Read Dagbani Zakaria 7 Bible Online

Zakaria 7 - Dagbani bible

Zakaria 7

¹Naa Dairus nam dibu yuma anahi saha, ka Yawɛ daa zaŋ o yɛligu ti anabi Zakaria, gol’ so ŋun pah’ awɛi (ka bɛ boon’ o Kisilɛv)[2] la daba anahi dali.

²Bɛtɛlnima n-daa tim Sharɛza mini Rɛgɛmmɛlɛk m-pahi bɛ ninvuɣ’ shɛb’ zuɣu ni bɛ chaŋ ti suhi Yawɛ ka o zo ba nambɔɣu,

³ka bɔhi maligumaaniba min’ anabinima bɔhigu shɛli. Bɔhigu maa m-bɔŋɔ: “Ti na kul lom’ noli, ka fabilim’ gol’ so ŋun pah’ anu ni kaman ti ni pun niŋdi shɛm yuma pam din gari ŋɔ ni la?”

⁴Di saha ka Yawɛ ŋun nyɛ Tɔbbihi Naa ŋɔ daa yɛli ma,

⁵“Bɔhim’ tiŋgbɔŋ ŋɔ ni niriba maa mini maligumaaniba maa, ‘Yi ni daa lɔri noli, ka fabindi gol’ so ŋun pah’ anu ni mini gol’ so ŋun pah’ ayopɔin ni zaŋ ti paai yuun’ pisopɔin la, mani ka yi daa niŋdi lala tiri maa?

⁶Ka yi ni diri ka nyur’ la, pa yimaŋmaŋ’ kɔre ka yi niŋdi lala kura?’ ”

⁷Lala ka Yawɛ daa pun yɛl’ anabinim’ bɛn daŋ tooni na la, ka bɛ yɛli ya saha shɛli Jɛrusalɛm ni daa pali niriba ka tɔŋdi la. Ka di daa pala di fɔndi ni kɔŋkɔ ka niriba daa be, amaa di fɔndi maa zaŋ tabili di nudirigu polo mini wulinluhili polo zolɔna ni tinsi la zaa ni ka niriba daa be.

⁸Ka Yawɛ daa yɛli anabi Zakaria: Yɛlim’ ba,

⁹“Yawɛ ŋun nyɛ Tɔbbihi Naa ŋɔ ni yɛli shɛm m-bɔŋɔ: ‘Karimiya saria ka di doli yɛlimaŋli soli, ka niŋmiya nirilim, ka zomiya tab’ nambɔɣu.

¹⁰Di nahindiya pakoya mini kpibisi ni tinzunnim’ bɛn be yi ni zaŋ tabili nandaamba. Yi mi di lɔnya yi kpee zaɣ’ biɛɣu niŋbu nia yi suhuri ni.’ ”

¹¹Amaa ka bɛ daa niŋ tipawumli zaɣisi wumbu.

¹²Bɛ daa chɛ ka bɛ suhuri kpaŋmi kaman kuɣili la. Ka bɛ ni daa zaɣisi ni bɛ ku wum Yawɛ ŋun nyɛ Tɔbbihi Naa ŋɔ ni daa pun zaŋ o yɛligu n-ti anabinim’ shɛb’ bɛn daŋ tooni na yɛligu la zuɣu, ka Yawɛ ŋun nyɛ Tɔbbihi Naa ŋɔ suhu daa yiɣisi pam bahi bɛ zuɣu.

¹³Yawɛ ŋun nyɛ Tɔbbihi Naa ŋɔ yɛliya, “N ni daa kuhi boli ba ka bɛ zaɣisi wumbu shɛm, lala zuɣu ka bɛ daa kuhi boli ma ka n gba zaɣisi ba garigibu.

¹⁴Ka n daa niŋ kaman pɔhimʒiɛpiliŋga n-wurim ba kpɛhi tinzun tinsi ni din nyɛ luɣ’ shɛli so ni bi mi ba. Ka tiŋgbɔŋ ŋɔ daa kpalim zani dabari, ka so bi lan kpɛri di ni gariti yira. Lala ka di daa niŋ ka tiŋgban’ suŋ maa ti leei so ni ka shɛl’ ni.”