Read Dagbani Zaligu 12 Bible Online

Zaligu 12 - Dagbani bible

Zaligu 12

¹“Zaligu shɛŋa yi ni yɛn doli viɛnyɛliŋga Yawɛ ŋun nyɛ yi yaannim’ Naawuni ŋɔ ni zaŋ tiŋgbɔn shɛli tin ya ni yi ʒini di ni saha shɛli zaa yi ni yɛn be dunia yili m-bɔŋɔ:

²Saɣimmiya yi ni yɛn kari ninvuɣ’ shɛb’ ka deei bɛ tiŋgbɔŋ maa buɣa jɛmbu shee zaa, din be zoya zuɣu mini daboya zuɣu ni ti’ maha gbina ni zaa.

³ Daamiya maligu bimbina la luhi, ka wurim bɛ buɣa bin’ wɔɣila la, ka nyo bɛ wuni Ashɛra binnana la buɣim, ka lala chɛ ka yi kpihim bɛ yuli nimaani.

⁴Miriya ka yi ti doli soya ŋɔ n-jɛm Yawɛ ŋun nyɛ yi Naawuni ŋɔ.

⁵Amaa bomiya nya Yawɛ ŋun nyɛ yi Naawuni ŋɔ ni pii luɣ’ shɛli yi zuliyanim’ maa zaa sani n-leeg’ o biɛhigu shee ni bɛ jɛmd’ o nimaani la.

⁶Nimaani ka yi ni ti mali yi ni zaŋdi sara shɛli nyɔri buɣim la mini yi sara maligunima ni bina pirigibu bupia puuni vaabu yim ni yi pina ni yi ni po pɔri ni yi mali sara shɛŋa ni yi suhuyubu sara maligunima ni yi niɣi mini yi biŋkɔbbaligu ni tuui dɔɣi bi’ shɛba maligunima.

⁷Nimaani ka yi mini yi yinsinim’ ni ti di li Yawɛ ŋun nyɛ yi Naawuni ŋɔ tooni, ka mali suhupiɛlli. Yawɛ ŋun nyɛ yi Naawuni ŋɔ ni niŋ alibarika niŋ yi ni yi tuuni kam zaa ni zuɣu.

⁸Yi ti bi yɛn niŋdi kaman ti ni niŋdi shɛm kpe zuŋɔ dabisili ŋɔ. Ti zaa kul niŋdila ti suhuri ni yu shɛm,

⁹dama yi na bi paai vuhim shee mini Yawɛ ŋun nyɛ yi Naawuni ŋɔ ni zaŋ luɣ’ shɛli tiri ya maa ni.

¹⁰Yi yi ti du Jɔɔdɛn Mɔɣili n-chaŋ ti be Yawɛ ŋun nyɛ yi Naawuni ŋɔ ni zaŋ tiŋgbɔn shɛli tiri ya maa ni, ka o ti tin ya vuhim yi dimnim’ bɛn gili ya la zaa sani, ka chɛ ka yi be ni alaafee,

¹¹di saha Yawɛ ŋun nyɛ yi Naawuni ŋɔ ni pii luɣ’ shɛli din nyɛ o jɛmbu shee, ka yi ti zaŋdi n ni zali ya binshɛŋa ŋɔ zaa na. Yi ni ti zaŋdi sara shɛli bɛ ni zaŋdi nyɔri buɣim la mini yi sara maligunima ni yi binyɛra pirigibu bupia kam yim zuɣu ni yi pina ni yi ni po pɔri ni yi ni zaŋ pin’ shɛŋa zaa ti Yawɛ na la.

¹²Ka yi mini yi bidibisi ni yi bipuɣinsi ni yi daba bɛn nyɛ dɔbba mini paɣiba ni Lɛvinim’ bɛn be yi tinsi ni ti mali suhupiɛlli, dama Lɛvinim’ maa ka tarili bee fali yi sani.

¹³Miriya ka yi ti mali yi ni zaŋdi sara shɛli nyɔri buɣim la yi ni kul paai luɣ’ shɛlikam zaa.

¹⁴Amaa luɣ’ shɛli Yawɛ ni pii yi zuliya yini sani, nimaani kɔŋko ka yi ni ti maani bɛ ni zaŋdi sara shɛli nyɔri buɣim maa, ka niŋmiya n ni zali ya ni yi niŋ shɛlikam maa zaa nimaani.

¹⁵“Amaa saha shɛlikam yi yi ti bɔra, yi ni tooi kɔri yi biŋkɔbiri ŋubi yi tin’ shɛŋa ni yi ni be kaman Yawɛ ni niŋ alibarika niŋ yi ni shɛm; bɛn be kasi mini bɛn bi be kasi zaa ni tooi ŋub’ li kaman yi ni ŋubiri kparibuhi bee wolisi shɛm la.

¹⁶ Amaa lee miriya ka yi ti ŋubi binʒim, chɛliya ka di yi m-bahi tiŋgban’ ni kaman kom la.

