Read Dagbani Matiu 17 Bible Online

Matiu 17 - Dagbani bible

Matiu 17

¹ Di daba ayɔbu nyaaŋa ka Yisa daa zaŋ Pita mini Jeemsi ni Jɔn ŋun daa nyɛ Jeemsi maa mabia la pah’ omaŋ’ zuɣu n-du zo’ shɛli din du pam zuɣu bɛ kɔŋko.

²Bɛ nini maa ni ka Yisa niŋgbuŋ biɛhigu daa taɣi, ka o ninni nyaɣisiri kaman wuntaŋ’ la, ka o binyɛrigu mi paligi paratɛte kaman gol’ la;

³ka bɛ daa nya ka Anabi Musa mini Anabi Ilaija puhi zan’ o sani ka bɛ min’ o tɔɣisiri yɛtɔɣa.

⁴Ka Pita yɛli Yisa, ‘N Duuma, di viɛli ni ti be kpe. A yi di saɣi, n naan ti suɣa ata: A zaɣ’ yini; Anabi Musa zaɣ’ yini, Anabi Ilaija gba zaɣ’ yini.”

⁵ Pita noli daa na bi lu tiŋa ka sagban’ piɛlli dii sirigina ti lim ba, ka bɛ wum ka kukol’ shɛli yɛri sagbani maa ni, “M Biyurigu m-bɔŋɔ; n nin’ ni tiɣi so pam m-bala; wummiy’ o noli!”

⁶Yisa nyaandoliba maa ni daa wum lala maa ka dabiɛm kpe ba, ka bɛ gbani n-zaŋ bɛ nini kpa tiŋa.

⁷Ka Yisa daa chaŋ ti shihi ba ka yɛli ba, “Yiɣisimiya! Di zɔriya dabiɛm!”

⁸Bɛ ni daa kul kpuɣ’ bɛ zuɣuri zuɣusaa, bɛ bi lan nya so n-naɣ’ pahila Yisa ko.

⁹Bɛ ni daa yi zoli maa zuɣu n-siɣirina ka Yisa kpahi bɛ zuɣu ni yɛli, “Miriya ka yi yɛli so yi ni nya shɛli ʒii maa ni maa yɛla, faashee Daadam Bia kum ni neebu nyaaŋa.”

¹⁰ Ka o nyaandoliba maa daa bɔh’ o, “Mami Naawuni zaligubaŋdiba yɛliya ni Anabi Ilaija n-yɛn daŋ kandina?”

¹¹Ka Yisa garigi yɛli ba, “Di shiri simdi ni Anabi Ilaija daŋna nti mali binshɛɣukam zali di zaani.

¹² Amaa n yɛri ya mi ni Anabi Ilaija pun kana, ka bɛ daa lee bi baŋ o, ka daa niŋ o bɛ suhu ni yu shɛm. Lala ka Daadam bia gba yɛn di wahala bɛ nuu ni.”

¹³Di saha maa ka o nyaandoliba maa daa baŋ ni Jɔn Baptaizira yɛla ka o yɛri ba maa.

¹⁴Yisa min’ o nyaandoliba ata maa daa kana ti paala salo, ka bɛ ni do’ so daa kana ti damdi Yisa tooni yɛli,

¹⁵“N Duuma, zom’ m bidibiga ŋɔ nambɔɣu! O nyɛla kpilinkpihilana, ka di nahind’ o pam; di kul’ luhir’ o la waawaayili, ka o luri buɣim ni, shɛlini mi kom ni.

¹⁶Ka n zaŋ o tah’ a nyaandoliba ŋɔ sanna, ka bɛ bi tooi tib’ o.”

¹⁷Ka Yisa garigi yɛli, “Yinim’ bɛn ka yɛda mini ʒiɛman’ golimanim’ ŋɔ, daba ala ka m mini ya yɛn tooi laɣim be bee daba ala ka n yɛn tooi din ya suɣilo?” Ka yɛl’ o, “Zaŋm’ o na!”

¹⁸Ka Yisa daa tahi alizin’ biɛɣu ŋun be bia maa ni zuɣu, ka o zo ka chɛ o, ka bia maa dii kpaŋ zaa.

¹⁹Ka Yisa nyaandoliba daa ka o sanna ashilɔni ti bɔh’ o, “Ka bɔ n-niŋ ka tinim’ di bi tooi kari alizin’ biɛɣu maa bahi?”

²⁰ Ka o yɛli ba, “Di nyɛla yi yɛda pɔrilim zuɣu. Yɛlimaŋli ka n yɛri ya, yi yi mali yɛda ka di be kaman zabiliga tibiɛlim la, yi ni tooi yɛli zoli ŋɔ, ‘Yiɣisim’ a dooshee ŋɔ nti dɔni kpe ha,’ ka di shiri yiɣisi; ka shɛli ku kɔŋ nanibu yi sani. [

²¹Di yi pala wunsuhigu mini nolɔbo zuɣu, so ku tooi kari alizin’ biɛɣu ŋɔ tatabo.”]

²²Yisa nyaandoliba daa ti laɣim Galili na ka o yɛli ba, “Bɛ ni ti zaŋ Daadam Bia n-niŋ salinim’ nuu ni,

²³ka bɛ ti ku o, amaa o ni ti neei kum ni daba ata dali.” Ka di daa niŋ ba nandahima pam.

²⁴ Bɛ ni daa ti paai Kapɛrinium ka Naawuni jɛmbu duu tɔto deeriba kana ti bɔhi Pita, “A karimba ŋɔ bi tɔhiri Naawuni jɛmbu duu tɔto la?”

²⁵Ka o yɛli, “O tɔhira.” O ni daa paai yiŋ’ na ka Yisa daŋ o di yɛla tɔɣisibu ka bɔh’ o, “Saimɔn, wula ka a lee tɛhiri di yɛla?” Ka lan bɔh’ o pahi, “Banim’ sani ka dunia ŋɔ nanim’ lee deeri farigu: Bɛmaŋmaŋ’ tiŋbihi sani bee saamba sani?”

²⁶Ka o yɛli, “Saamba sani.” O ni daa yɛli ni saamba sani maa, ka Yisa yɛli, “Ka dindina tiŋbihi bɛn’ nuu kani.

²⁷Amaa ti ni bi bɔri ni ti miligi bɛ suhuri zuɣu, cham’ teeku ni nti zaŋ ziŋgoo bahi, ka di ni ti tuui gbaai zin’ so, a yi yaag’ o noli, a ni nya liɣiri di ni n-zaŋ ti tɔhi m min’ a zuɣu.”