Read Dagbani Zaligu 27 Bible Online

Zaligu 27 - Dagbani bible

Zaligu 27

¹Di saha ka Musa mini Izraɛl kpamba daa yɛli niriba maa zaa. “Doliya n ni zaŋ zaligu shɛŋa zaa tin ya zuŋɔ dabisili ŋɔ.

²Ka yi yi ti yɛn baai du Jɔɔdɛn mɔɣili dahin’ shɛli chaŋ Yawɛ ŋun nyɛ yi Naawuni ŋɔ ni zaŋ tiŋgbɔn shɛli tin ya maa ni, yin’ bomiya kuɣ’ kara n-niŋ tari ta li.

³Ka a ti sabi zaligu ŋɔ yɛtɔɣa zaa pa di zuɣu, saha shɛli yi yi ti baai du Jɔɔdɛn mɔɣili n-chani ni yi ti kpe tiŋgbɔn shɛli Yawɛ ŋun nyɛ yi Naawuni ŋɔ ni zaŋ tiri ya, ka di nyɛ bihim mini shiri ni be tiŋgbɔn shɛli ni pam kaman Yawɛ ŋun nyɛ yi yaannim’ Naawuni ŋɔ ni daa lɔn ya alikauli shɛm la.

⁴Dinzuɣu yi yi ti baai du Jɔɔdɛn mɔɣili maa, yin’ zaŋmiya n ni zaani ya zaligu shɛŋa zuŋɔ dabisili ŋɔ ni be kuɣu shɛŋa ni ŋɔ ti sa Ɛbal zoli zuɣu, ka niŋ tari ta li,

⁵ka mɛnya kuɣa sara maligu bimbini nimaani n-ti Yawɛ ŋun nyɛ yi Naawuni ŋɔ; di ti yɛn nyɛla kuɣa sara maligu bimbini, ka pa yi ni zaŋ kurugu bini shihi kuɣ’ shɛŋa.

⁶ Di simdi ni yi ti zaŋla kuɣ’ shɛŋa bɛ ni bi kpe m-me sara maligu bimbini maa ti Yawɛ ŋun nyɛ yi Naawuni ŋɔ, ka mali bɛ ni zaŋdi sara shɛli nyɔri buɣim la di zuɣu ti Yawɛ ŋun nyɛ yi Naawuni ŋɔ.

⁷Ka yi ti mali suhudoo sara maligu ti Yawɛ ŋun nyɛ yi Naawuni ŋɔ, ka di li nimaani, ka mali suhupiɛlli Yawɛ ŋun nyɛ yi Naawuni ŋɔ tooni.

⁸ Ka yi ti sabi zaligu ŋɔ yɛtɔɣa zaa viɛnyɛliŋga m-pa kuɣa maa zuɣu.”

⁹Ka Musa mini Lɛvinim’ bɛn nyɛ maligumaaniba la daa tɔɣisi Izraɛlnim’ zaa yɛtɔɣa yɛli, “Izraɛlnima, chɛliya vuri ka wum, zuŋɔ dabisili ŋɔ ka yi leei Yawɛ ŋun nyɛ yi Naawuni ŋɔ niriba.

¹⁰Dinzuɣu deemiya Yawɛ ŋun nyɛ yi Naawuni ŋɔ noli, ka dol’ o fukumsi zaligunim’ min’ o zaligu shɛŋa zaa n ni zaani ya zuŋɔ dabisili ŋɔ.”

¹¹Musa daa lan zali niriba maa zaligu dindali maa yɛli:

¹² Yi yi baai du Jɔɔdɛn mɔɣili, bɛmbɔŋɔnima n-nyɛ bɛn ni ti zani Gɛrizim Zoli zuɣu n-suhi alibarika niŋ niriba maa ni, bɛna n-nyɛ: Simiɔn zuliya niriba mini Lɛvi zuliya niriba ni Juda zuliya niriba ni Isaka zuliya niriba ni Yisifu zuliya niriba ni Bɛnjamin zuliya niriba.

¹³Bɛmbɔŋɔnim’ mi n-ni ti zani Ɛbal zoli zuɣu n-yɛli noli dibu yɛtɔɣa maa. Bɛna n-nyɛ: Rubin zuliya niriba mini Gaad zuliya niriba ni Asha zuliya niriba ni Zɛbulɔn zuliya niriba ni Dan zuliya niriba ni Naftali zuliya niriba.

¹⁴Di saha Lɛvinim’ ni ti duhi bɛ yee yɛli Izraɛlnim’ zaa:

¹⁵ “Ninvuɣ’ so ŋun me wuni bee m-mali binnani bee binshɛlikam din chihiri Yawɛ sani, ka nyɛ tuumbaŋdiba tuma n-zaŋ li zali ashilɔni, noli din’ dim’ o.” Ka sokam garigi yɛli, “Ami!”

¹⁶ “Ninvuɣ’ so ŋun bi tir’ o ba min’ o ma jilima, noli din’ dim’ o.” Ka sokam yɛli, “Ami!”

¹⁷ “Ŋunkam vuɣi o kpee palo tariga kpaa, noli din’ dim’ o.” Ka sokam yɛli, “Ami!”

¹⁸ “Ŋunkam wuhi zom’ soli kpɛhi yɔɣu, noli din’ dim’ o.” Ka sokam yɛli, “Ami!”

¹⁹ “Ŋunkam mɔŋ sana bee kpibiga bee pakoli o yɛlimaŋli ni nyɛ shɛli, noli din’ dim o!” Ka sokam yɛli, “Ami.”

²⁰ “Ŋunkam gol’ o ba paɣa, noli din’ dim’ o, o ni ta o ba bindoo daɣiri zuɣu.” Ka sokam yɛli, “Ami!”

²¹ “Ŋunkam goli biŋkɔbigu kam, noli din’ dim’ o.” Ka sokam yɛli, “Ami!”

²² “Ŋunkam gol’ o tizɔpaɣa, o yi nyɛla o ba bipuɣiŋga bee o ma bipuɣiŋga, noli din’ dim’ o.” Ka sokam yɛli, “Ami!”

²³ “Ŋunkam gol’ o diɛmpaɣa, noli din’ dim’ o.” Ka sokam yɛli, “Ami!”

²⁴“Ŋunkam sɔɣi ku o kpee, noli din’ dim’ o.” Ka sokam yɛli, “Ami!”

²⁵“Ŋunkam deei liɣiri ka ku ŋun ka taali, noli din’ dim’ o.” Ka sokam yɛli, “Ami!”

²⁶ “Ŋunkam bi doli zaligu ŋɔ puuni yɛtɔɣa ŋɔ viɛnyɛliŋga noli din’ dim’ o.” Ka sokam yɛli, “Ami!”