Read Dagbani Matiu 23 Bible Online

Matiu 23 - Dagbani bible

Matiu 23

¹Di saha ka Yisa daa yɛli salo min’ o nyaandoliba,

²“Naawuni zaligubaŋdiba mini Farisiinima n-zani Anabi Musa zaashee;

³dinzuɣu niŋmiya bɛ ni wuhi ya ni yi niŋ shɛlikam, amaa ka di niŋdiya bɛ ni niŋdi shɛm, dama bɛ wuhiri din tuhi, amaa ka bɛmaŋmaŋ’ lee bi dol’ li.

⁴Bɛ lɔri ʒi’ tibisa din ʒibu to ʒiini niriba, amaa ka bɛmaŋmaŋ’ ku saɣi zaŋ bɛ nubil’ gba wuɣi li.

⁵ Bɛ tumdi bɛ tuma zaa la niriba nini zuɣu, ka niŋdi bɛ ni piriti sab’ shɛŋa mini din pari bɛ gbiɛri zuɣu ka di nyɛ zaɣ’ yɛlima, ka chɛri ka bɛ binyɛra naŋgbanzusa[2] nyɛ zaɣ’ wɔɣila,

⁶ka yuri jilima ʒiishɛhi ʒinibu bɛ churi puhibu ni, ka yuri ʒiishe’ viɛla ni ʒinibu bɛ jɛmbu duri ni;

⁷ka yuri puhigu dahi ni, ka lan yuri ni niriba booni ba bɛ karimbanima.

⁸Amaa di bi simdi ni bɛ boli ya karimbanima, dama karimba yino ka yi mali, ka yinim’ bɛn zaa kpalim nyɛla mabihi ni taba.

⁹Di boliya so yi ba dunia ŋɔ ni, dama Naawuni yino ŋun bɛ alizanda ni ŋɔ kɔŋko n-nyɛ yi ba.

¹⁰Yi mi di chɛliya ka niriba booni ya bɛ duumanima, dama Duuma yino kɔŋko ka yi mali, ŋuna n-nyɛ Masia.

¹¹ Ŋun nyɛ wɔɣirili yi ni, ŋun’ zaŋm’ omaŋa n-leei yi zaa ha bia.

¹² Ka ŋunkam tibigir’ omaŋa ni nya filiŋ, ka ŋunkam mi siɣisiri omaŋa ni nya tibiginsim.

¹³Yisa daa yɛliya, “Mbusim be yinim’ Naawuni zaligubaŋdiba mini Farisiinim’ bɛn nyɛ bilikɔɣinim’ ŋɔ zuɣu! Dama yi yo alizanda nam dunoli ni niriba di kpe di ni. Yimaŋmaŋ’ bi kpɛri di ni, ka mi bi saɣiri ni bɛn bɔri ni bɛ kpe di ni kpe. [

¹⁴“Mbusim be yinim’ Naawuni zaligubaŋdiba mini Farisiinim’ bɛn nyɛ bilikɔɣinim’ ŋɔ zuɣu! Dama yi fari pakoya yinsi, ka suhiri Naawuni yuuri ni niriba tɛhi ni yi nyɛla ninvuɣ’ suma. Dinzuɣu yi ni ti nya tibidarigibo pam.]

¹⁵“Mbusim be yinim’ Naawuni zaligubaŋdiba mini Farisiinim’ bɛn nyɛ bilikɔɣinim’ ŋɔ zuɣu! Dama yi kaari gindi teeku, ka dari gindi duli tiŋgbana mi ni yi kul nya ninvuɣ’ yino ŋun ni saɣi doli yi daadiini soli, ka yi yi ti nya so ka o dol’ li, yi chɛ ka o leela buɣim bia buyi zuɣu gari yimaŋmaŋ’ ni nyɛ buɣim bihi shɛm.

¹⁶“Mbusim be yinim’ sowuhiriba bɛn nyɛ zoomba ŋɔ zuɣu! Dama yi wuhiri ni nir’ yi po Naawuni jɛmbu duu di pa taali, amaa ni nir’ yi po salima din be Naawuni jɛmbu duu maa ni, shee ka o niŋ o ni po n-dalim yɛl’ shɛli maa.

¹⁷Yinim’ bɛn nyɛ zoon’ jɛra ŋɔ, bina ayi ŋɔ dini n-lee gari di kpee: Salima maa bee Naawuni jɛmbu duu din chɛ ka salima maa be kasi maa?

¹⁸Ka yi lan wuhiri ni nir’ yi po sara maligu bimbini di pa taali, amaa ni nir’ yi po sara shɛli din pa bimbini maa zuɣu, shee ka o niŋ o ni po n-dalim yɛl’ shɛli maa.

¹⁹Yinim’ zoomba ŋɔ, bina ayi maa ni dini n-lee gari di kpee: Sara maa bee bimbini din chɛ ka sara maa be kasi maa?

²⁰Dinzuɣu ŋunkam po sara maligu bimbini pola di mini binshɛɣukam din pa di zuɣu.

