Read Dagbani Luk 18 Bible Online

Luk 18 - Dagbani bible

Luk 18

¹Yisa daa ŋahi ŋahili ŋɔ wuhi ni di simdi ni niriba suhiri Naawuni sahakam ka di niŋdi anyinsi.

²O daa yɛliya, “Sariakarita so n-daa be tinshee; o daa bi zɔri Naawuni, ka mi bi lan lihiri nyari daadam kam.

³Ka pako’ so daa be tiŋ’ maa ni n-kul ʒe n-kan’ o sanna waawaayili nti yɛr’ o, ‘Karimi ti saria ŋɔ ti ma nasara, ka chɛ n dim’ ŋɔ.’

⁴Ka o kul zaɣisira, amaa di nyaaŋa ka o ti yɛli o suhu ni, ‘Wun’ ni m bi zɔri Naawuni ka mi bi lihiri nyari daadam kam ŋɔ zaa yoli,

⁵pakoli ŋɔ ni kaɣindi ma sahakam ŋɔ zuɣu, n ni kari bɛ saria ŋɔ n-ti o nasara. Di yi pa lala, o waawaayili kandina ŋɔ ni nyɔni n nyee pam.’ ”

⁶Ka ti Duuma daa lan yɛli, “Wummiya sariakarita bilikɔɣindan’ maa ni daa yɛli shɛm.

⁷Ka daɣila yi tɛhiya ni Naawuni ŋun’ ku kari saria n-ti o ninvuɣ’ gahindi’ shɛb’ bɛn suhir’ o wuntaŋ’ ni mini yuŋ kam la nasara? O ku sɔŋ ba yomyom?

⁸N yɛri ya mi o ni kari saria yomyom ti ba nasara.” Ka ŋmaligi bɔhi ba, “Daadam Bia yi lab’ dunia ŋɔ ni na, o ni nya bɛn mali yɛda?”

⁹Yisa daa lan ŋahi ninvuɣ’ shɛb’ bɛn lihi bɛmaŋ’ wuntizɔriba ka lihi ʒiɛm bɛ tab’ la ŋahili ŋɔ yɛli ni

¹⁰niriba ayi n-daa chaŋ Naawuni jɛmbu duu ni bɛ ti jɛm Naawuni; bɛ ni yino daa nyɛla Farisii, ka ŋun’ la mi nyɛ farigudeera.

¹¹Farisii maa daa kaɣimi ʒe o kɔŋko ha suhiri Naawuni yɛri ŋ-ŋɔ: “Yaa n Duuma Naawuni, m paɣir’ a pam n ni bi be kaman ninvuɣ’ fariba bee zalinsi diriba bee zinaniŋdiba bee farigudeera ŋun ʒiɛya ŋɔ zuɣu.

¹²N lɔri nol’ la buyi dakulo kam, ka yihiri n ni nya shɛlikam zaka.”

¹³Amaa ka farigudeera maa ʒe o ko ha, ka bi saɣi ni o kpuɣ’ o zuɣu lihi zuɣusaa, ka naɣ’ kul malila o nuhi bur’ o nyɔɣu ka yɛra, “Yaa n Duuma Naawuni, zom’ man’ alahichilan’ ŋɔ nambɔɣu!”

¹⁴ Ka Yisa daa ŋmaligi yɛli ba, “N yɛri ya mi ni farigudeera maa daa yi n-kuli ka yi taali ni gari ŋun’ la; dinzuɣu ŋunkam tibigir’ omaŋ’ ni nya filiŋ; ka ŋunkam mi siɣisir’ omaŋ’ ni nya tibiginsim.”

¹⁵Ninvuɣ’ shɛb’ daa ti zaŋ bibihi ka Yisa sanna ni o ti zaŋ o nuu pa bɛ zuɣu; ka o nyaandoliba daa nya lala ka tahiri bihinim’ maa zuɣu.

¹⁶Amaa ka Yisa daa bol’ o nyaandoliba maa na ti yɛli, “Chɛliya ka bihi kam’ n sanna, ka di karitiya ba, dama Naawuni nam nyɛla bɛ tatabo dini.

¹⁷Yɛlimaŋli ka n yɛri ya, ŋunkam bi deei Naawuni nam kaman bia ni deeri li shɛm ti ku kpe di ni.”

¹⁸Kpeen’ so daa ti bɔhi Yisa, “Karimba suŋ, wula ka n lee yɛn niŋ ti nya nyɛvili din ka bahigu?”

¹⁹Ka Yisa bɔh’ o, “Bɔ n-niŋ ka a boli ma ninvuɣ’ suŋ? Ninvuɣ’ suŋ kani n-naɣ’ pahila Naawuni.