¹⁷Miriya ka yi ti di yi kawana pirigibu bupia kam ni yim zuɣu bee yi wain bee yi kpam bee yi niɣi ni tuui dɔɣi naɣibihi shɛba bee yi biŋkɔbbaligu ni tuui dɔɣi bi’ shɛba bee yi ni po pɔri ni yi zaŋ pin’ shɛŋa ti bee yi suhuyubu pina bee yi pin’ shɛŋa din pahi ti tinsi maa ni.

¹⁸Amaa yi mini yi bidibisi ni yi bipuɣinsi ni yi daba bɛn nyɛ dɔbba mini paɣiba ni Lɛvinim’ bɛn be yi tinsi maa ni ni ti ŋub’ li ni suhupiɛlli Yawɛ ŋun nyɛ yi Naawuni ŋɔ tooni yi tuma zaa zuɣu.

¹⁹Miriya ka yi ti niŋ Lɛvinim’ yi baɣaka saha shɛli zaa yi ni yɛn be yi tiŋgbɔŋ maa ni.

²⁰“Ka Yawɛ ŋun nyɛ yi Naawuni ŋɔ yi ti chɛ ka yi tiŋgbɔŋ maa yɛligi kaman o ni lɔn ya alikauli shɛm la, ka yi ti bɔri ni yi ŋubi nimdi, dama nimdi kɔre ni ti mali ya, yi ni tooi ŋubi yi ni bɔri li saha shɛli.

²¹Ka Yawɛ ŋun nyɛ yi Naawuni ŋɔ ni yɛn pii luɣ’ shɛli leeg’ o jɛmbu shee maa mini yi ya yi waɣa pam, ka yi kɔrigi yi niɣi bee yi biŋkɔbbaligu shɛb’ Yawɛ ni tin ya maa kaman n ni zali ya shɛm, dindina yi ni tooi ŋub’ li saha shɛli yi ni bɔra.

²²Yi ni kul ŋubiri kparibuhi mini wolisi shɛm, lala ka yi ni ti ŋub’ ba, bɛn ka kasi mini bɛn be kasi zaa ni tooi ŋub’ li.

²³Naɣ’ kul miriya ka yi ti ŋubila binʒim, dama ʒim nyɛla nyɛvili, ka di bi simdi ni yi ti ŋubi nimdi mini di nyɛvili.

²⁴ Miriya ka yi ti ŋub’ li, ti kpaamiya li bahi tiŋa kaman kom la.

²⁵Di ŋubiya li, ka binshɛɣukam ti niŋ viɛnyɛliŋga yi sani ni yi bihi sani yi kalinsi nyaaŋa, yi ni tum din tuhi Yawɛ sani zuɣu.

²⁶Amaa pin’ kasi shɛŋa din yi yi sanna mini yi ni po pɔri ni yi zaŋ pin’ shɛŋa ti dina, zaŋmiya li chaŋ Yawɛ ni yɛn pii luɣ’ shɛli maa.

²⁷Zaŋmiya yi ni zaŋdi sara shɛŋa nyɔri buɣim la nimdi mini di binʒim mali sara Yawɛ ŋun nyɛ yi Naawuni ŋɔ sara maligu bimbini la zuɣu. Kpaamiya yi sara maligu shɛŋa din kpalim binʒim bahi Yawɛ ŋun nyɛ yi Naawuni ŋɔ sara maligu bimbini luɣili zuɣu, amaa yi ni tooi ŋubi di nimdi maa dina.

²⁸Doliya n ni zaŋ yɛtɔɣ’ shɛŋa zaa zaani ya zuŋɔ dabisili ŋɔ viɛnyɛliŋga din ni chɛ ka binshɛɣukam niŋ viɛnyɛliŋga yi sani ni yi bihi sani yi kalinsi nyaaŋa sahakam, dama yi yɛn niŋdila din viɛl’ mini din tuhi Yawɛ ŋun nyɛ yi Naawuni ŋɔ sani.”

²⁹“Yawɛ ŋun nyɛ yi Naawuni ŋɔ yi ti ku yi ni chani ni yi ti deei zuliya shɛb’ tiŋgbɔŋ maa, ka chɛ ka yi deei tiŋgbɔŋ maa, yi yi ti deei li ʒini bɛ tiŋgbɔŋ maa ni,

³⁰yin’ miriya ka yi ti doli bɛ tuma, ka zana gbahi ya. Di ti bɔhiya bɛ wuna yɛla n-yɛra, “Wula ka niriba ŋɔ daa lee jɛmdi bɛ wuna ŋɔ? Ti gba bɔri ni ti jɛm li.”

³¹Miriya ka yi ti niŋ Yawɛ ŋun nyɛ yi Naawuni ŋɔ lala, dama binshɛŋa din chihira ka nyɛ Yawɛ ni je shɛŋa zaa, bɛ niŋdi li tiri bɛ wuna maa, dama hal bɛ daa mi n-zaŋ bɛ bidibisi mini bɛ bipuɣinsi nyo buɣim mali bɛ wuna maa.

³² Niŋmiya n ni zali ya ni yi niŋ shɛlikam maa zaa viɛnyɛliŋga. Di pahiya shɛli di ni bee n-yihi shɛli di ni.