Read Dagbani Maak 10 Bible Online

Maak 10 - Dagbani bible

Maak 10

¹Ka Yisa daa yiɣisi ni chaŋ Judia tiŋgbɔŋ ni mini Jɔɔdɛn mɔɣili duli ha yaha; ka salo pam daa laɣim o sanna ka o ti gbaai ba wuhibu kaman o ni daa yi pun niŋdi shɛm.

²Ka Farisiinim’ daa ka o sanna nti bɔri ni bɛ zahim o ka bɔh’ o, “Di luhiya ni nir’ yih’ o paɣa?”

³Ka o bɔhi ba, “Zaligu dini ka Anabi Musa daa lee zali ya?”

⁴ Ka bɛ yɛl’ o, “Anabi Musa daa chɛ ka doo sabirila amiliya lɔrigibu gbaŋ pɔi ka naanyi yih’ o paɣa.”

⁵Ka Yisa yɛli ba, “Yi halibiɛri zuɣu ka Anabi Musa daa zali ya lala.

⁶ Amaa di sabiya ni ninsalinim’ nambu piligu ni, Naawuni daa nam ba la doo mini paɣa.”

⁷Ka di lan sabi yɛli, “Daliri ŋɔ zuɣu ka doo ŋmaligir’ o ba min’ o ma sani n-zaŋd’ omaŋ’ tabind’ o paɣa,

⁸ ka bɛ niriba ayi maa be kaman ninvuɣ’ yino la. Lala zuɣu n yɛri ya mi, bɛ lan pala niriba ayi yaha.

⁹Dinzuɣu Naawuni ni laɣim shɛba, sal’ ŋun’ miri ka o woligi ba.”

¹⁰Yisa min’ o nyaandoliba ni daa ti lab’ bɛ yilikpɛrili na ka bɛ bɔh’ o yɛtɔɣ’ yini maa gbinni yaha.

¹¹ Ka o yɛli ba, “Ŋunkam yih’ o paɣa ka kpuɣi paɣ’ so tum zina o ni yihi paɣ’ so maa sani.

¹²Ka paɣ’ mi yi yi o yidan’ yiŋ’ kuli do’ so, o gba tum zina.”

¹³Ninvuɣ’ shɛb’ daa ti zaŋ bihi ka Yisa sanna ni o ti zaŋ o nuu pa bɛ zuɣu; ka o nyaandoliba daa tahiri bihinim’ maa zuɣu.

¹⁴Amaa Yisa ni daa nya lala maa ka di ku o suli, ka o yɛl’ o nyaandoliba maa, “Chɛliya ka bihi kam’ n sanna, ka di karitiya ba, dama Naawuni nam nyɛla bɛ tatabo dini.

¹⁵ Yɛlimaŋli ka n yɛri ya, ŋunkam bi deei Naawuni nam kaman bia ni deeri li shɛm ti ku kpe di ni.”

¹⁶Ka o daa kpuɣiri bihi maa buɣira, ka zaŋd’ o nuhi pari bɛ zuɣu niŋdi alibarika niŋdi bɛ ni.

¹⁷Ka Yisa daa yiɣisi gbaai chandi yaha, ka do’ so daa zɔna ti damd’ o tooni m-bɔh’ o, “Karimba suŋ, wula ka n lee yɛn niŋ ti nya nyɛvili din ka bahigu?”

¹⁸Ka Yisa bɔh’ o, “Bɔ n-niŋ ka a boli ma ninvuɣ’ suŋ? Ninvuɣ’ suŋ kani n-naɣ’ pahila Naawuni.

¹⁹ Amaŋmaŋ’ mi din be Naawuni fukumsi zaligunim’ puuni. Dina n-nyɛ: ‘Miri ka a ku ninsala; miri ka a niŋ zina; miri ka a zu; miri ka a di shɛhira kpɛma; miri ka a di zalinsi; ka tim’ a ba min’ a ma jilima.’ ”

²⁰Ka o yɛl’ o, “Karimba, m pun dolila dimbɔŋɔnim’ zaa m bilim ni hal ni wayo.”

