Read Dagbani Luk 9 Bible Online

Luk 9 - Dagbani bible

Luk 9

¹Yisa daa ti bol’ o nyaandoliba pinaayi la na nti niŋ ba yiko ni bɛ kariti alizin’ biɛri bahira, ka tibiri barinima;

²ka daa tim ba ni bɛ chaŋ ti yihi Naawuni nam waazu, ka chɛ ka barinim’ kpaŋda.

³ O daa yɛli ba, “Di ʒin ya binshɛli chaŋ yi chandi maa; di gbibiya jaaŋgbɛhi bee n-ʒin ya adiikunima bee bindira bee liɣiri; yi mi di ʒin ya daliyanima ayiyi.

⁴Ka yi yi ti kpe yil’ shɛli, yin’ di lan taɣiya yilikpɛrili hal nti yi tiŋ’ maa ni.

⁵Ka yi yi ti paai tin’ shɛli ka bɛ bi deei ya, yi yi ti yɛn yi di tiŋ’ maa ni, yin’ pihimiya yi napɔna taŋkpaɣu bahi tiŋ’ maa nim’ zuɣu, ka di niŋ shɛhira biɛɣu jɛndi ba.”

⁶Ka bɛ daa chani gindi tiŋkpansi n-yihiri lahibal’ suŋ waazu, ka chɛ ka barinim’ kpaŋdi luɣ’ shɛlikam zaa.

⁷ Naa Hɛrɔd ni daa wum dimbɔŋɔnim’ zaa, di daa birim o pam; dama ninvuɣ’ shɛb’ daa yɛliya ni Jɔn Baptaizira n-neei kum ni na maa.

⁸Ka shɛb’ yɛli ni Anabi Ilaija n-lan yi palo maa yaha, ka shɛb’ mi yɛli ni anab’ kura la ni yino n-neei kum ni na maa.

⁹Ka Naa Hɛrɔd daa yɛli, “N daa ŋma Jɔn zuɣu; ka ŋuni mi yɛla ka n lee lan wumdi ŋɔ?” Ka daa lo nia ni o nya Yisa.

¹⁰Ka tuumba maa daa ti labina nti yɛli Yisa bɛ ni daa niŋ shɛlikam zaa, ka o daa zaŋ ba yi kpaŋa n-chaŋ tin’ shɛli din yuli booni Bɛtisaida.

¹¹Ka salo daa baŋ ka kar’ o naba; ka o daa ti puhi ba ni bɛ paabuna, ka tɔɣisi ba Naawuni nam yɛla, ka tib’ barinim’ bɛn daa be bɛ ni.

¹²Ka di daa ti niŋ zaawun’ yuŋ, ka o nyaandoliba pinaayi la chaŋ o sani nti yɛl’ o, “Bahim’ niriba ŋɔ ka bɛ chaŋ pukpariba bɛn puri miri ti ŋɔ na mini tiŋkpansi din baɣ’ ti ŋɔ ni nti da bindira di ka gbe nimaani, dama kpe nyɛla mɔɣu ni.”

¹³Ka Yisa yɛli ba, “Timiya ba bindirigu ka bɛ di.” Ka bɛ yɛl’ o, “Bɔrɔbɔro kpila anu mini zahim ayi kɔŋko n-kul bɛ ti sani; naɣila ti chaŋmi ti da bindirigu din ni saɣi niriba ŋɔ zaa na.”

¹⁴Dɔbba kalinli daa nyɛla kaman tusaanu laasabu. Ka Yisa yɛl’ o nyaandoliba maa ni bɛ chɛ ka salo maa ʒini gbilligbilli kaman ninvuɣ’ pihinunu laasabu.

¹⁵Ka bɛ daa niŋ lala n-chɛ ka bɛ zaa ʒini.

¹⁶Ka o daa zaŋ bɔrɔbɔro kpila anu maa mini zahim ayi maa, ka kpuɣ’ o zuɣu lihi zuɣusaa, ka niŋ alibarika niŋ di ni, ka ŋmahiŋmahi li ti o nyaandoliba maa ni bɛ tari salo maa.

¹⁷Ka bɛ zaa ha daa di li tiɣi. Ka Yisa nyaandoliba maa daa laɣisi zaɣ’ chɛhi din guui m-pali piɛri pinaayi.

¹⁸Yisa daa ti be luɣ’ shɛli o kɔŋko suhiri Naawuni ka o nyaandoliba chaŋ o sani ka o ti bɔhi ba, “Niriba lee yɛri ni n nyɛla ŋuni?”

¹⁹ Ka bɛ garigi yɛl’ o, “Shɛb’ yɛri ni a nyɛla Jɔn Baptaizira, ka shɛb’ yɛri ni a nyɛla Anabi Ilaija, ka shɛb’ mi yɛri ni a nyɛla anab’ kura la ni yino ŋun neei kum ni na.”

²⁰ Ka o ŋmaligi bɔhi ba, “Ka yi mi lee yɛli ni n nyɛla ŋuni?” Ka Pita garigi yɛl’ o, “A nyɛla Masia, Naawuni ni tim so na.”

