Read Dagbani Zaligu 32 Bible Online

Zaligu 32 - Dagbani bible

Zaligu 32

¹“Zuɣusaa, gbilisim tibili wum ka n tɔɣisi yɛtɔɣa. Chɛ ka tiŋgbani wum n nol’ ni yɛtɔɣa.

²Chɛ ka n wuhibu ŋɔ lu kaman saa la, ka n yɛtɔɣa tɔɣi lu kaman maligim la bee kaman saa ni yi luna baalim bahi mɔri zuɣu shɛm la; ka lan be kaman sa’ yuɣiyuɣi din yuɣisiri bahiri bimbilima zuɣu la.

³Dama n ni moli Yawɛ yuli. Yɛlimiya ti Naawuni ŋɔ galisim yɛla!

⁴O nyɛla tampiŋ ŋun ka ŋmali. O tuma nyɛla din viɛl’ zaa, ka o soya zaa nyɛ din tuhi. O nyɛla Naawuni ŋun ʒe yim ka ka galimi. O nyɛla ŋun bebu tuhi ka be tibi.

⁵Amaa o bihi bɛn filim bɛmaŋ’ la lan pala o bihi. Bɛ bela ʒiri biɛhigu o sani. Bɛ nyɛla ʒiɛman’ golimanim’ bɛn biɛhigu bi tuhi.

⁶Yinima ninvuɣ’ shɛb’ bɛn nyɛ jɛra ka ka yɛm ŋɔ, yi ni yo Yawɛ sam’ shɛli m-bala? Pa ŋuna n-nyɛ yi ba ŋun nam ya? Pa ŋuna n-nam ya, ka zali ya?

⁷Teemiya kurimbuni ha yɛla. Tɛhimiya yuun’ gbaliŋ din gari la yɛla. Bɔhimiya yi ba, o ni wuhi ya, ka bɔhi yi dɔɣirikpamba, bɛ ni yɛli ya.

⁸ Zallakudura Naa ni daa ti zuliyanim’ bɛ tiŋgbana saha shɛl’ o ni daa woligi daadamnima, o daa zali zuliya kam tintarisi kaman Izraɛlnim’ kalinli ni nyɛ shɛm.

⁹Yawɛ maŋmaŋ’ tarili nyɛla o niriba. Yaakubu n-nyɛ o tarili.

¹⁰O daa nya o la tiŋgban’ nɛli ni, ka lan nya o tiŋgban’ nɛli din ka buchi ni. O leei bintaɣirigu taɣ’ o. O gul’ o mi kaman o nimbil’ biɛlim la.

¹¹Kaman tɔrili ni damd’ o tiɛɣu ka yiɣiri gind’ o bihi, ka teer’ o kpiŋkpama kpuɣiri ba, ka zaŋ o kpiŋkpan’ yiɣira gbib’ ba zuɣusaa shɛm la, lala ka Yawɛ daa gbibi Izraɛl ka o bi lu.

¹²Yawɛ kɔŋko n-daa wuh’ o soli, ka tinzun’ buɣili daa ka o sani.

¹³O daa zaŋ o zali tiŋgbani luɣ’ shɛŋa din du zuɣu; ka daa zaŋ puri ni bindira dihir’ o. O daa zaŋ tampima voya ni shiri mini chɛribo kuɣa voya ni kpam dih’ o.

¹⁴O daa lan ti o niɣi mini biŋkɔbbaligu ni bihim ni waagasi ni piɛri mini piɛlahi kpam ni Bashan naɣilahi mini buhi ni alikama viɛlli. Yi daa nyu wain tiwala wain viɛlli.

¹⁵Yaakubu daa di n-tiɣi. Jɛshurun[5] daa ŋmɛlimya ka tiri gbini. A ŋmɛlimya piri m-muɣi lɔŋ. O daa zaɣisi Naawuni ŋun nam o, ka maani o tiliginsim tampiŋ ansarisi.

¹⁶Bɛ daa chɛ ka o zabi nyuli tinzun’ wuna zuɣu, ka daa lan niŋ binshɛŋa din chihira n-chɛ ka o suhu yiɣisi.

¹⁷ Bɛ daa mali sara tila alizinnima, pa Naawuni, ka mali maliŋ ti wun’ shɛb’ bɛ ni pun bi mi. Bɛ daa lan mali wun’ pal’ shɛb’ bɛn na yoli yina ka nyɛ yi yaannim’ ni daa bi lu shɛb’ sizuura.

