Read Dagbani Maak 1 Bible Online

Maak 1 - Dagbani bible

Maak 1

¹Naawuni Bia Yisa Masia lahibal’ suŋ m-bɔŋɔ.

² Di piligimi kaman Anabi Aizaia ni daa sab’ shɛm la ni Naawuni yɛliya: “N tumo m-bɔŋɔ; n ni tim o ka o daŋ a tooni nti mal’ a chandi maa soli ti a.

³ Ninvuɣ’ so ni ti be mɔɣu ni mooni molo yɛra, ‘Malimiya ti Duuma kandina soli gu o, ka mal’ o soya ka di tuhi.’ ”

⁴Jɔn Baptaizira daa bela mɔɣu ni yihiri waazu yɛri niriba, “Niŋmiya tuuba, ka m baptaizi ya kom ni, ka Naawuni kpihim yi daalahichi.”

⁵Ka Judianim’ mini Jɛrusalɛmnim’ zaa daa kabi chaŋ o sani nti kaŋka bɛ daalahichi ka o naanyi baptaizi ba Jɔɔdɛn mɔɣili ni.

⁶ Jɔn Baptaizira daa yɛrila laakum kɔbiri binyɛrigu, ka mali gbaŋ lɔr’ o shee ni, ka o bindirigu daa nyɛla toli mini shiri.

⁷Ka o daa mooni molo yɛra, “Ŋun na be n nyaaŋa kanna mali yiko gari ma hal ka man’ pɔri gba ni n ti damd’ o tooni gbaag’ o namda mal’ o ka o pirigi.

⁸Kom ni ka man’ baptaiziri ya, amaa ŋun’ ni ti zaŋla Naawuni Shia Kasi baptaizi ya.”

⁹Di saha maa ka Yisa daa yi Nazarɛt Galili tiŋgbɔŋ ni ka Jɔn Baptaizira sanna ka Jɔn ti baptaiz’ o Jɔɔdɛn mɔɣili ni.

¹⁰Yisa ni daa ti puhiri yiri kom maa ni na, o dii nyami ka zuɣusaa bɔɣi, ka Naawuni Shia Kasi yi zuɣusaa na kaman ŋmani la nti tam o zuɣu.

¹¹ Ka kukol’ shɛli daa yi zuɣusaa na yɛra, “M Biyurigu n-nyɛ a; n nini tiɣ’ a pam.”

¹²Di saha maa ka Naawuni Shia Kasi daa dii zaŋ Yisa tahi mɔɣu ni.

¹³Ka o daa be mɔɣu maa ni biɛɣ’ pihinahi, ka Sintani daa ti zahim o. Yisa mini mɔɣu ni biŋkɔbiri n-daa be mɔɣu maa ni, ka malaikanim’ daa kanna nti kpaŋsir’ o suhu.

¹⁴Naa Hɛrɔd ni daa gbaai Jɔn Baptaizira kpɛhi duu saha shɛl’ la nyaaŋa ka Yisa daa ka Galili tiŋgbɔŋ ni na nti yihiri Naawuni lahibal’ suŋ waazu

¹⁵ yɛra, “Saha paaya, ka Naawuni nam gba mirina; dinzuɣu niŋmiya tuuba ka niŋ lahibal’ suŋ ŋɔ yɛda.”

¹⁶Yisa daa ti baɣisiri Galili Teeku chana nti nya Saimɔn min’ o tizo Anduru, ka bɛ labiri laŋa teeku ni, dama bɛ daa nyɛla kulipalinima.

¹⁷Ka o yɛli ba, “Doliya ma, ka n chɛ ka yi booni ninsalinim’ tiri Naawuni kaman yi ni gbahiri zahim shɛm maa.”

¹⁸Ka bɛ daa dii chɛ bɛ lansi maa ka dol’ o.

¹⁹Ka o daa lan tirisi tooni biɛla ha nti nya Zɛbidii bihi Jeemsi min’ o tizo Jɔn, ka bɛ be ŋariŋ ni liɣiri bɛ lansi.

²⁰Ka o dii boli bɛ gba, ka bɛ chɛ bɛ ba Zɛbidii min’ o tumtumdiba ŋariŋ maa ni ka dol’ o.

²¹Ka Yisa mini ba daa chaŋ ti kpe fɔntin’ shɛli din yuli booni Kapɛrinium la, ka Vuhim Dabisili dali daa ti paai ka o kpe Yɛhudianim’ jɛmbu duu nti gbaai niriba wuhibu.

²² O ni daa wuhiri ba shɛm maa daa gari bɛnkam wum li pam; dama o daa wuhiri ba mi kaman ninvuɣ’ so ŋun su fukumsi, ka pa ni Naawuni zaligubaŋdiba ni daa wuhiri ba shɛm la.

