Read Dagbani Zaligu 2 Bible Online

Zaligu 2 - Dagbani bible

Zaligu 2

¹ ka ti daa labi ti nyaaŋa n-kpe tiŋgban’ nɛli maa ni zaŋ labi Teeku Ʒiɛɣu polo kaman Yawɛ ni daa yɛli ma shɛm, ka ti daa baɣisi Ɛdom Zoli chana n-niŋ dabisi’ gbaliŋ.”

²Di saha ka Yawɛ daa yɛli ma,

³“Yi chaŋ gili zoya ni tiŋgbani ŋɔ ni ka di yuui, kpamiya yi nuzaa polo.

⁴ Ka a yɛli niriba maa, ‘Yi yɛn kpɛla yi dɔɣiriba bɛn nyɛ Iso zuliya ka be Ɛdom la tiŋgban’ ni gari, bɛ ni zɔri ya dabiɛm. Dinzuɣu gbibiya yimaŋa,

⁵ka di chɛliya ka yi mini ba tuhi, n ti ku zaŋ bɛ tiŋgbani maa hal napɔŋ ŋmɛbu yim gba tin ya, dama n daa pun zaŋ Ɛdom Zoli maa tila Iso ni o su li.

⁶Yi ni ti zaŋ liɣiri da bindira bɛ sani di, ka lan zaŋ liɣiri da kom bɛ sani nyu.’

⁷“Yɛlimaŋli, Yawɛ ŋun nyɛ yi Naawuni ŋɔ pun niŋ alibarika niŋ yi ni yi tuma zaa puuni. O mi yi ni be tiŋgban’ nɛli din galisi ŋɔ ni chani ŋɔ yɛla. Yawɛ ŋun nyɛ yi Naawuni ŋɔ kul bela yi sani yuun’ pihinahi ŋɔ zaa, ka binshɛli bi pooi ya.

⁸“Di saha ka ti daa gari ka chɛ ti mabihi bɛn nyɛ Iso zuliya m-be Ɛdom maa, ka daa chɛ Araba soli bahi nyaaŋa, ka lan chɛ Ɛlat mini Ɛziɔngɛba bahi nyaaŋa. Ti ni daa ŋmaligi n-zaŋ kpa Mɔab yɔɣu polo,

⁹ ka Yawɛ daa yɛli ma, ‘Miri ka a muɣisi Mɔabnima bee n-tuhi ba tɔbu, dama n ku zaŋ bɛ tiŋgban’ shɛli tin ya ka yi su li, n ni pun zaŋ Ar ti Lɔt zuliya la zuɣu.’ ”

¹⁰(Ɛmim zuliya bɛn daa nyɛ wɔɣira ka wɔɣawɔɣa kaman Anaki zuliya, ka nyɛ bɛn galisi pam la n-daa pun be nimaani.

¹¹Bɛ daa ŋmanila Anakinima, ka niriba booni ba Rɛfaimnima, amaa Mɔabnim’ daa booni ba la Ɛmimnima.

¹²Hɔrinim’ mi n-daa pun be Ɛdom, amaa ka Iso zuliya daa ti ŋme n-deei li, ka ku ba ka ʒini nimaani n-zani bɛ zaani kaman Izraɛlnim’ ni daa niŋ shɛm Yawɛ ni daa zaŋ tiŋgbɔn shɛli ti ba ni bɛ su li la ni la.)

¹³“Pumpɔŋɔ chamiya ti du Zɛrɛd kulibɔŋ. Di saha ka ti daa chaŋ ti du Zɛrɛd kulibɔŋ maa.

¹⁴ Saha shɛli ti ni daa zaŋ yi Kadɛshibarinia hal ti du Zɛrɛd kulibɔŋ maa daa nyɛla yuun’ pihinahaayika hal ka di ʒiɛman’ maa ni bɛn daa nyɛ tɔbutuhiriba zaa daa ti kpi sansani maa ni kaman Yawɛ ni daa shiri po pɔri yɛli ba shɛm la.

¹⁵Yɛlimaŋli, Yawɛ suhu daa yiɣisi bahi bɛ zuɣu ni o yihi ba sansani maa ni hal ka bɛ zaa daa ti shiri kpi.

¹⁶“Tɔbutuhiriba bɛn daa be niriba maa ni zaa ni daa ti kpi n-naai saha shɛli,

¹⁷ka Yawɛ daa yɛli ma,

¹⁸‘Zuŋɔ dabisili ŋɔ yi yɛn dolila Ar polo ti gari Mɔabnim’ tintariga.

¹⁹ Ka yi yi ti paai Ammɔnnim’ tintariga, yin’ di muɣisiya ba bee n-tuhi ba tɔbu, dama n ku zaŋ Ammɔnnim’ tiŋgbɔŋ maa tin ya ni yi su li, dama n daa pun zaŋ li tila Lɔt zuliya ni bɛ su li.’ ”

²⁰(Niriba daa mi tiŋgbɔŋ maa gba la Rɛfaim, dama Rɛfaimnima n-daa pun be nimaani, amaa Ammɔnnim’ daa yi booni ba la Zamzumimnima.