¹⁸Yi daa tam tampiŋ din dɔɣi ya yɛla, ka daa tam Naawuni ŋun dɔɣi ya yɛla.

¹⁹Ka Yawɛ daa nya lala ka o suhu yiɣisi, ka o tabig’ o bidibisi min’ o bipuɣinsi bahi.

²⁰O daa yɛliya, “N ni lɛbi n nyaaŋa biri ba. N ni nya bɛ bahigu ni yɛn nyɛ shɛm, dama bɛ nyɛla ʒiɛman’ golimanima. Bɛ nyɛla bi’ shɛb’ bɛn bi ʒe yim.

²¹ Bɛ zaŋ bɛ wuna din pa Naawuni n-chɛ ka n suhu yiɣisi, ka zaŋ bɛ buɣa n-chɛ ka n suhu yiɣisi. Lala ka n yɛn chɛ ka bɛn pa niriba niŋ ba ka bɛ suhuri yiɣisi, ka chɛ ka zuliya shɛb’ bɛn nyɛ jɛra niŋ ba ka bɛ suhuri yiɣisi.

²²Dama n suhuyiɣisili maa dirimi kaman buɣim la, ka ni di hal ni kpiimba biɛhigu shee. Di saɣindi dunia mini di binshɛɣukam, ka niŋdi buɣim nyɔri zoya tanzahi.

²³N ni chɛ ka zaɣ’ biɛɣu lu bɛ zuɣu, ka chɛ ka m piɛma nyɔɣi ba:

²⁴N ni chɛ ka kum din bahiri niriba yoli mini buɣim din dira ni alɔbo din ni chɛ ka mɔɣu ni biŋkɔbiri zaŋ bɛ nyina liri ba lu bɛ zuɣu, ka zaŋ tinvura lɔɣu lu bɛ zuɣu.

²⁵Bɛ ni ti zaŋ takɔbiri kuri ba solɔri zuɣu, ka dabiɛm pam ti be duri puuni. Di ni paai nachimbihi mini paɣipiɛlisi ni bimɔɣirisi ni ninkura bɛn zuɣuri paligi.

²⁶N daa tɛhiya ni n ni wurim ba bahi katiŋa, ka chɛ ka so ku lan teei bɛ yɛla;

²⁷amaa n zɔrila bɛ dimnim’ ni yɛn kuri ma sul’ shɛli, dama bɛ dimnim’ maa ku baŋ di ni nyɛ shɛm ka ni yɛli, “Ti nuhi n-ti ti nasara, pa Yawɛ n-daa niŋ dimbɔŋɔnim’ zaa maa.

²⁸Bɛ nyɛla zuliya shɛb’ bɛn ka yɛm; baŋsim ka bɛ sani.

²⁹Bɛ yi di mali yɛm, bɛ naan baŋ dimbɔŋɔ. Bɛ naan baŋ di bahigu ni ti yɛn nyɛ shɛm.

³⁰Wula ka ninvuɣ’ yino ni tooi kari doli ninvuɣ’ tuhili ka niriba ayi mi tuhi nyaŋ ninvuɣ’ tuhi’ pia, ka pa ni bɛ Tampiŋ n-kɔhi ba? Ka pa ni Yawɛ n-zaŋ ba niŋ bɛ nuu ni?

³¹Yɛlimaŋli bɛ tampiŋ bi be kaman ti Tampiŋ ŋɔ. Hal ti dimnim’ maa gba mi lala.

³²Bɛ wain tihi yila Sɔdom wain tihi ni na, ka yi Gomɔra wain tihi puri ni na. Bɛ wain tiwala nyɛla wala din mali lɔɣu. Di zaɣ’ yila nyɛla din to.

³³Bɛ wain nyɛla tinvura lɔɣu. Di nyɛla sapaɣu lɔɣu din bie pam.

³⁴Dimbɔŋɔ bi bela n sani ka n zaŋ bini dihi tabili li sɔŋ?

³⁵ Biɛri bɔhibu mini sanyoo nyɛla n dini, saha shɛli bɛ napɔna yi ti sarigi; dama bɛ zaɣ’ biɛɣu nyabu dabisili saha miriya, ka bɛ bahi yoli saha kanna yomyom.

³⁶ Dama Yawɛ ni tilig’ o niriba, ka zo o daba nambɔɣu, o yi ti nya ka bɛ lan ka yiko, ka bɛ ni lo so bee bɛ ni bi lo so ti ku lan kpalim.

