Read Dagbani Luk 24 Bible Online

Luk 24 - Dagbani bible

Luk 24

¹Ka bakɔi piligu dali biɛɣu daa ti neerina, ka paɣiba maa zaŋ tulaale shɛli bɛ ni daa mali zal’ la chaŋ siliga maa gbini.

²Bɛ daa paaya nti nya ka kuɣili din daa yo siliga maa nol’ la biligimi ka chɛ di noli maa.

³Ka paɣiba maa kpe di puuni nti bi nya ti Duuma Yisa niŋgbuŋ;

⁴ka di gari ba pam ka bɛ na kpalim ʒiɛya. Di saha maa ka dɔbba ayi bɛn daa ye binyɛr’ nyɛlisira dii puhi zani paɣiba maa sani,

⁵ka dabiɛm kpe ba, ka bɛ zaŋ bɛ zuɣuri silim tiŋa. Ka dɔbba ayi maa bɔhi ba, “Bɔ n-niŋ ka yi bɔri ninvuɣ’ nɛɔŋ kpiimba ni?

⁶O lan ka kpe, o neei kum ni. Teemiya o ni daa na be Galili ka yɛli ya

⁷ ni bɛ ni ti zaŋ Daadam Bia niŋ alahichinim’ nuu ni ka bɛ kpah’ o tabili dapulli zuɣu, amaa ni di daba ata dali o ni ti neei kum ni la.”

⁸Ka paɣiba maa daa teei Yisa yɛligu maa,

⁹ka ŋmaligi siliga maa gbini n-chaŋ ti yɛli Yisa nyaandoliba piniyini la mini bɛnkam pahi bɛ zuɣu binshɛlikam din daa niŋ maa zaa yɛla.

¹⁰Mariama ŋun daa yi Magdala na la mini Jɔana ni Jeemsi ma Mariama ni paɣ’ shɛb’ bɛn daa pahi bɛ zuɣu n-daa nyɛ bɛn yɛli Yisa tuumba maa di yɛla maa,

¹¹amaa ka bɛ daa lihi paɣiba maa yɛligu maa kaman lahibal’ kpɛma, ka daa bi dihi li tabili. [

¹²Ka Pita daa yiɣisi zo n-chaŋ siliga maa gbini nti kurim lihi di puuni n-nya ka kahiŋga kɔŋko n-doya; ka o ŋmaligi kuna, ka bɔhir’ o suhu din niŋ maa zuɣu.]

¹³Dindali maa ka bɛ ni niriba ayi daa kuni tiŋkpan’ shɛli din yuli booni Ɛmaus, ka di mini Jɛrusalɛm daa nyɛ kaman maali ayopɔin la,

¹⁴ka tɔɣisiri binshɛɣukam zaa din daa niŋ maa yɛla.

¹⁵Bɛ ni daa tɔɣisiri di yɛla chani maa ka Yisa chirigi ba sol’ ni, ka bɛ min’ o doli chana;

¹⁶amaa ka bɛ daa bi tooi baŋ o.

¹⁷Ka o ti bɔhi ba, “Alizam’ bɔ ka yi lee diri chani maa?” Ka bɛ kpalim zani ni suhugarigu.

¹⁸Ka bɛ ni yino ŋun yuli daa booni Kliɔpas la bɔh’ o, “A kɔŋko n-nyɛ sana Jɛrusalɛm ŋun na bi wum yɛl’ shɛŋa din yol’ niŋ nimaani daba ayi ŋɔ sunsuuni la?”

¹⁹Ka o bɔhi ba, “Yɛl’ bɔ?” Ka bɛ yɛl’ o, “Nazarɛt do’ so ŋun yuli booni Yisa, ka o daa nyɛ anab’ titali o tumtumsa min’ o yɛtɔɣa ni zaŋ chaŋ Naawuni mini salinim’ zaa san’ la yɛla.

²⁰Ka ti maligumaaniba kpamba mini tiŋ’ maa ni kpamba daa zaŋ o ti, ka bɛ di o saria n-yɛli ni bɛ kum’ o, ka bɛ daa kpah’ o tabili dapulli zuɣu.

²¹Amaa tinim’ daa niŋ tahima ni ŋuna n-yɛn tiligi Izraɛlnima; ka din pahi ŋɔ zaa ha zuɣu nyɛla, di ni niŋ maa zuŋɔ daba ata m-bɔŋɔ.

²²Ka ti ni paɣ’ shɛb’ yɛl’ ti shɛli ka di gari ti pam: Asibaasi ŋɔ ka bɛ daŋ yibu chaŋ siliga maa gbini

²³nti bi nya Yisa siliga maa ni; ka labina ti yɛli ti ni bɛ naɣ’ nyala malaikanim’ ʒii, ka malaikanim’ maa yɛli ba ni o neei kum ni.

²⁴Ka ti ni shɛb’ chaŋ siliga maa gbini nti nya ka paɣiba maa ni yɛli shɛm maa nyɛla yɛlimaŋli, dama bɛ shiri bi nya o.”

²⁵Di saha ka Yisa ŋmaligi yɛli ba, “Yinim’ suhutunanim’ bɛn bi niŋdi anabinim’ yɛligu yɛda ŋɔ!

