Read Dagbani Maak 12 Bible Online

Maak 12 - Dagbani bible

Maak 12

¹ Yisa daa piligi wuhiri niriba yɛtɔɣ’ ŋaha puuni yɛra, “Do’ so n-daa sa wain tihi ka sa gariche gil’ li, ka gbi bɔɣili zaŋ binshɛli din yɛn kahindi wain tihi maa wala kom zali bɔɣili maa ni, ka sa gara din du pam nimaani; ka zaŋ li niŋ padiriba nuu ni ni bɛ lihiri li hal nti kpuɣ’ o tihi puu maa atam ti o ka deei bɛ yɔri, ka daa go n-chaŋ tinshee.

²Ka puu maa atam kpuɣibu saha daa ti paai, ka o tim o yiŋbi’ so padiriba maa sani ni bɛ ti zaŋ o puu maa daatam shɛli ti o na.

³Ka bɛ daa gbaag’ o yiŋbia maa fiɛb’ o, ka kar’ o ka o kuli ni nuzaŋa.

⁴Ka o daa lan tim so, ka bɛ ti ŋme n-chib’ o zuɣu ka dih’ o vi.

⁵Ka o lan tim so yaha, ka bɛ daa ti ku ŋuna. Ka o lan tim niriba pam pahi, ka bɛ ti fiɛb’ bɛ shɛba, ka ku bɛ gba ni shɛba.

⁶Ka di ti kpalimla omaŋmaŋ’ biyurigu ko, ka o ti bahi tim o gba bɛ sani ka yɛli, ‘Bɛ ni ti ti m bia maa ŋun’ jilima.’

⁷Amaa ka padiriba maa daa ti yɛli taba, ‘O falidir’ la m-bɔŋɔ na; chɛliya ka ti ku o, ka fali maa leei ti dini.’

⁸Ka bɛ daa gbaag’ o ku n-vu o ti bahi tihi puu maa kpaŋ’ ha.

⁹Ka Yisa lan bɔhi ba, “Yi tɛhiya ni wula ka tihi puu maa lana lee yɛn niŋ? O ni kana nti ku padiriba maa ka zaŋ o tihi puu maa niŋ padir’ shɛb’ nuu ni.”

¹⁰Ka lan bɔhi ba, “Yi na bi karim di ni sabi Naawuni Kundi ni luɣ’ shɛli shɛm la yɛla? Di sabiya: ‘Kuɣ’ shɛli tammɛriba ni zaɣisi la n-yipa leei kuɣ’ gahindili.

¹¹ Ti Duuma niŋsim m-bala, ka di mali ti alahiziba.’ ”

¹²Ka Yisa ni daa ŋahi ninvuɣ’ shɛb’ ŋahili ŋɔ bɔri ni bɛ gbaag’ o, dama bɛ daa baŋya ni bɛna ka o ŋahi ŋahili maa dalim, amaa ka daa lee zɔri salo maa ka chɛ o ka chaŋ.

¹³Ka bɛ daa tim Farisiinim’ mini Naa Hɛrɔd nyaanzaanib’ shɛb’ Yisa sani ni bɛ ti puɣisi gbaag’ o o yɛtɔɣa ni.

¹⁴Ka bɛ daa chaŋ ti yɛl’ o, “Karimba, ti mi ni a nyɛla yɛlimaŋyɛra, ka bi zɔri sal’ kam nini, dama a bi zɔri niriba nini bɛ ni ʒe zaashe’ shɛŋa ni zuɣu, amaa ka wuhiri Naawuni soli ni yɛlimaŋli. Di luhiya ni ti yo farigu Naa Siiza sani bee di bi luhi?

¹⁵Ti yom’ li bee ti di yo?” Amaa ka Yisa baŋ bɛ bilikɔɣintali maa ka bɔhi ba, “Bɔ niŋ ka yi zahindi ma? Zaŋmiya laɣifu na ka n nya.”

¹⁶Ka bɛ zaŋ li na; ka o bɔhi ba, “Ŋun’ daanfooni mini sabbu n-lee be di ni ŋɔ?” Ka bɛ yɛl’ o, “Naa Siiza dini.”

¹⁷Ka Yisa yɛli ba, “Dinzuɣu Naa Siiza ni su shɛli, yin’ zaŋmiya li ti o; ka Naawuni mi ni su shɛli, yin’ zaŋmiya li ti ŋun’ Naawuni.” Ka o yɛligu maa daa gari ba pam.

¹⁸ Ka Sadusiinim’ bɛn daa yɛri ni kum ni neebu kani la daa ka Yisa sanna ti bɔh’ o,

¹⁹ “Karimba, Anabi Musa daa sab’ zali ni so biɛli yi kpuɣi paɣa ka na bi zaŋ o dɔɣ’ bia ka kpi ka chɛ o, o tizo ŋun’ kpuɣim’ o pakoli maa dɔɣ’ bihi ti o biɛli maa.

²⁰To, mapuuni bih’ ayopɔin n-daa be, ka bikpɛm’ sani ti kpuɣi paɣa, ka bi zaŋ o dɔɣ’ bia ka kpi.

²¹Ka ŋun pa o zuɣu kpuɣ’ o pakoli maa, ka gba bi zaŋ o dɔɣ’ bia ka kpi; ka ŋun pah’ ata gba lala;

²²ka bɛ mabih’ ayopɔin maa zaa daa kpuɣ’ o, ka bi zaŋ o dɔɣ’ bihi ka kpi; di nyaaŋa ka paɣ’ maa gba daa kpi.

