Read Dagbani Zaligu 18 Bible Online

Zaligu 18 - Dagbani bible

Zaligu 18

¹Lɛvinim’ bɛn nyɛ maligumaaniba la, Lɛvi zuliya niriba maa zaa ti ku mali tarili bee fali Izraɛl tiŋgbɔŋ ni, bɛ ni ti dirila sara binshɛŋa din nyɛ Yawɛ dini.

² Amaa bɛ ku mali fali bɛ mabihi sani, Yawɛ n-nyɛ bɛ fali kaman o ni daa lo ba alikauli shɛm la.

³Maligumaaniba ni su shɛli niriba maa sani n-nyɛ: Ŋunkam yɛn mali sara, ka di nyɛla nahu bee piɛɣu, di simdi ka o yihi bimbɔɣigbini mini yɛno ni bimpuli ti maligumaana.

⁴Zaŋmiya yi kawaan’ daŋda mini yi wain daŋda ni yi kpa’ daŋda ni yi ni tuui chɛ biŋkɔbiri kɔb’ shɛŋa ti o.

⁵Dama Yawɛ ŋun nyɛ yi Naawuni ŋɔ m-pii Lɛvi yi zuliya zaa ni ni o min’ o bihi zani zaŋ ŋun’ Yawɛ yuli tumdi tuma sahakam.

⁶Lɛvi zuliya ni nira yi yi tin’ shɛl’ ni o ni pun be Izraɛl tiŋgbɔŋ ni n-ka Yawɛ ni yɛn pii luɣ’ shɛli na (ka o mi ni tooi kana o ni bɔri saha shɛli),

⁷dindina o ni tooi zaŋ Yawɛ ŋun nyɛ o Naawuni ŋɔ yuli tum tuma kaman o Lɛvi tab’ zaa ni zaani Yawɛ tooni tumdi tuma nimaani shɛm.

⁸Ka bɛ zaa dihili ni ti nyɛla dɛde hal bɛ ni mali tarili bɛ dɔɣiriba ni kɔhiri bɛ daŋ ni neen’ shɛŋa ni la zaa yoli.

⁹Yi yi ti paai Yawɛ ŋun nyɛ yi Naawuni ŋɔ ni zaŋ tiŋgbɔn shɛli tiri ya maa ni, yin’ miriya ka yi ti tumdi zuliya shɛb’ bɛn be nimaani tuun’ shɛŋa din tumbu chihiri la.

¹⁰ Yi ni so miri ka o ti zaŋ o bidibiga bee o bipuɣiŋga nyo buɣim mali sara bee n-ŋmɛri bihigu bee m-buɣiri baɣa bee n-nyɛ bɔha bee bukpaha

¹¹ bee n-niŋdi shiriku bee n-nyɛ dɔdihira bee kpilikparisilana.

¹²Dama ŋunkam niŋdi dimbɔŋɔnima nyɛla Yawɛ ni bi bɔri so, binyɛra din chihiri ŋɔ niŋbu zuɣu ka Yawɛ ŋun nyɛ yi Naawuni ŋɔ daŋ kariti ba maa.

¹³ Di simdi ni yi kul ʒe Yawɛ ŋun nyɛ yi Naawuni ŋɔ yim.

¹⁴Dama yi ni yɛn kari zuliya shɛb’ maa nyɛla bɛn doli baɣisi mini bihiŋmɛriba yɛligu, amaa yinim’ bɛna, Yawɛ ŋun nyɛ yi Naawuni ŋɔ bi saɣi ni yi niŋ lala.

¹⁵ Yawɛ ŋun nyɛ yi Naawuni ŋɔ ni ti chɛ ka anabi yi yimaŋmaŋ’ niriba ni na kaman n ni be shɛm ŋɔ, ti wummiya anabi maa yɛligu.

¹⁶Yi ni daa suhi Yawɛ ŋun nyɛ yi Naawuni ŋɔ dahin’ shɛli yi ni daa laɣim Sinai Zoli gbini la yɛli shɛm m-bɔŋɔ, “Ti yi lan wum Yawɛ ŋun nyɛ ti Naawuni ŋɔ kukoli pahi bee n-nya buɣim titali ŋɔ yaha, ti ni kpi.”

¹⁷Di saha ka Yawɛ daa garigi yɛli ma, “Bɛ ni yɛli shɛm maa tuhiya.

¹⁸N ni chɛ ka anabi ŋun be kaman nyini ŋɔ yi bɛmaŋmaŋ’ niriba maa ni na m-be bɛ sani, ka n zaŋ n zilinli niŋ anab’ maa nol’ ni, ka o ti yɛri ba n ni zal’ o ni o yɛli ba shɛlikam zaa.

¹⁹ Ka ŋunkam ti zaɣisi anab’ maa ni yɛn zaŋ n yuli tɔɣisi yɛtɔɣ’ shɛŋa maa wumbu, mmaŋmaŋ’ ni ti kari dilan’ saria.

²⁰Amaa anabi so ŋun ti zaŋ wuna yuya tɔɣisiri yɛtɔɣa bee anab’ so ŋun zaŋ n yuli tɔɣisiri yɛtɔɣ’ shɛŋa n ni bi zal’ o ni o tɔɣisi, di daanab’ maa ni kpi.

²¹Yi ni tooi bɔhi yimaŋa, ‘Wula ka ti lee yɛn niŋ baŋ yɛtɔɣ’ shɛli Yawɛ ni bi yɛli?’

²²Anabi yi zaŋ Yawɛ yuli tɔɣisi yɛtɔɣ’ shɛli ka di bi niŋ bee ka shɛli bi wuhi ni di nyɛla yɛlimaŋli, di pala Yawɛ ni yɛli yɛtɔɣ’ shɛli: Anabi maa n-kul ŋme nyɔɣu n-tɔɣisi yɛtɔɣa maa; yin’ di chɛ ka dabiɛm mali ya.”