Read Dagbani Zaligu 3 Bible Online

Zaligu 3 - Dagbani bible

Zaligu 3

¹Ti ni daa lu soli chani Bashan saha shɛli ka Bashan Naa Ogi min’ o niriba zaa daa yina ti liri ti ni bɛ tuhi ti tɔbu Ɛdirɛi.

²Ka Yawɛ daa yɛli ma, “Di zɔr’ o dabiɛm, dama n zaŋ o min’ o niriba maa zaa ni o tiŋgbɔŋ maa niŋ a nuu ni. Niŋm’ o kaman a ni daa niŋ Amɔrinim’ Naa Sihɔn ŋun daa be Hɛshibɔn shɛm la.”

³Di saha ka Yawɛ ŋun nyɛ ti Naawuni ŋɔ daa lan zaŋ Bashan Naa Ogi min’ o niriba zaa niŋ ti nuu ni, ka ti daa ku ba hal ka o ninvuɣ’ yino gba daa bi kpalim.

⁴Ka ti daa ŋme n-deeg’ o fɔntinsi zaa di saha maa, ka bɛ ni me goma gili tin’ shɛli daa kani ka ti bi dee’ li bɛ sani. Di daa nyɛla fɔntinsi pihiyɔbu, Arigɔb yaɣili zaa mini Bashan din daa nyɛ Naa Ogi nam ʒiishee la.

⁵Fɔntinsi ŋɔ zaa daa nyɛla bɛ ni me goon’ wɔɣila gili tin’ shɛŋa, ka di mali dunoyɔriti din mali kpiɔŋ ni dunokparitisi m-pahi tiŋkpansi pam zuɣu.

⁶Ka ti daa ku bɛ zaa, ka ku tiŋ’ kam nima dɔbba mini paɣiba ni bihi zaa kaman ti ni daa niŋ Hɛshibɔn Naa Sihɔn shɛm la.

⁷Amaa fɔntinsi maa ni biŋkɔbiri mini di nɛma zaa, ti daa zaŋ li ka di leei ti ni tuhi tɔbu di neen’ shɛŋa.

⁸Di saha ka ti daa deei tiŋgbɔn shɛli din be Jɔɔdɛn Mɔɣili dul’ la Amɔrinim’ nanim’ maa nuu ni, zaŋ Arinɔn kulibɔŋ ni hal ti paai Hɛrimɔn Zoli gbini.

⁹(Sidɔnnim’ booni Hɛrimɔn la Siriɔn, ka Amɔrinim’ mi booni li Sɛnir).

¹⁰Fɔntinsi zaa din daa be tintan’ ni mini Giliad zaa ni Bashan zaa zaŋ hal ni Salɛka ni Ɛdirɛi, fɔn’ shɛŋa din daa be Bashan Naa Ogi nam sulinsi ni la.

¹¹(Dama Bashan Naa Ogi maa kɔŋko n-daa nyɛ ŋun kpalim Rɛfaimnim’ zuliya maa ni, o garo daa nyɛla kurigu garo, di na kul be Raba din nyɛ Ammɔnnim’ tiŋ’ la ni. Di wɔɣilim daa nyɛla mita anahi, ka di yɛliŋ mi chɛ biɛla ni di niŋ mita ayi kaman sokam ni buɣisiri binyara shɛm).

¹²Ti ni daa deei tiŋgbɔŋ maa saha shɛli maa, ka n daa zaŋ Aroa nuzaa polo yaɣili din be Arinɔn kulibɔŋ nol’ la mini Giliad tiŋgbɔŋ ni zoya ni tinsi la pirigili mini di fɔntinsi ti Rubin mini Gaad zuliya niriba.

¹³Ka n daa lan zaŋ Giliad tiŋgbani din kpalim maa mini Bashan din daa nyɛ Naa Ogi ni daa su shɛl’ la zaa mi ti Manaasa zuliya niriba pirigili, dimbɔŋɔ wuhiya ni n daa zaŋ Arigɔb yaɣili zaa ti Manaasa zuliya niriba pirigili maa. (Arigɔb yaɣili zaa din daa be Bashan zaa la bɛ daa booni li la Rɛfaimnim’ tiŋgbani.

