Read Dagbani Matiu 20 Bible Online

Matiu 20 - Dagbani bible

Matiu 20

¹Yisa daa lan yɛli, “Alizanda nam ŋmanila yil’ yidan’ so ŋun daa daŋ yibu asiba n-chaŋ ni o ti bu padiriba paa niŋ o puu ni.

²Ka o mini ba daa ti di daa, ka bɛ saɣi ni o yom’ ba tumtumda dabisi’ munimuni yɔri; ka o chɛ ka bɛ chaŋ o puu maa ni.

³Zaŋ chaŋ kurig’ awɛi saha ka o daa lan yi n-chaŋ ti nya ka shɛb’ ʒi daa ni yoli.

⁴Ka o yɛli ba, ‘Yi gba chamiya m puu ŋɔ ni ha ti tum tuma, ka n ti yɔn ya din niŋ kamaata.’

⁵Ka bɛ daa chaŋ. Ka o daa ti lan yiɣisi chaŋ kurigu pinaayi saha ni kurig’ ata saha ti nya shɛba n-lan yɛli bɛ gba lala.

⁶Zaŋ chaŋ kurig’ anu saha ka o daa lan chaŋ ti nya ka shɛb’ lan ʒiya ka o bɔhi ba, ‘Bɔ n-niŋ ka yi ʒi kpe yoli biɛɣu zaa?’

⁷Ka bɛ yɛl’ o, ‘So m-bi bu ti paa.’ Di saha ka o yɛli ba, ‘Yi gba chamiya m puu ŋɔ ni ha ti tum tuma.’

⁸ “Ka di daa ti niŋ zaawun’ yuŋ ka puu maa lan’ yɛl’ o nachin’ kpɛma, Cham’ ti boli tumtumdiba maa na ti yo ba. Daŋmi bɛn yoli kana la yɔbu pɔi, ka naanyi yo bɛn di daŋna la.

⁹Ka o nachin’ kpɛm’ maa daa yo bɛn daa yoli kana maa tumtumda dabisi’ munimuni yɔri.

¹⁰Ka bɛn daa daŋ puu maa ni la ti kana n-tɛhiri ni bɛn’ ni deei gari lala; amaa ka o ti yo bɛ gba la tumtumda dabisi’ munimuni yɔri.

¹¹Ka bɛ daa dee’ lala, ka ŋumdi bɛ kparima ni niŋdi yil’ yidan’ maa

¹²yɛra, ‘Bɛn yoli ka tuma ŋɔ ni na kul tumla awa yini kɔŋko, ka tinim’ bɛn lee di tuma ŋɔ wahala ka wuntaŋ’ kpe ti biɛɣu zaa pahi ŋɔ mini ba zaa yɔri ti nyɛ yim?’

¹³Ka yil’ yidan’ maa garigi yɛli bɛ ni yino, ‘Zɔri, m bi din ya zalinsi.’ Ka bɔh’ o, ‘Bee yi di bi saɣi ni yi ni deei tumtumda dabisi’ munimuni yɔri?’

¹⁴Ka yɛli ba, ‘Zaŋmiya yi liɣiri chaŋ. N suhu n-yu ni n yo yi mini bɛn yoli kana maa zaa yim.’

¹⁵Ka bɔh’ o, ‘A tɛhiya ni di bi simdi ni n zaŋ n ni su binshɛli niŋ n yubu ni nyɛ shɛm bee yi zabiri ma la nyuli n nirilim niŋbu zuɣu?’

¹⁶ “Dinzuɣu bɛn daŋ tooni ni ti lab’ nyaaŋa, ka bɛn be nyaaŋa mi ti leei toonnima, dama niriba pam ka bɛ boli nti gahimla biɛla.”

