Read Dagbani Zaligu 11 Bible Online

Zaligu 11 - Dagbani bible

Zaligu 11

¹“Dinzuɣu yumiya Yawɛ ŋun nyɛ yi Naawuni ŋɔ, ka dol’ o ni yɛli shɛm min’ o fukumsi zalikpana ni o zaligu shɛŋa din pahi sahakam.

²Teemiya zuŋɔ dabisili ŋɔ ni pa yi bihi bɛn bi mi, ka bɛ nina mi bi nya Yawɛ ŋun nyɛ yi Naawuni ŋɔ ni daa tum tuun’ shɛŋa la. Amaa yinima n-nyɛ bɛn ni wuh’ o galisim min’ o nuu din mali kpiɔŋ ni o ni daa teeg’ o bɔɣu shɛm

³ ni o ni daa tum Firawuna ŋun daa nyɛ Ijipti naa la min’ o tiŋgbɔŋ zaa alahiziba tuun’ shɛŋa Ijipti la;

⁴ o ni daa niŋ Ijipti tɔbbihi mini bɛ yuri ni bɛ chɛchɛbunsi shɛm la ni o ni daa chɛ ka Teeku Ʒiɛɣu di ba shɛm saha shɛli bɛ ni daa kariti doli ya la. Yawɛ ni daa ku ba shɛm hal ni zuŋɔ dabisili ŋɔ

⁵ni o ni daa tum tuun’ shɛli tin ya tiŋgban’ nɛl’ ni hal ka yi ti paai kpe ŋɔ na.

⁶ O ni daa niŋ Rubin bia Ɛliab bidibisi Datan mini Abiram shɛm la, tiŋgbani ni daa bɔɣi n-vali bɛ mini bɛ malibu ni bɛ suɣa ni binnɛɔŋ kam ŋun daa be bɛ sani Izraɛlnim’ zaa sunsuuni la.

⁷Dama yimaŋmaŋ’ nina daa nya Yawɛ ni tum tuun’ kar’ shɛlikam maa zaa.”

⁸“Dinzuɣu gbibiya fukumsi zaligu shɛŋa zaa n ni zaani ya zuŋɔ dabisili ŋɔ, dina n-ni chɛ ka yi nya yaa n-chaŋ ti ʒini tiŋgbɔn shɛli yi ni yɛn du n-chaŋ ti ʒini maa ni.

⁹Ka yi ni ti be Yawɛ ni daa po pɔri yi yaannim’ sani ni o ni zaŋ tiŋgbɔn shɛli ti bɛ mini bɛ zuliya la ni yuui, di nyɛla tiŋgban’ shɛli din mali bihim mini shiri pam.

¹⁰Dama yi ni kpɛri tiŋgbɔn shɛl’ ni ni yi ti deei li su maa bi be kaman yi ni daa yi Ijipti tiŋgbɔn shɛli ni na la, nimaani yi daa yi biri yi bimbira, yi chanila yi naba zuɣu ti ŋɔŋ kom na ti yɔɣi li kaman ʒiɛvari puu la.

¹¹Amaa yi ni chani ni yi ti deei tiŋgbɔn shɛli ʒini maa nyɛla zoya mini vinvama tiŋgbɔŋ, ka saa miri nimaani.

¹²Di nyɛla Yawɛ ŋun nyɛ yi Naawuni ŋɔ zaŋsim ni be tiŋgbɔn shɛl’ ni. Yawɛ ŋun nyɛ yi Naawuni ŋɔ kul lihirila tiŋgbɔŋ maa viɛnyɛliŋga yuuni piligu ni hal ni di naabu ni.

¹³“Yi yi ni dol’ o fukumsi zalikpan’ shɛlikam n ni zaani ya zuŋɔ dabisili ŋɔ, ka yuri Yawɛ ŋun nyɛ yi Naawuni ŋɔ, ka jɛmd’ o ni yi suhuri zaa ni yi shihi zaa,

¹⁴dindina o ni tin ya saa yi tiŋgbɔŋ ni saha dɛde, saa ŋun daŋ tooni mini saa ŋun bahindi nyaaŋa, ka yi puri atam niŋ pam, ka yi nya wain mini kpam.

¹⁵Ka o ti chɛ ka mɔri niŋ mɔɣu ni ka yi biŋkɔbiri ŋubira, ka yi di n-tiɣi.

