Read Dagbani Luk 22 Bible Online

Luk 22 - Dagbani bible

Luk 22

¹ Chu’ shɛli din yuli booni Yaɣigari Chuɣu ka lan booni Bɔrɔbɔro din ka Dabindi Chuɣu la puhibu daa ti miri,

²ka maligumaaniba kpamba mini Naawuni zaligubaŋdiba daa bɔri so’ shɛli bɛ ni yɛn doli ku Yisa, dama bɛ daa zɔrila niriba.

³Di saha maa ka Sintani daa kpe Yisa nyaandoliba pinaayi maa ni yino ŋun yuli daa booni Judas Isikariɔt la suhu ni;

⁴ka o daa chaŋ maligumaaniba kpamba mini Naawuni jɛmbu duu tuumba kpamba sani ni o mini ba ti tɔɣisi gbaai o ni yɛn niŋ shɛm yi Yisa nyaaŋa chɛ ka bɛ gbaag’ o.

⁵Ka di daa niŋ ba nyaɣisim pam, ka bɛ lo o alikauli ni bɛ ni ti o liɣiri.

⁶Ka o daa saɣi, ka piligi bɔri so’ shɛli o ni yɛn doli yi Yisa nyaaŋa n-chɛ ka bɛ sɔɣi gbaag’ o salo ni ka o sani saha shɛli.

⁷Ka Bɔrɔbɔro din ka Dabindi Chuɣu la piligu dali daa ti paai, bɛ ni daa yi kɔrigiri Yaɣigari Chuɣu piɛbihi dahin shɛl’ la,

⁸ka Yisa daa tim Pita mini Jɔn n-yɛli ba, “Chamiya ti mali Yaɣigari Chuɣu ŋɔ puhibu shili gul’ ti, ka ti kana ti di di bindirigu.”

⁹Ka bɛ bɔh’ o, “Ya polo ka a lee bɔri ni ti mal’ ʒiishee ti a maa?”

¹⁰Ka o yɛli ba, “Nyamiya, yi yi ti kpe fɔŋ maa ni n-chirigi do’ so sol’ ni ka o ʒiri koyuli, yin’ doliy’ o ti kpe o ni kuni yil’ shɛli,

¹¹ka yi ti yɛli yili maa yidana ni yi karimba n-tim ya na ni yi ti bɔh’ o ni du’ din’ ni ka o min’ nyaandoliba yɛn ʒini m-puhi Yaɣigari Chuɣu ŋɔ ka di di bindirigu?

¹²O ni ti wuhi ya jirambisa du’ kar’ shɛli bɛ ni pun malimali binshɛɣukam zali, ka yi mali chuɣu maa shili nimaani gul’ ti.”

¹³Ka bɛ daa chaŋ fɔŋ maa ni nti shiri nya Yisa ni yɛli ba shɛm maa zaa, ka mali Yaɣigari Chuɣu maa bindirigu dibu shili.

¹⁴Ka saha daa ti paai ka Yisa min’ o tuumba maa laɣim ʒini ni bɛ di bindirigu maa.

¹⁵Ka o yɛli ba, “N suhu zaa kul yɛmi ni m mini ya laɣim di Yaɣigari Chuɣu ŋɔ bindirigu ka n naanyi di wahala.

¹⁶Amaa n yɛri ya mi, n ku lan di li naɣila di gbinni ti niŋ pali Naawuni nam ni.”

¹⁷Ka o daa zaŋ wain pipia niŋ alibarika n-niŋ di ni, ka zaŋ li ti ba ka yɛli, “Zaŋmiya li nyu ka ti taba,

¹⁸dama n yɛri ya mi ni zuŋɔ zaŋ chana, n ku lan nyu tiwala kom ŋɔ hal ka Naawuni nam ti kana.”

¹⁹Ka o daa lan kpuɣi bɔrɔbɔro n-niŋ alibarika niŋ di ni, ka ŋmahiŋmahi li n-zaŋ ti ba ka yɛli, “N niŋgbuŋ m-bala; n niŋgbun shɛli n ni zaŋ pa talima yi zuɣu. Niŋmiya dimbɔŋɔ n-teemi n yɛla.”

²⁰ Bindirigu maa dibu nyaaŋa, ka o daa lan zaŋ wain pipia ka yɛli, “Dimbɔŋɔ nyɛla Naawuni daalikauli shɛli o ni lo n ʒim ni. Dina n-nyɛ n ʒi’ shɛli din ti yɛn yi n niŋgbuŋ ni yi zuɣu.

²¹ “Amaa nyamiya, m mini ŋun yɛn yi n nyaaŋa maa n-laɣim ʒi teebuli gbini diri ŋɔ.

²²Daadam Bia ni chaŋ kaman di ni ʒe o shɛm, amaa mbusim be ŋun yɛn yi o nyaaŋa maa zuɣu!”

²³Ka bɛ daa gbaai tab’ bɔhibu ni bɛ baŋ bɛ ni yino ŋun yɛn niŋ lala maa.

²⁴ Yisa nyaandoliba daa ti ŋmɛri tab’ naŋgbankpeeni ni bɛ nya ŋun gar’ o kpee bɛ ni.