²¹Ka Yisa lih’ o yurilim lihigu ka yɛl’ o, “Yɛl’ yini n-naɣ’ poog’ a: Cham’ ti kɔhi a ni mali shɛlikam zaa zaŋ ti nandaamba, ka kana ti doli ma, ka di chɛ ka a ti nya buni alizanda ni.”

²²Ka yɛtɔɣili ŋɔ daa saɣim o suhu pam ka o kuli ni suhugarigu, dama o daa nyɛla bundana.

²³Di saha ka Yisa daa ŋmaligi yul’ o nyaandoliba maa ti tuui taba ka yɛli ba, “Di to ni bundaannim’ kpe Naawuni nam ni!”

²⁴Ka o yɛtɔɣili maa daa gar’ o nyaandoliba maa pam. Ka o lan yɛli ba, “M bihi, nyamiya Naawuni nam ni kpɛbu ni to shɛm bɛn niŋ dunia ŋɔ daazichi naani sani!

²⁵Hal laakum shɛriga nyee ni kpɛbu mal’ asama gari bundan’ Naawuni nam ni kpɛbu.”

²⁶Ka di gari ba pam ka bɛ bɔhi taba, “Ka ŋuni n-lee ni tooi tiligi?”

²⁷Ka Yisa yuli ba ka yɛli ba, “Ninsalinim’ sani ka dimbɔŋɔ ku tooi nani, amaa pa ni Naawuni sani; dama Naawuni ŋun’ sani binshɛɣukam nandimi.

²⁸Di saha ka Pita yɛl’ o, “Nyama, ti chɛla binshɛɣukam ka dol’ a.”

²⁹Ka Yisa yɛl’ o, “Yɛlimaŋli ka n yɛri ya, ŋunkam chɛ o yili bee o mabi’ dɔbba bee o tizɔpaɣiba bee o ba bee o ma bee o bihi bee o puri, n mini n lahibal’ suŋ ŋɔ zuɣu

³⁰ni nya dimbɔŋɔnim’ zaa ha bukɔbigakɔbiga dunia ŋɔ ni. O ni nya yiya mini mabi’ dɔbba ni tizɔpaɣiba ni banima ni manima ni bihi ni puri m-pahi muɣisigu, ka ti lan nya nyɛvili din ka bahigu dunia shɛli din kanna ni.

³¹ Amaa niriba pam bɛn daŋ tooni ni ti leei nyaannima, ka bɛn be nyaaŋa mi ti leei toonnima.”

³²Yisa daa ti be o nyaandoliba tooni ka bɛ yi soli chani Jɛrusalɛm, ka di gar’ o nyaandoliba maa pam; ka dabiɛm daa kpe bɛn zaa dol’ o maa. Ka o lan zaŋ bɛ pinaayi maa yi kpaŋa nti piligi wuhiri ba yɛl’ shɛŋa din ti yɛn niŋ o

³³yɛra, “Nyamiya, ti chanila Jɛrusalɛm, ka bɛ ni ti zaŋ Daadam Bia niŋ maligumaaniba mini Naawuni zaligubaŋdib’ nuu ni, ka bɛ ni ti di o saria yɛli ni bɛ kum’ o, ka zaŋ o ti bɛn pa Yɛhudianima.

³⁴Ka bɛ ti mal’ o ansarisi ka fiɛb’ o, ka tuhi nintɔri vie o ka naanyi ku o; amaa di daba ata dali o ni ti neei kum ni.”

³⁵Ka Jeemsi mini Jɔn, Zɛbidii bihi la, daa ka Yisa sanna ti yɛl’ o, “Karimba, ti di bɔri ni a niŋ ti la ti ni bɔri shɛm ŋɔ.”

