Read Dagbani Matiu 26 Bible Online

Matiu 26 - Dagbani bible

Matiu 26

¹Yisa ni daa tɔɣisi yɛtɔɣa ŋɔ zaa naai ka o yɛl’ o nyaandoliba,

² “Yi mi ni dali nyɛla Yaɣigari Chuɣu, ka bɛ ni ti zaŋ Daadam Bia ti ninvuɣ’ shɛb’ ni bɛ kpah’ o tabili dapulli zuɣu.”

³Di saha maa ka maligumaaniba kpamba mini tiŋ’ maa ni kpamba zaa daa laɣim maligumaaniba kpamba zuɣulan’ so ŋun yuli daa booni Kaiafas la yiŋa

⁴ni bɛ ti to jina baŋ bɛ ni yɛn niŋ shɛm sɔɣ’ gbaai Yisa ku o,

⁵amaa ka daa lee yɛli ni bɛ di niŋ li chuɣu maa dali, dama ni di pa shɛli ka niriba ti taai duŋ o gbaabu zuɣu.

⁶Yisa daa ti be Bɛtani Saimɔn ŋun daa nyɛ kɔŋlan’ la yiŋa

⁷ n-ʒiya diri bindirigu, ka paɣ’ so zaŋ luɣulu’ viɛlli din pali tulaale din mali shaara pam ka o sanna ti kpaa’ li niŋ o zuɣu ni.

⁸O nyaandoliba ni daa nya lala maa, ka bɛ je suli ka yɛra, “Bɔzuɣu ka paɣ’ ŋɔ saɣim tulaale maa lala?

⁹Dama tulaale ŋɔ naan tooi kɔhi liɣiri pam ka bɛ zaŋ li ti nandaamba.”

¹⁰Amaa ka Yisa daa baŋ bɛ ni yɛli shɛm maa ka bɔhi ba, “Bɔ n-niŋ ka yi kaɣili paɣ’ maa lala? Tuun’ suŋ ka o tum ma maa.

¹¹ Dama nandaamba kul ni be yi sani sahakam; amaa man’ kul ku be yi sani sahakam.

¹²O ni kpaai tulaale ŋɔ niŋ ma maa, o niŋ li mi gu n sɔɣibu.

¹³Yɛlimaŋli ka n yɛri ya, bɛ yi ti yihi lahibal’ suŋ ŋɔ waazu dunia ŋɔ ni luɣ’ shɛlikam zaa, bɛ ni yɛli paɣ’ ŋɔ ni tum tuun’ shɛli ŋɔ teer’ o yɛla.”

¹⁴Di saha maa ka Yisa nyaandoliba pinaayi maa ni yino ŋun yuli daa booni Judas Isikariɔt la daa chaŋ maligumaaniba kpamba sani

¹⁵ nti bɔhi ba, “Bɔ ka yi lee yɛn ti ma ka n chɛ ka Yisa kpe yi nuu ni?” Ka bɛ daa ti o anzinfa laɣibaligu bini pihita.

¹⁶Di saha maa zaŋ chana ka o daa bɔri so’ shɛli o ni yɛn doli yi Yisa nyaaŋa chɛ ka bɛ gbaag’ o.

¹⁷Ka Bɔrɔbɔro din ka Dabindi Chuɣu la piligu dali daa ti paai ka Yisa nyaandoliba ka o sanna ti bɔh’ o, “Ya polo ka a lee bɔri ni ti mali ʒiishee ti a ka a puhi Yaɣigari Chuɣu ŋɔ?”

¹⁸Ka o yɛli ba, “Chamiya so sani fɔŋ ni ti yɛl’ o, ‘Ti karimba n-tim ti na ni ti ti yɛl’ a ni o saha miriya; ka o bɔri ni o min’ o nyaandoliba puhi Yaɣigari Chuɣu ŋɔ a yili ŋɔ.’ ”

¹⁹Ka o nyaandoliba maa daa chaŋ ti niŋ o ni yɛli ba shɛm maa, ka mali Yaɣigari Chuɣu maa bindirigu dibu shili.

²⁰Ka di daa ti niŋ zaawun’ yuŋ ka Yisa min’ o nyaandoliba pinaayi maa laɣim ʒini ni bɛ di bindirigu maa.

