Read Dagbani Matiu 18 Bible Online

Matiu 18 - Dagbani bible

Matiu 18

¹ Di saha maa ka Yisa nyaandoliba daa ka o sanna ti bɔh’ o, “Ŋuni n-lee gari sokam zaa alizanda nam ni?”

²Ka o daa boli bibil’ so na nti zaŋ o zali bɛ sunsuuni

³ ka yɛli, “Yɛlimaŋli ka n yɛri ya, yi yi bi zaŋ yimaŋ’ zali bia zaani yi ti ku kpe alizanda nam ni.

⁴Ka ŋunkam siɣis’ omaŋ’ leei kaman bibil’ ŋɔ n-nyɛ ŋun gari sokam zaa alizanda nam ni.

⁵Ŋunkam mi deeri bibil’ ŋɔ tatabo n yuli zuɣu deerila mani.”

⁶Yisa daa yɛliya, “Ŋunkam chɛ ka bibihi bɛn niŋ ma yɛda ŋɔ ni yino birigi n-tum alahichi, bɛ yi di zaŋ nɛ’ karili lo dilan’ nyiŋgol’ ni n-zaŋ o bahi teeku ni ka kom di o, di naan so o zuɣu.

⁷Mbusim be dunia ŋɔ zuɣu binshɛŋa din be di ni n-chɛri ka niriba birigiri tumd’ alahichi zuɣu! Biriginsim din ni kpɛhi nira alahichi ni ku chɛ, amaa mbusim be ninvuɣ’ so ŋun chɛ ka o kpee birigi zuɣu.

⁸ “Ka a nuu bee a napɔŋ yi chɛ ka a yɛn birigi tum alahichi, nyin’ ŋmaam’ li bahi, dama a yi kɔŋ a nu’ yini bee a napɔn yini ka ti be, di so ni a mali nuh’ ayi bee napɔna ayi ka bɛ ti zaŋ a kpɛhi buɣim din bi kpiri ni.

⁹ Ka a nimbil’ mi yi chɛ ka a yɛn birigi tum alahichi, nyin’ kpɔɣim’ li bahi, dama a yi kɔŋ a nimbil’ yini ka ti be, di so ni a mali nina ayi ka bɛ ti zaŋ a kpɛhi buɣim din bi kpiri ni.

¹⁰Yisa daa lan yɛli, “Miriya ka yi ʒiɛm bibihi ŋɔ ni yino gba, dama n yɛri ya mi ni bɛ malaikanim’ kul chola m Ba Naawuni ŋun be alizanda ni ŋɔ ninni. [

¹¹Daadam Bia kamina ni o ti tiligi bɛn bɔrigi la.]

¹²“Ka wula ka yi lee tɛhira? So yi mali piɛri kɔbiga, ka bɛ ni yino ti bɔrigi, o ku chɛ kɔbigayinika la zoya zuɣu bɛ mɔri ŋubbu shee ka gbaai ŋun bɔrigi maa shee bɔbu?

¹³Ka o yi ti nya piɛ’ yino maa, yɛlimaŋli ka n yɛri ya, o suhu paligirila o zuɣu gari piɛ’ kɔbigayinika bɛn bi bɔrigi la.

¹⁴Dinzuɣu di pala m Ba Naawuni ŋun be alizanda ni ŋɔ yubu ni bibihi ŋɔ ni yino gba bahi yoli.

¹⁵ Yisa daa lan yɛli yaha, “A mabia yi tum a taali, nyin’ cham’ ti wuh’ o o taali maa a min’ o kɔŋko. O yi deeg’ o galimi, a zaŋ o labisi yi mabiligu maa puuni yaha m-bala.

¹⁶ Amaa o yi zaɣisi wumbu, nyin’ bom’ ninvuɣ’ yino bee niriba ayi pah’ amaŋ’ zuɣu lab’ o sani, ka niriba ata bee ayi shɛhira dibu zuɣu ti chɛ ka yɛtɔɣili kam mali nyaanzaana.