²¹Di saha maa ka Yisa daa kpahi bɛ zuɣu ni n-yɛli ni bɛ di yɛli so di yɛla.

²²Ka lan yɛli, “Faashee Daadam Bia nya wahala pam, ka tiŋ’ maa ni kpamba mini maligumaaniba kpamba ni Naawuni zaligubaŋdib’ zaa ti zaɣis’ o, ka chɛ ka bɛ ti ku o, amaa di daba ata dali o ni ti neei kum ni.”

²³ Ka Yisa daa yɛli bɛ zaa, “Ŋunkam bɔri ni o doli ma, ŋun zaɣisim’ omaŋa ka kpuɣ’ o dapulli buɣi doli ma dabisili kam.

²⁴ Dama ŋunkam tiligir’ o nyɛvili ni ti kɔŋ li, ka ŋunkam mi kɔŋ’ o nyɛvili n zuɣu ni ti lan nya li.”

²⁵Ka o daa bɔhi ba, “Sal’ yi lee nya dunia ŋɔ binshɛɣukam zaa ka ti kɔŋ o nyɛvili, nyɔ’ bɔ ka o lee di?

²⁶Dinzuɣu ŋunkam zɔri vi m mini n yɛligu zuɣu, Daadam Bia yi ti labina ni o jilima ni o Ba Naawuni mini malaika kasinim’ jilima, o gba ni ti zo vi dilana zuɣu.

²⁷Yɛlimaŋli ka n yɛri ya, ninvuɣ’ shɛb’ be kpe ka ku kpi hal ka bɛ nini ti nya Naawuni nam.”

²⁸ Yɛtɔɣa ŋɔ nyaaŋa zaŋ chaŋ kaman daba anii dali ka Yisa daa zaŋ Pita mini Jɔn ni Jeemsi pah’ omaŋ’ zuɣu n-du zo’ shɛli zuɣu ni o ti suhi Naawuni.

²⁹O ni daa suhiri Naawuni maa, ka o niŋgbuŋ biɛhigu ti taɣi, ka o binyɛrigu mi paligi paratɛte kaman gol’ la;

³⁰ka bɛ daa nya niriba ayi o sani. Anabi Musa mini Anabi Ilaija

³¹n-daa puhi zani o sani ni jilima, ka bɛ min’ o tɔɣisiri ŋun’ Yisa ni ti yɛn niŋ shɛlikam Jɛrusalɛm ka naanyi kpi la yɛla.

³²Di saha gom daa wum Pita min’ o tab’ la pam, amaa ka bɛ lee ne n-ʒiya, ka daa ti nya Yisa jilima ni niriba ayi bɛn daa ʒe o sani maa.

³³Niriba ayi maa ni daa ti ŋmaligi chani saha shɛli ka Pita yɛli Yisa, “N Duuma, di viɛli ni ti be kpe. Chɛ ka ti ti suɣa ata: A zaɣ’ yini; Anabi Musa zaɣ’ yini; Anabi Ilaija mi zaɣ’ yini.” Ŋun’ Pita daa ʒi o ni yɛli shɛm maa gbinni.

³⁴Pita ni daa na kul yɛri lala maa, ka sagbani dii sirigina ti lim ba, ka dabiɛm daa gbahi ba pam bɛ ni kpe sagbani maa ni maa zuɣu.

³⁵ Ka kukol’ shɛli daa yɛri sagbani maa ni, “M Bia m-bɔŋɔ, n ni pii so m-bala; wummiy’ o noli!”

³⁶Kukoli maa ni daa tɔɣisi naai ka bɛ nya ka Yisa kɔŋko n-kpalim. Ka bɛ daa zaŋ yɛlli maa shini ka bi yɛli so bɛ ni daa nya shɛli maa yɛla di saha maa.

³⁷N-daa yi biɛɣu ka Yisa min’ o nyaandoliba ata maa yi zoli maa zuɣu siɣina nti paala salo pam.

³⁸Ka salo maa ni yino daa kuhi yɛl’ o, “Karimba, n suhir’ a mi ni a lihi m bia ŋɔ ti ma, dama o kɔŋko n-kul nyɛ m bia.

³⁹Ka alizin’ biɛɣu ʒi o zuɣu kul yiɣisir’ o, ka o yi bembe o ti kuhirimi; ka alizin’ biɛɣu maa darigir’ o hal ka nintɔfuɣifuɣi ŋariti o noli, ka o kul nahind’ o ka bi bɔr’ o bahibu.

⁴⁰Ka n suhi a nyaandoliba ŋɔ ni bɛ kari alizin’ biɛɣu maa, ka bɛ bi tooi.”

⁴¹Ka Yisa garigi bɔhi, “Yinim’ bɛn ka yɛda mini ʒiɛman’ golimanim’ ŋɔ, daba ala ka m mini ya yɛn tooi laɣim be bee daba ala ka n yɛn tooi din ya suɣilo?” Ka yɛl’ o, “Zaŋm’ a bia maa na!”