²¹Bɛ daa nyɛla ninvuɣ’ shɛb’ bɛn mali yaa, ka zooi pam ka wɔɣawɔɣa kaman Anakinim’ la. Amaa ka Yawɛ daa ku ba ka chɛ ka Ammɔnnim’ maa deei bɛ tiŋgbɔŋ maa ʒini n-zani bɛ zaani.

²²Lala ka o daa niŋ ti Iso zuliya bɛn be Ɛdom la, o daa kula Hɔrinima ka chɛ ka bɛ deei bɛ tiŋgbɔŋ maa ʒini n-zani bɛ zaani hal ni zuŋɔ dabisili ŋɔ.

²³Ka di yi nyɛla Avimnim’ bɛn daa be tiŋkpansi zaŋ hal ni Gaza la, Kafitɔrimnim’ bɛn daa yi Kafitɔr[1] na la daa ku ba ka ʒini bɛ ʒiishee maa.)

²⁴“Yiɣisimiya gbaai soli chaŋ ti siɣi Arinɔn vinvamli ni du. Nyamiya, n zaŋ Sihɔn Amɔri nir’ ŋun nyɛ Hɛshibɔn naa ŋɔ min’ o tiŋgbɔŋ niŋ yi nuu ni, ŋmɛmiy’ o tɔbu m-piligi li deebu.

²⁵Zuŋɔ dabisili ŋɔ n ni pili n-chɛ ka dunia ŋɔ luɣilikam niriba zɔn ya dabiɛm, bɛ yi wum yi yɛla dabiɛm ni gbahi ba, ka bɛ ni sɔhira ka biɛrim pam mali ba.”

²⁶“Dinzuɣu ka n daa tim tuumba ka bɛ yi Kɛdɛmɔt tiŋgban’ nɛli ni n-chaŋ Hɛshibɔn naa Sihɔn sani nti zaŋ suhudoo yɛtɔɣa ŋɔ yɛl’ o,

²⁷‘A yi saɣi ni n tim a tiŋgbɔŋ ŋɔ ni gari, n kul yɛn dolila solɔɣu gari, m bi yɛn birigi nudirigu bee nuzaa polo.

²⁸N ni ti zaŋ liɣiri da bindirigu a sani di, ka zaŋ liɣiri da kom a sani nyu. N kul bɔri ni a chɛ ka n chaŋla n naba zuɣu na ti gari

²⁹kaman Iso zuliya bɛn be Ɛdom la mini Mɔabnim’ bɛn be Ar la ni daa niŋ ma shɛm hal ka n ti gbaai Jɔɔdɛn Mɔɣili du n-chaŋ Yawɛ ŋun nyɛ ti Naawuni ŋɔ ni zaŋ tiŋgbɔn shɛli ti ti la ni.’

³⁰“Amaa ka Hɛshibɔn naa Sihɔn daa bi saɣi ni ti gari, dama Yawɛ ŋun nyɛ yi Naawuni ŋɔ n-daa chɛ ka o suhu kpaŋ ka o niŋ tipawumli maa ni di chɛ ka o zaŋ o niŋ yi nuu ni kaman o ni niŋ shɛm pumpɔŋɔ ŋɔ.

³¹“Ka Yawɛ daa yɛli ma, ‘Nyama, M pun piligi zaŋdi Sihɔn min’ o tiŋgbɔŋ maa tiri ya, piligimiya o tiŋgbɔŋ maa deebu pumpɔŋɔ.’

³²Dinzuɣu Sihɔn min’ o niriba zaa ni daa yina ti liri ti n-tuhi ti Jahaz,

³³Yawɛ ŋun nyɛ ti Naawuni ŋɔ daa zaŋ o ti ti, ka ti ku o min’ o bihi ni o niriba zaa.

³⁴Ka ti daa ŋme n-deeg’ o fɔntinsi zaa di saha maa, ka ku dɔbba mini paɣiba ni bihi fɔntiŋ’ kam ni. Bɛ ninvuɣ’ yino gba daa bi tiligi.

³⁵Naɣila biŋkɔbiri ka ti daa zaŋ leei ti ni ŋme tɔb’ di shɛli m-pahi ti ni daa ŋme n-fa neen’ shɛŋa fɔntin’ shɛŋa ti ni daa dee’ la ni.

³⁶Zaŋ Aroa din be Arinɔn vinvamli tariga ni la hal ni fɔntin’ shɛli din be vinvamli maa ni la m-mali hal ni Giliad, tiŋ’ daa kani din goma du n-nyaŋ ti. Yawɛ ŋun nyɛ ti Naawuni ŋɔ daa zaŋ binshɛɣukam zaa ti ti.

³⁷Amaa ti daa bi chaŋ miri Ammɔnnim’ tiŋgbɔŋ la ni zaŋ tabili Jabok kulibɔŋ dul’ la mini fɔntin’ shɛli din daa be zoya tiŋgbɔŋ ni la kaman Yawɛ ŋun nyɛ ti Naawuni ŋɔ ni daa zali shɛm la.”