¹⁷Ka o yi zaɣisi bɛ yɛligu wumbu, nyin’ zaŋm’ li yɛli cheechi, ka o yi kul zaɣisi cheechi gba yɛligu wumbu, nyin’ lihim’ o kaman chɛfira bee lampɔdeera.

¹⁸ “Yɛlimaŋli ka n yɛri ya, yi yi ti lo yɛl’ shɛlikam dunia ŋɔ ni, dina n-ni zani alizanda ni, ka yi yi ti lɔrigi yɛl’ shɛlikam mi dunia ŋɔ ni, di ni ti lɔrigi alizanda ni gba.

¹⁹“N lan yɛri ya mi, yi ni niriba ayi yi naai noli dunia ŋɔ ni bɛ ni suhi Naawuni yɛl’ shɛli zuɣu, m Ba Naawuni ŋun be alizanda ni ŋɔ ni chɛ ka di niŋ.

²⁰Dama niriba ayi bee ata yi laɣim luɣ’ shɛli n yuli zuɣu, n ni be bɛ sani.”

²¹ Ka Pita daa ka Yisa sanna ti bɔh’ o, “N Duuma, bula ka m mabia lee yɛn tum ma taali ka n kul chɛri paŋd’ o? N chɛli paŋ o hal ti paai ʒii buyopɔin?”

²² Ka Yisa yɛl’ o, “Pa ʒii buyopɔin kɔŋko, amaa pisopɔin mi ʒii buyopɔin.

²³Dinzuɣu alizanda nam ŋmanila na’ so ŋun daa bol’ o yiŋbihi na ni o ti mal’ o liɣiri din be bɛ sani laasabu.

²⁴O ni daa ti piligi maani di laasabu maa ka bɛ zaŋ do’ so ŋun daa di naa maa laɣ’ gbaliŋ samli na.

²⁵Ka o daa ka kɔbo din ni yo, ka naa maa yɛli ni bɛ zaŋm’ sandira maa min’ o paɣa ni o bihi n-tabil’ o ni mali shɛlikam zaa ti kɔhi na nti yo o samli maa.

²⁶Ka sandira maa daa damd’ o tooni m-balind’ o yɛra, ‘N dana, na dim’ ma suɣilo, n ni yo a di zaa.’

²⁷Ka di daa niŋ naa maa nambɔɣu, ka o ku samli maa zaa o min’ o sunsuuni, ka chɛ ka o chaŋ.

²⁸Amaa ka ŋun’ daa lee yi ha nti nya o kpe’ so ŋun daa di o gba samli ka di bi yaɣi lala, ka o ʒe n-di dilan’ maa nyiŋgol’ ni ka yɛl’ o, ‘Yom’ ma n samli la!’

²⁹Ka o kpee maa gba damd’ o tooni m-balind’ o yɛra, ‘Na dim’ ma suɣilo, n ni yo a di zaa.’

³⁰Ka ŋun’ daa zaɣisi, ka chɛ ka bɛ kpɛh’ o kpee maa duu, ka yɛli ni faashee o yo samli maa zaa.

³¹O tab’ ni daa nya lala maa ka di niŋ ba yoli, ka bɛ chaŋ ti yɛli naa doo maa ŋun’ ni niŋ shɛm.

³²Ka naa maa daa bol’ o na ti yɛl’ o, ‘Nyin’ zaɣ’ yoli ŋɔ! A ni daa balim ma la, n daa bi ku a samli la zaa ti a?

³³Di di bi simdi ni a gba zo a kpee maa nambɔɣu kaman n ni daa zo a nambɔɣu shɛm maa?’

³⁴Ka naa maa gba suhu daa yiɣisi pam, ka o chɛ ka pirinsi kpɛh’ o duu, ka yɛli ni faashee o gba yo samli maa zaa.”

³⁵Dimbɔŋɔ nyaaŋa ka Yisa daa yɛli, “Dinzuɣu yi yi bi chɛri yi mabihi taali paŋdi ba yi suhuri ni, lala ka m Ba Naawuni gba ti yɛn niŋ yi zaa yinoyino.”