Read Dagbani Maak 8 Bible Online

Maak 8 - Dagbani bible

Maak 8

¹Ka salo pam daa ti lan laɣim ka Yisa sanna, ka daa ti lan ka bindirigu din ni di, ka o daa bol’ o nyaandoliba na ti yɛli ba,

²“Salo ŋɔ yɛla niŋ ma nambɔɣu pam, dama zuŋɔ daba ata m-bɔŋɔ ka bɛ kul be n sani ka lan ka bindirigu dira.

³Bɛ ni shɛb’ yila katinsi na, dinzuɣu n yi chɛ ka bɛ kuli ni kum bɛ ni ti tarigi sol’ ni.”

⁴Ka o nyaandoliba maa bɔh’ o, “Ka ya polo ka nir’ lee yɛn nya bindirigu mɔɣu ŋɔ ni ti niriba ŋɔ zaa ka bɛ di n-tiɣi?”

⁵Ka o bɔhi ba, “Bɔrɔbɔro kpila ala ka yi lee mali?” Ka bɛ yɛl’ o, “Diba ayopɔin.”

⁶Ka o yɛli salo maa ni bɛ ʒinim’ tiŋa; ka daa zaŋ bɔrɔbɔro kpila ayopɔin maa niŋ alibarika niŋ di ni, ka ŋmahiŋmahi li ti o nyaandoliba maa ni bɛ zaŋ li tari salo maa; ka bɛ daa zaŋ li tari salo maa zaa.

⁷O nyaandoliba maa daa mali zim’ bihi biɛla pahi, ka o daa zaŋ di gba niŋ alibarika niŋ di ni ka yɛli ba ni bɛ zaŋm’ li tari ba pahi.

⁸Ka bɛ zaa ha daa di li tiɣi, ka bɛ daa laɣisi bɔrɔbɔro chɛhi mini zimburisa din guui pal’ piɛr’ ayopɔin.

⁹Bɛn daa di li maa daa nyɛla kaman niriba tusaanahi laasabu.

¹⁰Di nyaaŋa ka Yisa daa chɛbisi ba, ka o min’ o nyaandoliba dii kpe ŋariŋ m-baai du teeku duli chaŋ Dalimanuta tiŋgbɔŋ ni.

¹¹ Ka Farisiinim’ shɛb’ daa ka Yisa sanna nti ŋmɛr’ o naŋgbankpeeni m-bɔri ni bɛ zahim o ka o wuhi ba alizanda ni shihirili.

¹² Ka o daa siɣim pam ka yɛli, “Bɔ n-lee chɛ ka ʒiɛmani ŋɔ nim’ bɔri shihirili? Yɛlimaŋli ka n yɛri ya, yi ʒiɛmani ŋɔ nim’ ku nya shihirili hal baabiɛla!”

¹³Ka o daa chɛ ba, ka lan kpe ŋariŋ maa m-baai du dul’ din’ la ha.

¹⁴Yisa nyaandoliba daa ti tam bɔrɔbɔro ʒibu yɛla, ka malila bɔrɔbɔro kpil’ yini kɔŋko bɛ ŋariŋ ni.

¹⁵ Ka o daa ti kpahi bɛ zuɣu ni yɛli, “Miriya Farisiinim’ dabindi mini Naa Hɛrɔd dabindi la.”

¹⁶Ka bɛ daa niŋ tab’ saawara yɛra, “Ti ni bi ʒi bɔrɔbɔro la na zuɣu m-bala.”

¹⁷Ka Yisa daa baŋ bɛ ni tɛhi shɛm ka yɛl’ lala maa ka ŋmaligi bɔhi ba, “Bɔ n-niŋ ka yi niŋdi tab’ saawara yi ni bi ʒi bɔrɔbɔro maa na zuɣu? Yi nini na kul bi neei bee yi na kul bi baŋ? Yi nyɛla suhutunanima?

¹⁸ Yi malila nina din bi nyara? Ka mali tiba din bi wumda? Ka yi bi lan teei yaha?

¹⁹N ni daa ŋmahi bɔrɔbɔro kpila anu dihi niriba tusaanu la, piɛr’ ala ka yi daa lee laɣisi di zaɣ’ chɛhi pali?” Ka bɛ yɛl’ o, “Piɛri pinaayi.”

²⁰Ka o lan bɔhi ba, “Ka n ni daa ŋmahi bɔrɔbɔro kpila ayopɔin shɛli dihi niriba tusaanahi la, piɛr’ ala ka yi daa lee laɣisi di zaɣ’ chɛhi pali?” Ka bɛ yɛl’ o, “Piɛr’ ayopɔin.”

