Read Dagbani Zaligu 4 Bible Online

Zaligu 4 - Dagbani bible

Zaligu 4

¹Dinzuɣu pumpɔŋɔ Izraɛlnima, wummiya n ni wuhiri ya zalikpan’ shɛŋa mini zaligu shɛŋa din pahi ŋɔ zaa, ka dol’ li din ni chɛ ka yi be, ka chaŋ ti ʒini tiŋgbɔn shɛli Yawɛ ŋun nyɛ yi yaannim’ Naawuni ŋɔ ni zaŋ tiri ya maa ni.

² Miriya ka yi pahi yɛtɔɣ’ shɛli n ni zali ya zaligu shɛli ŋɔ ni bee n-yihi shɛli di ni. Amaa doliya Yawɛ ŋun nyɛ yi Naawuni ŋɔ fukumsi zaligu shɛŋa n ni zaŋ tiri ya ŋɔ.

³ Yimaŋmaŋ’ daa nya Yawɛ ni niŋ shɛm zaŋ chaŋ Pɛɔr Baal polo la, Yawɛ ŋun nyɛ yi Naawuni ŋɔ daa ku yi ni ninvuɣ’ shɛb’ bɛn daa doli Pɛɔr Baal maa.

⁴Amaa yinim’ bɛn daa kul ʒe Yawɛ ŋun nyɛ yi Naawuni ŋɔ yim la zaa n-na be yi nyɛviya ni zuŋɔ dabisili ŋɔ.

⁵“Nyamiya, pumpɔŋɔ n zaŋ zalikpana mini zaligu shɛŋa din pahi wuhi ya ni yi ti dol’ li yi ni chani ni yi ti ʒini tiŋgbɔn shɛli ni maa kaman Yawɛ ŋun nyɛ n Naawuni ŋɔ ni zali ma shɛm.

⁶Doliya li viɛnyɛliŋga, dina n-ni wuhi yi yɛm mini yi baŋsim ni nyɛ shɛm niriba sani; bɛ yi ti wum zaligunim’ ŋɔ zaa yɛla bɛ ni yɛli, ‘Yɛlimaŋli, zuliya titali ŋɔ niriba nyɛla bɛn mali yɛm mini baŋsim.’

⁷“Dama zuliya tital’ dini n-lee beni m-mali wuni ka di wuni maa miri ba kaman Yawɛ ŋun nyɛ ti Naawuni ŋɔ ni miri ti shɛm saha shɛli ti yi ti suh’ o ŋɔ?

⁸Ka zuliya tital’ dini n-lee beni m-mali zalikpana mini zaligunim’ din pahi ka wuntizɔbo be di ni kaman n ni zaŋ zaligu shɛŋa zaa zali ya zuŋɔ dabisili ŋɔ?

⁹Amaa yirigimiya yimaŋ’ zuɣu, ka gbibiya yi maŋ’ viɛnyɛliŋga din ni chɛ ka yi ku tam yi nina ni daa nya binshɛŋa la bee n-chɛ ka di yi yi suhuri ni saha shɛli zaa yi ni be yi nyɛviya ni ŋɔ; zaŋmiya li wuhi yi bihi mini yi yaansi.

¹⁰Yi ni daa ti zani Yawɛ ŋun nyɛ yi Naawuni ŋɔ tooni Sinai Zoli[2] gbini ka Yawɛ yɛli ma, ‘Laɣimmi niriba maa na ka n ti chɛ ka bɛ wum n yɛligu din ni chɛ ka bɛ luri ma sizuura saha shɛli zaa bɛ ni be dunia ŋɔ ni, ka wuhi bɛ bihi lala.’

¹¹“Ka yi daa vu m-mirina ti zani zoli maa gbini, ka zoli maa daa taai buɣim n-kpuɣi du sagbana ni, ka sagbana daa zibigi lim li.

¹² Di saha ka Yawɛ daa tɔɣisi ya yɛtɔɣa buɣim maa sunsuuni; ka yi daa wum yɛtɔɣa maa vuri, amaa ka lee bi nya kɔtomsi shɛli, kukoli kɔŋko n-daa kul beni.

