Read Dagbani Maak 2 Bible Online

Maak 2 - Dagbani bible

Maak 2

¹Ka di daa niŋ daba ayi ka Yisa lan lab’ Kapɛrinium ka di mol’ gili ni o lab’ yiŋ’ na.

²Ka salo pam dii laɣimna hal ka palichee ti lan ka yili maa ni, ka so daa naan ku tooi lan miri dunol’ ni gba, ka Yisa yihiri ba waazu.

³Ka niriba anahi daa zaŋ gbalikpimalan’ so niŋ amaŋka ni ʒi o ka Yisa sanna.

⁴Ka salo maa galisim zuɣu daa chɛ ka bɛ kɔŋ bara maa zaŋ paai Yisa sani, ka daa dula duu maa zuɣusaa nti chib’ voli Yisa zuɣusaa dɛde. Bɛ ni daa chib’ voli maa, ka bɛ zaŋ bara maa mini amaŋka maa siɣisi li ti sɔŋ tiŋa.

⁵Yisa ni daa nya ka bɛ niŋ o yɛda shɛm maa ka o yɛli bara maa, “M bia, n chɛ a daalahichi paŋ a.”

⁶Di saha ka Naawuni zaligubaŋdi’ shɛb’ daa ʒi nimaani m-bɔhiri bɛ suhuri yɛra,

⁷“Bɔzuɣu ka doo ŋɔ tɔɣisiri lala? O mɔri Naawuni! Ŋuni n-lee ni tooi chɛ niriba daalahichi paŋ ba ka pa ni Naawuni kɔŋko?”

⁸Tɛha maa ni daa be bɛ suhuri ni saha shɛli maa ka Yisa baŋ li ka dii bɔhi ba, “Wula ka yi bɔhiri yi suhuri dimbɔŋɔnim’ zuɣu?

⁹Yɛla ayi ŋɔ sunsuuni, dini n-lee be asama ni nir’ yɛli: A yi yɛli gbalikpimalana ni a chɛ o daalahichi paŋ o bee a yi yɛl’ o ni o yiɣisim’ zaŋ o daamaŋka chaŋ?”

¹⁰Ka lan yɛli ba, “Amaa m bɔrimi ni yi baŋ ni Daadam Bia mali yiko din chɛri niriba daalahichi paŋdi ba dunia ŋɔ ni.” Di saha ka o daa ŋmaligi yɛli gbalikpimalan’ maa,

¹¹N yɛr’ a mi, “Yiɣisim’ zaŋ a daamaŋka maa kuli!”

¹²Ka o dii yiɣisi zaŋ o daamaŋka maa yi bɛ zaa ninni. Ka di daa niŋ bɛ zaa alahiziba pam, ka bɛ paɣiri Naawuni yɛra, “Ti na ʒi n-nya alahiziba tuuni ŋɔ tatabo.”

¹³Ka Yisa daa lan lab’ teeku nol’ ni, ka salo maa zaa lan laɣimna nti gil’ o ka o wuhiri ba.

¹⁴Ka o daa tirisi tooni ha nti nya Alifius bia Lɛvi, ka o ʒi farigu deebu shee. Ka Yisa yɛl’ o, “Yiɣisim’ doli ma!” Ka o yiɣisi dol’ o.

¹⁵Ka bɛ daa chaŋ ti kpe Lɛvi maa yiŋa, ka Yisa min’ o nyaandoliba ni farigudeeriba pam ni alahichinim’ laɣim ʒini diri bindirigu, dama bɛ pam n-daa doli Yisa na.

¹⁶Ka Naawuni zaligubaŋdiba bɛn nyɛ Farisiinim’ ni daa nya ka Yisa mini alahichinima ni farigudeeriba laɣim diri maa, ka bɛ bɔh’ o nyaandoliba, “Bɔzuɣu ka o mini farigudeeriba ni alahichinim’ laɣim timdi dira ka nyura?”

¹⁷Ka Yisa daa wum lala maa ka yɛli ba, “Bɛn mal’ alaafee bi bɔri dɔɣite naɣila bɛn biɛra; pa wuntizɔriba zuɣu ka n kana, amaa alahichinim’ tuuba niŋbu zuɣu ka n kana.”

¹⁸Jɔn Baptaizira nyaandoliba mini Farisiinim’ daa ti lɔri noli; ka ninvuɣ’ shɛb’ kana nti bɔhi Yisa, “Bɔ niŋ ka Jɔn nyaandoliba mini Farisiinim’ nyaandoliba lɔri noli, ka nyin’ nyaandoliba bi lɔra?”

¹⁹Ka Yisa bɔhi ba, “Aŋgo zɔnim’ ni tooi lo noli aŋgo ni be bɛ sani saha shɛli? Aŋgo ni na be bɛ sani maa, bɛ ku tooi lo noli.

²⁰Amaa saha kanna ka bɛ ni ti yihi aŋgo maa bɛ sani, dindali maa ka bɛ ni ti lo noli.”

²¹Ka o daa lan ŋahi ba ŋaha ŋɔ yɛli, “So ku saɣi zaŋ tan’ palli din na bi tiri liɣi binyɛr’ kurili, dama o yi niŋ lala, tan’ palli maa ni yaai di ko cheei ka chɛ binyɛr’ kurili maa, ka di maan chɛhi pahi.

²²So mi ku saɣi zaŋ da’ palli le dakol’ kura ni, dama o yi niŋ lala da’ palli maa ni chɛhichɛhi kol’ kura maa, ka dam maa bahi yoli, ka kola maa gba saɣim. Dinzuɣu bɛ zaŋdi da’ palli lɛrila kol’ pala ni.”

²³ Di daa ti lu Vuhim Dabisili dali, ka Yisa min’ o nyaandoliba tim so puu ni garita; bɛ ni daa chani maa ka o nyaandoliba maa piligi kabisiri chi chana.

²⁴Ka Farisiinim’ bɔh’ o, “Nyama! Bɔzuɣu ka bɛ tumdi din chihiri Vuhim Dabisili dali?”

²⁵Ka Yisa bɔhi ba, “Yi na ʒi n-karim Naa Dauda ni daa niŋ shɛm kum ni daa ti wum o mini bɛn be o sani ka bɛ bɔri bindirigu la yɛla?

²⁶ Abiata ni daa nyɛ maligumaaniba zuɣulana saha shɛl’ la ka ŋun’ Naa Dauda daa chaŋ ti kpe Naawuni jɛmbu duu nti ŋub’ bɔrɔbɔro shɛŋa din daa chihiri ni so ŋubi naɣila maligumaaniba kɔŋko la, hal ka daa pii li nti ti bɛn daa be o sani la?”

²⁷ Ka o daa lan yɛli ba, “Naawuni zali Vuhim Dabisili dali tila ninsalinima, amaa o bi nam ninsalinim’ ti Vuhim Dabisili dali.

²⁸Dinzuɣu Daadam Bia n-su Vuhim Dabisili dali gba.”