²¹Ka o lan bɔhi ba pahi, “Ka daɣila yi na kul bi baŋ?”

²²Yisa min’ o nyaandoliba daa ti paai Bɛtisaida, ka bɛ zaŋ zoon’ so tah’ o sanna nti balim o ni o zaŋ o nuu shih’ o.

²³Ka o daa gbaai zom’ maa nuu ni vo o yi tiŋ’ maa tariga nti tuhi nintɔri ta o nina, ka zaŋ o nuhi shih’ o ka bɔh’ o, “A nya shɛli?”

²⁴Ka zom’ maa kpuɣ’ o zuɣu lihi ka yɛli, “N nya niriba ka bɛ chana; amaa bɛ ŋmanila tihi.”

²⁵Di nyaaŋa ka Yisa daa lan zaŋ o nuhi shihi o nina maa; ka zom’ maa lan neeg’ o nina lihi yaha, ka o nina maa dii neei zaa, ka o nyari binshɛɣukam viɛnyɛliŋga.

²⁶Ka Yisa chɛbis’ o ni o kulima ka yɛl’ o, “Di lan lab’ tiŋ’ ŋɔ ni.”

²⁷Ka Yisa min’ o nyaandoliba daa chani gindi tiŋkpan’ shɛŋa din be Siizaria Filipai tiŋgbɔŋ ni; bɛ ni daa chani maa ka o ti bɔhi ba, “Niriba lee yɛri ni n nyɛla ŋuni?”

²⁸ Ka bɛ yɛl’ o, “Shɛb’ yɛri ni a nyɛla Jɔn Baptaizira, ka shɛb’ yɛri ni a nyɛla Anabi Ilaija, ka shɛb’ mi yɛri ni a nyɛla anabinim’ la ni yino.”

²⁹ Ka o ŋmaligi bɔhi ba, “Ka yi mi lee yɛli ni n nyɛla ŋuni?” Ka Pita garigi yɛl’ o, “A nyɛla Masia.”

³⁰Ka o daa kpahi bɛ zuɣu ni yɛli ni bɛ di yɛli so di yɛla.

³¹Ka Yisa daa piligi wuhir’ o nyaandoliba maa yɛra, “Faashee Daadam Bia nya wahala pam, ka tiŋ’ maa ni kpamba mini maligumaaniba kpamba ni Naawuni zaligubaŋdib’ zaa ti zaɣis’ o, ka chɛ ka bɛ ku o, amaa di daba ata dali o ni ti neei kum ni.”

³²O daa kul kahigila dimbɔŋɔ gbinni zaa viɛnyɛliŋga wuhi ba. Ka Pita daa bol’ o yi kpaŋa nti kpahir’ o zuɣu ni.

³³Di saha ka Yisa ŋmaligi yul’ o nyaandoliba maa, ka kpahi Pita zuɣu ni yɛli, “Sintani ŋɔ! Garimi n nyaaŋa! Dama a bi tɛhiri yɛl’ shɛŋa din nyɛ Naawuni dini yɛla, amaa din nyɛ salinim’ dini yɛla ka a tɛhira.”

³⁴ Ka Yisa daa boli salo pah’ o nyaandoliba zuɣu na nti yɛli ba, “Ŋunkam bɔri ni o doli ma, ŋun’ zaɣisim’ omaŋa ka kpuɣ’ o dapulli buɣi doli ma.

³⁵ Dama ŋunkam tiligir’ o nyɛvili ni ti kɔŋ li, ka ŋunkam mi kɔŋ o nyɛvili m mini n lahibal’ suŋ ŋɔ zuɣu ni ti lan nya li.”

³⁶Ka bɔhi ba, “Ka sal’ yi lee nya dunia ŋɔ binshɛɣukam zaa ka ti kɔŋ o nyɛvili, nyɔ’ bɔ ka o lee di

³⁷bee bin’ bɔ ka sal’ lee yɛn zaŋ o nyɛvili taɣi?

³⁸Dinzuɣu ŋunkam zɔri vi m mini n yɛligu zuɣu ninvuɣ’ biɛri bɛn bi ʒe Naawuni yim ʒiɛmani ŋɔ ni, Daadam Bia mini malaika kasinim’ yi ti labina o Ba jilima ni, o gba ni ti zo vi ni o zaŋ dilan’ pah’ o niriba ni.”