Read Dagbani Luk 12 Bible Online

Luk 12 - Dagbani bible

Luk 12

¹ Kulla di saha maa ka niriba tusa gari shɛm daa laɣimna hal ti nɔri tab’ naba bɛ galisim zuɣu, ka Yisa daa daŋ piligi saɣisir’ o nyaandoliba yɛra, “Miriya Farisiinim’ dabindi din nyɛ bɛ bilikɔnsi la;

² dama binshɛɣu kani din sɔɣiya ka ti ku yi palo, binshɛɣ’ mi kani m-be ashilɔni ka bɛ ti ku baŋ li.

³Yi ni sɔɣ’ yɛli shɛlikam zibisim ni ni ti yi neesim ni; ka yi ni sɔɣ’ ŋumsi shɛli duu puuni, bɛ ni mol’ li gili luɣilikam.”

⁴Yisa daa lan yɛli, “Amaa yinim’ bɛn nyɛ n zɔnim’ ŋɔ, n yɛri ya mi, di zɔriya bɛn ni tooi ku daadam ka ku tooi lan niŋ shɛli pahi.

⁵N ni daŋ wuhi ya yin’ ni zo so: Zomiyala Naawuni ŋun ni tooi ku daadam ka mali yiko din ni tooi zaŋ o shia niŋ buɣim ni ŋɔ. Yɛlimaŋli ka n yɛri ya, zomiy’ o!”

⁶Ka bɔhi ba, “Bɛ bi kɔhirila jahinjɛya anu kɔbo? Naawuni mi bi tamdi bɛ ni yino yɛla.

⁷Hal yi zabiri zaa mali kalinli. Dinzuɣu di chɛliya ka yi suhuri zɔhira; yi mali buchi pam gari jahinjɛya.”

⁸Yisa daa lan yɛli, “N lan yɛri ya mi, ŋunkam ʒe n nyaaŋa niriba ni, Daadam Bia gba ni ti ʒe dilan’ nyaaŋa Naawuni malaikanim’ sani;

⁹ka ŋunkam mi zaɣisi ma niriba ni, n gba ni ti zaɣis’ o Naawuni malaikanim’ sani.

¹⁰ Ka ŋunkam tɔɣisiri yɛtɔɣ’ biɛri dalindi Daadam Bia ni tooi nya di chɛ m-paŋ; amaa ŋunkam mo Naawuni Shia Kasi, dilana ŋun’ kul ku nya di chɛ m-paŋ Naawuni sani.

¹¹Bɛ yi ti tahi ya Yɛhudianim’ jɛmbu duri ni mini nanim’ ni zuɣulaannim’ sani, yin’ di ti bɔhiri yi suhuri yi ni yɛn garigi shɛm bee yi ni yɛn yɛli shɛm zuɣu,

¹² dama di saha maa Naawuni Shia Kasi ni ti wuhi ya yi ni yɛn yɛli shɛm.”

¹³Ka salo maa ni so daa yɛli Yisa, “N Duuma, yɛlimi m biɛli ni o chɛ ka ti pirigi ti ba fali ti taba.”

¹⁴Ka Yisa bɔh’ o, “Zɔri, ŋuni n-lee zaŋ ma leei yi sariakarita bee yi falitarita?”

¹⁵Ka ŋmaligi yɛli salo maa, “Di zabiriya so nyuli o buni zuɣu, dama ninsal’ nyɛvili bi dolila o ni mali shɛli.”

¹⁶Ka daa ŋahi ba ŋahili ŋɔ yɛli, “Bundaan’ so n-daa ko n-nya bindirigu pam,

¹⁷ka yɛli o suhu ni, ‘N ka luɣ’ shɛli din yɛn zaŋ m bindira ŋɔ sɔŋ, ka wula ka n lee yɛn niŋ?

¹⁸N naɣ’ ni niŋla ŋ-ŋɔ: N ni wurim n kambɔna ŋɔ, ka taɣi me zaɣ’ kara n-zaŋ m bindira mini m binkparisi zaa niŋ di ni;

¹⁹ka ŋmaligi yɛli mmaŋa n suhu ni, M mali nɛma pam din ni gbib’ ma yuun’ bɔbigu; n ni ʒini vuhi n-dira ka nyura, ka mali suhupiɛlli.”

²⁰Amaa ka Naawuni yɛl’ o, “Jɛrigu ŋɔ! Yuŋ ŋɔ n ni deeg’ a nyɛvili, ka a nɛma maa zaa leei ŋun dini?”

