Read Dagbani Luk 7 Bible Online

Luk 7 - Dagbani bible

Luk 7

¹Yisa ni daa tɔɣisi niriba maa yɛtɔɣa ŋɔ zaa naai o daa chaŋla Kapɛrinium.

²Ka sapashin’ so dabiyurigu daa biɛra n-tarigi.

³Ka sapashini maa daa wum Yisa yɛla, ka tim Yɛhudianim’ kpeen’ shɛba ni bɛ ti suhi Yisa ka o kana ti tib’ o dabili maa ti o.

⁴Ka bɛ daa paag’ o sani nti balim o pam yɛra, “Sapashini maa simdi ni a sɔŋ o,

⁵dama o yuri ti zuliya ŋɔ hal ka me jɛmbu duu ti ti.”

⁶Bɛ ni daa labiri kuna ka Yisa doli ba. O ni daa ti miri sapashini maa yiŋa ka sapashini maa lan tim o zɔnim’ Yisa sanna ni bɛ ti yɛl’ o ni o di nahim omaŋa, dama ni ŋun’ sapashini maa pɔri ni Yisa ka o yiŋ’ na,

⁷ka mi bi simdi ni o ka Yisa sanna. Amaa ni o kul yɛlim’ yɛtɔɣ’ shɛli o ni yɛn yɛli ka o dabili maa kpaŋ.

⁸Dama ni o nyɛla bɛ ni su ninvuɣ’ so, ka o mi su tɔbbi’ shɛb’ fukumsi. Ka o ni tooi yɛli bɛ ni yino ni o cham’ luɣ’ shɛli, ka o chaŋ; ka ni tooi yɛli bɛ ni yino ni o kamina, ka o kana; ka mi ni tooi yɛl’ o dabili ni o niŋmi ŋ-ŋɔ, ka o niŋ li.

⁹Yisa ni daa wum sapashini maa ni yɛli shɛm maa ka di gar’ o pam, ka o ŋmaligi yɛli salo bɛn dol’ o maa, “Yɛlimaŋli ka n yɛri ya, hal Izraɛlnim’ ni n na ʒi n-nya ŋun niŋ yɛda ŋ-ŋɔ.”

¹⁰Ka sapashin’ maa ni daa tim ninvuɣ’ shɛb’ maa daa lab’ yiŋa nti nya ka sapashini maa dabili maa shiri kpaŋmi zaa.

¹¹Di nyaaŋa di daa bi yuui ka Yisa chani tin’ shɛli din yuli booni Nain la; ka o nyaandoliba mini salo pam dol’ o.

¹²O ni daa ti miri tiŋ’ maa ni kpɛbu, ka tiŋ’ maa ni nachimbil’ so kpi ka bɛ ʒir’ o yirina, ka tiŋ’ maa niriba kabiri doli. Kpim’ maa ma daa nyɛla pakoli; o mi kɔŋko n-daa nyɛ pakoli maa bia.

¹³Ka ti Duuma daa nya pakoli maa ka di niŋ o nambɔɣu ka o yɛl’ o, “Di kuhira!”

¹⁴Ka chaŋ ti shihi kpim’ maa daamaŋka, ka bɛn daa ʒir’ o maa kpalim zani. Ka o kuhi boli kpim’ maa, “Nachimbila, n yɛr’ a mi, yiɣisima!”

¹⁵Ka kpim’ maa dii neei kum ni n-yiɣisi ʒini gbaai yɛtɔɣa tɔɣisibu, ka Yisa zaŋ o ti o ma maa.

¹⁶Ka dabiɛm daa gbahi sokam, ka bɛ paɣiri Naawuni yɛra, “Anab’ titali ka dunia ŋɔ ni na nti be ti sani.” Ka bɛ lan yɛli, “Naawuni n-ka o niriba sani maa na!”

¹⁷Ka Yisa ni daa niŋ shɛm maa lahibali moli gili Judia tiŋgbɔŋ ni mini tin’ shɛŋa din gili nimaani zaa.

¹⁸Jɔn Baptaizira nyaandoliba daa chaŋ ŋun’ Jɔn sani nti yɛl’ o Yisa ni daa niŋdi shɛlikam maa zaa yɛla.

