Read Dagbani Zaligu 16 Bible Online

Zaligu 16 - Dagbani bible

Zaligu 16

¹Puhimiya Yawɛ ŋun nyɛ yi Naawuni ŋɔ Yaɣigari chuɣu Abib goli ni, dama Abib goli maa ni yuŋ ka Yawɛ ŋun nyɛ yi Naawuni ŋɔ daa yihi ya Ijipti tiŋgbɔŋ ni.

²Di simdi ni yi ti zaŋ biŋkɔbbihi bee niɣi mali Yaɣigari chuɣu sara ti Yawɛ ŋun nyɛ yi Naawuni ŋɔ luɣ’ shɛli ŋun’ Yawɛ ni pii ni bɛ jɛmd’ o la.

³Miriya ka yi ti ŋubi di mini dabindi ni be binshɛlikam ni. Yi ni ti ŋubila di mini bɔrɔbɔro din ka dabindi daba ayopɔin, ka di nyɛ nahiŋgu bɔrɔbɔro, dama yi daa kul niŋla yomyom yi Ijipti tiŋgbɔŋ ni din ni chɛ ka yi teeri yi ni daa yi Ijipti dahin’ shɛli maa yɛla yi nyɛvili ni zaa.

⁴Di ti chɛliya ka so nya dabindi yi sani daba ayopɔin ŋɔ puuni, yi ni be luɣ’ shɛlikam zaa bee n-chɛ ka yi ni kɔrigi biŋkɔb’ so dabisi tuuli dali maa nimdi zani yuŋ hal ti neei biɛɣu.

⁵Miriya ka yi ti mali Yaɣigari chuɣu sara maa Yawɛ ŋun nyɛ yi Naawuni ŋɔ ni zaŋ tin’ shɛŋa tin ya maa tin’ shɛli ni.

⁶Amaa ti malimiya li la luɣ’ shɛli Yawɛ ŋun nyɛ yi Naawuni ŋɔ ni pii ni yi jɛmd’ o nimaani kɔŋko, ka yi ni ti mali Yaɣigari chuɣu sara maa zaawuni wuntan’ luhili saha, yi ni daa yi Ijipti tiŋgbɔŋ ni dahin shɛl’ la saha.

⁷Ka yi yi ti duɣi li ŋubi luɣ’ shɛli Yawɛ ŋun nyɛ yi Naawuni ŋɔ ni yɛn pii maa n-yi biɛɣu asiba, yin’ labimiya yi suɣa ni.

⁸ Yi ni ti ŋubiri la bɔrɔbɔro din ka dabindi la hal ni daba ayɔbu, ka dabisi’ shɛli din pahir’ ayopɔin dali, di simdi ni yi ti laɣim jɛm Yawɛ ŋun nyɛ yi Naawuni ŋɔ, ka di ti tumiya tuun’ shɛli dindali maa.

⁹Yi yi ti piligi kachɛɣu dahin’ shɛli, yin’ piligimiya kali dindali maa hal ni bakɔi ayopɔin,

¹⁰di saha ka yi ti puhi dakulɔdakulo chuɣu, ka zaŋ yi suhuyubu pina kaman Yawɛ ŋun nyɛ yi Naawuni ŋɔ ni niŋ alibarika niŋ yi ni, ka yi nya shɛlikam na.

¹¹Ka yi mini yi bidibisi ni yi bipuɣinsi ni yi daba bɛn nyɛ dɔbba ni yi dabipaɣiba ni Lɛvinim’ bɛn be yi tinsi ni ni saamba ni kpibisi ni pakoya bɛn be yi sani ti mali suhupiɛlli Yawɛ ŋun nyɛ yi Naawuni ŋɔ tooni, luɣ’ shɛli ŋun’ Yawɛ ŋun nyɛ yi Naawuni ŋɔ ni yɛn pii leeg’ o jɛmbu shee maa.

¹² Teemiya ni yi daa nyɛla daba Ijipti tiŋgbɔŋ ni, ka doliya zaligunim’ ŋɔ viɛnyɛliŋga.

¹³Yi yi ti kpuɣi yi puri atam, ka kahim yi wain naai, yin’ zaŋmiya daba ayopɔin puhi suɣa tibu chuɣu.

¹⁴Ka yi mini yi bidibisi ni yi bipuɣinsi ni yi daba bɛn nyɛ dɔbba ni yi daba bɛn nyɛ paɣiba ni Lɛvinima ni kpibisi ni pakoya bɛn be yi tinsi ni ti puhi chuɣu maa ni suhupiɛlli.

¹⁵ Zaŋmiya daba ayopɔin puhi chuɣu maa Yawɛ ŋun nyɛ yi Naawuni ŋɔ ni yɛn pii luɣ’ shɛli maa, dama Yawɛ ŋun nyɛ yi Naawuni ŋɔ ni niŋ alibarika niŋ yi puri atam mini yi ni tum tuun’ shɛlikam zaa ni. Ka di simdi ni yi shiri puhi chuɣu maa.

¹⁶Yi zuliya ni dɔbba zaa ni laɣim Yawɛ ŋun nyɛ yi Naawuni ŋɔ sani o ni yɛn pii luɣ’ shɛli maa buta yuuni puuni. Bɔrɔbɔro din ka dabindi chuɣu puhibu ni mini dakulɔdakulo chuɣu puhibu ni ni suɣa tibu chuɣu puhibu ni. Di bi simdi ni bɛ ti ka Yawɛ sanna ni nu’ zaŋa.

¹⁷Di simdi ni sokam ti ti o yaa tariga kaman Yawɛ ŋun nyɛ yi Naawuni ŋɔ ni niŋ alibarika niŋ o ni shɛm.

¹⁸Piimiya sariakaritiba mini tuma kpamba Yawɛ ŋun nyɛ yi Naawuni ŋɔ ni zaŋ fɔntin’ shɛŋa tin ya maa zaa ni kaman yi daŋdaŋ ni nyɛ shɛm, ka bɛ ti doli zaligu soli maani niriba yɛla.

¹⁹ Miriya ka yi ti ti nimmira yɛlimaŋli, yi mi di ti zaŋ gaŋbu bee birapu dibu kpɛhi yi bebu ni, dama birapu dibu nyɛla din chɛ ka baŋda nina bi ne, ka chɛ ka bɛn mali yɛlimaŋli kɔŋdi yɛlimaŋli.

²⁰Kul doliya zaligu ni wuhi shɛm kɔŋko din’ ni chɛ ka yi be, ka ti ʒini Yawɛ ŋun nyɛ yi Naawuni ŋɔ ni zaŋ tiŋgbɔn shɛli tiri ya maa ni.

²¹ Miriya ka yi ti sa Ashɛra tia baɣili yi ni ti yɛn me Yawɛ ŋun nyɛ yi Naawuni ŋɔ sara maligu bimbin’ shɛl’ la.

²² Yi mi miriya ka yi ti zaŋ kuɣa me binwɔɣinli zali, dimbɔŋɔnim’ nyɛla Naawuni ni je shɛŋa.