Read Dagbani Luk 13 Bible Online

Luk 13 - Dagbani bible

Luk 13

¹Di saha maa ka ninvuɣ’ shɛb’ bɛn daa be nimaani yɛli Yisa Galilinim’ ni daa maani ʒim yihibu sara ka Gomna Pailɛt chaŋ ti ku bɛ ni shɛb’ la yɛla.

²Ka Yisa daa bɔhi ba, “Yi tɛhiya ni o ni daa ku Galilinim’ shɛb’ maa daa nyɛla tuumbiɛrinim’ gari Galilinim’ zaa zuɣu ka bɛ daa kpi maa?

³Aai! N yɛri ya mi ni shee yi niŋ tuuba, di yi pa lala yi zaa gba ni ti bahi yoli.”

⁴Ka lan bɔhi ba, “Bee yi tɛhiya ni Sailom du’ shɛli din daa du pam la ni daa lu n-ku ninvuɣ’ pisaayika shɛb’ la daa nyɛla tuumbiɛrinim’ gari bɛn zaa daa be Jɛrusalɛm la?

⁵Aai! N yɛri ya mi ni shee yi niŋ tuuba, di yi pa lala yi zaa gba ni ti bahi yoli.”

⁶Ka Yisa daa ŋahi ba ŋahili ŋɔ yɛli, “Do’ so n-daa sa fiig tia o puu ni, ka di walibu saha ti paai ka o chaŋ ti bɔri wala di zuɣu ka bi nya.

⁷Ka o daa yɛl’ o pukpar’ kpɛma, ‘Nyama, zuŋɔ yuma ata m-bɔŋɔ ka n kul kanna ti bɔri tia ŋɔ wala ka bi nyara; dinzuɣu ŋmaam’ li bahi! Bɔzuɣu ka nir’ ni chɛ li zali ka di kul nyuri tam yoli?’

⁸Ka pukpar’ kpɛm’ maa garigi yɛl’ o, ‘N dana, chɛl’ li zali yuuni ŋɔ pahi, ka n gbi bɔɣili gil’ li n-niŋ kulim niŋ li.

⁹Di yi ti wali yuuni na di viɛla; ka di mi yi ti bi wali, man’ naanyi ŋmaa’ li luhi.’ ”

¹⁰Yisa daa ti be Yɛhudianim’ jɛmbu du’ shɛl’ ni wuhiri niriba Vuhim Dabisili dali.

¹¹Ka dɔro ni daa mali paɣ’ so m-pɔri gɔŋ o yuun’ pisaayika ka o ku tooi teeg’ omaŋ’ zaa la daa be nimaani.

¹²Ka Yisa daa nya o m-bol’ o na ti yɛl’ o, “A yipa nya amaŋa a dɔro ŋɔ ni.”

¹³Ka daa zaŋ o nuhi pa o zuɣu, ka o dii teei zaa zani ka paɣiri Naawuni.

¹⁴ Amaa ka jɛmbu duu maa zuɣulan’ daa je suli Yisa ni daa chɛ ka so kpaŋ Vuhim Dabisili dali maa zuɣu; ka daa yɛli niriba maa, “Daba ayɔbu ka niriba zaŋdi tumdi bɛ tuma, dinzuɣu di dabisa maa puuni ka yi ni tooi kana ti nya tibbu, ka pa ni Vuhim Dabisili dali!”

¹⁵Ka ti Duuma daa yɛl’ o, “Yinim’ bilikɔɣinim’ ŋɔ! Yi ni ŋuni n-lee ku lɔrig’ o nahu bee o buŋa n-taɣ’ o chaŋ kuliga ka o ti nyu kom Vuhim Dabisili dali?

¹⁶Ka di bi simdi ni man’ chɛ ka paɣ’ so ŋun nyɛ ti yab’ Ibrahimma zuliya ka Sintani daa lo m-pɔri gɔɣ’ o yuun’ pisaayika ŋɔ kpaŋ Vuhim Dabisili dali?”

¹⁷Ka o ni daa yɛli shɛm maa zuɣu chɛ ka vi gbahi o dimnim’ zaa; amaa ka ninvuɣ’ shɛb’ bɛn kpalim zaa suhuri daa paligi tuun’ kar’ shɛŋa o ni tum maa zuɣu.

¹⁸Ka Yisa daa bɔhi ba, “Naawuni nam lee ŋmanila bɔ bee bɔ ka n lee yɛn zaŋ li ŋmahindi?