²³Di saha ka alizin’ biɛɣu ni daa ʒi do’ so zuɣu daa dii kpe bɛ jɛmbu duu maa ni na nti kuhi bɔhi,

²⁴“Ti min’ a bɔ ni, nyin’ Yisa Nazarɛt nir’ ŋɔ? A kamina ni a ti bahi ti yoli? M mi a ni nyɛ so: A nyɛla Naawuni Ninvuɣ’ Suŋ so o ni timna.”

²⁵Ka Yisa daa tahi alizin’ biɛɣu maa zuɣu, “Fom’ a noli ka wara!”

²⁶Ka alizin’ biɛɣu maa daa luhi doo maa, ka kuhi pam ka naanyi chaŋ ka chɛ o.

²⁷Ka di daa niŋ niriba maa zaa alahiziba pam ka bɛ bɔhiri taba, “Bɔ n-lee bɔŋɔ? Wuhiri palli m-bala! Doo ŋɔ mali yiko mi hal ka alizin’ biɛri ti deer’ o noli!”

²⁸Ka o yɛla daa dii moli gili Galili tiŋgbɔŋ maa ni zaa.

²⁹Di saha maa ka Yisa daa yi Yɛhudianim’ jɛmbu duu maa ni na, ka o mini Jeemsi ni Jɔn daa chaŋ ti kpe Saimɔn mini Anduru yiŋa.

³⁰Ka Saimɔn deempaɣa niŋgbuŋ daa bii ka o doya, ka bɛ daa dii yɛli Yisa o niŋgbun’ biisim maa yɛla.

³¹Ka Yisa daa chaŋ ti gbaag’ o nuu ni yiɣis’ o ʒili; ka o niŋgbun’ biisim maa dii maai, ka o yiɣisi niŋ ba saani.

³²Dindali maa zaawun’ yuŋ ka niriba daa tahi barinim’ mini alizin’ biɛri ni ʒi ninvuɣ’ shɛb’ zuɣu zaa Yisa sanna.

³³Ka tiŋ’ maa nim’ zaa daa laɣimna nti muɣi dunoli.

³⁴Ka o daa chɛ ka dɔro balibu kam ni mali ninvuɣ’ shɛb’ pam kpaŋ, ka daa kari alizin’ biɛri niriba pam zuɣu bahi, ka bi saɣi ni alizin’ biɛri maa yɛli shɛli, dama bɛ daa mi o ni nyɛ so.

³⁵Ka Yisa daa ti daŋ yibu nolɔɣu kukoli saha chaŋ mɔɣu ni ni o ti suhi Naawuni.

³⁶Ka Saimɔn min’ o tab’ la daa chani bɔr’ o shee

³⁷nti nya o yɛl’ o, “Sokam kul lihiri bɔrila a shee.”

³⁸Ka o yɛli ba, “Chɛliya ka ti chaŋ tin’ shɛŋa din be tooni ŋɔ ha ka n ti yihi waazu nimaani gba; dama di zuɣu ka n kana.”

³⁹ Ka o daa gɔri gindi Galili tiŋgbɔŋ ni zaa yihiri waazu Yɛhudianim’ jɛmbu duri ni, ka kariti alizin’ biɛri bahira.

⁴⁰Ka kɔŋlan’ so daa ka Yisa sanna nti damd’ o tooni m-balind’ o yɛra, “A yi di saɣi, a naan chɛ ka n kɔŋ’ ŋɔ naai ka n kpe n tab’ ni.

⁴¹Ka nambɔɣu daa gbaai Yisa, ka o teeg’ o nuu shih’ o ka yɛl’ o, “N saɣiya; di naama!”

⁴²Ka doo maa kɔŋ’ maa daa dii naai, ka o niŋgbuŋ lan lab’ di bebu ni zaa.

⁴³Ka Yisa kpah’ o zuɣu ni viɛnyɛliŋga, ka dii bah’ o ni o chama

⁴⁴ ka yɛl’ o, “Miri ka a yɛli so di yɛla; amaa cham’ ti zaŋ amaŋ’ wuhi maligumaana, ka mali sara shɛli Anabi Musa ni daa sab’ zali zaŋ chaŋ kɔŋ’ tibbu polo la; dina n-ni niŋ a kpaŋbu maa shɛhira niriba sani.”

⁴⁵Amaa ka doo maa daa chaŋ ti mol’ o kpaŋbu maa yɛla gili luɣilikam, dina n-daa chɛ ka Yisa ku lan tooi yi palɔni kpe tiŋ’ kam ni yaha, amaa ka kul bela mɔɣu ni, ka niriba yiri luɣ’ shɛlikam chan’ o sani.