Read Dagbani Matiu 21 Bible Online

Matiu 21 - Dagbani bible

Matiu 21

¹Yisa min’ o nyaandoliba ni daa ti paai Bɛtifɛji, Olivi Tihi Zoli din miri Jɛrusalɛm la gbini, ka o tim o nyaandoliba ayi,

²ka yɛli ba, “Chamiya tiŋkpan’ shɛli din be yi tooni ŋɔ ha; yi yi ti paai ni, yi ni nya bunnyaŋ min’ o bia ka bɛ loya ka yi lɔrigi ba na.

³So yi bɔhi ya, yin’ yɛlimiy’ o ni yi Duuma m-bɔri ba, ka o ni chɛ ka yi dii zaŋ ba na.”

⁴Dimbɔŋɔ daa niŋmi ni di chɛ ka anab’ so ni daa yɛli shɛm la niŋ pali. O ni daa yɛli shɛm maa m-bɔŋɔ:

⁵ “Yɛlim’ Ziɔnnima, Nyamiya! Yi naa kani yi sanna. O nyɛla maŋsiɣisibulana, ka bari buŋ’ min’ o bia.”

⁶Ka Yisa nyaandoliba maa daa chaŋ ti shiri niŋ o ni wuhi ba ni bɛ niŋ shɛm maa

⁷n-zaŋ bunsi maa na nti zaŋ bɛ binyɛra pa bɛ yaansi zuɣu, ka Yisa ba.

⁸Ka salo maa ni niriba pam daa zaŋ bɛ binyɛra n-teeri sɔŋdi sol’ ni, ka bɛ ni shɛb’ mi ŋahiri tiwula din mali vari sɔŋdi soli maa ni.

⁹ Ka salo bɛn be o tooni mini bɛn dol’ o nyaaŋa zaa daa kuhiri yɛra, “Paɣimiya Naa Dauda yaaŋa ŋɔ! Ŋun mali ti Duuma yuli kanna ŋɔ mal’ alibarika! Paɣimiya Zallakudura Naa!”

¹⁰Yisa ni daa ti kpɛri Jɛrusalɛm, tiŋ’ maa zaa daa dammi ka bɛ bɔhira, “Ŋuni n-lee bala?”

¹¹Ka salo bɛn dol’ o maa yɛli, “Yisa ŋun nyɛ anabi n-yi Nazarɛt Galili tiŋgbɔŋ ni la na m-bala.”

¹²Ka Yisa daa chaŋ ti kpe Naawuni jɛmbu duu n-kariti bɛn kɔhiri mini bɛn dari nɛma Naawuni jɛmbu duu maa ni yihira; ka daari laɣitaɣiriba teebuya mini ŋmaŋkɔhiriba kuɣisi luhira.

¹³ Ka yɛli ba, “Di sabiya: Man’ Naawuni duu ni boonila wunsuhigu duu. Amaa yinim’ zaŋ li leela ŋmɛnditoya duu!”

¹⁴Ka zoomba mini gbariti daa ka o sanna Naawuni jɛmbu duu maa ni, ka o daa chɛ ka bɛ kpaŋ.

¹⁵Amaa ka maligumaaniba kpamba mini Naawuni zaligubaŋdiba daa nya alahiziba tuun’ shɛŋa o ni tum maa, ka lan wum ka bihi yɛriti saɣiri Naawuni jɛmbu duu maa ni, “Paɣimiya Naa Dauda yaaŋa ŋɔ!” Ka di daa ku ba suli pam

¹⁶ ka bɛ bɔh’ o, “A wum bɛ ni yɛri shɛm maa bebɔ?” Ka Yisa garigi yɛli ba, “Iin. Amaa yi na bi karim din sabi Naawuni Kundi ni? Di sabiya: ‘Bihi mini bimɔɣirisi noya ni ka Naawuni nyari paɣibu ni yɛlimaŋli.’ ”

¹⁷Ka o daa chɛ ba, ka yiɣisi tiŋ’ maa ni chaŋ Bɛtani ti gbe nimaani.

