Read Dagbani Maak 5 Bible Online

Maak 5 - Dagbani bible

Maak 5

¹Yisa min’ o nyaandoliba ni daa du Galili Teeku maa duli m-paai Gɛrasa tiŋgbɔŋ ni,

²ka o ti yi ŋariŋ maa ni na, ka alizin’ biɛɣu ni daa ʒi do’ so zuɣu yi gbala polo na tuhir’ o soli.

³O daa kul bela gbala maa shee, ka so daa naan ku tooi zaŋ hal bandi m-ba o ʒili luɣ’ yini gba.

⁴Bɛ daa pun bar’ o la bandi ka lɔr’ o zoligɔnima, ka o chihiri li ka kabiri bandi maa; ka so ku tooi maag’ o nini.

⁵Yuŋ ni wuntaŋ’ ni zaa o daa kul bela gbala maa shee mini zoya zuɣu kuhiri ka mali kuɣa jɛr’ omaŋa.

⁶O ni daa ti nya Yisa ka o be katiŋa, ka o guui ti damd’ o tooni

⁷kuhi pam yɛli, “M min’ a bɔ ni, nyin’ Yisa Zallakudura Naa Bia? N suhir’ a Naawuni yuli zuɣu, di nahim ma!”

⁸Dama Yisa daa pun yɛl’ o mi, “Nyin’ alizin’ biɛɣu ŋɔ, yim’ doo maa ni!”

⁹Ka Yisa bɔh’ o, “A yuli?” Ka o garigi yɛl’ o, “N yuli m-booni Bɔbigu, dama ti galisiya.”

¹⁰Ka o daa balim Yisa pam ni o di kari ba yihi tiŋgbɔŋ maa ni.

¹¹Kuruchu bɔbigu daa ʒe zol’ luɣili ni gbiri binyara ŋubira;

¹²ka alizin’ biɛri maa daa balim o yɛli, “Chɛ ka ti chaŋ ti kpe kuruchunim’ ŋɔ ni.”

¹³Ka o daa bahi ba noli. Ka alizin’ biɛri maa daa yi doo maa ni chaŋ ti kpe kuruchunim’ maa ni; ka bɛ daa dii zo wuriwuri nti sirigi kuligbiriŋ ni ha faai lu teeku ni, ka kom di ba. Kuruchunim’ maa daa nyɛla kaman tusaayi laasabu.

¹⁴Ka bɛn daa guli kuruchunim’ maa zo n-chaŋ ti yɛli fɔnnim’ mini tiŋkpannim’ dinkam daa niŋ maa zaa. Ka bɛ daa kana ni bɛ ti nya din niŋ maa.

¹⁵Ka bɛ daa paai Yisa sani nti nya alizin’ biɛri ni daa ʒi do’ so zuɣu maa, ka o leela ninvuɣ’ maŋli ye situra ʒiya; ka dabiɛm daa kpe ba pam.

¹⁶Ka ninvuɣ’ shɛb’ bɛn daa nya din niŋ maa yɛli sokam din daa niŋ alizin’ biɛri ni daa ʒi do’ so zuɣu maa mini kuruchunim’ maa.

¹⁷Ka bɛ daa balim Yisa ni o yim’ bɛ tiŋgbɔŋ maa ni.

¹⁸Ka o daa kpe ŋariŋ ni ni o chaŋ, ka alizin’ biɛri ni daa zo ka chɛ do’ so maa balim o ni o chɛ ka o dol’ o chaŋ.

¹⁹Amaa ka Yisa daa bi saɣi ka yɛl’ o, “Lab’ kuli nti yɛl’ a yiŋnim’ a Duuma ni zo a nambɔɣu ka tum tuun’ kar’ shɛli ti a ŋɔ yɛla.”

²⁰Ka o daa kuli n-daa ti chaŋ tin’ shɛli din yuli booni Tinsi Pia [1] tiŋgbɔŋ ni la nti moli Yisa ni daa tum o tuun’ kar’ shɛli maa yɛla zaa gili; ka di daa niŋ sokam zaa alahiziba.

²¹Yisa ni daa kpe ŋariŋ maa ni lan baai du duli ha nti ʒe teeku noli ka salo pam daa lan laɣim o sanna.

