Read Dagbani Matiu 11 Bible Online

Matiu 11 - Dagbani bible

Matiu 11

¹Yisa ni daa wuh’ o nyaandoliba pinyaayi maa bɛ ni yɛn niŋ shɛm naai, o daa yiɣisimi n-chaŋ tin’ shɛŋa din miri nimaani nti wuhiri niriba ka yihiri ba waazu.

²Jɔn Baptaizira daa bela sarika ni, ka wum Yisa Masia tuma yɛla, ka daa tim o nyaandoliba

³ni bɛ ti bɔh’ o, “Nyini n-nyɛ ŋun ti yɛn kana la bee ti na yulim’ dilan’ soli?”

⁴Ka Yisa yɛli ba, “Labimiya nti yɛli Jɔn yi ni nya ka wum shɛm:

⁵ Zoomba nina neera, ka wɔbisi chana, ka kɔnsi tibiri kpaŋda, ka tikpiranim’ wumda, hal ka kpiimba gba neeri kum ni, ka lahibal’ suŋ waazu mi yihiri tiri tarimba.”

⁶Ka ŋmaligi yɛli, “Ŋunkam suhu bi miligi n zuɣu mal’ alibarika!”

⁷Jɔn nyaandoliba maa ni daa kuli naai, ka Yisa piligi tɔɣisiri salo maa Jɔn yɛla ka bɔhiri ba, “Bɔ ka yi daa lee chaŋ tiŋgban’ nɛli ni ni yi ti nya la? Gbiŋgban’ shɛli pɔhim ni ʒɛra?

⁸Ka bɔzuɣu ka yi daa chaŋ? Nira ŋun bɔbi ka yi daa chaŋ ni yi ti nya? Nyamiya, bɛn bɔbiri bela nanim’ yinsi.

⁹Ka bɔzuɣu ka yi daa chaŋ? Anabi ka yi daa chaŋ ni yi ti nya? Yɛlimaŋli ka n yɛri ya, hal o gari anabi gba.

¹⁰ Ŋuna n-nyɛ bɛ ni daa sab’ yɛli so yɛla ni Naawuni yɛliya, ‘N tumo m-bɔŋɔ; n ni tim o ka o daŋ a tooni nti mal’ a chandi maa soli ti a.’

¹¹Yɛlimaŋli ka n yɛri ya, Jɔn Baptaizira gari paɣ’ ni dɔɣi sokam, amaa ŋun pɔri alizanda nam ni galisi gar’ o.

¹²Jɔn saha zaŋ kana zuŋɔ, bɛn suhuri ye alizanda nam ni kpɛbu zuɣu kul kabirimi chani ni bɛ ti zaŋ kpiɔŋ kpe di ni.

¹³ Naawuni zaligunim’ min’ anabinim’ yɛligu daa pun benimi hal ka Jɔn ti kana.

¹⁴ Ka yi yi saɣi, ŋuna n-nyɛ Anabi Ilaija so ŋun yɛn kana la.

¹⁵Ŋun mali tibili, ŋun’ wumma!”

¹⁶Ka Yisa daa lan bɔhi, “Bimbɔ ka n lee yɛn zaŋ ŋ-ŋmahindi ʒiɛmani ŋɔ niriba? Bɛ ŋmanila bihi bɛn ʒi daa ni m-booni tab’ yɛra:

¹⁷‘Ti piɛb’ yuhi niŋ ya, ka yi zaɣisi waa wabu; ka kumda, ka yi bi fabinda.’

¹⁸Jɔn Baptaizira daa kana, ka o mini niriba ti bi laɣindi diri ka nyura, ka bɛ yɛli ni alizin’ biɛɣu n-ʒi o zuɣu.

¹⁹Ka Daadam Bia ti kana, ka o mini niriba laɣindi diri ka nyura ka bɛ yɛra, ‘Nyama, ŋun’ kpiri kum pam, ka lan nyɛ danyura mini farigudeeriba ni alahichinim’ zo.’ Amaa Naawuni yɛm wuhiri dimaŋ’ la di tumtumsa ni.”

²⁰Di saha maa ka Yisa daa piligi galindi tin’ shɛŋa nim’ bɛn daa nya o daalahiziba tuun’ kar’ shɛŋa o ni daa tum bɛ tinsi ni ka bɛ bi niŋ tuuba la.

²¹ Yisa daa yɛli ba, “Mbusim be yinim’ Kɔrazinnim’ mini Bɛtisaidanim’ zuɣu, dama tuun’ kar’ shɛŋa din daa tum yi tinsi maa ni la yi di daa tumla Taai mini Sidɔn, bɛn’ daa naan pili buri, ka buɣi tampiligim n-niŋ tuuba yom.

²²Amaa n yɛri ya mi ni zaadali Taainim’ mini Sidɔnnim’ azaaba nyabu ni ti so yi dini.

²³ Ka yinim’ Kapɛriniumnima, yi mi bɔri ni yi duhila yimaŋa hal ni Naawuni nam ʒiishee? Naawuni ni ti siɣisi ya kpiimba biɛhigu shee; dama tuun’ kar’ shɛŋa din daa tum yi tinsi maa ni la yi di daa tumla Sɔdom, di naan na kpalim ʒiɛya hal ni zuŋɔ.

²⁴ Amaa n yɛri ya mi ni zaadali Sɔdomnim’ azaaba nyabu ni ti sɔ yi dini.”

²⁵Di saha ka Yisa daa yɛli, “M Ba Naawuni, nyin’ ŋun su alizanda mini dunia ŋɔ, m paɣir’ a, dama a zaŋ dimbɔŋɔnima n-sɔɣi yɛnnim’ mini baŋdiba, ka lee kahigi li wuhila biliɛri;

²⁶yɛlimaŋli m Ba, dama lala n-viɛl’ a sani.”

²⁷ Ka lan yɛli niriba, “M Ba Naawuni zaŋ binshɛɣukam zaa niŋ n nuu ni. Ka so ʒi Naawuni Bia maa naɣila o Ba maa m-mi o; ka so mi ʒi Ba maa naɣila o Bia maa m-mi o m-pahi Bia maa ni kahigi Ba maa wuhi so.”

²⁸Ka ŋmaligi yɛli, “Yinim’ bɛn zaa tumdi tuma ka di fukumsi ʒi’ tibisa ʒi yi zuɣu, kamiya n sanna, ka n ti tin ya vuhim.

²⁹ Kamiya n sanna nti zaŋ n naɣikɔra dapua ye n-zaŋ yimaŋ’ tabili ma m-bɔhim biɛhigu n sani ka nya vuhim; dama n nyɛla tarima zaa,

³⁰ka n naɣikɔra dapua yɛbu bi to, ka n ʒili mi bi tibisa.”