¹⁸N-yi biɛɣ’ asiba ka Yisa labiri Jɛrusalɛm ka kum ti gbaag’ o.

¹⁹Ka o nya ti’ shɛli bɛ ni booni fiig tia ka di ʒe sokpaŋa; ka o chaŋ di gbini nti bi nya binshɛɣu di zuɣu n-naɣ’ pahila vari kɔŋko. Ka Yisa daa yɛli tia maa, “Zuŋɔ din’ tariga a ku lan wali wala hal abada!” Ka tia maa daa dii zani yim kuui.

²⁰O nyaandoliba ni daa nya li lala ka di niŋ ba alahiziba ka bɛ bɔhi, “Bɔ n-chɛ ka fiig tia maa dii zani yim kuui lala?”

²¹ Ka Yisa garigi yɛli ba, “Yɛlimaŋli ka n yɛri ya, yi yi niŋ yɛda ka bi biɛhim, pa n ni niŋ fiig tia ŋɔ shɛm ŋɔ kɔŋko ka yi ni niŋ, amaa hal yi yi yɛli zoli ŋɔ, ‘Yiɣisim’ a dooshee ŋɔ ti lu teeku ni ha,’ di ni niŋ lala.

²²Ka yi yi niŋ yɛda ka suhi binshɛɣukam, yi ni nya li.”

²³Yisa ni daa mali ti kpe Naawuni jɛmbu duu ka maligumaaniba kpamba mini tiŋ’ maa ni kpamba ka o sanna o ni daa wuhiri niriba saha shɛli ti bɔh’ o, “Ŋun’ yiko ni ka a lee tumdi dimbɔŋɔnima bee ŋuni n-lee ti a di yiko maa?”

²⁴Ka Yisa garigi yɛli ba, “N gba ni bɔhi ya bɔhigu, ka yi yi garigi m bɔhigu maa, m mi ni yɛli ya yiko shɛli n ni mali niŋdi dimbɔŋɔnim’ maa zaa ni yi shɛl’ na.

²⁵Jɔn Baptaizira baptaizibu la, Naawuni n-daa lee zal’ li bee ninsalinima?” Ka bɛ niŋ tab’ saawara yɛli, “Ti yi yɛli ni Naawuni n-daa zal’ li, o ni bɔhi ti ni ka bɔ n-niŋ ka ti daa bi niŋ o yɛda?

²⁶Ti mi zɔri niriba ni ti yɛli ni ninsalinima n-daa zal’ li, dama sokam zaa saɣiya ni Jɔn Baptaizira daa nyɛla anab’ maŋli.”

²⁷Di saha ka bɛ garigi yɛli Yisa, “Ti bi mi.” Ka o yɛli ba, “Dindina n gba ku yɛli ya ŋun ti ma yiko shɛli n ni mali niŋdi dimbɔŋɔnim’ zaa maa.”

²⁸Dimbɔŋɔ nyaaŋa ka Yisa daa bɔhi ba, “Wula ka yi lee tɛhi? Do’ so n-daa mali bidibis’ ayi nti chaŋ o bikpɛm’ sani ti yɛl’ o, ‘M bia, cham’ m puu ni ti tum tuma zuŋɔ.’

²⁹Ka o yɛli, ‘N ku chaŋ.’ Amaa di nyaaŋa ka o suhu ti lɛbigi ka o chaŋ.

³⁰Ka o chɛ, ka chaŋ ŋun paya sani ti yɛl’ o kaman o ni yɛl’ o bikpɛm’ maa shɛm maa. Ka o saɣi yɛli, ‘M ba, n ni chaŋ;’ amaa ka bi chaŋ.

