Read Dagbani Luk 3 Bible Online

Luk 3 - Dagbani bible

Luk 3

¹Taibɛrius Siiza ni daa diri nam, ka di ti paai yuun’ pinaanu saha shɛl’ la, ka Pɔntius Pailɛt daa nyɛ Judia Gomna, ka Naa Hɛrɔd daa diri Galili, ka o tizo Filip daa su Ituria mini Trakɔnaitis, ka Naa Laisanias diri Abiliin,

²ka Annas mini Kaiafas mi daa nyɛ maligumaaniba zuɣulaannima. Di saha maa ka Naawuni zilinli daa ti paai Zakaria bia Jɔn ŋun daa be mɔɣu ni la.

³Ka o daa gindi Jɔɔdɛn mɔɣili polo tinsi zaa n-yihiri waazu yɛri niriba, “Niŋmiya tuuba, ka m baptaizi ya kom ni, ka Naawuni kpihim yi daalahichi.”

⁴ Di bemi kaman Anabi Aizaia ni daa sab’ shɛm o litaafi ni la ni Naawuni yɛliya: “Ninvuɣ’ so ni ti be mɔɣu ni mooni molo yɛra, ‘Malimiya ti Duuma kandina soli gu o, ka mal’ o soya ka di tuhi.

⁵Ka yiliŋ kam ti ŋari, ka zoya mini daboya zaa ti nahi taba, ka luɣ’ shɛlikam din golim ti tuhi, ka soli kam din be gbirimagbirima ti niŋ polipoli,

⁶ka daadam kam ti nya Naawuni tiliginsim.’ ”

⁷ Lala zuɣu ka Jɔn daa bɔhi salo bɛn ka o sanna ni o ti baptaizi ba maa, “Yinim’ garinsi zuliya ŋɔ, ŋuni n-lee saɣisi yi mi ni yi zo n-yi mbusim shɛli din ti yɛn kana ŋɔ ni?

⁸ Amaa benya kaman tihi la m-mali wala yi biɛhigu ni din ni wuhi ni yi shiri niŋ tuuba ni yɛlimaŋli. Ka miriya ka yi nyuri bara yi suhuri ni yi yab’ ni nyɛ Ibrahimma la zuɣu; dama n yɛri ya mi ni Naawuni ni tooi zaŋ kuɣa ŋɔ nam ninsalinima ka bɛ leei Ibrahimma zuliya.

⁹ Hal pumpɔŋɔ lɛhu domi gu tihi; dinzuɣu tia kam din bi wandi wal’ suma, bɛ ni ŋmaa’ li luhi n-zaŋ li nyo buɣim.”

¹⁰Ka salo maa bɔh’ o, “Ka wula ka ti lee yɛn niŋ?”

¹¹Ka o garigi yɛli ba, “Ŋun mali binyɛra ayi, ŋun’ piimi zaɣ’ yini ti o kpe’ so ŋun ka; ka ŋun mi malila bindirigu, ŋun’ niŋmi lala.”

¹² Ka farigudeeriba gba daa kana ni bɛ ti deei baptaizibu ka bɔh’ o, “Karimba, ka wula ka ti lee yɛn niŋ?”

¹³Ka o yɛli ba, “Miriya ka yi deei farigu yaɣi bɛ ni zali ya ni yi deemi shɛm tariga.”

¹⁴Ka tɔbbihi gba daa bɔh’ o, “Ka wula ka ti mi lee yɛn niŋ?” Ka o yɛli ba, “Di muɣisiriya niriba bee n-diri shɛhir’ kpɛma fari bɛ nɛma; ka chɛliya ka yi nini tiɣimi yi yɔri.”

¹⁵Sokam zaa ni daa pun niŋdi tiliginsim nyabu tahima maa zuɣu ka bɛ daa bɔhiri bɛ suhuri yɛra, “Amii Masia la m-bala bee so mi?”

¹⁶Ka Jɔn daa yɛli bɛ zaa, “Yɛlimaŋli, kom ni ka man’ baptaiziri ya, amaa ŋun be n nyaaŋa kanna mali yiko gari ma, hal ka man’ pɔri gba ni n gbaag’ o namda mal’ o ka o pirigi; ŋun’ ni ti zaŋla Naawuni Shia Kasi mini buɣim baptaizi ya.

¹⁷O ni ti gbib’ o kayeeni ŋmani o nuu ni na ni o ti yɛl’ o chi kabɔɣili ni zaŋ kabiɛlim su o kunchuna ni, ka zaŋ buɣim din bi kpiri nyo wurigu mi.”

¹⁸Jɔn daa lan wuhi niriba maa yɛla pam pah’ o lahibal’ suŋ waazu maa puuni.

¹⁹ O daa galim Naa Hɛrɔd ŋun’ Naa Hɛrɔd tizɔbil’ paɣa Hɛrɔdias yɛla zuɣu m-pah’ o ni daa tum tuun’ biɛ’ shɛŋa la zuɣu.

²⁰Naa Hɛrɔd daa lan tum tuun’ biɛ’ shɛli pahi; dina n-nyɛ o ni daa gbaai Jɔn kpɛhi duu la.

