Read Dagbani Zaligu 15 Bible Online

Zaligu 15 - Dagbani bible

Zaligu 15

¹Yuma ayopɔin kam ni di simdi ni yi ku sama.

²Yi ni yɛn niŋ shɛm ku li m-bɔŋɔ: Ŋunkam samli dol’ o ʒiʒiinikpee, ŋun’ kum’ li, ka di lan yɛli ni o ʒiʒiinikpee maa yom’ li, dama bɛ moli Yawɛ ni zali ni bɛ kum’ sama saha shɛli molo.

³Tinzun’ nira yi di a samli, a ni tooi bɔh’ o dee’ li, amaa a mabia ŋun be yi ʒilɛl’ ni ŋuna, di simdi ni a ku san’ shɛli din be a min’ o sunsuuni.

⁴Binshɛli ti ku pooi yi ni so, dama Yawɛ shiri niŋ alibarika niŋ yi ni ŋun’ Yawɛ ŋun nyɛ yi Naawuni ŋɔ ni zaŋ tiŋgbɔn shɛli tin ya ni yi ʒini maa ni.

⁵Yi yi ni deei Yawɛ ŋun nyɛ yi Naawuni ŋɔ noli, ka dol’ o fukumsi zaligu shɛŋa zaa n ni zaani ya zuŋɔ dabisili ŋɔ viɛnyɛliŋga,

⁶Yawɛ ŋun nyɛ yi Naawuni ŋɔ yi ti niŋ alibarika niŋ yi ni kaman o ni lɔn ya alikauli shɛm la, yi ni ti dihi zuliyanim’ pam samli; amaa yinim’ ti ku paŋ shɛli. Yi ni ti su zuliyanim’ pam, amaa bɛn’ ti ku sun ya.

⁷So yi be yi ni n-nyɛ ŋun ka, ka nyɛ yi ʒilɛl’ ni nira m-be yi tin’ shɛl’ ni Yawɛ ŋun nyɛ yi Naawuni ŋɔ ni zaŋ tiŋgbɔn shɛli tin ya maa ni, yin’ di kuuya yi nini niŋ’ o bee n-kpibi yi nuu zaŋ chaŋ yi ʒiʒiinikpee ŋun ka maa polo.

⁸ Amaa yin’ teemiya yi nuu n-zaŋ o ni bɔri shɛli maa paŋ o ni yi suhu zaa ka di saɣ’ o, hal di yi kul nyɛ shɛlikam.

⁹Miriya ka yi ti zaŋ biɛm tɛha kpɛhi yi suhu ni, ka yɛli ni yuun’ shɛli din pahir’ ayopɔin ka nyɛ samli kubu yuuni la bi lan waɣa, ka di zuɣu chɛ ka yi kuui yi nini niŋ yi ʒiʒiinikpee ŋun ka maa, ka bi ti o shɛli. Yi ʒiʒiinikpee maa yi fabili niŋ Yawɛ, yi ni kpe taali ni.

¹⁰Timiya ni yi suhu zaa, ka yi yi yɛn niŋ li yin’ di ŋumdiya yi kparima ni, dama dimbɔŋɔ n-ni chɛ ka Yawɛ ŋun nyɛ yi Naawuni ŋɔ niŋ alibarika niŋ yi tuma mini yi ni niŋdi shɛlikam ni.

¹¹ Nandaamba kul ku kɔŋ dunia ŋɔ ni, dinzuɣu ka n zali ya, “Teemiya yi nuu n-tim’ faranim’ mini yi ʒiʒiinitab’ bɛn nyɛ nandaamba bɛn be yi tiŋgbɔŋ ni pina.”

¹²Bɛ yi kɔhi a ʒilɛl’ ni Yɛhudia doo bee paɣa a zuɣu, ka o tum tuma ti a yuma ayɔbu, yuun’ shɛli din pahira ayopɔin ni, nyin’ bahimi dilana ka o chaŋ.

¹³Ka a yi bahi a dabili ni o chaŋ, nyin’ di chɛ ka o chaŋ ni nu’ zaŋa.

¹⁴Di simdi ka a ti o Yawɛ ŋun nyɛ a Naawuni ŋɔ ni ti a binshɛŋa zaa la ni shɛli. A ni tooi piig’ a biŋkɔbbaligu ti o bee a puu atam bee a wain tɔɣiri bɔɣili ni wain ti o ni a suhu zaa.

¹⁵Teemiya ni yi daa nyɛla daba Ijipti tiŋgbɔŋ ni, ka Yawɛ ŋun nyɛ yi Naawuni ŋɔ daa fan ya bahi, dinzuɣu ka n zaani ya zaligu ŋɔ zuŋɔ dabisili ŋɔ.

¹⁶Amaa a dabili maa yi yɛl’ a, ‘N ku chaŋ ka chɛ a, ka di nyɛla o ni yur’ a mini a yiŋnima yi ni gbib’ o viɛnyɛliŋga zuɣu,

¹⁷dindina nyin’ bom’ peeŋkpaa n-zaŋ o tibili tabili dunoli naŋgbanyee n-chib’ li voli, ka o nyɛ a dabili sahakam. Zaŋ chaŋ a dabili ŋun nyɛ paɣ’ gba polo, di simdi ni a niŋ o lala.

¹⁸ Ka a yi yɛn bah’ o ka o chaŋ, nyin’ di chɛ ka di muɣis’ a, dama o tum tuma yuma ayɔbu ti a, ka di gar’ a ni di yɛn zaŋ laɣ’ shɛli bu padiriba paa ʒii buyi, ka Yawɛ ŋun nyɛ a Naawuni ŋɔ niŋ alibarika niŋ a tuuni kam ni.

¹⁹ Yi niɣi ni tuui dɔɣi naɣilabihi shɛb’ mini yi biŋkɔbbaligu ni tuui dɔɣi zaɣ’ la’ shɛb’ zaa, yin’ zaŋmiya ba ti Yawɛ ŋun nyɛ yi Naawuni ŋɔ. Di zaŋya yi naɣilabihi tuulinim’ tum tuma, yi mi di chɛnya yi biŋkɔbbaligu ni tuui dɔɣi bi’ shɛb’ kɔbiri.

²⁰Di simdi ni yi mini yi yinsinim’ ti zaŋdi ba chani Yawɛ ŋun nyɛ yi Naawuni ŋɔ ni pii luɣ’ shɛli ni bɛ jɛmd’ o maa nti kɔriti ba ŋubiri Yawɛ tooni yuuni kam.

²¹Amaa o yi mali daŋa, ka di nyɛ dan’ titali, kaman o yi nyɛ napombara bee o yi nyɛ zoma, yin’ di zaŋy’ o mali sara ti Yawɛ ŋun nyɛ yi Naawuni ŋɔ.

²²Yi ni tooi ŋub’ ba yi tinsi ni, bɛn be nyam mini bɛn bi be nyam zaa yi ni tooi ŋub’ ba kaman yi ni kul ŋubiri kparibuhi mini wolisi shɛm la.

²³ Amaa miriya ka yi ti ŋubi bɛ ʒim; yi ni ti kpaai li mi bahi tiŋgban’ ni kaman kom la.