¹⁹Ka o daa pii bɛ niriba ayi n-tim ba ti Duuma Yisa sani ni bɛ ti bɔh’ o, “Nyini n-nyɛ ŋun yɛn kana la bee ti na yulim’ dilan’ soli?”

²⁰Ka nyaandoliba ayi maa daa ti paai Yisa sani nti yɛl’ o, “Jɔn Baptaizira n-tim ti a sanna ni ti ti bɔh’ a ni nyini n-nyɛ ŋun ti yɛn kana la bee ni ti na yulim’ dilan’ soli?”

²¹Di saha maa ka Yisa daa chɛ ka dɔr’ biɛri mini alɔbo dɔriti ni daa mali shɛb’ pam kpaŋ, ka kari alizin’ biɛri niriba zuɣu bahi, ka neei zoomba pam gba nina.

²² Ka Yisa daa yɛli Jɔn nyaandoliba maa, “Labimiya ti yɛli Jɔn yi ni nya ka wum shɛm: Zoomba nina neera, ka wɔbisi chana, ka kɔnsi tibiri kpaŋda, ka tikpiranim’ wumda, hal ka kpiimba gba neeri kum ni, ka lahibal’ suŋ waazu mi yihiri tiri tarimba.”

²³Ka o ŋmaligi yɛli, “Ŋunkam suhu bi miligi n zuɣu mal’ alibarika!”

²⁴Jɔn Baptaizira nyaandoliba maa ni daa kuli naai, ka Yisa piligi tɔɣisiri salo maa Jɔn yɛla ka bɔhiri ba, “Bɔ ka yi daa lee chaŋ mɔɣu ni ni yi ti nya la? Gbiŋgban’ shɛli pɔhim ni ʒɛra?

²⁵Bee bɔ ka yi daa lee chaŋ ni yi ti nya? Nira ŋun bɔbi?” Ka o lan yɛli, “Nyamiya, ninvuɣ’ shɛb’ bɛn bɔbiri ka niŋdi bɛ suhu yubu bela nanim’ yinsi.

²⁶Ka bɔ ka yi daa lee chaŋ ni yi ti nya? Anabi ka yi daa chaŋ ni yi ti nya? Yɛlimaŋli ka n yɛri ya, hal o gari anabi gba.

²⁷ Ŋuna n-nyɛ bɛ ni daa sab’ yɛli so yɛla ni Naawuni yɛliya, ‘N tumo m-bɔŋɔ; n ni tim o ka o daŋ a tooni nti mal’ a chandi maa soli ti a.’

²⁸N yɛri ya mi ni Jɔn gari paɣ’ ni dɔɣi sokam, amaa ninvuɣ’ so ŋun pɔri Naawuni nam ni galisi gar’ o.”

²⁹ Niriba maa mini farigudeeriba ni daa wum Yisa ni yɛli shɛm maa ka bɛ tibigi Naawuni, dama bɛn’ daa pun deei kom baptaizibu Jɔn sani;

³⁰amaa Farisiinim’ mini Naawuni zaligubaŋdiba bɛn’ daa zaɣisi Naawuni ni zali ba shɛm, ka bɛn’ daa bi deei kom baptaizibu Jɔn sani.

³¹Ka Yisa daa lan bɔhi, “Bimbɔ ka n lee yɛn zaŋ ŋmahindi ʒiɛmani ŋɔ niriba? Bɛ lee ŋmanila bɔ?

³²Bɛ ŋmanila bihi bɛn ʒi daa ni booni tab’ yɛra, ‘Ti piɛb’ yuhi niŋ ya, ka yi zaɣisi waa wabu; ka kumda, ka yi bi fabinda.’

³³Jɔn Baptaizira daa kana ka o mini niriba ti bi laɣindi diri ka nyura, ka yi yɛli ni alizin’ biɛɣu n-ʒi o zuɣu.

³⁴Ka Daadam Bia ti kana, ka o mini niriba laɣindi diri ka nyura ka yi yɛra, ‘Nyama, ŋun’ kpiri kum pam, ka lan nyɛ danyura mini farigudeeriba ni alahichinim’ zo.’

