Read Dagbani Zaligu 29 Bible Online

Zaligu 29 - Dagbani bible

Zaligu 29

¹Yawɛ ni daa chɛ ka Musa zaŋ alikauli yɛtɔɣ’ shɛŋa lo Izraɛlnim’ alikauli Mɔabnim’ tiŋgbɔŋ ni m-pah’ o ni daa lo ba alikauli shɛli Sinai Zoli gbin’ la m-bɔŋɔ.

²Ka Musa daa boli Izraɛlnim’ zaa na nti yɛli ba, “Yi daa nya Yawɛ ni tum tuun’ shɛŋa zaa yi ninni Ijipti tiŋgbɔŋ ni, o ni daa niŋ Firawuna min’ o sapashinnim’ ni o tiŋgbɔŋ maa zaa shɛm,

³ka yi nini daa nya zahimbu kara mini shihir’ kara ni alahiziba tuun’ kara la.

⁴Amaa hal ni zuŋɔ Yawɛ na bi tin ya tɛha din ni baŋ bee nina din ni nya bee tiba din ni wum.

⁵N daa zaŋ ya bela tiŋgban’ nɛl’ ni yuun’ pihinahi, yi niŋgbuna ni situra daa bi chahi, ka yi naba ni namda gba daa bi chahi.

⁶Yi daa bi ŋubi bɔrɔbɔro bee n-nyu wain bee binnyur’ kpiɔŋ ni di chɛ ka yi baŋ ni man’ Yawɛ n-nyɛ yi Naawuni.

⁷ Yi ni daa paai kpe na, Hɛshibɔn Naa Sihɔn mini Bashan Naa Ogi daa kana ti liri ti n-tuhi ti, amaa ka ti daa nyaŋ ba.

⁸ Ti daa fa bɛ tiŋgbɔŋ n-zaŋ li ti Rubin zuliya niriba mini Gaad zuliya niriba ni Manaasa zuliya niriba pirigili.

⁹Dinzuɣu doliya alikauli ŋɔ puuni yɛtɔɣa ŋɔ viɛnyɛliŋga din ni chɛ ka yi di nasara yi tuuni kam ni.

¹⁰Yi zaa laɣim ʒiɛla Yawɛ ŋun nyɛ yi Naawuni ŋɔ tooni zuŋɔ dabisili ŋɔ. Yi daŋ ni kpamba mini yi zuɣulaannim’ ni yi sapashin’ kpamba ni Izraɛl dɔbba zaa

¹¹ni yi paɣiba ni yi bihi ni saamba bɛn be yi sani, ka nyɛ bɛn wɔriti yi dari bee bɛn ŋɔŋdi kom tiri ya

¹²ni yi kpe Yawɛ ŋun nyɛ yi Naawuni ŋɔ ni po pɔri lɔn ya alikauli shɛli zuŋɔ dabisili ŋɔ ni;

¹³ka lala chɛ ka o zaŋ ya leeg’ o niriba zuŋɔ dabisili ŋɔ, ka leei yi Naawuni kaman o ni daa lɔn ya alikauli ni kaman o ni daa po pɔri yɛli yi yaannim’ bɛn nyɛ Ibrahimma mini Yisahaku ni Yaakubu shɛm la.

¹⁴Di pala yinim’ bɛn ʒe ti sani Yawɛ ŋun nyɛ ti Naawuni ŋɔ tooni ŋɔ kɔŋko ka m po pɔri lɔri alikauli zuŋɔ dabisili ŋɔ,

¹⁵amaa zaŋ tabili ninvuɣ’ shɛb’ bɛn ka ti sani kpe zuŋɔ dabisili ŋɔ gba.

¹⁶Yi mi ti ni daa be Ijipti tiŋgbɔŋ ni shɛm mini ti ni daa tim zuliya gbaliŋ ni garina shɛm.

¹⁷Yi daa lan nya bɛ binyoya din nyɛ buɣa din mali daɣiri ka nyɛ dari mini kuɣa ni anzinfa ni salima din daa be bɛ san’ la.