³⁷Di saha o ni ti bɔhi, “Bɛ wuna la lee be ya? Bɛ ni daa sɔɣi tampiŋ shɛli ni la lee be ya?

³⁸Bɛn daa ŋubi bɛ sara maligu biŋkɔbiri kpam ka nyu bɛ sara maligu wain la lee be ya? Chɛ ka bɛ yiɣisi zani sɔŋ ya, chɛ ka bɛ guli ya.

³⁹Pumpɔŋɔ nyamiya ma, mani m-bala. Wuni so lan kani m-pahi n zuɣu. Mani n-kura, ka lan neera. Mani n-tir’ dansi; mani n-lan tibira, ka so ku tooi fa shɛli n nuu ni.

⁴⁰Dama n zaŋ n nuu tiri zuɣusaa, ka po pɔri ni mani ŋun be sahakam ŋɔ zuɣu,

⁴¹n yi ti sahi n takɔb’ shɛli din nyaɣisiri ŋɔ, ka zaŋ saria karibu niŋ n nuu ni, n ni bɔhi n dimnim’ biɛri, ka darigi bɛn je ma la tibili.

⁴²N ni chɛ ka m piɛma varim ʒim. N ni chɛ ka n takɔbi ŋmahi n ni ku shɛba mini n ni gbahi ninvuɣ shɛb’ nimdi mini ʒim din yi n dimnim’ bɛn nyɛ zab’ wɔɣilanim’ la ni na.

⁴³ Yinim’ zuliya shɛb’ bɛn pa Yɛhudianima, pahimiya o niriba zuɣu paɣ’ o. Dama o ni bɔhi biɛri o daba ʒim yihibu zuɣu, ka bɔhi o dimnim’ biɛri, ka darigi bɛn je o tibili ka mali tiŋgbɔŋ maa ka di viɛl’ ti o niriba.

⁴⁴Ka Musa mini Nan bia Jɔshua[6] daa kana ti zaŋ yilli ŋɔ puuni yɛtɔɣa ŋɔ zaa yɛli niriba maa ka bɛ wum li.

⁴⁵Musa ni daa yɛli Izraɛlnim’ zaa yɛtɔɣa ŋɔ zaa naai,

⁴⁶ka o daa lan yɛli ba, “Zaŋmiya n ni zaŋ yɛtɔɣ’ shɛŋa zaa tiri ya ka di nyɛ shɛhira jɛndi ya zuŋɔ dabisili ŋɔ niŋ yi suhuri ni. Zaŋmiya li leei zaligu ti yi bihi din ni chɛ ka bɛ doli yɛtɔɣ’ shɛŋa zaa din be zaligu ŋɔ puuni viɛnyɛliŋga.

⁴⁷Dimbɔŋɔ pala binshɛli din ka buchi yi sani, amaa di nyɛla yimaŋmaŋ’ nyɛvili. Di puuni ka yi ni ti mali nyɛvili wɔɣinli m-be yi ni yɛn du Jɔɔdɛn mɔɣili chaŋ ti deei tiŋgbɔn shɛli su maa ni.

⁴⁸Ka Yawɛ daa zaŋ yɛtɔɣa ŋɔ yɛli Musa dindali maa,

⁴⁹“Dum’ Abarim zoli din nyɛ Nɛbo zoli ka be Mɔabnim’ tiŋgbɔŋ ni zaŋ labi Jɛriko tooni polo la nti lihi Keenan tiŋgbɔn shɛli n ni zaŋ ti Izraɛlnim’ ni bɛ su maa.

⁵⁰A ni kpi zo’ shɛli a ni yɛn du maa zuɣu, ka bɛ sɔɣ’ a pah’ a yaannim’ zuɣu kaman a mabia Aduna ni daa kpi Hɔr Zoli zuɣu ka bɛ sɔɣ’ o pah’ o yaannim’ zuɣu shɛm la,

⁵¹dama yi niriba ayi maa daa bi ʒe ma yim Izraɛlnim’ sunsuuni Mɛribatikadɛshi kom la gbini Zin tiŋgban’ nɛl’ la ni, yi ni daa bi gbibi m biɛrikasitali Izraɛlnim’ sunsuuni la zuɣu.

⁵² Hal a ni kul yɛn nya tiŋgbɔŋ maa ka di do katiŋ’ maa zaa yoli, a ku kpe n ni zaŋ tiŋgbɔn shɛli tiri Izraɛlnim’ maa ni.