Read Dagbani Zakaria 8 Bible Online

Zakaria 8 - Dagbani bible

Zakaria 8

¹Ka Yawɛ ŋun nyɛ Tɔbbihi Naa ŋɔ daa lan yɛli ma,

²“Man’ Yawɛ ŋun nyɛ Tɔbbihi Naa ŋɔ yɛliya, ‘N suhu kul yɛla Ziɔn sɔŋbu zuɣu, ka n zabiri nyuli ni suhuyiɣisili di zuɣu.’ ”

³Yawɛ lan yɛli, “N ni lab’ Ziɔn na nti be Jɛrusalɛm, ka bɛ ni ti booni Jɛrusalɛm la yɛlimaŋli tiŋa; ka boli Yawɛ ŋun nyɛ Tɔbbihi Naa ŋɔ zol’ la, zoli din be kasi.”

⁴Yawɛ ŋun nyɛ Tɔbbihi Naa ŋɔ lan yɛli yaha, “Do’ kura mini paɣ’ kpamba bɛn dihiri jaaŋgbɛhi ni lan ʒiini Jɛrusalɛm puuni sɔnaŋgbanyɛhi.

⁵Ka bidibbihi mini bipuɣimbihi ni doli Jɛrusalɛm solɔri diɛmda.”

⁶Yawɛ ŋun nyɛ Tɔbbihi Naa ŋɔ lan yɛli, “Yinim’ ninvuɣ’ shɛb’ bɛn kpalim beni pumpɔŋɔ ŋɔ sani, di pa shɛli ka yi tɛhi ni yɛlli ŋɔ ku tooi nani, amaa man’ sani, di ni tooi nani.”

⁷Yawɛ ŋun nyɛ Tɔbbihi Naa ŋɔ lan yɛli yaha, “N ni yihi n niriba bɛn be tiŋgban’ shɛŋa din be wulimpuhili mini wulinluhili polo la

⁸n-zaŋ ba na ka bɛ ti be Jɛrusalɛm; ka bɛ nyɛ n niriba, ka n gba nyɛ bɛ Naawuni; ka n zaŋ ʒiɛyimtali mini wuntitali su ba.”

⁹Yawɛ ŋun nyɛ Tɔbbihi Naa ŋɔ lan yɛli, “Yinim’ bɛn wumdi yɛtɔɣ’ shɛŋa anabinim’ ni daa yɛli bɛ ni daa zali n jɛmbu duu ŋɔ tanzaa saha shɛl’ la wuhiya ni n jɛmbu duu maa ni me, kpaŋsimiya yimaŋa.

¹⁰Dama dabisi’ shɛŋa din daa daŋ di saha maa tooni puuni, so daa naan ku tooi bu ninsal’ paa bee n-zaŋ biŋkɔbigu tum tuun’ shɛli; ka so daa yi yɛn yi bee n-yɛn lab’ kpe na, bɛ mini bɛ dimnim’ kul varimi. Mani n-daa tuɣindi ba maa.

¹¹Amaa pumpɔŋɔ, n ku lan niŋ yinim’ bɛ kpalim ŋɔ kaman n ni daa niŋ kurimbuni ha niriba maa shɛm maa.” Man’ Yawɛ ŋun nyɛ Tɔbbihi Naa ŋɔ n-yɛli lala maa.

¹²“Sokam ni tooi bir’ o bimbira ni suhudoo. Tihi din wandi wala ni wali, ka tiŋgban’ ni bindira niŋ, ka saa gba mi pam. N ni chɛ ka n ninvuɣ’ shɛb’ bɛn kpalim ŋɔ di binyara ŋɔ zaa daanfaani.

¹³Yinim’ Judanim’ mini Izraɛlnima, tinzunnim’ daa yi maani ya la ansarisi n-turi tab’ yɛra, ‘Mbusim shɛli din bahi Judanim’ mini Izraɛlnim’ yol’ la lum’ a zuɣu.’ Amaa n ni tiligi ya, ka tinzunnim’ maa lan ŋmaligi yɛl’ taba, ‘Nyam’ alibarika shɛli tatabo Judanim’ mini Izraɛlnim’ ni nya la.’ Dinzuɣu di zɔri ya dabiɛm, kul maliya suhukpeeni.”

¹⁴Yawɛ ŋun nyɛ Tɔbbihi Naa ŋɔ lan yɛli, “Saha shɛli yi yaannim’ ni daa ku ma suli, ka n suhu yiɣisi la, n daa loya ni n ni chɛ ka zaɣ’ biɛɣu paai ba; ka daa bi taɣi n tɛha zaŋ chaŋ di polo.

¹⁵Amaa pumpɔŋɔ, n lo nia ni n niŋ alibarika niŋ Jɛrusalɛmnim’ mini Judanim’ ni, dinzuɣu di chɛliya ka yi suhuri zɔhira.

¹⁶Di ni naɣ’ simdi ni yi niŋ shɛm m-bɔŋɔ: Yɛlimiya tab’ yɛlimaŋli, ka karimiya saria ka di doli yɛlimaŋli soli, ka lan nyɛ din tiri suhudoo yi kootunim’ ni.

¹⁷Miriya ka yi lo tab’ zaɣ’ biɛɣu niŋbu nia yi suhuri ni. Yi mi miriya ka yi pɔri pɔri n-diri ʒiri shɛhira. N je dimbɔŋɔnim’ zaa ha.” Man’ Yawɛ n-yɛli lala maa.

¹⁸Yawɛ ŋun nyɛ Tɔbbihi Naa ŋɔ daa lan yɛli ma,

¹⁹“Man’ Yawɛ ŋun nyɛ Tɔbbihi Naa ŋɔ yɛliya: Gol’ so ŋun pah’ anahi mini ŋun pah’ anu ni ŋun pah’ ayopɔin ni ŋun pahi pia puuni nolɔbo la zaa ha ni ti leela suhupiɛlli saha Judanim’ sani. Dinzuɣu yumiya yɛlimaŋli mini suhudoo.”

²⁰Yawɛ ŋun nyɛ Tɔbbihi Naa ŋɔ lan yɛli, “Saha kanna ka niriba ni ti yi tinsi pam ni kana,

²¹ka tin’ yin’ nim’ ni ti yɛli tin’ shɛlinima, ‘Ti chanimi ni ti ti jɛm Yawɛ ŋun nyɛ Tɔbbihi Naa ŋɔ, ka suh’ o ka o niŋ alibarika niŋ ti ni. Kamiyana ka ti mini ya chaŋ.’

²²Niriba pam mini zuliya shɛb’ bɛn mali yiko pam ni ti ka Jɛrusalɛm na nti jɛm Yawɛ ŋun nyɛ Tɔbbihi Naa ŋɔ, ka suh’ o ka o niŋ alibarika niŋ bɛ ni.”

²³Yawɛ ŋun nyɛ Tɔbbihi Naa ŋɔ lan yɛli yaha, “Di saha maa tinzun’ tiŋ’ kam niriba pia ni ti kana nti ʒe n-gbaai Yɛhudia nira binyɛrigu ka yɛli, ‘Chɛ ka ti dol’ a kul’ a ya, dama ti wumya ni Naawuni be yi sani.