¹⁹Di ŋmanila zabiliga tibiɛl’ shɛli nir’ ni zaŋ bir’ o puu ni, ka di zooi niŋ tia hal ka noonsi ti tɛri bɛ tɛri di wula zuɣu la.”

²⁰Yisa daa lan bɔhi ba, “Bɔ ka n lee kul yɛn zaŋ ŋmahindi Naawuni nam?

²¹Di ŋmanila dabin’ shɛli paɣ’ ni yi zahim bɔrɔbɔro zim ŋmani buta n-zaŋ li gari di ni ŋɔri zali, ka di zaa ti mii piri la.”

²²Yisa daa ti zaŋ kpa Jɛrusalɛm polo doli fɔntinsi mini tiŋkpansi wuhiri niriba chana.

²³Ka so daa ti bɔh’ o, “N Duuma, niriba biɛla kɔŋko n-yɛn tiligi?” Ka Yisa yɛli ba,

²⁴“Kpaŋmiya yimaŋ’ doli duno’ muɣiliŋga kpe, dama n yɛri ya mi ni niriba pam ni ti bɔri ni bɛ dol’ li kpe ka ku tooi.

²⁵Yil’ yidan’ yi ti yiɣisi kpari dunoli maa ka yi kana ti ʒiɛya niŋdi gaafara yɛra, ‘Ti Duuma, yoom’ ti ka ti gari,’ o ni ti garigi yɛli ya, ‘N ʒi yi ni yi shɛl’ na.’

²⁶Di saha maa yi ni ti yɛli, ‘Ti min’ a n-daa yi laɣindi diri ka nyura, ka a be pala zuɣu wuhiri ti la.’

²⁷ Ka o mi ti yɛli ya yaha, ‘N yɛri ya mi, n ʒi yi ni yi shɛl’ na. Yinim’ tuumbiɛrinim’ ŋɔ, wariya!’ ”

²⁸ Yisa daa lan yɛli ba, “Yi ni ti nya ti yab’ Ibrahimma mini Yisahaku ni Yaakubu ni anabinim’ zaa ka bɛ be Naawuni nam ni, amaa ka Naawuni ti kari yinim’ di ni bahi. Yinim’ ni ti fabili ka dim yi nyina.

²⁹ Ka niriba ni ti yi wulimpuhili mini wulinluhili ni nuzaa mini nudirigu polo na ti ʒini Naawuni nam ni n-diri ka nyura.

³⁰ Amaa nyamiya! Ninvuɣ’ shɛb’ bɛn nyɛ nyaannim’ ni ti leei toonnima, ka ninvuɣ’ shɛb’ bɛn nyɛ toonnim’ mi ti leei nyaannima.”

³¹Di saha maa ka Farisiinim’ shɛb’ daa ka Yisa sanna ti yɛl’ o, “Yim’ ya ŋɔ, dama Naa Hɛrɔd lɔri nia ni o ku a.

³²Ka o yɛli ba, “Chamiya ti yɛli ŋɔɣu maa ni n yɛn karila alizin’ biɛri, ka chɛ ka barinim’ kpaŋ zuŋɔ ni biɛɣuni, ka zaŋ chaŋ daba ata dali n ni naai n tuma.

³³Amaa di nyɛ ma la talahi ni n gbaai soli zuŋɔ ni biɛɣuni zaŋ chaŋ dali; dama anabi bi kɔŋd’ o nyɛvili luɣ’ shɛli ka pa ni Jɛrusalɛm.”

³⁴Ka Yisa daa kuhi yɛli, “Mbaye Jɛrusalɛmnima! Mbaye Jɛrusalɛmnima! Yinim’ bɛn kuri anabinima, ka labiri Naawuni ni timdi tuun’ shɛb’ yi sanna kuɣa ŋɔ, yimyim paai shɛm ka n kul bɔri ni n laɣim ya kaman noo ni laɣind’ o bihi niŋd’ o kpiŋkpama ni shɛm la, ka yi bi saɣira.

³⁵ Nyamiya, yi jɛmbu duu yipa leela dabɔɣu. Ka n yɛri ya mi ni yi ku lan nya ma hal ni saha shɛli yi ni ti yɛn yɛli, ‘Ŋun mali ti Duuma yuli kanna ŋɔ mal’ alibarika!’ ”