¹³ Ka o daa wuhi ya o daalikauli shɛli o ni zali ya ni yi doli, dina n-nyɛ o fukumsi zaligunim’ pia la. Ka o daa sabi li pa kuɣiparilana ayi zuɣu.

¹⁴ Di saha ka Yawɛ daa zali ma ni n wuhim’ ya zalikpana mini zaligu shɛŋa din pahi maa, ka yi ti gbib’ li yi ni chani ni yi ti deei tiŋgbɔn shɛli ʒini maa ni.

¹⁵“Yawɛ ni daa tɔɣisiri ya yɛtɔɣa buɣim sunsuuni Sinai Zoli gbin’ la, yi daa bi nya kɔtomsi shɛli, dinzuɣu gbaamiya yimaŋ’ viɛnyɛliŋga

¹⁶ din ni chɛ ka yi ku mali wuni ŋmahindi binshɛli n-tum alahichi. Di maliya li ŋmahindi bin’ lɔɣu bee bin’ nyaŋ.

¹⁷ Yi mi di maliya li ŋmahindi biŋkɔbigu ŋun be dunia ŋɔ ni bee ŋ-ŋmahindi nooŋa ŋun mali kpiŋkpama yiɣiri zuɣusaa

¹⁸bee ŋ-ŋmahindi binneen’ so ŋun gbamdi tiŋgbani zuɣu bee ŋ-ŋmahindi zahim bɛn be kom ni tiŋgbani puuni ŋɔ.

¹⁹Ka yi yi lihi zuɣusaa nya wuntaŋa mini goli ni saŋmarisi ni zuɣusaa binyara zaa, yin’ miriya ka yi damdi tiŋa n-jɛm li ka di chɛ ka yi birigi. Di nyɛla binshɛŋa Yawɛ ŋun nyɛ yi Naawuni ŋɔ ni zaŋ ti ninvuɣ’ shɛb’ bɛn be dunia ŋɔ ni zaa.

²⁰ Amaa Yawɛ n-yihi ya kuriti nyɛligibu daaŋa ni na Ijipti ni yi ti leei omaŋmaŋ’ ni su ninvuɣ’ shɛba kaman yi ni nyɛ shɛm pumpɔŋɔ ŋɔ.

²¹ Ka din pahi nyɛla, Yawɛ je suli niŋ ma yi zuɣu, ka po pɔri yɛli ma ni n ku du Jɔɔdɛn mɔɣili ŋɔ, ni n ku kpe tiŋgbɔn viɛl’ shɛli ŋun’ Yawɛ ŋun nyɛ yi Naawuni ŋɔ ni zaŋ tin ya ni yi su la ni.

²²Dama n ni kpi tiŋgbɔŋ ŋɔ ni; n ku du Jɔɔdɛn mɔɣili, amaa yinim’ ni du li chaŋ ti deei tiŋgbɔn viɛlli maa su.

²³Dinzuɣu miriya ka yi ti tam Yawɛ ŋun nyɛ yi Naawuni ŋɔ ni daa lɔn ya alikauli shɛl’ la yɛla, ka mali wuni ŋmahindi binshɛŋa Yawɛ ŋun nyɛ yi Naawuni ŋɔ ni zali ya ni di nyɛla din chihiri la.

²⁴ Dama Yawɛ ŋun nyɛ yi Naawuni ŋɔ nyɛla buɣim din dira, o nyɛla Naawuni ŋun zabiri nyuli.

²⁵“Yi yi ti dɔɣi bihi, ka yi bihi maa mi dɔɣi bihi, ka yi nini ti tiɣi yimaŋ’ tiŋgbɔŋ maa ni, yi yi ti mali wuni ŋmahindi binshɛlikam n-tum alahichi Yawɛ ŋun nyɛ yi Naawuni ŋɔ sani n-chɛ ka o suhu yiɣisi,

²⁶m bɔri ni zuɣusaa mini tiŋgbani dinya shɛhira zuŋɔ dabisili ŋɔ ni di ku yuui ka yi kpi zaa yi ni yɛn du Jɔɔdɛn mɔɣili chaŋ ti ʒini tiŋgbɔn shɛli ni maa; yi ti ku yuui di ni, amaa yi ni ti kpi zaa.