²⁶Ka daɣila di daa bi simdi ni Masia nya wahala ŋɔ zaa ka naanyi nya jilima?”

²⁷Ka o daa piligi wuhiri ba Anabi Musa min’ anabinim’ zaa ha litaafinim’ ni daa yɛli ŋun’ Yisa yɛla shɛm.

²⁸Bɛ ni daa ti miri tiŋkpan’ shɛli bɛ ni kuni maa, ka o ŋmani ŋun bɔri ni o garila tooni.

²⁹Ka bɛ daa goog’ o yɛl’ o, “Kpalimmi ya ŋɔ n-gbe ti sani, dama wuntaŋ’ luya ka yuŋ zibira.” Ka o daa doli ba kpe bɛ yiŋa.

³⁰Ka o mini ba daa ti ʒini ni bɛ di bindirigu, ka o zaŋ bɔrɔbɔro kpilli n-niŋ alibarika niŋ di ni ka ŋmahiŋmahi li tari ba.

³¹Di saha ka bɛ nina neei ka bɛ baŋ o, ka o daa dii bɔrigi ka chɛ ba ka bɛ bi lan nya o.

³²Ka bɛ bɔhi taba, “O ni di tɔɣisiri ti yɛtɔɣa sol’ ni ka kahigiri Naawuni litaafinim’ wuhiri ti la, di di bi kpe ti suhuri ni pam?”

³³Ka bɛ daa dii yiɣisi di saha maa lab’ Jɛrusalɛm nti nya ka Yisa tuumba piniyini maa mini ninvuɣ’ shɛb’ laɣim ʒiya

³⁴yɛra, “Yɛlimaŋli ti Duuma shiri neei kum ni; hal o yi Saimɔn zuɣu.”

³⁵Ka niriba ayi maa gba daa yɛli ba binshɛɣukam zaa din daa niŋ sol’ ni mini bɛ ni daa lan baŋ o shɛm o bɔrɔbɔro ŋmahibu ni la yɛla.

³⁶Bɛ ni daa na kul tɔɣisiri lala maa ka Yisa maŋmaŋ’ dii zani bɛ sunsuuni yɛli ba, “Naawuni tim’ ya suhudoo!”

³⁷Ka dabiɛm daa kpe ba ka bɛ ni sɔhira, dama bɛ daa tɛhiya ni alizini ka bɛ nya maa.

³⁸Ka o bɔhi ba, “Bɔ n-lee muɣisi ya bee bɔ n-leei niŋ ka yi biɛhindi yi suhuri ni?

³⁹Lihimiya n nuhi mini n naba, ka baŋ ni mani m-bala. Tabisimiya ma nya, dama alizini ka niŋgbuŋ mini kɔba ka n ni mali shɛm ŋɔ.” [

⁴⁰O ni daa yɛl’ lala naai, ka o teeg’ o nuhi min’ o naba wuhi ba.]

⁴¹Bɛ ni daa na kul bi niŋ yɛda suhupiɛlli zuɣu ka biɛhindi maa ka o bɔhi ba, “Yi mali bindir’ shɛli kpe ka n ni di?”

⁴²Ka bɛ daa zaŋ zahin’ shɛrili ti o;

⁴³ka o zaŋ li ŋubi bɛ zaa nini maa ni.

⁴⁴Ka Yisa daa yɛl’ o nyaandoliba maa, “N ni daa be yi sani ka yɛri ya yɛtɔɣ’ shɛŋa la m-bɔŋɔ: Binshɛɣukam zaa din sabi Anabi Musa min’ anabinim’ litaafinim’ ni ni Yila litaafi ni zaŋ chaŋ n polo la daa kpami ni di zaa ha niŋ pali.”

⁴⁵Di saha ka o daa neei bɛ nini ni bɛ baŋ Naawuni litaafinim’ maa gbinni.

⁴⁶Ka yɛli ba, “Di sabi zali ni faashee Masia di wahala, ka lan neei kum ni daba ata dali;

⁴⁷ka bɛ ti yihi tuuba niŋbu mini alahichi chɛ m-paŋ waazu ŋun’ Masia yul’ ni n-ti zuliya kam zaa, ka di piligu shee mi yɛn nyɛla Jɛrusalɛm zaŋ nti kpa luɣilikam.

⁴⁸Yinim’ mi n-nyɛ n shɛhiranim’ dimbɔŋɔnim’ zaa ha ni.

⁴⁹ Nyamiya! N ni siɣisi ya m Ba Naawuni ni daa lɔn ya alikauli shɛl’ la na, dinzuɣu kul benya Jɛrusalɛm hal ti deei yiko shɛli din yɛn yi alizanda ni na maa.”

⁵⁰Ka Yisa min’ o nyaandoliba maa daa mali ti paai Bɛtani, ka o daa kpuɣ’ o nuhi zuɣusaa n-niŋ alibarika niŋ bɛ ni.

⁵¹ O ni daa niŋdi alibarika niŋdi bɛ ni saha shɛli maa ka o daa yi bɛ sani lab’ alizanda ni.

⁵²Ka bɛ daa jɛm o, ka lan lab’ Jɛrusalɛm ni suhupiɛlli

⁵³nti kul be Naawuni jɛmbu duu m-paɣiri Naawuni.