³⁵Amaa Naawuni yɛm wuhiri dimaŋ’ la bɛn dee’ li sani.”

³⁶Farisiinim’ ni so daa ti boli Yisa ni o ka o yiŋ’ na ka bɛ ti laɣim di bindirigu; ka Yisa daa chaŋ o yiŋa nti ʒini bindirigu maa dibu shee ni bɛ di.

³⁷Tiŋ’ maa ni paɣ’ tuumbiɛrilan’ so ni daa wum ni Yisa be Farisii maa yiŋa n-diri bindirigu maa ka o zaŋ luɣilu’ viɛlli din pali tulaale

³⁸ n-chaŋ ti ʒe Yisa sani kumda, ka o nintam tɔɣiri luri Yisa naba zuɣu, ka o mal’ li paɣiri Yisa naba maa, ka mal’ o zabiri nyɛhiri li, ka bɔbindi li ka zaŋ tulaale maa ʒiɛri li.

³⁹Ka Farisii so ŋun daa boli Yisa na maa daa nya lala ka yɛli o suhu ni, “Doo ŋɔ yi di nyɛla anabi, o naan baŋ paɣ’ ŋun shihir’ o ŋɔ ni nyɛ so, dama o nyɛla tuumbiɛrilana.”

⁴⁰Ka Yisa daa ŋmaligi yɛl’ o, “Saimɔn, m mali yɛtɔɣ’ shɛli ni n yɛl’ a.” Ka Saimɔn yɛl’ o, “N dana, yɛlim’ ma.”

⁴¹Ka Yisa yɛl’ o, “Sandihir’ so n-daa be m-mal’ o sandaannima ayi; yino daa di o samli ka di paai tumtumda yuma ayi tuma yɔri, ka ŋun’ la mi di o samli ka di paai tumtumda chira ayi tuma yɔri.

⁴²Ka bɛ ni so daa ka shɛli din ni yo o, ka o daa chɛ sama maa ti bɛ niriba ayi maa zaa. Dinzuɣu yɛlim’ ma, bɛ niriba ayi ŋɔ sunsuuni, ŋuni n-lee ni yuri sandihira ŋɔ gar’ o kpee?”

⁴³Ka Saimɔn yɛli, “N tɛhiya ni ŋun samli galisi pam la.” Ka Yisa yɛl’ o, “A shiri baŋya.”

⁴⁴Ka ŋmaligi lihi paɣ’ maa ka bɔhi Saimɔn, “A nya paɣ’ ŋɔ? N ni kpe a yili ŋɔ na, a bi ti ma kom ni m paɣi n naba; amaa paɣ’ ŋɔ zaŋ o nintam paɣi n naba, ka zaŋ o zabiri nyɛhi li.

⁴⁵A mi di bi puhi ma ka mɔɣisi n kpariŋ kaman ti kali ni nyɛ shɛm, amaa n ni kpe a yili ŋɔ na hal ni wayo, paɣ’ ŋɔ na bi chɛ n naba bɔbilibu.

⁴⁶Ka din pahi nyɛla, a bi niŋ tulaale niŋ n zuɣu, amaa paɣ’ ŋɔ ŋun’ zaŋ tulaale niŋ n naba.

⁴⁷Dinzuɣu n yɛr’ a mi ni paɣ’ ŋɔ nya o daalahichi din galisi ŋɔ zaa chɛ m-paŋ, dama o yurilim galisiya pam; amaa ŋun nya o daalahichi chɛ m-paŋ ka di pɔri nyɛla ŋun yurilim pɔra.”

⁴⁸Ka ŋmaligi yɛli paɣ’ maa, “N chɛ a daalahichi maa paŋ a.”

⁴⁹Ka ninvuɣ’ shɛb’ bɛn mini Yisa daa laɣim diri maa gbaai bɛ kparima ni ŋumdi yɛra taba, “Ŋun’ mi n-lee bɔŋɔ hal ti chɛri niriba daalahichi paŋdi ba?”

⁵⁰Di saha ka Yisa lan yɛli paɣ’ maa, “Cham’ ni suhudoo; a yɛda niŋbu n-tilig’ a.”