Read Dagbani Zakaria 4 Bible Online

Zakaria 4 - Dagbani bible

Zakaria 4

¹Ka malaika so ŋun daa yɛli ma yɛtɔɣa maa daa lan labina nti neei ma kaman nir’ ni yi gbihiri ka bɛ neeg’ o shɛm la.

²O daa bɔhi ma mi, “Bɔ ka a lee nya?” Ka n garigi yɛli, “N nyala salima firilatamdigu, ka laa tam di zuɣu; ka firilanima ayopɔin tam di zuɣu; ka firila kam mali mihi ayopɔin,

³ ka olivi tih’ ayi ʒe m-baɣi firilatamdigu maa nudirigu mini nuzaa polo.”

⁴Ka n daa bɔhi malaika maa, “N dana, bɔ ka binyara ŋɔ lee wuhira.”

⁵Ka o gba ŋmaligi bɔhi ma, “A bi mi di ni nyɛ shɛli?” Ka n garigi yɛli, “N dana, m bi mi.”

⁶ Ka o daa yɛli ma, Yawɛ ŋun nyɛ Tɔbbihi Naa ŋɔ ni yɛli Zɛrubabɛl shɛm m-bɔŋɔ, “Pa a kpiɔŋ bee a yiko zuɣu, amaa n Shia yiko zuɣu.

⁷Nyin’ zoli din do Zɛrubabɛl tooni ŋɔ, bɔ n-lee nyɛ a? A ni leei tintani. O ni me Naawuni jɛmbu duu maa. Ka o yi ti zaŋ kuɣ’ shɛli din bahindi nyaaŋa pa di zuɣu, di saha maa niriba ni ti kuhi yɛli, ‘Naawuni nirilim galisiya, Naawuni nirilim galisiya.’ ”

⁸Ka Yawɛ daa lan yɛli ma,

⁹“Zɛrubabɛl n-sɔŋ Naawuni Jɛmbu Duu ŋɔ tampuɣili. O mi ni me li naai. Dina n-ni chɛ ka n niriba maa baŋ ni mani n-shiri tim a bɛ sanna.

¹⁰ Ŋuni n-lee ni ʒiɛm tuma biɛla dabisili? Niriba yi ti nya tammɛri bimbuɣisirigu Zɛrubabɛl nuu ni, di ni niŋ ba suhupiɛlli.” Firilanima ayopɔin la wuhirila Yawɛ nina din lihiri gindi dunia ŋɔ zaa la.

¹¹ Di saha ka m bɔhi malaika maa, “Ka bɔ ka olivi tih’ ayi din ʒe m-baɣi firilatamdigu la yaɣa ayi la mi lee wuhira?

¹²Ka olivi tiwula ayi shɛŋa din ʒe m-baɣi salima bimmulima ayi shɛŋa ni bɛ ni boori olivi kpam la mi gbinni lee nyɛla wula?”

¹³Ka o bɔhi ma, “A bi mi di ni nyɛ shɛli?” Ka n garigi yɛli, “N dana, m bi mi.”

¹⁴Ka o yɛli ma, “Dimbɔŋɔ maa wuhirila bɛ ni booi kpam bahi shɛb’ zuɣuri ni ni bɛ tum ŋun nyɛ dunia ŋɔ zaa Duuma la tuma.”