¹⁴Jair ŋun daa nyɛ Manaasa zuliya ni nir’ la n-daa deei Arigɔb yaɣili din daa be Bashan maa zaŋ hal ti paai Gɛshurinim’ mini Maakatinim’ tintariga, ka daa zaŋ omaŋmaŋ’ yuli boli Bashan, dina n-nyɛ Havɔtijairi kaman di ni nyɛ shɛm zuŋɔ dabisili ŋɔ).

¹⁵Ka n daa zaŋ Giliad ti Makiri.

¹⁶Ka daa lan zaŋ Giliad hal ni Arinɔn kulibɔŋ ni n-ti Rubin zuliya niriba mini Gaad zuliya niriba, ka kulibɔŋ maa sunsuuni nyɛ bɛ tintariga vulo zaŋ ti du Jabok, kulibɔŋ maa ni n-daa nyɛ Ammɔnnim’ tintariga.

¹⁷Ka n daa lan zaŋ Araba gba mini Jɔɔdɛn Mɔɣili mini di duli zaŋ Kinɛrɛt ni Araba Teeku din nyɛ Teeku Kpiŋ la ni Pisiga zo’ lɔŋ din be wulimpuhili polo la ti ba.

¹⁸Di saha ka n daa zali ya zaligu yɛli, “Hal Yawɛ ŋun nyɛ yi Naawuni ŋɔ ni zaŋ tiŋgbɔŋ ŋɔ tin ya ni yi su ŋɔ zaa yoli, lomiya kpara gari yi mabihi Izraɛlnim’ ŋɔ tooni chaŋ ti du Jɔɔdɛn Mɔɣili.

¹⁹Yi paɣiba mini yi bihi ni yi biŋkɔbiri bɛn’ ni kpalim be n ni zaŋ fɔntin’ shɛŋa tin ya maa ni, (m mi ni yi mali biŋkɔbiri pam.)

²⁰ Yawɛ yi ti ti yi mabihi maa vuhim kaman o ni tin ya vuhim shɛm ŋɔ, ka bɛ gba ti nya tiŋgbani ʒini Yawɛ ŋun nyɛ yi Naawuni ŋɔ ni zaŋ tiŋgbɔn shɛli ti ba Jɔɔdɛn Mɔɣili dul’ la ni; di nyaaŋa ka yi ni yino kam naanyi labina ti ʒini tiŋgbɔn shɛli n ni zaŋ tin ya ni yi su li ŋɔ ni.”

²¹Di saha ka n daa yɛli Jɔshua, “Amaŋmaŋ’ nini nya Yawɛ ŋun nyɛ a Naawuni ŋɔ ni niŋ nanim’ ayi ŋɔ shɛm zaa, lala ka Yawɛ yɛn niŋ yi ni yɛn garina’ shɛb’ tinsi ni ŋɔ zaa.

²²Di zɔri ba dabiɛm, dama Yawɛ ŋun nyɛ yi Naawuni ŋɔ n-tuhiri tɔb’ tiri ya.”

²³Ka n daa suhi Yawɛ di saha maa gba yɛli,

²⁴“Yaa n Duuma Yawɛ, a kul yoli piligimi n-wuhir’ a dabili a galisim min’ a yiko tuma ni nyɛ shɛm, wuni ŋuni n-lee be zuɣusaa bee tiŋgbani zuɣu n-ni tooi tum yiko tuma mini tuun’ kar’ shɛŋa a ni tum ŋɔ?

²⁵Chɛ ka n gbaai Jɔɔdɛn Mɔɣili du n-chaŋ ti nya zoya ni tiŋgban’ viɛlli din be duli maa mini Lɛbanɔn.”

²⁶Amaa ka Yawɛ daa je suli niŋ ma yi zuɣu, ka bi saɣi ka naɣ’ yɛli ma mi, “Di saɣiya, di lan yɛli ma yɛlli ŋɔ yaha.

²⁷ Dum’ Pisiga Zoli zuɣu nti kpuɣ’ a zuɣu lihi bahi wulinluhili polo mini nuzaa polo ni nudirigu polo ni wulimpuhili polo, lihim li viɛnyɛliŋga, dama a ku du Jɔɔdɛn Mɔɣili ŋɔ.

²⁸Amaa wuhim’ Jɔshua ka kpaŋs’ o suhu, dama ŋuna n-yɛn leei niriba ŋɔ zuɣulana n-zaŋ ba du nti deei a ni yɛn nya tiŋgbɔn shɛli maa ti ba.

²⁹“Dinzuɣu ka ti daa kpalim be vinvamli maa ni Bɛtipɛɔr tooni polo la.”