¹⁶Miriya ka yi ti chɛ ka bɛ yɔhim ya ka yi ŋmaligi doli wuna jɛmdi li, dama di saha

¹⁷ Yawɛ suhu ni ti yiɣisi bahi yi zuɣu, ka o chɛ ka saa ku lan min ya, ka yi bindira ku niŋ, ka di zuɣu chɛ ka yi kpi yomyom Yawɛ ni zaŋ tiŋgbɔŋ viɛl’ shɛli tiri ya maa ni.

¹⁸“Dinzuɣu zaŋmiya n yɛligu ŋɔ niŋ yi suhuri ni mini yi biɛhigu ni, zaŋmiya li lo yi nuhi ni ka di leei shihirili, ka zaŋ li lo m-pa yi gbɛri zuɣu kaman saba la.

¹⁹Zaŋmiya li wuhi yi bihi. Yi yi ʒi yi yinsi puuni, yin’ tɔɣisimiya di yɛla, ka yi yi ti be luɣ’ shɛli polo bee yi yi ti dɔni bee yi yi ti yiɣisi, yin’ tɔɣisimiya di yɛla.

²⁰ Ka yi ti sab’ li pa yi yinsi dunɔpaɣirisi zuɣu mini yi dunɔdaya zuɣu.

²¹Ka lala zuɣu chɛ ka yi mini yi bihi dabisa ti nabi tiŋgbɔn shɛli Yawɛ ni daa po pɔri ni o ni zaŋ ti yi yaannim’ la ni n-yuui nimaani kaman sagbana ni be tiŋgbani zuɣusaa shɛm ŋɔ.

²²Yi yi ni doli n ni zaŋ fukumsi zalikpan’ shɛŋa zaa zaani ya ŋɔ viɛnyɛliŋga, ka yuri Yawɛ ŋun nyɛ yi Naawuni ŋɔ, ka dol’ o soya zaa, ka zaŋ yimaŋ’ ti o,

²³dindina Yawɛ ni kari zuliya shɛb’ zaa bɛn be yi tooni ŋɔ bahi, ka yi ti deei zuliya shɛb’ bɛn galisi ka mali kpiɔŋ gari ya tinsi su.

²⁴Yi napɔna yi ti kul no di luɣ’ shɛlikam di ni leei yi dini. Yi tintariga ni ti zanila Lɛbanɔn tiŋgban’ nɛl’ ni n-zaŋ Yufretiiz Mɔɣili ni hal ti paai Wulinluhili polo teeku[4] la ni.

²⁵ So ti ku tooi zaŋ o nyɔɣu yɔn ya. Yawɛ ŋun nyɛ yi Naawuni ŋɔ ni ti chɛ ka yi yɛla gbahi yi ni yɛn chaŋ tiŋgbɔn shɛli ni maa nim’ zaa dabiɛm kaman o ni daa lɔn ya alikauli shɛm la.

²⁶“Nyamiya, n zaŋla alibarika mini noli dibu zali ya zuŋɔ dabisili ŋɔ:

²⁷Yi yi doli Yawɛ ŋun nyɛ yi Naawuni ŋɔ fukumsi zalikpan’ shɛŋa n ni zaani ya zuŋɔ dabisili ŋɔ, dina n-nyɛ alibarika maa,

²⁸ka yi yi zaɣisi Yawɛ ŋun nyɛ yi Naawuni ŋɔ fukumsi zalikpana maa, ka ŋmaligi ka chɛ n ni zaani ya ni yi doli so’ shɛli zuŋɔ dabisili ŋɔ, ka chaŋ ti jɛmdi wun’ shɛŋa yi ni bi mi, din’ mi n-nyɛ noli dibu maa.

²⁹ Ka Yawɛ yi ti zaŋ ya tahi yi ni kpɛri tiŋgbɔn shɛli ni ni yi ti ʒini maa, yin’ zaŋmiya alibarika ŋɔ ti tam Gɛrizim Zoli zuɣu, ka zaŋya noli dibu ŋɔ mi ti tam Ɛbal Zoli zuɣu.

³⁰Yi mi ni di bela Jɔɔdɛn Mɔɣili duli zaŋ labi wulinluhili polo Keenannim’ bɛn be Araba la tiŋgban’ ni. Tiŋgbani din be Giligal tooni polo m-baɣi Mɔre oki tia la.

³¹Yi yi ti du Jɔɔdɛn Mɔɣili chaŋ ti ʒi tiŋgbɔn shɛli Yawɛ ŋun nyɛ yi Naawuni ŋɔ ni zaŋ tiri ya maa ni, yi yi ti ʒini di ni ka be di ni,

³²yin’ doliya n ni zaŋ zaligu shɛŋa zaa zaani ya zuŋɔ dabisili ŋɔ viɛnyɛliŋga.”