Read Dagbani Zaligu 14 Bible Online

Zaligu 14 - Dagbani bible

Zaligu 14

¹ Yi nyɛla Yawɛ ŋun nyɛ yi Naawuni ŋɔ niriba, miriya ka yi ti zaŋ bini ŋmaai yimaŋa bee m-pini yi gbɛri yi kpiimba zuɣu.

² Dama yi nyɛla Yawɛ ŋun nyɛ yi Naawuni ŋɔ niriba bɛn be kasi. Yawɛ n-daa pii ya dunia ŋɔ zuliya pam sunsuuni n-leeg’ omaŋmaŋ’ niriba.

³Miriya ka yi di binshɛŋa din chihiri dibu.

⁴Yin’ ni di biŋkɔb’ shɛba n-nyɛ niɣi mini piɛri ni buhi

⁵ni muli ni wolisi ni kparibuhi ni bambuhi.

⁶Biŋkɔbigu kam ŋun mali takarifiɛma din wɔrigi, ka nyɛ ŋun gbuɣiri ŋubira, yin’ ŋubimiy’ o.

⁷Amaa biŋkɔb’ shɛb’ bɛn gbuɣiri ŋubira, ka bɛ takarifiɛma bi wɔrigi, yin’ di ŋubiya ba. Bɛna n-nyɛ laakuma mini soonsi ni ŋɔŋa, dama bɛ nyɛla bɛn gbuɣiri ŋubira, amaa bɛ ka takarifiɛma din wɔrigi, bɛ nyɛla bɛn bi be nyam yi sani.

⁸Di ŋubiya kuruchunima, dama bɛ nyɛla bɛn mali takarifiɛma din wɔrigi, amaa bɛ bi gbuɣiri ŋubira, dinzuɣu bɛ nyɛla bɛn bi be nyam yi sani. Miriya ka yi ti ŋubi bɛ nimdi, yi mi di ti shihi bɛ zaɣ’ kpima.

⁹Yin’ ni tooi di binshɛŋa zaa bɛn be kom ni n-nyɛ: binshɛɣukam bɛn mali gɔhi mini paɣiri.

¹⁰Amaa binshɛɣukam bɛn ka gɔhi mini paɣiri, yin’ di ŋubiya ba. Bɛ nyɛla bɛn bi be nyam yi sani.

¹¹Yi ni tooi ŋubi noombil’ kam ŋun be nyam.

¹²Amaa bɛmbɔŋɔ n-nyɛ di ni bi simdi ni yi ŋubi shɛba: tɔrili mini juɣu ni zinyaarigu

¹³ni suligu ni baŋtooŋa balibu kam zaa

¹⁴ni kahiŋkɔɣu balibu kam zaa

¹⁵ni taataa ni yuŋ nooŋa ni teeku ni laɣipiɛliga ni wubiga balibu kam

¹⁶ni vikpiluɣu mini viɣu zaɣ’ titali ni kulinoo

¹⁷ni tiŋgban’ nɛl’ ni viɣu ni jukangba ni kulijuɣu

¹⁸ni shinshingooro ni wɔɣivaana balibu kam ni napakoli ni zɔŋ.

¹⁹Binneembihi zaa bɛn mali kpiŋkpama nyɛla bɛn nyɛ daɣiri bini yi sani, ka di bi simdi ni yi ŋub’ ba.

²⁰Ka binshɛb’ bɛn mali kpiŋkpama ka be nyam, yin’ ŋubimiya ba.

²¹ Binshɛɣukam ŋun kpi nyiŋgo’ muni, yin’ di ŋubiy’ o, yi ni tooi zaŋ o ti tinzunnim’ bɛn be yi tinsi ni ka bɛ ŋubi bee yi ni tooi zaŋ o kɔhi tinzun nira zuɣu, dama yinima nyɛla Yawɛ ŋun nyɛ yi Naawuni ŋɔ niriba bɛn be kasi. Miriya ka yi zaŋ bubil’ ma bihim duɣ’ o.

²²Di simdi ni yi yihi yi ni kpuɣi atam shɛli yi puri ni pirigibu bupia puuni yim zuɣu zali yuuni kam.

²³Di simdi ni yi ti di li la Yawɛ ŋun nyɛ yi Naawuni ŋɔ tooni o ni pii luɣ’ shɛli ni bɛ jɛmd’ o la. Yi ni tooi di yi puri atam pirigibu bupia zuɣu yim mini yi wain ni yi kpam ni yi niɣi mini yi biŋkɔbbaligu ni tuui dɔɣi bi’ shɛb’ zaa din ni chɛ ka yi bɔhim Yawɛ ŋun nyɛ yi Naawuni ŋɔ sizuura lubu sahakam.

²⁴Amaa Yawɛ ŋun nyɛ yi Naawuni ŋɔ yi niŋ alibarika niŋ yi ni, ka yi biɛhigu shee wɔɣa, ka yi ku tooi zaŋ li chaŋ nimaani, ka di nyɛla Yawɛ ŋun nyɛ yi Naawuni ŋɔ ni pii tin’ shɛli ni bɛ jɛmd’ o nimaani wɔɣilim maa zuɣu,

²⁵dindina yin’ zaŋmiya li kɔhi deei liɣiri n-zaŋ liɣiri maa mali chaŋ Yawɛ ŋun nyɛ yi Naawuni ŋɔ ni pii luɣ’ shɛli ni bɛ jɛmd’ o maa

²⁶nti zaŋ li da yi suhu ni bɔri shɛli; yi ni tooi da niɣi bee piɛri bee wain bee dam din mali kpiɔŋ bee yi suhu ni kul bɔri shɛli, ka yi mini yi yinsinim’ ti di li nimaani Yawɛ ŋun nyɛ yi Naawuni ŋɔ tooni, ka laɣim mali suhupiɛlli.

²⁷Miriya ka yi ti tam Lɛvinim’ bɛn be yi tinsi maa ni la yɛla, dama bɛ ka tarili bee fali yi sani.

²⁸Yuma ata kam puuni, zaŋmiya yi puri atam pirigibu bupia zuɣu yim sɔŋ yi tinsi ni,

²⁹ ka Lɛvinim’ bɛn ka tarili bee fali yi sani la mini tinzunnim’ bɛn be yi sani ni kpibisi ni pakoya bɛn be yi tinsi ni gba di n-tiɣi, ka Yawɛ ŋun nyɛ yi Naawuni ŋɔ niŋ alibarika niŋ yi tuma zaa ni.