²²Ka Yɛhudianim’ jɛmbu duu zuɣulan’ so ŋun yuli daa booni Jairus daa ka o sanna nti damd’ o tooni

²³m-balind’ o yɛra, “M bipuɣiŋga n-tarigi yɛn kpi. Kamina nti zaŋ a nuhi pa o zuɣu ka o kpaŋ n-lan niŋ nyɛvililana yaha.”

²⁴Ka Yisa daa dol’ o chana. Ka salo daa muɣ’ o sani kabiri dol’ o.

²⁵Ka paɣital’ dɔro ni daa mali paɣ’ so yuun’ pinaayi daa be bɛ ni.

²⁶O daa di wahala pam timanim’ sani n-saɣim o ni daa mali shɛlikam zaa ha, ka di bi niŋd’ o soochi ka kul maan pahirimi.

²⁷O daa pun wum Yisa yɛla, ka daa gil’ o nyaaŋa nti ŋaɣisi kpe salo maa ni nti shihi o binyɛrigu,

²⁸dama o daa yɛli o suhu ni, “Hal n yi kul shihi o binyɛrigu gba, n ni nya alaafee.”

²⁹Ka o dɔro maa daa dii naai, ka o baŋ o niŋgbuŋ ni ni o nya alaafee.

³⁰Di saha maa ka Yisa daa dii baŋ ni yiko shɛli yi o ni, ka ŋmaligi salo maa ni bɔhi, “Ŋuni n-lee shihi m binyɛrigu ŋɔ?”

³¹Ka o nyaandoliba bɔh’ o, “A ni nya ka salo daar’ a ŋ-ŋɔ, ka a ti bɔhi ni ŋuni n-lee shih’ a?”

³²Ka o daa yuuni salo maa gindi ni o nya ŋun niŋ lala maa.

³³Paɣ’ maa ni daa baŋ din niŋ o maa, ka dabiɛm kpe o pam ka o ni dii sɔhira, ka o chaŋ ti gbani Yisa tooni yɛl’ o din niŋ o maa zaa.

³⁴Ka Yisa yɛl’ o, “M bia, a yɛda niŋbu n-chɛ ka a kpaŋ; kulimi ni suhudoo, a yipa kpaŋya zaa.”

³⁵O noli daa na bi lu tiŋa, ka ninvuɣ’ shɛb’ daa yi Yɛhudianim’ jɛmbu duu zuɣulan’ maa yiŋ na nti yɛl’ o, “A bipuɣiŋga maa bahiya. Ka wula ka a na kul doli suhiri karimba maa?”

³⁶Yisa daa bi be kaman o wum bɛ ni yɛli shɛm maa, ka naɣ’ yɛlila Yɛhudianim’ jɛmbu duu zuɣulan’ maa, “Di chɛ ka a suhu zɔhira; kul niŋmila yɛda.”

³⁷O daa bi saɣi ka so dol’ o pahila Pita mini Jeemsi ni Jeemsi tizo Jɔn.

³⁸Ka bɛ daa mali nti paai jɛmbu duu zuɣulan’ maa yiŋa, ka o nya ka salo be nimaani yarindi ka mɔhiri vuri, ka kumdi ka fabinda.

³⁹O ni daa kpe yili maa ni ka o bɔhi ba, “Bɔ n-niŋ ka yi kumdi ka fabindi lala? Bipuɣiŋga maa bi kpi, amaa o gbihirimi.”

⁴⁰Ka bɛ daa lar’ o. Amaa ka o daa kari bɛ zaa yihi, ka zaŋ bipuɣiŋga maa ba min’ o ma pahi bɛn daa be o san’ la zuɣu kpe bipuɣiŋga maa ni daa do’ du’ shɛli ni maa

⁴¹nti gbaag’ o nuu ka yɛl’ o, “Talita kumi!” Di gbinni nyɛla, “Bipuɣiŋga, n yɛr’ a mi, yiɣisima!”

⁴²Ka o daa dii yiɣisi zani chana, dama o daa nyɛla yuun’ pinaayi bia, ka di daa niŋ ba alahiziba pam ti yaɣi.

⁴³Ka Yisa daa saɣisi ba yɛli ni bɛ di chɛ ka so wum li; ka yɛli bipuɣiŋga maa ba min’ o ma ni bɛ tim’ bia maa bindirigu ka o di.