Read Dagbani Malaki 2 Bible Online

Malaki 2 - Dagbani bible

Malaki 2

¹“Pumpɔŋɔ, yinim’ maligumaaniba, yi zaligu m-bɔŋɔ.

²Yi yi ku gbilisi tibili wum ka ku zaŋ li niŋ yi suhuri ni n-tiri ma jilima, dindina, n ni yɛli noli niŋ yi daalibarikanim’ ni. Yɛlimaŋli m pun yɛli noli niŋ di ni, dama yi bi zaŋ li niŋ yi suhuri ni.

³N ni darigi yi bihi tibili, ka zaŋ yi sara biŋkɔbiri bindi ʒe yi nina ni, ka kari ya n sani.

⁴ Dinzuɣu baŋmiya ni mani n-zali ya zaligu ŋɔ ni di chɛ ka n ni daa lo Lɛvi alikauli shɛl’ la zani.” Yawɛ ŋun nyɛ Tɔbbihi Naa ŋɔ n-yɛli lala maa.

⁵ “N ni daa lo o alikauli shɛli daa nyɛla nyɛvili mini alaafee alikauli din nyɛ n ni daa zaŋ shɛli ti o ka di wuhiri jilima tibu, ka o daa tiri ma jilima ka luri n yuli sizuura la.

⁶Yɛlimaŋli wuhibu daa be o nol’ ni, ka galimi yɛtɔɣa daa ka o nol’ ni. O daa kul doli ma mi ni nimmaŋtali mini biɛrisuntali, ka daa yihi niriba pam tuumbiɛri tumbu ni.

⁷Dama di simdi ni yɛm yɛtɔɣa yiri maligumaana nol’ ni na, ka niriba ni bɔr’ o wuhibu, dama o nyɛla Yawɛ ŋun nyɛ Tɔbbihi Naa ŋɔ tumo.

⁸“Amaa yinim’ birigimi kpe yɔɣu ka chɛ soli, ka yi wuhibu chɛ ka niriba pam tuui, yi saɣim n ni daa lo Lɛvi alikauli shɛli maa.” Yawɛ ŋun nyɛ Tɔbbihi Naa ŋɔ n-yɛli lala maa.

⁹“Dinzuɣu n ni chɛ ka yi nya filiŋ, ka niriba zaa ʒiɛm ya ka filim ya yi ni bi doli n soya, amaa ka chɛ ka niriba gaŋbu be yi wuhibu ni la zuɣu.”

¹⁰Ti zaa ba pala ba yino? Pa Naawuni yino n-nam ti? Ka wula ka ti bi ʒe tab’ yim, ka saɣindi Naawuni ni daa lo ti yaannim’ alikauli shɛli maa?

¹¹Judanim’ bi ʒe yim, ka din chihiri kul tumdi Izraɛl mini Jɛrusalɛm puuni. Dama Judanim’ saɣim Yawɛ ni yuri o jɛmbu du’ shɛl’ la, ka kpuɣi tinzunnim’ bɛn jɛmdi buɣa bipuɣinsi.

¹²Yawɛ ni yihi ninvuɣ’ so ŋun niŋ lala Yaakubu zuliya ni, ka o ku lan di shɛhira bee n-garigi yɛtɔɣ’ shɛli bee n-zaŋ pina na ti ti Yawɛ ŋun nyɛ Tɔbbihi Naa ŋɔ.

¹³Ka yi lan niŋdi dimbɔŋɔnim’ pahira. Yi kuhira, ka fabinda, ka yi nintam tɛli Yawɛ sara maligu bimbini, o ni bi lan lihi nya yi sara bee n-deeri li yi nuu ni ni yurilim la zuɣu.

¹⁴Yi bɔhira, “Wula ka o bi lan deeri li?” Dama Yawɛ n-daa di a min’ a ni daa kpuɣi paɣ’ so a bipolitali ni shɛhira, hal paɣ’ maa ni kul nyɛ a mini ŋun be, ka lan nyɛ a daalikauli paɣ’ maa zaa yoli, a bi ʒe o yim.

¹⁵Pa Naawuni yino maa n-nam paɣ’ maa? Niŋgbina mini shia maa zaa nyɛla o dini. Ka bɔ ka o lee bɔra? O bɔri ni Naawuni biɛhigu be ti bihi ni. Dinzuɣu gbibiya yimaŋa, ka di chɛn ya ka so bi ʒe o ni daa kpuɣi paɣ’ so o bipolitali ni yim.

¹⁶Dama Yawɛ ŋun nyɛ Izraɛl Naawuni ŋɔ yɛliya “N je paɣ’ yihibo, n je ni so niŋ o paɣa kiŋkansi. Yawɛ ŋun nyɛ Tɔbbihi Naa ŋɔ n-yɛli lala maa. Dinzuɣu miriya ka yi nyɛ bɛn bi ʒe yim.”

¹⁷Yi chɛ ka yi yɛtɔɣa nyɔni Yawɛ nyee. Amaa ka yi bɔhira, “ Wula ka ti lee chɛ ka o nyee nyɔni?” Yi ni yɛra, “Ŋunkam tum zaɣ’ biɛɣu, di nyɛla din viɛli Yawɛ sani, ka nyɛ o ni bɔri shɛl’ la.” Bee yi ni bɔhira, “Naawuni ŋun nyɛ yɛlimaŋlilan’ maa lee be ya la?”