Read Dagbani Malaki 1 Bible Online

Malaki 1 - Dagbani bible

Malaki 1

¹Anabitali yɛtɔɣ’ shɛŋa Yawɛ ni daa zaŋ ti Malaki ni o yɛli Izraɛlnima.

²Yawɛ yɛliya, “N yuri ya.” Amaa ka yi bɔhira, “Wula ka a lee yuri ti?” Yawɛ yɛliya, “Iso daa pala Yaakubu mabia? Di zaa yoli, n daa yuri Yaakubu,

³ amaa ka je Iso. N daa chɛ ka o tiŋ’ din be zoya ni la leei dabari, ka o tiŋgbani leei tiŋgban’ nɛli din nyɛ yɔbahi biɛhigu shee.”

⁴Ɛdomnim’ yi yɛli, “Bɛ daa wurim ti tinsi, amaa ti ni lab’ me li.” Yawɛ ŋun nyɛ Tɔbbihi Naa ŋɔ yɛliya, “Bɛ ni tooi me, amaa n kul ni wurindi li hal ka niriba ti bol’ li tiŋgban’ biɛɣu ni Yawɛ ni je suli niŋ ninvuɣ’ shɛba sahakam.”

⁵ Yimaŋmaŋ’ nina ni ti nya dimbɔŋɔ, ka yɛli, “Yawɛ galisiya Izraɛl tiŋgbɔŋ ni zaŋ tabili tinduya ni.”

⁶“Bidibiga tir’ o ba jilima, ka dabili mi tir’ o dan’ jilima. Ka n yi nyɛ yi ba n jilima din simdi ma maa lee be ya? Ka n yi nyɛla yi dana, jilima din simdi ma maa lee be ya?” Yawɛ ŋun nyɛ Tɔbbihi Naa ŋɔ n-yɛli lala maa. “Yinim’ maligumaaniba ʒiɛm n yuli. Yi bɔhira, ‘Wula ka ti lee ʒiɛm a yuli?’

⁷Yi zaŋdi bindir’ shɛŋa din saɣim maani sara n sara maligu bimbina zuɣu. Yi bɔhira, ‘Wula ka ti lee saɣim li?’ Yi tɛhiya ni nira ni tooi ʒiɛm Yawɛ bindira dibu shee.

⁸ Yi yi ti zaŋ biŋkɔb’ zoomba mali sara, pa gala ka yi niŋ maa? Ka yi yi zaŋ biŋkɔb’ wɔbisi bee biŋkɔb’ barinim’ mali sara, pa gala ka yi niŋ maa? Yi yi zaŋ ba ti yi Gomna, o nini ni tiɣi ya bee o ni niŋ ya nirilim?” Yawɛ ŋun nyɛ Tɔbbihi Naa ŋɔ n-yɛli lala maa.

⁹Pumpɔŋɔ suhimiya Naawuni ka o zo ti nambɔɣu ka niŋ ti nirilim. Yinima n-nyɛ bɛn mali taali. O ni niŋ yi so nirilim? Yawɛ ŋun nyɛ Tɔbbihi Naa ŋɔ n-yɛli lala maa.

¹⁰“N di yuya ni yi ni so kpari Naawuni jɛmbu duu dunoya, ka yi ku lan mali buɣim pa n sara maligu bimbini zuɣu ka di ka buchi. N nini bi lan tiɣi ya, ka n ku lan deei yi ni maani sara shɛli tiri ma.” Yawɛ ŋun nyɛ Tɔbbihi Naa ŋɔ n-yɛli lala maa.

¹¹“Dama wulimpuhili zaŋ hal ni wulinluhili, n yuli nyɛla din tibisa zuliya kam sani, ka bɛ kul tuɣindi tulaale zim ka maani sara din be kasi tiri ma luɣilikam, dama n yuli nyɛla din tibisa zuliya kam sani.” Yawɛ ŋun nyɛ Tɔbbihi Naa ŋɔ n-yɛli lala maa.

¹²“Amaa yinim’ ta li daɣiri yi ni yɛli ni ti Duuma bindirigu shee bi be nyam, ka di bindirigu maa nyɛ bɛ ni ni tooi ʒiɛm shɛl’ la zuɣu.

¹³Yi kul yɛra, ‘Ti nyee nyɔniya,’ ka naɣiri yi nyɛhi niŋdi ma. Yi zaŋdi yi ni fa biŋkɔb’ shɛb’ bee biŋkɔb’ gbariti bee biŋkɔb’ barinim’ na ti maani sara tiri ma, yi tɛhiya ni n ni dee’ li yi sani?” Yawɛ n-yɛli lala maa.

¹⁴“Noli ni di ninvuɣ’ so ŋun ŋariti m mini niriba, ka nyɛ ŋun mali biŋkɔb’ lɔɣu o biŋkɔbbaligu ni, ka po pɔri ni o ni zaŋ o ti ma, amaa ka ti zaŋla biŋkɔb’ so ŋun mali daŋa mali sara ti man’ o Duuma, dama n nyɛla Natitali ka zuliya kam luri n yuli sizuura.” Yawɛ ŋun nyɛ Tɔbbihi Naa ŋɔ n-yɛli lala maa.