²⁵ Ka Yisa daa yɛli ba, “Zuliya kam zuɣulaannim’ kuuni bɛ nam, ka wuhiri tarimba bɛ kpiɔŋ ni nyɛ shɛm; ka niriba booni ba tarimba sɔŋdiba.

²⁶ Di bi simdi ni di nyɛ lala yinim’ sani; amaa chɛliya ka ŋun nyɛ yi zaa kpɛma lee zaŋ omaŋa zalila bia zaani, ka yi zaa zuɣulana zaŋ omaŋa leei ŋun tumdi bia tuma yi zaa ha sani.”

²⁷ Ka bɔhi ba, “Ŋun ʒiya ka bɛ kpuɣiri bindirigu na ti tir’ o mini ŋun kpuɣiri li na maa ni ŋuni n-lee gar’ o kpee? Pa ŋun ʒiya ka bɛ kpuɣiri bindirigu na ti tir’ o maa n-gari ŋun kpuɣiri li maa na? Amaa man’ be yi sani mi kaman ŋun kpuɣiri bindirigu tiri ya.”

²⁸Ka lan yɛli ba, “Yinima n-nyɛ bɛn be n sani n wahala dibu ni hal ni pɔŋɔ;

²⁹dinzuɣu m Ba Naawuni ni zali ma nam shɛm, lala ka n gba zali ya nam

³⁰ ni m mini ya ti laɣim ʒini n nam ʒiishee n-diri ka nyura, ka yi ti ʒini nam kuɣisi zuɣu n-kari Izraɛl zuliya pinaayi la saria.”

³¹Yisa daa yɛliya, “Saimɔn, Saimɔn, Sintani lo nia ni o kpɛhi ya nuu ni yɛli ya kaman bɛ ni yeeni chi shɛm la.

³²Amaa m pun suhi Naawuni a zuɣu ni a yɛda di filim; ka a yi ti lan lab’ zani dɛde, nyin’ kpaŋsim’ a mabihi suhuri.”

³³Ka Pita yɛl’ o, “N Duuma, hal bɛ yi yɛn kpɛh’ a la duu, m min’ a ni laɣim kpe duu maa; di mi yi nyɛla kum, m min’ a ni laɣim kpi.”

³⁴Ka Yisa yɛl’ o, “Pita, yɛlimaŋli ka n yɛr’ a, zuŋɔ yuŋ ŋɔ a ni ti chihi siɣimsiɣim buta ni a bi mi ma ka nolɔɣu na bi kum.”

³⁵ Ka Yisa daa bɔhi ba, “N ni daa tim ya ka yi bi ʒi liɣiri kolibihi bee adiikunima bee namdanim’ la, shɛli daa ti pooi ya?” Ka bɛ yɛl’ o, “Aai, shɛli daa bi pooi ti.”

³⁶Ka o yɛli ba, “Amaa pumpɔŋɔ yi ni ŋun mal’ liɣiri kolibila, ŋun’ kpuɣim’ li; lala n-nyɛ ŋun mal’ adiiku gba. Ka ŋun mi ka takɔbi, ŋun zaŋm’ o binyɛrigu kɔhi da li.

³⁷ N yɛri ya mi ni di ni sab’ shɛm Naawuni Kundi ni n-yɛli ni bɛ kali ma pahila tuumbiɛrinim’ ni la ni bahi niŋ pali m bebu ni; dama di kpala talahi ni di ni sabi n yɛla shɛm maa niŋ pali.”

³⁸Ka bɛ yɛl’ o, “Ti Duuma, nyama, n-nyɛ takɔbir’ ayi!” Ka o yɛli ba, “Di ni saɣi.”

³⁹Ka Yisa daa yi n-chaŋ Olivi Tihi Zol’ zuɣu kaman o ni daa yi pun niŋdi shɛm, ka o nyaandoliba gba dol’ o chaŋ.

⁴⁰O ni daa ti paai nimaani ka o yɛli ba, “Suhimiya Naawuni ni yi di ti lu zahimbu puuni.”

⁴¹Ka o daa chɛ ba, ka tirisi tooni biɛla ha kaman nira ni ni tooi lab’ kuɣili paai shɛl’ tariga nti gbani tiŋa n-suhiri Naawuni yɛra,

⁴²“M Ba, di yi ni nani, nyin’ chɛ ka pipia ŋɔ miligi n zuɣu, amaa chɛ ka a yubu n-niŋ, pa n dini.” [

⁴³Ka malaika daa yi alizanda ni na ti kpaŋsir’ o suhu.

⁴⁴O ni daa be suhusaɣiŋgu ni pam zuɣu ka o daa suhuri Naawuni ni nimmoo hal ka o niŋgbuŋ ni woligu ti tɔɣiri luri tiŋa kaman ʒim la.]

⁴⁵O ni daa ti yiɣisi o Naawuni suhibu maa shee o daa labila o nyaandoliba maa sani nti nya ka bɛ gbihirimi, suhugarigu ni daa mali ba zuɣu.