²¹Ka ŋunkam po Naawuni jɛmbu duu pola di mini Naawuni ŋun be di ni maa.

²² Ka ŋunkam mi po alizanda pola di mini Naawuni nam ʒiishee n-tabili ŋun’ Naawuni ŋun ʒi di ni maa.

²³ “Mbusim be yinim’ Naawuni zaligubaŋdiba mini Farisiinim’ bɛn nyɛ bilikɔɣinim’ ŋɔ zuɣu! Dama yi yihiri naanzua mini buŋgu ni nili zaka, amaa ka lee chɛ Naawuni fukumsi zaligu puuni yɛlikpɛma din nyɛ saria din tuhi karibu mini nambɔzɔbo ni yɛda niŋbu la; dimbɔŋɔnim’ zaa simdi niŋbu, ka di bi niŋ kamaata ni yi chɛ din pahi maa gba niŋbu.

²⁴Yinim’ sowuhiriba bɛn nyɛ zoomba ŋɔ, yi nyɛla bɛn lɔŋdi nanviɣu, amaa ka lee vaani laakum.

²⁵“Mbusim be yinim’ Naawuni zaligubaŋdiba mini Farisiinim’ bɛn nyɛ bilikɔɣinim’ ŋɔ zuɣu! Dama yi paɣirila pipihi mini lahi nyaansi, amaa ka di puuni lee pali ninvuɣ’ fabo mini diribarilim.

²⁶Nyin’ Farisii ŋun nyɛ zom’ ŋɔ, daŋm’ paɣila pipia mini laa puuni, ka naanyi chɛ ka di nyaaŋa gba neei.

²⁷ “Mbusim be yinim’ Naawuni zaligubaŋdiba mini Farisiinim’ bɛn nyɛ bilikɔɣinim’ ŋɔ zuɣu! Dama yi ŋmanila gbala du’ shɛŋa bɛ ni niŋ kalo paligi di nyaansi ka di lihibu viɛla, amaa ka kpiimba kɔba mini daɣiri balibu kam pali di puuni la.

²⁸Lala n-nyɛn ya. Yi ŋmanila wuntizɔriba niriba sani, amaa ka bilikɔnsi mini tuumbiɛri lee pali yi suhuri ni.

²⁹“Mbusim’ be yinim’ Naawuni zaligubaŋdiba mini Farisiinim’ bɛn nyɛ bilikɔɣinim’ ŋɔ zuɣu! Dama yi mɛri duri gindi anabinim’ gbala, ka maani wuntizɔriba yɛla teebu binyara zaana,

³⁰ka yɛri ni yinim’ yi di daa be yi yaannim’ saha la, yi daa naan ku pahi bɛ zuɣu ku anabinim’ maa.

³¹Dimbɔŋɔ puuni yi di yimaŋ’ shɛhira ni yi nyɛla bɛn daa ku anabinim’ maa yaansi.

³²Dinzuɣu bahi naaya yi yaannim’ tuma maa!

³³ Yinim’ tinvura ŋɔ! Yinim’ garinsi ŋɔ! Wula ka yi yɛn niŋ nti zo n-yi buɣim ni?

³⁴Dinzuɣu n ni tim anabinim’ mini yɛnnima ni Naawuni zaligubaŋdiba yi sanna, ka yi ti ku bɛ shɛba, ka kpahi bɛ shɛb’ tabili dapula zuɣu, ka fiɛb’ bɛ shɛb’ mi yi jɛmbu duri ni, ka niŋ ba alaka tiŋ’ ni zaŋ ti kpa tiŋ’ ni.

³⁵ Ka di zuɣu chɛ ka Naawuni ti zaŋ bɛ ni daa ku wuntizɔr’ shɛba dunia ŋɔ ni, Ɛbɛl ŋun daa bi tum taal’ shɛl’ la kubu saha zaŋ ti paai Anabi Zakaria Bɛrakia bi’ so yi ni daa ku Naawuni jɛmbu duu mini sara malibu bimbini sunsuuni la taali ʒili ya.

³⁶Yɛlimaŋli ka n yɛri ya, dimbɔŋɔnim’ zaa taali ni ti ʒi ʒiɛmani ŋɔ niriba zuɣu.

³⁷Ka Yisa daa kuhi yɛli, “Mbaye Jɛrusalɛmnima! Mbaye Jɛrusalɛmnima! Yinim’ bɛn kuri anabinima, ka labiri Naawuni ni timdi tuumb’ shɛb’ yi sanna kuɣa ŋɔ, yimyim paai shɛm ka n kul bɔri ni n laɣim ya kaman noo ni laɣind’ o bihi niŋdi o kpiŋkpama ni shɛm la, ka yi bi saɣira.

³⁸ Nyamiya, yi jɛmbu duu yipa leela dabɔɣu.

³⁹ Ka n yɛri ya mi ni yi ku lan nya ma hal ni saha shɛli yi ni ti yɛn yɛli, ‘Ŋun mali ti Duuma yuli kanna ŋɔ mal’ alibarika.’ ”