³⁶Ka o bɔhi ba, “Bɔ ka yi lee bɔri ni n niŋ tin ya?”

³⁷Ka bɛ yɛl’ o, “Chɛ ka ti ni yino ti ʒin’ a nudirigu polo, ka yino mi ʒin’ a nuzaa polo a nam ʒiishee.”

³⁸ Ka Yisa yɛli ba, “Yi ʒi yi ni suhiri shɛli maa. Yi ni ti tooi nyu binnyur’ shɛli din be m pipia la ni ka n yɛn nyu la? Ka tooi deei baptaizibu shɛli bɛ ni ti yɛn baptaizi ma la?”

³⁹Ka bɛ yɛl’ o, “Ti ni tooi.” Ka Yisa yɛli ba, “Yɛlimaŋli, yi ni ti nyu binnyur’ shɛli din be m pipia maa ni, ka ti deei baptaizibu shɛli bɛ ni ti yɛn baptaizi ma maa;

⁴⁰amaa n nudirigu mini n nuzaa polo ʒinibu maa, din’ pala man’ tibu, amaa Naawuni ni mal’ li zali ninvuɣ’ shɛba n-ni ti ʒin’ nimaani.”

⁴¹Ka o nyaandoliba pia la daa wum lala ka je suli niŋ Jeemsi mini Jɔn.

⁴² Ka Yisa daa boli ba na nti yɛli ba, “Yi mi ni zuliya kam zuɣulaannim’ kuuni bɛ nam, ka wɔɣira mi wuhiri tarimba bɛ kpiɔŋ ni nyɛ shɛm;

⁴³ amaa di ku niŋ lala yinim’ sani. Dinzuɣu ŋun bɔri ni o nyɛ wɔɣirili yi ni, ŋun’ zaŋm’ omaŋ’ lee yi zaa ha bia;

⁴⁴ka ŋun mi bɔri ni o gari yi zaa, ŋun’ zaŋm’ omaŋ’ lee yi zaa ha dabili.

⁴⁵Dama Daadam Bia gba bi kamina ni o ti ʒiya ka niriba tumdi tir’ o; amaa ni ŋun’ lee ti tumdi tiri ba, ka zaŋ o nyɛvili pa talima niriba pam nyɛviya zuɣu.”

⁴⁶Yisa min’ o nyaandoliba daa ti paai Jɛriko, ka bɛ mini salo pam daa ti yiri Jɛriko maa, ka Timius bia Baatimius ŋun daa nyɛ zoma, ka nyɛ barimaana ʒi sokpaŋa.

⁴⁷O ni daa ti wum ni Yisa Nazarɛt nira n-gariti maa ka o dii gbaai kuhiri yɛra, “Yisa, nyin’ ŋun nyɛ Naa Dauda yaaŋa ŋɔ, zom’ ma nambɔɣu!”

⁴⁸Ka niriba pam tah’ o zuɣu ni o foma; amaa ka o maan kuhi pam yɛli, “Nyin’ ŋun nyɛ Naa Dauda yaaŋa ŋɔ, zom’ ma nambɔɣu!”

⁴⁹Ka Yisa daa kpalim zani, ka yɛli ni bɛ bolim’ o na. Ka bɛ daa bol’ zom’ maa ka yɛl’ o, “Chɛ ka a suhu kpɛma! Yiɣisima, o boon’ a.”

⁵⁰Ka o pirig’ o chinchini sɔŋ, ka vaai yiɣisi chaŋ Yisa sani.

⁵¹Ka Yisa ti bɔh’ o, “Bɔ ka a lee bɔri ni n niŋ ti a?” Ka zom’ maa yɛl’ o, “Karimba, m bɔri ni a neela n nina ŋɔ ti ma.

⁵²Ka Yisa yɛl’ o, “To, cham’ a chandi! A yɛda niŋbu n-neeg’ a nina maa.” Ka o nina maa daa dii neei, ka o doli Yisa chana.