²¹Bɛ ni daa diri maa ka o yɛli ba, “Yɛlimaŋli ka n yɛri ya, yi ni yino ni yi n nyaaŋa.”

²²Ka di daa niŋ ba suhugarigu pam, ka bɛ gbaag’ o bɔhibu yinoyino, “N Duuma, mani? N Duuma, mani?”

²³ Ka o yɛli ba, “M mini ŋun laɣim suɣiri ʒiɛri ŋɔ n-nyɛ ŋun yɛn yi n nyaaŋa maa.

²⁴Di ni niŋ Daadam Bia kaman di ni sabi o yɛla shɛm la; amaa mbusim be ŋun ti yɛn yi Daadam Bia nyaaŋa maa zuɣu! Hal bɛ yi di daa bi dɔɣ’ o gba, di naan so o zuɣu.”

²⁵Di saha ka Judas ŋun daa yɛn yi o nyaaŋa maa bɔh’ o, “Karimba, mani?” Ka Yisa yɛl’ o, “Iin, nyini.”

²⁶Yisa min’ o nyaandoliba ni daa ʒiya diri bindirigu maa ka o zaŋ bɔrɔbɔro n-niŋ alibarika niŋ di ni, ka ŋmahiŋmahi li n-zaŋ ti ba ka yɛli, “N niŋgbuŋ m-bala; zaŋmiya li ŋubi.”

²⁷Ka lan zaŋ wain pipia niŋ alibarika niŋ di ni, ka zaŋ li ti ba ka yɛli, “Yi zaa nyumiya li,

²⁸ dama dimbɔŋɔ nyɛla Naawuni daalikauli pal’ shɛli o ni lo n ʒim ni. Dina n-nyɛ n ʒi’ shɛli din ti yɛn yi n niŋgbuŋ ni niriba pam daalahichi kpihimbu zuɣu.

²⁹Amaa n yɛri ya mi, n ku lan nyu tiwala kom ŋɔ naɣila dahin’ shɛli ka m mini ya ni ti lan laɣim nyu di zaɣ’ palli m Ba Naawuni nam ni.”

³⁰Ka bɛ daa yili Naawuni paɣibu yilli naai, ka naanyi yi n-chaŋ Olivi Tihi Zoli zuɣu.

³¹ Yisa daa yɛli ba, “Yuŋ ŋɔ yi zaa ni ti zo ka chɛ ma, dama di sabiya ni Naawuni yɛliya, ‘N ni ku piɛgula, ka piɛri wurim.’

³² Amaa n yi ti neei kum ni, n ni daŋ yi tooni chaŋ Galili.”

³³Ka Pita yɛl’ o, “Hal sokam zaa yi ni zo ka chɛ a, man’ kul ku zo ka chɛ a.”

³⁴Ka Yisa yɛl’ o, “Yɛlimaŋli ka n yɛr’ a, zuŋɔ yuŋ ŋɔ a ni ti chihi siɣimsiɣim buta ni a bi mi ma, ka nolɔɣu na bi kum.”

³⁵Ka Pita lan yɛl’ o, “Hal bɛ yi ni ku m min’ a gba, n ku chihi ni m bi mi a.” Ka Yisa nyaandoliba maa zaa daa yɛl’ lala.

³⁶Ka Yisa min’ o nyaandoliba maa daa chaŋ luɣ’ shɛli din yuli booni Gɛtsɛmani la ka o ti yɛli ba, “Ʒinimiya kpe ka n chaŋ tooni ha ti suhi Naawuni.”

³⁷Ka o daa zaŋ Pita mini Zɛbidii bih’ ayi la pah’ omaŋ’ zuɣu, ka suhugarigu mini suhusaɣiŋgu daa gbaag’ o pam

³⁸ka o yɛli ba, “N suhu saɣimya pam, hal di ŋmanila n yɛn kpimi. Yinim’ kpalimmiya kpe guhimiya.”

³⁹Ka o daa tirisi tooni biɛla ha nti teei dɔn’ o puli zuɣu suhiri Naawuni yɛra, “M Ba, di yi ni nani, nyin’ chɛ ka pipia ŋɔ miligi n zuɣu, amaa chɛ ka a yubu n-niŋ, pa n dini.”

