Read Dagbani Maak 16 Bible Online

Maak 16 - Dagbani bible

Maak 16

¹Ka Vuhim Dabisili dali maa daa ti gari, ka Mariama ŋun daa yi Magdala na la mini Jeemsi ma Mariama ni Salomi daa da tulaale viɛlli ni bɛ chaŋ siliga maa ni ti mihi Yisa.

²Bakɔi piligu dali asibaasi wuntampuhili saha ka bɛ daa chaŋ siliga maa gbini.

³Bɛ ni daa chani maa ka bɛ gbaai tab’ bɔhibu, “Ka ŋuni n-lee ti yɛn biligi kuɣ’ shɛli din yo siliga maa nol’ la ti ti?

⁴Kuɣili maa daa galisiya pam, amaa ka bɛ daa ti paai nya ka kuɣili maa pun biligimi doya.

⁵Ka bɛ daa kpe siliga maa ni nti nya ka nachimbil’ so ye binyɛr’ piɛlli ʒi bɛ nudirigu polo, ka di gari ba pam.”

⁶Ka o yɛli ba, “Di chɛliya ka di gari ya; m mi ni yi bɔrila Yisa Nazarɛt do’ so bɛ ni daa kpahi tabili dapulli zuɣu la. O lan ka kpe, o neei kum ni; nyamiya bɛ ni daa sɔɣ’ o luɣ’ shɛli.

⁷ Amaa chamiya ti yɛl’ o nyaandoliba mini Pita ni Yisa daŋ yi tooni chaŋ Galili; nimaani ka yi ni ti nya o kaman o ni daa pun yɛli ya shɛm la.”

⁸Ka bɛ daa ŋmaligi siliga maa gbini zo yomyom, dama di daa gari ba mi pam ka bɛ ni sɔhira; bɛ mi daa bi yɛli so shɛli sol’ ni, dama dabiɛm daa kpe ba. [

⁹Yisa ni daa neei kum ni bakɔi piligu dali asibaasi maa o daa tuui yila Mariama ŋun daa yi Magdala na la zuɣu. Ŋuna n-nyɛ Yisa ni daa kari alizin’ biɛri ayopɔin so zuɣu la.

¹⁰Ka o daa chaŋ ti yɛli Yisa nyaandoliba bɛn daa laɣim ʒiya kumdi ka fabindi la ni Yisa neei kum ni.

¹¹Amaa bɛ ni daa wum ni o neei kum ni, ka Mariama ŋun daa yi Magdala na la nya o maa, bɛ daa bi niŋ li yɛda.

¹²Dimbɔŋɔ nyaaŋa ka Yisa biɛhigu daa taɣi, ka o lan yi o nyaandoliba ayi bɛn daa be sol’ ni kuni bɛ ya zuɣu.

¹³Ka bɛ daa labi nti yɛli bɛ nyaandol’ tab’ la, amaa ka bɛ daa bi niŋ bɛ gba yɛda.

¹⁴Di nyaaŋa ka Yisa daa ti yi o nyaandoliba piniyini bɛn daa kpalim la zuɣu, ka bɛ ʒimi diri bindirigu. Ka o daa galim ba bɛ ni nyɛ suhutunanim’ mini bɛ biɛhiŋ zuɣu, dama bɛ daa bi niŋ ninvuɣ’ shɛb’ bɛn daa nya o o kum ni neebu nyaaŋa la yɛligu yɛda.

¹⁵ Ka Yisa daa yɛl’ o nyaandoliba maa, “Chamiya gili dunia ŋɔ zaa yihi tiliginsim’ lahibal’ suŋ ŋɔ waazu ti sokam.

¹⁶Ka ŋunkam ti niŋ yɛda ka deei baptaizibu ni tiligi, amaa ŋun ti bi niŋ yɛda ni mali taali.

¹⁷Shihira ŋɔ ni ti be ninvuɣ’ shɛb’ bɛn niŋ lahibal’ suŋ maa yɛda yɛligu ni: Bɛ ni ti mali n yuli karit’ alizin’ biɛri, ka ni ti tɔɣisi tinzun yɛligu balibu kam yɛtɔɣa.

¹⁸ Bɛ yi ti gbahi tinvura bee n-nyu binshɛli din nyɛ lɔɣu, di ku niŋ ba shɛli; ka bɛ ni ti zaŋ bɛ nuhi pa barinim’ zuɣu ka bɛ kpaŋ.”

¹⁹Ti Duuma Yisa ni daa tɔɣisi ba yɛtɔɣa ŋɔ naai nyaaŋa ka o labi alizanda ni nti ʒini Naawuni nudirigu polo.

²⁰Ka o nyaandoliba maa daa gindi luɣ’ shɛlikam zaa yihiri waazu, ka ti Duuma daa ʒe bɛ nyaaŋa n-chɛ ka shihir’ shɛŋa din wuhiri ni lahibal’ suŋ maa shiri nyɛla yɛlimaŋli niŋda.]