²⁰ Amaŋmaŋ’ mi din be Naawuni fukumsi zaligunim’ puuni. Dina n-nyɛ: ‘Miri ka a niŋ zina; miri ka a ku ninsala; miri ka a zu; miri ka a di shɛhira kpɛma; ka tim’ a ba min’ a ma jilima.’ ”

²¹Ka o yɛl’ o, “M pun doli dimbɔŋɔnim’ zaa la m bilim ni hal ni wayo.”

²²Ka Yisa wum lala ka yɛl’ o, “Yɛl’ yini n-naɣ’ poog’ a. Kɔhim’ a ni mali shɛlikam zaa n-zaŋ ti nandaamba, ka kana ti doli ma, ka di chɛ ka a ti nya buni alizanda ni.”

²³Ka o daa wum yɛtɔɣili ŋɔ ka o suhu saɣim pam, dama o daa nyɛla bundana.

²⁴Ka Yisa daa lih’ o ka yɛli, “Di to ni bundaannim’ kpe Naawuni nam ni!

²⁵Hal laakum shɛriga nyee ni kpɛbu mal’ asama gari bundan’ Naawuni nam ni kpɛbu.”

²⁶Ka bɛn daa wum o ni yɛli shɛm maa bɔhi, “Ka ŋuni n-lee ni tooi tiligi?”

²⁷Ka o yɛli ba, “Din ku tooi nani ninsalinim’ sani nyɛla din ni tooi nani Naawuni ŋun’ sani.”

²⁸Di saha maa ka Pita daa yɛli Yisa, “Nyama, ti chɛla ti yinsi ka dol’ a.”

²⁹Ka Yisa yɛli ba, “Yɛlimaŋli ka n yɛri ya, ŋunkam chɛ o yili bee o paɣa bee o mabi’ dɔbba bee o ba min’ o mabihi Naawuni nam zuɣu

³⁰ni nya dimbɔŋɔnim’ zaa ha pam dunia ŋɔ ni, ka ti lan nya nyɛvili din ka bahigu dunia shɛli din kanna ni.”

³¹Ka Yisa daa zaŋ o nyaandoliba pinaayi maa yi kpaŋ’ ti yɛli ba, “Nyamiya, ti chanila Jɛrusalɛm; ka anabinim’ ni daa sab’ shɛlikam zaŋ chaŋ Daadam Bia polo la ni ti niŋ pali.

³²Dama bɛ ni ti zaŋ o ti bɛn pa Yɛhudianima, ka bɛ mal’ o ansarisi ka dih’ o vi, ka tuhi nintɔri vie o,

³³ka fiɛb’ o ka naanyi ku o; amaa di daba ata dali o ni ti neei kum ni.”

³⁴Amaa ka bɛ bi baŋ o ni yɛli ba shɛlikam maa zaa gbinni; di daa nyɛla yɛlisɔɣirili bɛ sani, dinzuɣu ka bɛ daa bi baŋ di gbinni maa.

³⁵Ka Yisa daa chani ti miri Jɛriko, ka zoon’ so daa ʒi sokpaŋ’ maani bara,

³⁶ka ti wum salo ni garita ka o bɔhi, “Bɔ n-lee niŋdi maa?”

³⁷Ka bɛ yɛl’ o, “Yisa Nazarɛt nir’ la n-garita.”

³⁸Di saha ka o kuhi yɛli, “Yisa, nyin’ ŋun nyɛ Naa Dauda nyaaŋa ŋɔ, zom’ ma nambɔɣu!”

³⁹Ka bɛn be tooni tahir’ o zuɣu ni o foma; amaa ka o maan kuhi pam yɛli, “Nyin’ ŋun nyɛ Naa Dauda yaaŋa ŋɔ, zom’ ma nambɔɣu!”

⁴⁰Ka Yisa daa kpalim zani, ka yɛli ni bɛ zaŋm’ o na. O ni daa ti mirina ka Yisa bɔh’ o,

⁴¹“Bɔ ka a lee bɔri ni n niŋ ti a?” Ka o yɛl’ o, “N dana, m bɔri ni a neela n nina ŋɔ ti ma.”

⁴²Ka Yisa yɛl’ o, “A nina maa neema. A yɛda niŋbu n-neeg’ a nina maa.”

⁴³Ka o nina maa dii neei, ka o doli Yisa chani ka paɣiri Naawuni. Salo maa zaa ni daa nya lala maa, ka bɛ gba daa gbaai Naawuni paɣibu.