²¹Niriba maa ni daa deei baptaizibu, ka Yisa gba daa deei baptaizibu ka suhiri Naawuni; di saha maa ka zuɣusaa daa bɔɣi,

²² ka Naawuni Shia Kasi yi zuɣusaa na ka o kɔtomsi be kaman ŋmani la ti tam o zuɣu. Ka kukol’ shɛli daa yi zuɣusaa na yɛra, “M Biyurigu n-nyɛ a; n nini tiɣ’ a pam.”

²³Saha shɛli Yisa ni daa ti paai kaman yuun’ pihita, ka o daa piligi o tuma, ka niriba daa tɛhi ni o nyɛla Yisifu bia. Yisifu daa nyɛla Hɛli bia.

²⁴Ka Hɛli daa nyɛ Matat bia, ka Matat nyɛ Lɛvi bia, ka Lɛvi nyɛ Mɛlikai bia, ka Mɛlikai nyɛ Jannai bia, ka Jannai mi nyɛ Yisifu so bia.

²⁵Ka Yisifu maa daa nyɛ Matatias bia, ka Matatias nyɛ Amɔs bia, ka Amɔs nyɛ Nahum bia, ka Nahum nyɛ Ɛsili bia, ka Ɛsili mi nyɛ Nagai bia.

²⁶Ka Nagai daa nyɛ Maat bia, ka Maat nyɛ Matatias so bia, ka Matatias maa nyɛ Sɛmɛin bia ka Sɛmɛin nyɛ Josɛk bia, ka Josɛk mi nyɛ Jɔda bia.

²⁷Ka Jɔda daa nyɛ Jɔanan bia, ka Jɔanan nyɛ Riisa bia, ka Riisa nyɛ Zɛrubabɛl bia, ka Zɛrubabɛl nyɛ Shialtiɛl bia, ka Shialtiɛl mi nyɛ Nɛri bia.

²⁸Ka Nɛri daa nyɛ Mɛlikai so bia, ka Mɛlikai maa nyɛ Addi bia, ka Addi nyɛ Kosam bia, ka Kosam nyɛ Ɛlimadam bia, ka Ɛlimadam nyɛ Ɛr bia.

²⁹Ka Ɛr daa nyɛ Jɔshua bia, ka Jɔshua nyɛ Ɛliɛza bia, ka Ɛliɛza nyɛ Jɔrim bia, ka Jɔrim nyɛ Matat so bia, ka Matat maa mi nyɛ Lɛvi so bia.

³⁰Ka Lɛvi maa daa nyɛ Simiɔn bia, ka Simiɔn nyɛ Juda bia, ka Juda nyɛ Yisifu so bia, ka Yisifu maa nyɛ Jɔnam bia, ka Jɔnam mi nyɛ Ɛliakim bia.

³¹Ka Ɛliakim daa nyɛ Milia bia, ka Milia nyɛ Mɛna bia, ka Mɛna nyɛ Matata bia, ka Matata nyɛ Neetan bia, ka Neetan mi nyɛ Naa Dauda bia.

³²Ka Naa Dauda daa nyɛ Jɛsi bia, ka Jɛsi nyɛ Obɛd bia, ka Obɛd nyɛ Bɔaz bia, ka Bɔaz nyɛ Sala bia, ka Sala mi nyɛ Nashɔn bia.

³³Ka Nashɔn daa nyɛ Aminadab bia, ka Aminadab nyɛ Adimin bia, ka Adimin nyɛ Arini bia, ka Arini nyɛ Hɛzirɔn bia, ka Hɛzirɔn nyɛ Pɛrɛz bia, ka Pɛrɛz mi nyɛ Juda so bia.

³⁴Ka Juda maa daa nyɛ Yaakubu bia, ka Yaakubu nyɛ Yisahaku bia, ka Yisahaku nyɛ Ibrahimma bia, ka Ibrahimma nyɛ Tɛra bia, ka Tɛra mi nyɛ Nahɔr bia.

³⁵Ka Nahɔr daa nyɛ Sɛrug bia ka Sɛrug nyɛ Riu bia, ka Riu nyɛ Pɛlɛg bia, ka Pɛlɛg nyɛ Ɛba bia, ka Ɛba mi nyɛ Shɛla bia.

³⁶Ka Shɛla daa nyɛ Kainan bia, ka Kainan nyɛ Arifazad bia, ka Arifazad nyɛ Shɛm bia, ka Shɛm nyɛ Nuhu bia, ka Nuhu mi nyɛ Lamɛk bia.

³⁷Ka Lamɛk daa nyɛ Mɛtusɛla bia, ka Mɛtusɛla nyɛ Inok bia, ka Inok nyɛ Jarɛd bia, ka Jarɛd nyɛ Mahalalɛl bia, ka Mahalalɛl mi nyɛ Kɛnan so bia.

³⁸Ka Kɛnan maa daa nyɛ Ɛnɔs bia, ka Ɛnɔs nyɛ Sɛt bia, ka Sɛt mi nyɛ Adam bia, ka Adam mi nyɛ Naawuni bia.