¹⁸ Di pa shɛli ka yi ni doo bee paɣa bee yili shɛli niriba bee zuliya muni niriba be yi ni ka bɛ suhuri yi Yawɛ ŋun nyɛ ti Naawuni ŋɔ jɛmbu ni, ka ŋmaligi ni bɛ jɛm zuliyanim’ maa buɣa maa. Di pa shɛli ka ninvuɣ’ shɛb’ ti be yi ni ka barina mini putɔɣu ba nyaɣa bɛ ni.

¹⁹Ka bɛnkam wum pɔri ŋɔ puuni yɛtɔɣa ŋɔ ka tɛhi ni bɛ mali alibarika ka yɛri bɛ suhuri ni, “Ti tiligiya, hal ti ni kul doli ti tipawumli soya ŋɔ zaa yoli,” ka lala zuɣu chɛ ka ashaara lu ninvuɣ’ biɛri mini ninvuɣ’ suma zuɣu.

²⁰Yawɛ ku saɣi chɛ bɛ taali, dama Yawɛ suhuyiɣisili nyɔhi ni lu bɛ zuɣu. Noli yɛlibu zaa din sabi be kundi ŋɔ ni ŋɔ ni di ba, ka Yawɛ kpihim’ bɛ yuli dunia ŋɔ ni.

²¹Yawɛ ni ti woligi ba bɛ ko Izraɛl zuliyanim’ zaa ni n-chɛ ka zaɣ’ biɛɣu paai ba kaman noli yɛlibu zaa din be alikauli puuni, ka sabi be zaligu kundi ŋɔ puuni la.

²²Ka ʒiɛman’ shɛli din dolina puuni, yi bihi yi ti yiɣisina yi kalinsi nyaaŋa bee saan’ so yi ti yi tinshee katiŋ’ na n-nya Yawɛ ni chɛ ka zaɣ’ biɛ’ shɛli mini nahiŋgu shɛli paai tiŋgbani maa,

²³ ka tiŋgbani maa zaa leei chilibi mini yalim, ka binshɛli ku biri nimaani ka binshɛli mi ku bili nimaani, luɣ’ shɛli mɔri ni ku bili. Di ni ti saɣim kaman Sɔdom mini Gomɔra ni Adima mini Zɛbɔiim, Yawɛ ni daa saɣim shɛli o suhuyiɣisili puuni la.

²⁴Yɛlimaŋli, bɛ mini zuliya kam ni ti bɔhi, ‘Bɔzuɣu ka Yawɛ lee niŋ tiŋgbani ŋɔ shɛm ŋɔ? Bɔ n-daa lee chɛ ka o suhu yiɣisi pam lala?’

²⁵Di saha niriba ni ti yɛli, ‘Bɛ ni daa zaɣisi Yawɛ ŋun nyɛ bɛ yaannim’ Naawuni ŋɔ ni daa lo ba alikauli shɛli saha shɛl’ o ni daa yihi ba Ijipti tiŋgbɔŋ ni na la zuɣu.

²⁶Bɛ daa ŋmaligi dolila buɣa n-jɛmdi li. Di nyɛla buɣ’ shɛŋa bɛ ni daa pun bi mi ni o ni daa bi zaŋ buɣ’ shɛŋa ti ba.

²⁷Dinzuɣu ka Yawɛ suhu yiɣisi bahi tiŋgbani maa zuɣu, ka o chɛ ka noli din yɛla zaa sab’ be kundi ŋɔ ni di li maa.

²⁸Ka Yawɛ suhu daa yiɣisi pam bahi bɛ zuɣu, ka o yihi ba bɛ tiŋgbɔŋ ŋɔ ni ni suhuyiɣisili tahi tiŋgbɔn shɛl’ ni kaman di ni nyɛ shɛm zuŋɔ dabisili ŋɔ.

²⁹Binshɛŋa din be ashilɔni nyɛla Yawɛ ŋun nyɛ ti Naawuni ŋɔ dini, amaa binshɛŋa din yi zahira nyɛla ti mini ti bihi dini sahakam ni di chɛ ka ti doli yɛtɔɣ’ shɛŋa zaa din be zaligu ŋɔ puuni.