⁴²O ni daa mali bia maa chani Yisa sani ka alizin’ biɛɣu maa yiɣis’ o n-darig’ o. Ka Yisa tahi alizin’ biɛɣu maa zuɣu, ka chɛ ka bia maa kpaŋ, ka o zaŋ o labisi ti o ba maa.

⁴³Ka Naawuni yiko tuuni ŋɔ daa niŋ niriba maa zaa alahiziba pam. Niriba maa ni daa na kul tɛhiri Yisa ni tumd’ alahiziba tuun’ shɛlikam zaa yɛla maa ka o daa yɛl’ o nyaandoliba,

⁴⁴“Chɛliya ka yɛtɔɣa ŋɔ kpe yi tiba ni viɛnyɛliŋga: Bɛ ni ti zaŋ Daadam Bia niŋ salinim’ nuu ni.”

⁴⁵Amaa ka bɛ daa bi baŋ o ni yɛli shɛm maa gbinni, dama di daa nyɛla yɛlisɔɣirili bɛ sani ni bɛ di baŋ li, ka bɛ mi daa zɔr’ o suhu ni bɛ bɔh’ o baŋ.

⁴⁶ Yisa nyaandoliba daa ti ŋmɛri tab’ naŋgbankpeeni ni bɛ baŋ ŋun gar’ o kpee bɛ ni.

⁴⁷Ka Yisa daa baŋ bɛ suhuri ni tɛha maa ka boli bibil’ na nti zaŋ o zali baɣil’ omaŋa

⁴⁸ ka yɛli ba, “Ŋunkam deeri bibil’ ŋɔ tatabo n yuli zuɣu deerila mani, ka ŋunkam mi deeri ma deerila ŋun tim ma na; dama ŋun pɔri yi zaa ha ni, dilana n-nyɛ wɔɣirili yi ni.”

⁴⁹Ka Jɔn daa yɛli Yisa, “N Duuma, ti nyala so ka o mal’ a yuli kariti alizin’ biɛri, ka ti kar’ o o ni pa ti ni yino maa zuɣu.”

⁵⁰Amaa ka Yisa yɛl’ o, “Di karitiy’ o, dama ŋunkam bi galindi ya bela yi polo.”

⁵¹Yisa alizanda ni labbu saha ni daa ti miri, o daa lo nia ni o chaŋla Jɛrusalɛm,

⁵²ka daa daŋ tim tuumba ni bɛ chaŋ Samaria tiŋkpan’ shɛli nti mali shili n-gul’ o;

⁵³ka tiŋkpaŋ’ maa nim’ daa ti zaɣisi ni bɛ ku deeg’ o, o ni daa pun lo nia ni o gari chaŋ Jɛrusalɛm zuɣu.

⁵⁴ Di saha ka o nyaandoliba ayi bɛn yuya daa booni Jeemsi ni Jɔn daa wum lala ka bɔhi Yisa, “Ti Duuma, a bɔri ni ti chɛ ka buɣim yi zuɣusaa na ti di ba kaman Anabi Ilaija ni daa niŋ shɛm la?”

⁵⁵Ka Yisa ŋmaligi tahi bɛ zuɣu ka yɛli ba, “Yi ʒi din gbibi ya.

⁵⁶Daadam Bia kamina ni o ti tiligi nyɛviya, ka pa ni o ti di nyɛviya.” Ka bɛ daa yiɣisi taɣi tiŋkpan’ shɛli.

⁵⁷Yisa min’ o nyaandoliba maa ni daa ti be soli n-chana, ka do’ so ti yɛl’ o, “N ni dol’ a chaŋ a ni chani luɣ’ shɛlikam zaa.”

⁵⁸Ka Yisa yɛl’ o, “Ŋɔri malila voya, ka noonsi mi mali tɛri, amaa Daadam Bia ka luɣ’ shɛli din ni zaŋ o zuɣu n-sɔŋ gba.”

⁵⁹Ka Yisa gba daa ti yɛli do’ so, “Doli ma!” Ka dilan’ yɛli, “N Duuma, chɛ ka n kuli ka m ba ti di saɣim saɣ’ o tariga ka n sɔɣ’ o pɔi ka naanyi kana ti dol’ a.”

⁶⁰Amaa ka Yisa yɛl’ o, “Chɛ ka kpiimba sɔɣimi bɛ kpiin’ taba, amaa nyin’ cham’ ti moli Naawuni nam molo.”

⁶¹ Ka so mi daa ti lan yɛli Yisa, “N Duuma, n ni dol’ a; amaa lee chɛ ka n kuli nti chɛbisi n yiŋnim’ pɔi ka naanyi kana ti dol’ a.”

⁶²Ka Yisa yɛl’ o, “Di bi simdi ka nir’ chaŋchaŋ ti lan ŋmaligi gbamda. Ŋunkam niŋdi lala bi simdi Naawuni nam ni kpɛbu.”