³¹To, bidibis’ ayi maa ni ŋuni n-daa lee tum o ba yubu?” Ka bɛ garigi yɛli, ‘Kpɛm’ san’ la.’ Ka Yisa yɛli ba, “Yɛlimaŋli ka n yɛri ya, farigudeeriba mini pagɔra daŋ ya Naawuni nam ni kpɛbu,

³² dama Jɔn Baptaizira ni daa zaŋ wuntia soli ka yi sanna la, yi daa bi niŋ o yɛda; amaa ka farigudeeriba mini pagɔra bɛn’ daa niŋ o yɛda. Ka hal yi ni daa nya lala maa zaa yoli, di nyaaŋa yi daa bi niŋ tuuba ka niŋ o yɛda.

³³ Yisa daa lan yɛli, “Wummiya ŋahi’ shɛli yaha. Yili yidan’ so n-daa sa wain tihi ka sa gariche gil’ li, ka gbi bɔɣili n-zaŋ binshɛli din yɛn kahindi wain tihi maa wala kom zali bɔɣili maa ni, ka sa gara din du pam nimaani, ka zaŋ li niŋ padiriba nuu ni ni bɛ lihiri li hal ti kpuɣ’ o tihi puu maa atam ti o ka deei bɛ yɔri, ka daa go n-chaŋ tinshee.

³⁴Ka puu maa atam kpuɣibu saha daa ti paai, ka o tim o yiŋbihi padiriba maa sani ni bɛ ti zaŋ o puu maa daatam ti o na.

³⁵Ka padiriba maa daa gbahi o yiŋbihi maa n-fiɛb’ bɛ yino, ka ku yino, ka lab’ yino mi kuɣa.

³⁶Ka o daa lan tim o yiŋbi’ shɛb’ bɛn zooi gari o ni tuui tim shɛb’ maa, ka bɛ ti niŋ bɛ gba lala.

³⁷Dimbɔŋɔ nyaaŋa ka o daa ti tim omaŋmaŋ’ bia ka yɛli, “Bɛ ni ti ti m bia ŋɔ ŋun’ jilima.”

³⁸Amaa ka padiriba maa daa ti nya o bia maa ka yɛli taba, “O falidir’ la m-bɔŋɔ na; chɛliya ka ti ku o, ka fali maa leei ti dini.”

³⁹Ka bɛ daa gbaag’ o yi tihi puu maa kpaŋ’ ha ti ku o.

⁴⁰Ka Yisa daa bɔhi ba, “Dinzuɣu tihi puu maa lana yi ti kana, wula ka o lee yɛn niŋ padiriba maa?”

⁴¹Ka maligumaaniba kpamba mini tiŋ’ maa ni kpamba maa daa garigi yɛl’ o, “O ni ku padir’ biɛri ŋɔ, ka zaŋ o tihi puu maa ti padir’ shɛb’ bɛn ni zaŋ di daatam maa ti o di kpuɣibu saha.”

⁴² Ka Yisa bɔhi ba, “Yi na bi karim di ni sabi Naawuni Kundi ni luɣ’ shɛli shɛm la yɛla? Di sabiya: ‘Kuɣ’ shɛli tammɛriba ni zaɣisi la n-yipa leei kuɣ’ gahindili. Ti Duuma niŋsim m-bala, ka di mali ti alahiziba.’ ”

⁴³Dinzuɣu n yɛri ya mi, “Naawuni ni deei ŋun’ Naawuni nam yi sani n-zaŋ li ti zuliya shɛb’ bɛn ni wali o nam maa wala. [

⁴⁴Ka ŋunkam lu kuɣili maa zuɣu ni chɛrisichɛrisi, amaa kuɣili maa mi yi lu sokam zuɣu, di ni niɛm o buɣibuɣi kaman zim la.”]

⁴⁵Maligumaaniba kpamba mini Farisiinim’ ni daa wum Yisa ŋaha ŋɔ, ka bɛ baŋ ni bɛna ka o ŋahi li dalim maa.

⁴⁶Ka bɛ daa bɔri ni bɛ gbaag’ o, amaa ka zɔri salo, dama sokam daa saɣiya ni Yisa nyɛla anabi.