⁴⁶Ka o bɔhi ba, “Bɔ n-niŋ ka yi do n-gbihira? Yiɣisimiya yirigimiya yimaŋ’ zuɣu, ka suhimiya Naawuni ni yi di ti lu zahimbu puuni!”

⁴⁷Yisa ni daa kul yɛri maa, o noli daa na bi lu tiŋa, ka o nyaandoliba pinaayi la ni yino ŋun yuli booni Judas la mini salo daa paana. Ka Judas daa chaŋ Yisa sani nti puh’ o ka mɔɣis’ o kpariŋ.

⁴⁸Ka Yisa bɔh’ o, “Judas, puhigu mini kpariŋ mɔɣisibu ka a yɛn zaŋ yi Daadam Bia nyaaŋa?”

⁴⁹Ka Yisa nyaandoliba maa daa baŋ din yɛn doli di nyaaŋa ka bɔh’ o, “Ti Duuma, ti cham’ ba takɔbiri?”

⁵⁰Ka bɛ ni yino daa shiri chɛ n-shɛligi maligumaaniba zuɣulan’ dabili nudirigu tibili bahi.

⁵¹Ka Yisa yɛli, “Di lan pahi lala!” Ka daa zaŋ o nuu shihi doo maa tibili maa ka di lab’ tabili yaha.

⁵²Di saha ka Yisa daa bɔhi maligumaaniba kpamba mini Naawuni jɛmbu duu tuumba kpamba ni tiŋ’ maa ni kpamba bɛn daa kana ni bɛ ti gbaag’ o maa, “Mani ka yi nyaɣi takɔbiri ka gbib’ kpahi kana ni yi ti gbaai kaman ŋmɛnditoli n-nyɛ ma maa?

⁵³ M mini ya n-yi be Naawuni jɛmbu duu dabisili kam ka yi bi gbaai ma. Amaa yi saha mini zibisim yiko saha m-paai.”

⁵⁴Ka bɛ daa gbaai Yisa n-zaŋ o tahi maligumaaniba zuɣulan’ yiŋa; ka Pita daa puɣisiri doli nyaaŋa.

⁵⁵Ka bɛ daa mali buɣim sɔŋ dundɔŋ sunsuuni ʒiya wuɣisira, ka Pita daa chaŋ ti ʒini pahi bɛ zuɣu.

⁵⁶Ka yili maa ni bipuɣin’ so daa ti nya Pita ni ʒi buɣim maa neesim ni n-lihir’ o ka ti yɛli, “Doo ŋɔ gba yi be Yisa sani!”

⁵⁷Ka Pita chihi yɛli, “Paɣa, man’ bi mi a ni yɛri so maa.”

⁵⁸Ka di tooi biɛla ka so lan nya o n-yɛli, “A gba nyɛla bɛ ni yino!” Ka Pita yɛli, “Zɔri, m pala bɛ ni yino.”

⁵⁹Ka di daa tooi biɛla kaman awa yini laasabu yaha ka so lan yɛli, “Yɛlimaŋli, doo ŋɔ gba yi bela Yisa sani, dama o nyɛla Galili nira.”

⁶⁰Amaa ka Pita yɛl’ o, “Zɔri, m bi baŋ a ni yɛli shɛm maa gbinni.” Pita ni daa kul yɛri maa, o noli daa na bi lu tiŋa, ka nolɔɣu dii kum.

⁶¹Ka ti Duuma Yisa daa ŋmaligi lihi Pita. Ka Pita teei Yisa ni daa yɛl’ o ni o ni ti chihi siɣimsiɣim buta ni o bi mi ŋun’ Yisa ka nolɔɣu naanyi kum la yɛla,

⁶²Ka daa yi nti kum pam.

⁶³Ka bɛn daa guli Yisa maa maan’ o ansarisi ka ŋmɛr’ o,

⁶⁴ka pɔb’ o nina ka yɛl’ o, “A daanabitali puuni, wuhim’ ti bɛn ŋmɛr’ a ŋɔ!”

⁶⁵Ka bɛ daa yɛl’ o zilima pam ka tur’ o.

⁶⁶Ka biɛɣu daa ti neei, ka maligumaaniba kpamba mini Naawuni zaligubaŋdiba bɛn nyɛ jintɔriba la daa laɣim n-zaŋ Yisa tahi bɛ jina tɔbu shee ti yɛl’ o,

⁶⁷“Nyini n-yi shiri nyɛ Masia, nyin’ yɛlim’ ti.” Ka Yisa yɛli ba, “N yi yɛli ya, yi ku niŋ yɛda;

⁶⁸ka m mi yi bɔhi ya, yi ku garigi ma.

⁶⁹Amaa zuŋɔ zaŋ chana, Daadam Bia ni ti ʒila Kpiɔŋlan’ Naa nudirigu polo.”

⁷⁰Di saha ka bɛ zaa bɔh’ o, “Ka daɣila a shiri nyɛla Naawuni Bia?” Ka o yɛli ba, “Yi ni yɛli shɛm maa n-nyɛ li.”

⁷¹Ka bɛ yɛli, “Bɔ ka ti lee lan bɔri shɛhiranim’ ni ti niŋ yaha? Timaŋmaŋ’ wum li o nol’ ni!”