Read Dagbani Matiu 10 Bible Online

Matiu 10 - Dagbani bible

Matiu 10

¹Ka Yisa daa ti bol’ o nyaandoliba pinaayi la na nti niŋ ba yiko ni bɛ kariti alizin’ biɛri niriba zuɣu bahira, ka tibiri dɔro balibu kam mini dɔr’ biɛri balibu kam ni mali ninvuɣ’ shɛba.

²O tuumba pinaayi maa yuya m-bɔŋɔ: Saimɔn ŋun yuli lan booni Pita la min’ o tizo Anduru ni Zɛbidii bihi Jeemsi min’ o tizo Jɔn ni

³Filip mini Baatolomiu ni Tomas ni Matiu ŋun daa nyɛ farigudeera la ni Alifius bia Jeemsi ni Taddius ni

⁴Saimɔn ŋun daa nyɛ bɛn bɔri ni bɛn’ Izraɛlnim’ su bɛmaŋ’ la ni yino ni Judas Isikariɔt ŋun daa ti yi Yisa nyaaŋa la.

⁵Ka Yisa daa tim tuumba pinaayi maa ka kpahi bɛ zuɣu ni yɛli, “Miriya ka yi chaŋ bɛn pa Yɛhudianim’ sani, yi mi di kpɛnya Samarianim’ tin’ shɛl’ ni,

⁶amaa chamiyala Izraɛlnim’ bɛn bɔrigi kaman piɛri la sani.

⁷Yi yi chana, yin’ yihimiya waazu yɛra, ‘Alizanda nam mirina.’

⁸Ka tibimiya barinima, ka neemiya kpiimba, ka chɛliya ka kɔnsi kpaŋda, ka karimiya alizin’ biɛri bahira. Yi dee’ li la yoli, yi gba timiya li yoli.

⁹Di ʒin ya liɣiri din nyɛ salima bee anzinfa, hal di zaŋya kɔbo gba n-niŋ yi liɣiri kolibihi ni

¹⁰ bee n-ʒin ya adiikunima n-chaŋ yi chandi maa bee n-yɛnya daliyanima ayiyi; yi mi di piriya namda bee n-gbibi jaaŋgbɛhi, dama tumtumda kam simdi ni bɛ ti o bindirigu.

¹¹“Yi yi ti kpe fɔntiŋ’ ni bee tiŋkpaŋa, yin’ bɔhimiya n-nya ninvuɣ’ chirichi n-kpe o yiŋa m-be nimaani hal nti yi tiŋ’ maa ni.

¹²Yi yi ti kpe yil’ shɛli, yin’ puhimiya ba puhiri suŋ.

¹³Yili maa yi nyɛla yil’ chirichi, yin’ chɛliya ka yi daalibarika kpalim di ni; amaa di yi pala yil’ chirichi, yin’ chɛliya ka yi daalibarika kpalim yi sani.

¹⁴ Ka so yi ti bi deei ya bee n-zaɣisi yi yɛligu wumbu, yi yi ti yɛn yi yili maa ni bee di tiŋ’ maa ni, yin’ pihimiya yi napɔna taŋkpaɣu bahi di zuɣu.

¹⁵ Yɛlimaŋli ka n yɛri ya, zaadali Sɔdomnim’ mini Gomɔranim’ azaaba nyabu ni ti so tiŋ’ maa nim’ dini.”

¹⁶ Yisa daa lan yɛli ba, “Nyamiya, n tim ya mi kaman piɛri ni be kunduna sunsuuni shɛm la; dinzuɣu maliya yɛm kaman tinvura, ka benya baalim kaman ŋmana la.

¹⁷Miriya daadamnima! Bɛ ni ti gbahi ya tahi ʒiishɛhi, ka fiɛbi ya Yɛhudianim’ jɛmbu duri ni,

¹⁸ka zaŋ ya tahi gomnanim’ mini nazuɣuri tooni n zuɣu, ka yi ti niŋ n shɛhiranima bɛ mini bɛn pa Yɛhudianim’ sani.

¹⁹Dinzuɣu bɛ yi ti gbahi ya tahi saria karibu shee, yin’ di chɛliya ka yi suhuri zɔhiri yi ni ti yɛn yɛli shɛm bee n-tɔɣisi shɛm zuɣu; di saha maa yi ni ti baŋ yi ni yɛn yɛli shɛm,

²⁰ dama pa yinima nti yɛn tɔɣisi, amaa di ti yɛn nyɛla yi Ba Naawuni Shia n-yɛn be yi ni tɔɣisira.