¹⁷Yisa daa ti be soli n-chani Jɛrusalɛm ka daa ti zaŋ o nyaandoliba pinaayi la yi kpaŋa nti yɛli ba,

¹⁸“Nyamiya, ti chanila Jɛrusalɛm, ka bɛ ni ti zaŋ Daadam Bia niŋ maligumaaniba mini Naawuni zaligubaŋdib’ nuu ni, ka bɛ ti di o saria yɛli ni bɛ kum’ o,

¹⁹ka zaŋ o ti bɛn pa Yɛhudianima ni bɛ mal’ o ansarisi ka fiɛb’ o, ka kpah’ o tabili dapulli zuɣu; amaa di daba ata dali, o ni ti neei kum ni.”

²⁰Di saha ka Zɛbidii paɣa daa zaŋ o bih’ ayi kana ti gbani Yisa tooni n-suhir’ o binshɛli.

²¹Ka o bɔh’ o, “Bɔ ka a lee bɔri ni n niŋ ti a?” Ka paɣ’ maa yɛl’ o, “Chɛ ka m bihi ŋɔ ni yino ti ʒin’ a nudirigu polo, ka yino mi ti ʒin’ a nuzaa polo a nam ʒiishee.”

²²Ka o yɛli ba, “Yi ʒi yi ni suhiri shɛli maa. Yi ni ti tooi nyu binnyur’ shɛli din be m pipia la ni ka n yɛn nyu la?” Ka bɛ yɛl’ o, ‘Ti ni tooi.’

²³Ka o yɛli ba, “Yɛlimaŋli, yi ni ti nyu binnyur’ shɛli din be m pipia maa ni, amaa n nudirigu mini n nuzaa polo ʒinibu maa din’ pala man’ tibu; amaa m Ba Naawuni ni mal’ li zali ninvuɣ’ shɛba n-ni ti ʒin’ nimaani.”

²⁴Ka o nyaandoliba pia la daa wum lala ka je suli niŋ bɛ tab’ niriba ayi maa.

²⁵ Ka Yisa daa boli ba na ti yɛli ba, “Yi mi ni zuliya kam zuɣulaannim’ kuuni bɛ nam, ka wɔɣira mi wuhiri tarimba bɛ kpiɔŋ ni nyɛ shɛm;

²⁶amaa di ku niŋ lala yinim’ sani. Dinzuɣu ŋun bɔri ni o nyɛ wɔɣirili yi ni, ŋun’ zaŋm’ omaŋ’ leei yi zaa ha bia;

²⁷ ka ŋun mi bɔri ni o gari yi zaa, ŋun’ zaŋm’ omaŋ’ leei yi zaa ha dabili m-be

²⁸kaman Daadam Bia gba ni be shɛm la; o bi kamina ni o ti ʒiya ka niriba tumdi tir’ o, amaa ni ŋun’ lee ti tumdi tiri ba, ka zaŋ o nyɛvili pa talima niriba pam nyɛviya zuɣu.”

²⁹Yisa min’ o nyaandoliba ni daa ti yiri Jɛriko ka salo pam dol’ o.

³⁰Ka zoomba ayi daa ʒi sokpaŋa ka ti wum ni Yisa n-gariti maa, ka bɛ kuhi yɛli, Ti Dana, nyin’ ŋun nyɛ Naa Dauda yaaŋa ŋɔ, zom’ ti nambɔɣu!”

³¹Ka salo maa tahi bɛ zuɣu ni bɛ foma; amaa ka bɛ maan kuhi pam yɛli, “Ti dana, nyin’ ŋun nyɛ Naa Dauda yaaŋa ŋɔ, zom’ ti nambɔɣu!”

³²Ka Yisa daa kpalim zani ka boli ba na ti bɔhi ba, “Bɔ ka yi lee bɔri ni n niŋ tin ya?”

³³Ka bɛ yɛl’ o, “Ti dana, ti bɔri ni a neela ti nina ŋɔ ti ti.”

³⁴Ka di daa niŋ Yisa nambɔɣu, ka o shihi bɛ nina maa ka di dii neei, ka bɛ yiɣisi doli Yisa chana.