⁴⁰Ka o daa ti lab’ o nyaandoliba maa sanna ti nya ka bɛ gbihirimi ka o bɔhi Pita, “Yi ku tooi gali gom biɛla n zuɣu?

⁴¹Yirigimiya yimaŋ’ zuɣu, ka suhimiya Naawuni ni yi di ti lu zahimbu puuni; yi suhuri din’ bɔra, amaa ka yi niŋgbuna lee ka yaa.”

⁴²Ka Yisa daa lan labi pahi buyi ti suhiri Naawuni yɛra, “M Ba, pipia ŋɔ yi ku miligi n zuɣu ka pa ni n nyu li mi, nyin’ chɛ ka a yubu n-niŋ.”

⁴³Ka o ti lan lab’ o nyaandoliba maa sanna nti nya ka bɛ lan gbihirimi, dama gom n-daa mali ba pam.

⁴⁴Ka o daa chɛ ba, ka lan lab’ pahi buta ti suhiri Naawuni n-kul yɛrila yɛtɔɣ’ yini maa o suhigu maa ni.

⁴⁵Ka o daa ti lan lab’ o nyaandoliba maa sanna ti bɔhi ba, “Yinima na kul gbihirimi ka vuhiri jɛlinsi? Nyamiya, saha maa paaya; so pun yi Daadam Bia nyaaŋa ka zaŋ o niŋ alahichinim’ nuu ni.

⁴⁶Yiɣisimiya ka ti chaŋ; nyamiya, ŋun yi n nyaaŋa maa paana.”

⁴⁷Yisa ni daa kul yɛri maa, o noli daa na bi lu tiŋa, ka o nyaandoliba pinaayi la ni yino ŋun yuli daa booni Judas la pahi maligumaaniba kpamba mini tiŋ’ maa ni kpamba ni daa tim salo pam shɛba ka bɛ nyaɣiri takɔbiri ka gbib’ kpahi la dii paana.

⁴⁸Ka Judas ŋun daa yi Yisa nyaaŋa maa daa pun wuhi ba shihir’ shɛli yɛli, “N yi ti kul puhi so ka mɔɣis’ o kpariŋ, ŋuna m-bala; yin’ gbaamiy’ o.”

⁴⁹O ni daa ti paana, o dii shiri chaŋmi ti zani Yisa tooni ka yɛli, “Karimba, m puhir’ a! Ka mɔɣis’ o kpariŋ.”

⁵⁰Ka Yisa yɛl’ o, “Zɔri, niŋm’ a ni kana ni a ti niŋ shɛli maa.” Di saha ka salo maa dii kana ti gbaai Yisa.

⁵¹Ka bɛn daa ʒe Yisa sani maa ni yino ŋoog’ o takɔbi chɛ n-shɛligi maligumaaniba zuɣulan’ dabili tibili bahi.

⁵²Di saha ka Yisa yɛl’ o, “Labisim’ a takɔb’ maa su di tɔɣu ni, dama ŋunkam ŋoori takɔbi ti kpirila takɔb’ kum.

⁵³A tɛhiya ni n ku tooi suhi m Ba Naawuni ka o tim malaikanim’ tusatusa shɛm n sanna pumpɔŋɔ?

⁵⁴Amaa di yi niŋ lala, wula ka Naawuni Kundi ni yɛli ni shee lala niŋya la yɛn niŋ pali?”

⁵⁵ Di saha ka Yisa daa bɔhi salo maa, “Mani ka yi nyaɣi takɔbiri ka gbib’ kpahi n-kana ni yi ti gbaai kaman ŋmɛnditoli n-nyɛ ma maa? M mini ya n-yi be Naawuni jɛmbu duu dabisili kam ka n wuhiri ya, ka yi bi gbaai ma.”

⁵⁶Amaa dimbɔŋɔnim’ zaa niŋmi ni di chɛ ka anabinim’ sabbu niŋ pali. Ka o nyaandoliba maa zaa daa zo ka chɛ o.

⁵⁷Ka bɛn daa gbaai Yisa maa zaŋ o tahi Kaiafas ŋun daa nyɛ maligumaaniba zuɣulan’ la yiŋa; nimaani ka Naawuni zaligubaŋdiba mini tiŋ’ maa ni kpamba daa pun laɣim ʒiya.