²¹Yisa daa lan yɛli ba yaha, “Lala n-nyɛ ŋun bo n-nya bun’ la omaŋmaŋ’ kɔŋko zuɣu, amaa Naawuni ŋun’ sani, lala nir’ pala bundana.”

²²Yisa daa yɛl’ o nyaandoliba, “Dinzuɣu n yɛri ya mi, miriya ka yi jiɣindi yi nyɛviya bee yi niŋgbuna zuɣu zaŋ chaŋ yi ni yɛn di shɛli bee yi ni yɛn ye shɛli polo;

²³dama nyɛvili gari bindirigu, ka niŋgbuŋ mi gari situra.

²⁴Kpahimmiya kahiŋkɔri: Bɛ bi birita bee n-chɛra; bɛ mi ka kambɔna bee kunchuna; amaa Naawuni n-dihiri ba. Yi mali bukaata pam gari noonsi!”

²⁵Ka bɔhi ba, “Yi ni ŋuni suhu n-lee ni ye o nyɛvili zuɣu, ka o tooi pahi li yuun’ yini?

²⁶Ka yi yi ku tooi niŋ bin’ din pɔri ŋ-ŋɔ tatabo, di chaŋ wula ka yi jiɣindi binshɛŋa din kpalim zuɣu?

²⁷ Yulimiya paɣiviɛligakushihikom ni zoori shɛm: Di bi tumda; di mi bi miri gumdi. Amaa n yɛri ya mi ni hal Sulemaana min’ o jilima zaa ha, o daa bi ye situra ka di viɛli kaman paɣiviɛligakushihikom zaɣ’ yini gba viɛlim.

²⁸Ka Naawuni yi zaŋ viɛlim ŋɔ tatabo ti mɔri din be mɔɣu ni zuŋɔ n-kaai biɛɣu ka buɣim diri li ŋɔ, di chaŋ wula ka o ku ti yinim’ situra? Laabira, yi yɛda shiri pɔra!

²⁹Di jiɣindiya yi ni yɛn di shɛli bee n-nyu shɛli zuɣu, ka di chɛliya ka yi suhuri ye di zuɣu;

³⁰dama dimbɔŋɔnim’ zuɣu ka dunia ŋɔ ni zuliya kam zaa kul jiɣindi sahakam; amaa yi Ba Naawuni mi ni di zaa ha simdi ya.

³¹Amaa lee bomiyala Naawuni nam dubu, ka o naanyi zaŋ dimbɔŋɔnim’ zaa ha pahi ya.”

³²Yisa daa lan yɛli ba, “Yinim’ bɛn kalinli pɔri ŋɔ, di zɔriya dabiɛm, dama di nyɛla yi Ba Naawuni yubu ni o tin ya nam.

³³Kɔhimiya yi ni mali shɛli n-zaŋ ti nandaamba pini; bomiya liɣiri kolibihi shɛŋa din bi kurigira n-sɔŋ azichi shɛli din ti ku naai Naawuni yili, tayiɣ’ ni ti ku be shɛli bee lɛla ni ti ku saɣim li luɣ’ shɛli,

³⁴dama yi daazichi ni be shɛli, nimaani ka yi suhuri gba ni be.”

³⁵ Ka Yisa daa lan yɛli ba yaha, “Malimiya shili, ka nyo yi firilanim’ zali ka di dira;

³⁶ ka benya kaman dunɔguliba bɛn mali shili ʒi n-guli bɛ duuma ni o ti yi amiliya chuɣu ni na n-niŋ gaafara ka bɛ yoog’ o yom ka o gari.

³⁷Dunɔguliba bɛn ʒiya m-bi gbihiri hal ka bɛ duuma ti paana mal’ alibarika. Yɛlimaŋli ka n yɛri ya, o gba ni ti mali shili chɛ ka bɛ ʒini, ka o kpuɣi bindirigu na ti zali ba ka bɛ di.

³⁸O yi ti paana yuntisuɣu bee nolɔɣu kukoli n-nya ba lala, bɛ ni nya alibarika.

³⁹Amaa lee baŋmiya dimbɔŋɔ: Yil’ yidan’ yi di mi saha shɛli tayiɣ’ ni yɛn kana, o naan ne n-ʒiya gu o ka ku chɛ o yili maa bahi ka tayiɣ’ maa kab’ li kpe.

⁴⁰ Dinzuɣu yi gba malimiya shili sahakam; dama Daadam Bia ni ti labina saha shɛli yi ni bi yuun’ o soli.”