²³Dinzuɣu kum ni neebu dali, ŋun’ paɣa n-lee ni ti nyɛ o? Dama bɛ niriba ayopɔin maa zaa daa kpuɣ’ o mi.”

²⁴Ka Yisa yɛli ba, “Yi ʒi din be Naawuni Kundi ni, ka bi lan mi Naawuni yiko gba. Lala zuɣu ka yi chirim maa.

²⁵Niriba yi ti neei kum ni, bɛ bi lan yɛn kpuɣiri paɣiba bee n-zaŋdi bɛ bipuɣinsi tiri dɔbba; bɛ ti kul yɛn bemi kaman malaikanim’ bɛn be alizanda ni la.

²⁶ Ka di yi nyɛla kpiimba kum ni neebu yɛla, yi na bi karim Anabi Musa ni daa sabi Naawuni ni daa tɔɣis’ o yɛtɔɣa tutuɣu ni yɛli shɛm la yɛla? O ni daa yɛli shɛm m-bɔŋɔ: ‘Mani n-nyɛ Ibrahimma mini Yisahaku ni Yaakubu Naawuni.’

²⁷Naawuni pala kpiimba Naawuni, amaa o nyɛla nyɛviyanim’ Naawuni. Yi shiri chirimya pam!”

²⁸ Ka Naawuni zaligubaŋdiba ni yino daa kana nti wum ka Yisa garigi bɛn daa ŋmɛr’ o naŋgbankpeeni maa bɔhigu viɛnyɛliŋga ka bɔh’ o, “Naawuni fukumsi zaligunim’ ni, dini n-lee nyɛ kpɛma?”

²⁹Ka Yisa yɛl’ o, “Fukumsi zaligunim’ zaa ni, din nyɛ kpɛma nyɛla, Izraɛlnima, wummiya! Ti Duuma Naawuni nyɛla Duuma yino.

³⁰ Yum’ a Duuma Naawuni ni a suhu zaa min’ a shia zaa ni a tɛha zaa ni a kpiɔŋ tariga.

³¹ Ka din pa di zuɣu mi nyɛla, Yum’ a ʒiʒiinikpee kaman amaŋmaŋ’ la. Ka fukumsi zaligu shɛl’ lan kani kpɛm’ gari dimbɔŋɔnima.”

³² Ka Naawuni zaligubaŋda maa yɛl’ o, “Karimba, achiika! A yɛli yɛlimaŋli; dama Naawuni yino n-shiri beni, ka Naawuni so lan kani pah’ o zuɣu.

³³ Ka nir’ yi yuri Naawuni ni o suhu zaa min’ o tɛha zaa ni o kpiɔŋ tariga, ka yur’ o ʒiʒiinikpee kaman omaŋmaŋ’ la, di gari sara malibu balibu kam.”

³⁴Yisa ni daa nya ka o garig’ o yɛm garigibu maa ka o yɛl’ o, “A mini Naawuni nam bi wɔɣ’ ni taba.” Di nyaaŋa ka so daa bi lan buɣisi ni o bɔhi Yisa bɔhigu shɛli yaha.

³⁵Yisa daa ti be Naawuni jɛmbu duu wuhiri niriba ka daa ti bɔhi ba, “Wula ka Naawuni zaligubaŋdiba lee ni tooi yɛli ni Masia nyɛla Naa Dauda yaaŋa?

³⁶ Dama Naawuni Shia Kasi yiko ni Naa Dauda maŋmaŋ’ daa yɛliya: ‘Ti Duuma yɛli n Duuma: Ʒinimi n nudirigu polo hal ka n ti nyaŋ a dimnima ti a ka a du n-tam bɛ zuɣu.’

³⁷Ka Naa Dauda maŋmaŋ’ yi daa bol’ o o Duuma, di chaŋ wula ka o ni lan nyɛ ŋun’ Naa Dauda yaaŋa?” Ka Yisa yɛligu maa daa paligi salo maa suhuri pam.

³⁸Ka o yɛli ba o wuhibu maa ni, “Miriya Naawuni zaligubaŋdib’ bɛn yuri binyɛr’ wɔɣila yɛri gɔra, ka lan yuri ni niriba puhiri ba dahi ni la,

³⁹ka yuri ʒiishe’ viɛla ni ʒinibu bɛ jɛmbu duri ni, ka yuri jilima ʒiishɛhi ʒinibu bɛ churi puhibu ni,

⁴⁰ka lan fari pakoya yinsi, ka suhiri Naawuni yuuri ni niriba tɛhi ni bɛ nyɛla ninvuɣ’ suma la. Bɛmbɔŋɔnim’ ni ti nya tibidarigibo pam!”

⁴¹Ka Yisa daa ti ʒini Naawuni jɛmbu duu miri bɛ liɣiri tɔhibu shee n-yuuni niriba ni tɔhiri liɣiri shɛm; ka bundaannim’ tɔhiri pampam.

⁴²Ka pako’ faralaan’ so daa kana nti tɔhila pihinu diba ayi din nyɛ kɔbo.

⁴³Ka o bol’ o nyaandoliba na ti yɛli ba, “Yɛlimaŋli ka n yɛri ya, pako’ faralan’ ŋɔ tɔhiya gari bɛnkam zaa tɔhi liɣiri maa;

⁴⁴dama bɛn’ zaa piila bɛ bun’ ni na ti tɔhi, amaa pakoli ŋɔ ŋun’ zaŋla o duu ni o yiŋ’ zaa na ti tɔhi.”