²¹ “Di saha nir’ ni ti yi o mabia nyaaŋa n-chɛ ka bɛ ku o; ka doo ni ti yi o bia nyaaŋa n-chɛ ka bɛ ku o, ka bihi gba ti zaɣisi bɛ banim’ mini bɛ manima, ka zaŋ ba puhi kubu.

²² Ka sokam ni ti jɛn ya n yuli zuɣu. Amaa ŋunkam ti niŋ suhukpeeni hal ni wahala ŋɔ bahigu ni ti tiligi.

²³Bɛ yi ti muɣisi ya tin’ shɛl’ ni, yin’ yimiya ni n-taɣi tiŋa; dama yɛlimaŋli ka n yɛri ya, yi na ku chaŋ tuui Izraɛl tinsi zaa ka Daadam Bia labina.

²⁴ “Karimbia bi garit’ o karimba; dabili mi bi garit’ o duuma.

²⁵ Di simdi ni karimbia bemi kaman o karimba; ka dabili mi be kaman o duuma. Ka bɛ yi zaŋ alizin’ biɛri naa yuli Biilzibul m-boli yil’ yidana, wula ka bɛ lee ni bol’ o yiŋnim’ bɛna?”

²⁶ Yisa daa lan yɛla ba yaha, “Dinzuɣu di zɔriya ba dabiɛm, dama binshɛɣu kani din sɔɣiya ka ti ku yi palo, binshɛɣu mi kani m-be ashilɔni ka bɛ ti ku baŋ li.

²⁷N ni yɛli ya shɛli zibisim ni, yɛlimiya li neesim ni; ka yi ni wum shɛli ashilɔni, yin’ molimiya li gili luɣilikam.”

²⁸“Di zɔriya bɛn ni tooi ku daadam ka ku tooi ku o shia; amaa zomiyala Naawuni ŋun ni tooi zaŋ daadam niŋgbuŋ min’ o shia zaa niŋ buɣim ni la.”

²⁹Ka bɔhi ba, “Jahinjɛya ayi bi kɔhirila siidi yini? Ka bɛ ni yino mi ku lu tiŋa ka di pala yi Ba Naawuni yubu ni.

³⁰Hal yi zabiri zaa mali kalinli.

³¹Dinzuɣu di chɛliya ka yi suhuri zɔhira; yi mali buchi pam gari jahinjɛya.”

³²Yisa daa lan yɛli, “Ŋunkam ʒe n nyaaŋa niriba ni, n gba ni ti ʒe dilan’ nyaaŋa m Ba Naawuni ŋun be alizanda ni ŋɔ sani;

³³ amaa ŋunkam zaɣisi ma niriba ni, n gba ni ti zaɣisi dilana m Ba Naawuni ŋun be alizanda ni ŋɔ sani.”

³⁴“Di tɛhiya ni n kamina ni n ti ti dunia ŋɔ nim’ suhudoo; m bi kamina ni n ti ti suhudoo, amaa takɔbi ka n tahina.

³⁵N kamina ni n ti tuɣili bidibiga min’ o ba ni bipuɣiŋga min’ o ma ni paɣa min’ o yidana ma;

³⁶ ka nir’ yiŋnim’ ni nyɛla o dimnima.

³⁷“Ka ŋun yur’ o ba bee o ma gari ma, o bi simdi ni o doli ma; ka ŋun yur’ o bidibiga bee o bipuɣiŋga gari ma, o bi simdi ni o doli ma,

³⁸ ka ŋun mi bi kpuɣ’ o dapulli m-buɣi doli ma gba bi simdi ni o doli ma.

³⁹ Ka ŋunkam tiligir’ o nyɛvili ni ti kɔŋ li, ka ŋunkam mi kɔŋd’ o nyɛvili n zuɣu ni ti lan nya li.”

⁴⁰ O daa lan yɛli yaha, “Ŋunkam deeri ya deerila mani, ka ŋunkam deeri ma deerila ŋun tim ma na.

⁴¹Ka ŋunkam deeri anabi o ni nyɛ anabi zuɣu ni ti deeg’ anabi laara; ka ŋunkam deeri wuntizɔra o ni nyɛ wuntizɔra zuɣu ni ti deei wuntizɔra laara.

⁴²Ka ŋunkam mi niŋ hal ko’ mahim biɛla ti n nyaandoliba ni yino, hal ŋun pɔri bɛ ni gba, o ni nyɛ n nyaandol’ zuɣu, yɛlimaŋli ka n yɛri ya, o ti ku kɔŋ di laara.”