⁵⁸Ka Pita daa puɣisiri doli Yisa nyaaŋa mali nti paai maligumaaniba zuɣulan’ maa yiŋ’ dundɔŋ ni n-chaŋ ti ʒi yili maa ni dunɔguliba sani ni o nya di bahigu.

⁵⁹Ka maligumaaniba kpamba mini jintɔriba zaa daa bo niriba ni bɛ di Yisa ʒiri shɛhira ka bɛ tɔɣisi luh’ o, ka ku o.

⁶⁰Ka niriba pam daa shiri di o ʒiri shɛhira, amaa ka bɛ daa lee bi nya o galimi. Di nyaaŋa ka niriba ayi daa tɔhi zanna

⁶¹ yɛli, “Doo ŋɔ daa yɛliya ni o mali yiko din ni tooi wurim Naawuni jɛmbu duu la, ka lan me li daba ata sunsuuni.

⁶²Ka maligumaaniba zuɣulan’ maa daa yiɣisi zani bɔh’ o, “A ka noli din ni garigi? Shɛhira bɔ ka bɛ lee dir’ a ŋɔ?

⁶³Amaa ka Yisa shini. Ka maligumaaniba zuɣulan’ maa yɛl’ o, “Yɛlim’ ti Naawuni ŋun be ŋɔ zuɣu, nyini n-shiri nyɛ Masia Naawuni Bia la?”

⁶⁴ Ka Yisa garigi yɛl’ o, “A ni yɛli shɛm maa n-nyɛ li. Amaa n yɛri ya mi ni dahin’ shɛli yi ni ti nya Daadam Bia ka o ʒila Yiko Zaa Naa nudirigu polo m-be sagbana ni kanna.”

⁶⁵Di saha ka maligumaaniba zuɣulan’ maa dii darigi cheeg’ omaŋmaŋ’ binyɛrigu ka yɛli, “O mɔri Naawuni! Bɔ ka ti lan bɔri shɛhiranim’ ni ti niŋ yaha? Yi zaa wum o ni mɔri Naawuni shɛm.

⁶⁶ Yi lee zahimla wula?” Ka bɛ garigi yɛli, “O simdila kubu.”

⁶⁷ Di saha ka bɛ daa dii tuhiri nintɔri viɛr’ o ninni, ka ŋmɛr’ o nutala, ka shɛb’ labir’ o tapaɣisi

⁶⁸ka yɛra, “Nyini Masia, a daanabitali puuni wuhim’ ti bɛn ŋmɛr’ a ŋɔ!”

⁶⁹Di saha Pita daa ʒila Kaiafas yiŋ’ maa dundɔŋ ni. Ka yili maa ni bipuɣin’ so ti chaŋ o sani ti yɛl’ o, “A gba yi be Yisa ŋun yi Galili na ŋɔ sani.”

⁷⁰Ka Pita chihi bɛ zaa nini maa ni yɛli, “Man’ bi baŋ a ni yɛli shɛm maa gbinni.”

⁷¹Ka yiɣisi nimaani yi zɔŋ ni. Ka yili maa ni bipuɣin’ so gba ti lan nya o ka yɛli bɛn daa ʒe nimaani maa, “Doo ŋɔ gba yi bela Yisa ŋun yi Nazarɛt na ŋɔ sani.”

⁷²Ka Pita lan chihi ka po pɔri yɛli, “Man’ ʒi doo maa.”

⁷³Ka di daa bi tooi biɛla ka bɛn daa ʒe nimaani maa kana ti yɛli Pita, “A shiri nyɛla bɛ ni yino, dama a yɛtɔɣa n-viig’ a gbini.”

⁷⁴Ka Pita dii gbaai kari ka pɔri pɔri yɛra, “Man’ ʒi doo maa.” Di saha maa ka nolɔɣu dii kum.

⁷⁵Ka Pita teei Yisa ni daa yɛl’ o ni o ni ti chihi siɣimsiɣim buta ni o bi mi ŋun’ Yisa ka nolɔɣu naanyi kum la yɛla, ka daa yi nti kum pam.