Read Dagbani Matiu 1 Bible Online

Matiu 1 - Dagbani bible

Matiu 1

¹Yisa Masia ŋun daa yi Naa Dauda ŋun nyɛ Ibrahimma yaaŋa la zuliya ni na dɔɣirikpamba ni nyɛ shɛba m-bɔŋɔ:

²Ibrahimma daa nyɛla Yisahaku ba, ka Yisahaku nyɛ Yaakubu ba, ka Yaakubu mi nyɛ Juda min’ o tizɔbihi ba.

³Ka Juda daa nyɛ o paɣ’ Tɛma bihi Pɛrɛz mini Zɛra ba, ka Pɛrɛz nyɛ Hɛzirɔn ba, ka Hɛzirɔn mi nyɛ Ram ba,

⁴Ka Ram daa nyɛ Aminadab ba, ka Aminadab nyɛ Nashɔn ba, ka Nashɔn mi nyɛ Salimɔn ba.

⁵Ka Salimɔn daa nyɛ o paɣ’ Reehab bia Bɔaz ba, ka Bɔaz nyɛ o paɣ’ Rut bia Obɛd ba, ka Obɛd nyɛ Jɛsi ba,

⁶ka Jɛsi mi nyɛ Naa Dauda ba. Naa Dauda daa nyɛla o paɣ’ ŋun daa nyɛ Yuria paɣa la bia Sulemaana ba;

⁷ka Sulemaana daa nyɛ Rɛhɔbɔam ba, ka Rɛhɔbɔam nyɛ Abija ba, ka Abija mi nyɛ Ɛsa ba.

⁸Ka Ɛsa daa nyɛ Jɛhɔshafat ba, ka Jɛhɔshafat nyɛ Jɔram ba, ka Jɔram mi nyɛ Yuzaia ba.

⁹Ka Yuzaia daa nyɛ Jɔtam ba, ka Jɔtam nyɛ Ahaz ba, ka Ahaz mi nyɛ Hɛzɛkia ba.

¹⁰Ka Hɛzɛkia daa nyɛ Manaasa ba, ka Manaasa nyɛ Ɛmɔn ba, ka Ɛmɔn mi nyɛ Jɔsia ba.

¹¹ Ka Jɔsia daa nyɛ Jɛkɔnia min’ o tizɔbihi ba, bɛ ni daa gbahi ba chaŋ Babilɔn saha shɛl’ la.

¹²Bɛ ni daa gbahi ba chaŋ Babilɔn maa nyaaŋa ka Jɛkɔnia daa dɔɣi Shialtiɛl, ka Shialtiɛl mi nyɛ Zɛrubabɛl ba.

¹³Ka Zɛrubabɛl daa nyɛ Abiiud ba, ka Abiiud nyɛ Ɛliakim ba, ka Ɛliakim mi nyɛ Azɔr ba.

¹⁴Ka Azɔr daa nyɛ Zadok ba, ka Zadok nyɛ Akim ba, ka Akim mi nyɛ Ilaiud ba.

¹⁵Ka Ilaiud daa nyɛ Ɛliɛza ba, ka Ɛliɛza nyɛ Matan ba, ka Matan mi nyɛ Yaakubu so ba.

¹⁶Ka Yaakubu maa daa nyɛ Yisifu ba; ka Yisifu mi daa nyɛ Mariama ŋun daa dɔɣi Yisa so bɛ ni booni Masia la yidana.

¹⁷Dinzuɣu Ibrahimma ʒiɛmani zaŋ ti paai Naa Dauda ʒiɛmani saha daa nyɛla dɔɣirikpamba pinaanahi; ka Naa Dauda ʒiɛmani zaŋ ti paai bɛ ni daa gbahi ba chaŋ Babilɔn ʒiɛman’ shɛl’ ni la saha daa nyɛ dɔɣirikpamba pinaanahi; ka bɛ ni daa gbahi ba chaŋ Babilɔn ʒiɛman’ shɛl’ ni la zaŋ ti paai Yisa Masia ʒiɛmani saha mi daa nyɛ dɔɣirikpamba pinaanahi.

¹⁸Bɛ ni daa dɔɣi Yisa Masia shɛm m-bɔŋɔ: Saha shɛli bɛ ni daa zaŋ o ma Mariama ti Yisifu ka na bi kulis’ o la, ka bɛ ti nya o ka o malila pua Naawuni Shia Kasi yiko ni.

¹⁹ O yidana Yisifu daa nyaŋ ninvuɣ’ suŋ pam, dinzuɣu ka o daa bi bɔri ni o yihi li palɔni n-dihi Mariama vi, amaa ka daa lee lo ni o ku lan kpuɣ’ o.

²⁰O ni daa na kul tɛhiri di yɛla maa, ka ti Duuma malaika ka o sanna zahindi ni nti yɛl’ o, “Nyin’ Yisifu ŋun nyɛ Naa Dauda yaaŋa ŋɔ, di zɔri dabiɛm ni a chɛ ka bɛ kulisi Mariama a yiŋ’ na, dama o ni mali pu’ shɛli maa yila Naawuni Shia Kasi yiko ni na.

²¹ O ni ti dɔɣi bidibiga, ka a bol’ o yuli Yisa, dama o ni ti tilig’ o niriba bɛ daalahichi ni.”

²²Dimbɔŋɔ zaa daa niŋmi ni ti Duuma ni daa chɛ ka anab’ so yɛli shɛm la niŋ pali. O ni daa yɛli shɛm maa m-bɔŋɔ.

²³ “Paɣipiɛl’ so ni ti niŋ pua n-dɔɣi bidibiga, ka bɛ ti bol’ o yuli Imanuɛl.” Di gbinni nyɛla, “Naawuni be ti sani.”

²⁴Saha shɛli Yisifu ni daa neei gom ni ka o niŋ kaman ti Duuma malaika ni daa yɛl’ o shɛm maa n-chɛ ka bɛ kulis’ o na.

²⁵ Amaa o daa bi baŋ o ni paɣitali hal ka o ti dɔɣ’ o paɣisar’ dɔɣim bidibiga; ka Yisifu daa bol’ o yuli Yisa.