Read Dagbani Matiu 19 Bible Online

Matiu 19 - Dagbani bible

Matiu 19

¹Yisa ni daa tɔɣisi yɛtɔɣa ŋɔ naai ka o yiɣisi Galili n-chaŋ Judia tiŋgbɔŋ ni Jɔɔdɛn mɔɣili duli ha;

²ka salo pam daa kul kabiri dol’ o, ka o daa tib’ barinim’ bɛn be bɛ ni.

³Ka Farisiinim’ daa ka o sanna ti bɔri ni bɛ zahim o ka bɔh’ o, “Di luhiya ni nir’ yih’ o paɣa daliri shɛli zuɣu?”

⁴ Ka o garigi bɔhi ba, “Yi na bi karim ni Naawuni ŋun daa nam ninsalinim’ piligu ni la daa nam ba la doo mini paɣa?

⁵ Ka di sabi yɛli, ‘Daliri ŋɔ zuɣu ka doo ŋmaligir’ o ba min’ o ma sani n-zaŋd’ omaŋ’ tabind’ o paɣa, ka bɛ niriba ayi maa be kaman ninvuɣ’ yino la.’

⁶Lala zuɣu n yɛri ya mi, bɛ lan pala niriba ayi yaha, amaa bɛ nyɛla ninvuɣ’ yino. Dinzuɣu Naawuni ni laɣim shɛba, sal’ ŋun’ miri ka o woligi ba.”

⁷ Ka bɛ bɔh’ o, “Ka di chaŋ wula ka Anabi Musa daa bahi noli ni so yi yɛn yih’ o paɣa, ŋun’ tim’ o amiliya lɔrigibu gbaŋ ka yih’ o?”

⁸Ka o yɛli ba, “Yi halli zuɣu ka Anabi Musa daa chɛ ka yi yihiri yi paɣiba, amaa piligu ni ha, pa lala n-daa nyɛ li.

⁹ Dinzuɣu n yɛri ya mi, ŋunkam yih’ o paɣa ka di pala pagɔrisigu gɔbu zuɣu ka kpuɣi paɣ’ so tum zina. Ka ŋunkam mi kpuɣi paɣ’ yihiŋ maa gba tum zina.”

¹⁰Ka Yisa nyaandoliba maa daa yɛl’ o, “Ka doo mini paɣ’ yɛla yi nyɛla lala, dindina di bi simdi ni nir’ kpuɣi paɣa.

¹¹Amaa ka Yisa yɛli ba, “Pa sokam zaa n-ni tooi doli dimbɔŋɔ naɣila Naawuni ni zaŋ lala ti shɛba.

¹²Ninvuɣ’ shɛb’ nyɛ namɔɣilisi la bɛ dɔɣibu ni, ka salinim’ niŋ shɛb’ lala, ka shɛb’ mi zaŋ bɛmaŋ leei lala niriba la alizanda nam zuɣu. Ŋun ni tooi deei wuhibu ŋɔ, ŋun’ deem’ li.”

¹³Ninvuɣ’ shɛb’ daa ti zaŋ bihi ka Yisa sanna ni o ti zaŋ o nuhi pa bɛ zuɣu n-suhi Naawuni ti ba. Ka o nyaandoliba daa tahiri bihinim’ maa zuɣu;

¹⁴amaa ka Yisa yɛli ba, “Chɛliya ka bihi kam’ n sanna ka di karitiya ba, dama alizanda nam nyɛla bɛ tatabo dini.”

¹⁵Ka o daa zaŋ o nuhi pa bɛ zuɣu ka naanyi ŋmaligi chaŋ.

¹⁶Di saha ka nachimbil’ so daa ka Yisa sanna ti bɔh’ o, “Karimba, tuun’ sun bɔ ka n lee yɛn tum ti nya nyɛvili din ka bahigu?”

¹⁷Ka o bɔh’ o, “Bɔ n-niŋ ka a bɔhi ma bin’ suŋ yɛla? Ninvuɣ’ yino kɔŋko n-nyɛ ninvuɣ’ suŋ. Amaa a yi bɔri ni a ti nya nyɛvili, nyin’ doli Naawuni fukumsi zaligunima.”

¹⁸ Ka doo maa bɔh’ o, “Di nyɛla din’ ni dini?” Ka Yisa yɛli, “Miri ka a ku ninsala; miri ka a niŋ zina; miri ka a zu; miri ka a di shɛhira kpɛma;

¹⁹ ka tim’ a ba min’ a ma jilima; ka yum’ a ʒiʒiinikpee kaman amaŋmaŋ’ la.”

²⁰Ka nachimbil’ maa yɛl’ o, “M pun doli dimbɔŋɔnim’ zaa, ka bɔ n-lee lan kpalim ma?”

²¹Ka Yisa yɛl’ o, “A yi bɔri ni a niŋ shɛlikam dɛde, nyin’ cham’ ti kɔhi a ni mali shɛlikam zaa n-zaŋ ti nandaamba n-zali buni alizanda ni, di nyaaŋa ka kana ti doli ma.”

²²Nachimbil’ maa ni daa wum yɛtɔɣili ŋɔ ka o kuli ni suhugarigu, dama o daa nyɛla bundana.

²³Ka Yisa daa yɛl’ o nyaandoliba, “Yɛlimaŋli ka n yɛri ya, di to ni bundana kpe alizanda nam ni.

²⁴N lan yɛri ya mi ni laakum shɛriga nyee ni kpɛbu mal’ asama gari bundan’ Naawuni nam ni kpɛbu.”

²⁵O nyaandoliba maa ni daa wum lala maa, ka di gari ba pam ka bɛ bɔhi, “Ka ŋuni n-lee ni tooi tiligi?”

²⁶Amaa ka Yisa yuli ba ka yɛli ba, “Ninsalinim’ sani ka dimbɔŋɔ ku tooi nani, amaa Naawuni ŋun’ sani, binshɛɣukam nandimi.”

²⁷Di saha ka Pita yɛl’ o, “Nyama, ti chɛla binshɛɣukam ka dol’ a. Ka bɔ ka ti lee ti yɛn nya di zuɣu?”

²⁸ Ka Yisa yɛli ba, “Yɛlimaŋli ka n yɛri ya, Daadam Bia yi ti ʒin’ o jilima nam ʒiishee dunia palli din kanna ni, yinim’ bɛn dol’ o ŋɔ gba ni ti ʒini nam ʒiishɛhi pinaayi ni n-kari Izraɛl zuliya pinaayi la saria.

²⁹Ka ŋunkam mi chɛ o yiya bee o mabi’ dɔbba bee o tizɔpaɣiba bee o ba bee o ma bee o bihi bee o puri n yuli zuɣu ni nya dimbɔŋɔnim’ zaa ha bukɔbigakɔbiga, ka ti lan nya nyɛvili din ka bahigu.

³⁰ Amaa niriba pam bɛn daŋ tooni ni ti leei nyaannima, ka bɛn be nyaaŋa mi ti leei toonnima.