⁴¹Di saha ka Pita daa bɔhi Yisa, “Ti Duuma, tinim’ ka a lee ŋahi ŋahili ŋɔ bee sokam zaa?”

⁴²Ka ti Duuma garigi yɛli, “Yiŋbi’ ŋuni n-lee pal’ alikauli ka nyɛ yɛndana? Di nyɛla yiŋbi’ so ŋun yiŋlan’ zaŋ o yili fukumsi niŋ o nuu ni ni o bahiri mɔni mɔni bahibu saha.

⁴³Yiŋbia maa yiŋlan’ maa yi ti kuna nya o ni lala, o ni nya suhupiɛlli.

⁴⁴Yɛlimaŋli ka n yɛri ya, o ni ti zaŋ o binshɛɣukam fukumsi niŋ o yiŋbia maa nuu ni.

⁴⁵Amaa yiŋbia maa yi yɛl’ o suhu ni ni o yiŋlan’ yuui kundi na, ka piligi bur’ o tab’ bɛn nyɛ dɔbba mini paɣiba, ka diri ka nyuri dam kuuna,

⁴⁶di yiŋbia maa yiŋlan’ maa ni ti kuna o ni bi yuun’ o soli dahin’ shɛli bee saha shɛli nti darig’ o tibili darigiri biɛɣu, ka zaŋ o laɣim bɛn bi ʒe yim ni.

⁴⁷Ka yiŋbi’ so ŋun mi o duuma yubu ni nyɛ shɛli ka bi mali shili bee n-tum kaman o duuma maa yubu ni nyɛ shɛm ni nya buri pam.

⁴⁸Ka yiŋbia ŋun mi bi mi o duuma yubu ni nyɛ shɛli ka tum din simdi buri, o buri ni bala. Bɛ ni ti ninvuɣ’ so pam, o sani ka bɛ ni ti lan bɔhi pam yɛla; ka niriba ni zaŋ fukumsi pam niŋ so mi nuu ni, o sani ka bɛ ni ti bɔhi din galisi pam yɛla.”

⁴⁹Yisa daa lan yɛl’ o nyaandoliba, “N kamina ni n ti niŋ buɣim juui dunia ŋɔ, ka n di bi zaɣisi ka di pun taai dira.

⁵⁰ Baptaizibu shɛli n-na ʒe n-guli ma; di mi nyɛla din chɛ ka n suhu bi doya shee di ti niŋ naai.”

⁵¹Ka bɔhi ba, “Yi tɛhiya ni n kamina ni n ti ti dunia ŋɔ nim’ suhudoo? Aai, n yɛri ya mi ni ninvuɣ’ tuɣilibo ka n tahina.

⁵²Pumpɔŋɔ zaŋ chana, yil’ yini puuni niriba anu noya ni ti woli. Niriba ata ni ti naai noli zaɣisi niriba ayi, ka niriba ayi mi ni ti zaɣisi niriba ata maa.

⁵³ Doo min’ o bia noya ni ti woli taba ka bɛ zaɣisi taba; ka paɣ’ min’ o bipuɣiŋga ti zaɣisi taba; ka paɣ’ ni ti zaɣis’ o bia paɣa, ka paɣ’ gba ti zaɣis’ o yidana ma.

⁵⁴Yisa daa ti yɛli salo pam, “Yi yi ti nya ka sagbani dɔni gbinni, yi yɛrimi ni saa ni mi, ka o ti shiri mi.

⁵⁵Ka yi mi yi ti nya ka pɔhim ʒiɛri yiri nudirigu polo na, yi yɛrimi ni woligu ni niŋ, ka di ti shiri niŋ.

⁵⁶Yinim’ bilikɔɣinim’ ŋɔ! Di chaŋ wula ka yi baŋdi dunia ŋɔ mini sagbana shihira, ka lee bi baŋdi ʒiɛmani ŋɔ din’ shihira?”

⁵⁷Ka daa lan bɔhi ba, “Ka bɔ lee niŋ ka yimaŋmaŋ’ bi baŋdi din tuhi?

⁵⁸So yi tahir’ a sariakarita sani ka a min’ o be soli chani yɛtɔɣa maa ni, nyin’ chɛ ka yi naai noli m-mali yi yɛtɔɣa maa; di yi pa lala o ni zaŋ a chaŋ sariakarita maa sani, ka sariakarita maa ti zaŋ a ti dansarika gula, ka o mi kpɛh’ a duu.

⁵⁹N yɛr’ a mi ni a ku tooi yi nimaani faashee a ti yo bɛ ni zal’ a san’ shɛli zaa, ka di laɣifu ku guui.”