²⁷Yawɛ ni ti wurim ya kpɛhi zuliya shɛb’ ni, ka yi kalinli ti ku lan galisi Yawɛ ni yɛn kari ya bahi zuliya shɛb’ ni maa.

²⁸ Nimaani ka yi ni ti jɛmdi wuna din nyɛ kuɣa mini dari, ka nyɛ ninsalinim’ ni zaŋ bɛ nuhi mali binshɛŋa, ka di ku tooi nya bee n-wum bee n-di bee n-wum nyom ŋɔ.

²⁹ Nimaani ka yi ni ti lihi bo Yawɛ ŋun nyɛ yi Naawuni ŋɔ; ka yi yi ti bo o ni yi suhu zaa ni yi shia zaa, yi ni nya o.

³⁰Dimbɔŋɔnim’ zaa yi ti paai ya saha shɛli yi nandahima maa ni, yi ni ŋmaligi labi Yawɛ ŋun nyɛ yi Naawuni ŋɔ sani nti deeg’ o yɛligu.

³¹Dama Yawɛ ŋun nyɛ yi Naawuni ŋɔ nyɛla Naawuni ŋun zɔri nambɔɣu, o ku chɛn ya bahi bee n-kun ya; o mi ku tam o ni daa po pɔri lo yi yaannim’ alikauli shɛl’ la yɛla.

³²“Dinzuɣu pumpɔŋɔ bɔhimiya ʒiɛmana din gari la yɛla, ʒiɛman’ shɛli din daŋ yi dini ŋɔ tooni ka di yuui la, Naawuni ni daa nam daadamnim’ dunia ŋɔ ni dahin shɛl’ la, bɔhimiya gili dunia ŋɔ ni luɣ’ shɛlikam zaa; tuun’ kara ŋɔ tatabo na mi n-tum bee so na mi n-wum di tatabo yɛla?

³³Ninvuɣ’ shɛb’ daa na mi n-wum wuni kukoli ni tɔɣisiri ba yɛtɔɣa buɣim ni kaman yi ni daa wum shɛm maa, ka be?

³⁴Bee wun’ so na mi m-buɣisi ni o chaŋ ti pii niriba zuliya shɛli sunsuuni n-zaŋ ba leeg’ o dahalali niriba, ka zaŋ zahimbunim’ mini shihira ni alahiziba tuma ni tɔbu, ka teeg’ o nuu din mali kpiɔŋ n-wuhi yiko din mali dabiɛm pam kaman Yawɛ ŋun nyɛ yi Naawuni ŋɔ ni daa niŋ shɛm tin ya yi nimbansi ni Ijipti la?

³⁵ O daa niŋ li wuhi ya ni di chɛ ka yi baŋ ni Yawɛ n-nyɛ Naawuni, ka so lan kani pah’ o zuɣu.

³⁶O daa chɛ ka o kukoli yi zuɣusaa na ka yi wum li ni di chɛ ka o wuhi ya. O daa wuhi ya o buɣim titali dunia ŋɔ ni, ka yi daa wum o kukoli buɣim sunsuuni.

³⁷O ni daa yuri yi yaannim’ la zuɣu ka o daa pii bɛ bihi bɛ kalinsi nyaaŋa, ka daa be yi sani n-yihi ya Ijipti na. O daa zaŋ o yiko

³⁸n-kari zuliya shɛb’ bɛn daa galisi ka mali kpiɔŋ gari ya, ka zaŋ ya na ti zaŋ bɛ tiŋgbɔŋ tin ya, ka yi su li kaman di ni nyɛ shɛm zuŋɔ dabisili ŋɔ.

³⁹Dinzuɣu baŋmiya zuŋɔ dabisili ŋɔ, ka zaŋ li niŋ yi suhuri ni ni Yawɛ n-nyɛ zuɣusaa mini dunia ŋɔ Naawuni, ka so lan kani pah’ o zuɣu.

⁴⁰Gbibiy’ o zalikpana min’ o zaligu shɛŋa n ni zaani ya zuŋɔ dabisili ŋɔ yi mini yi bihi biɛrisuŋ zuɣu, ka lala zuɣu chɛ ka yi yuui Yawɛ ŋun nyɛ yi Naawuni ŋɔ ni zaŋ tiŋgbɔn shɛli tiri ya sahakam ŋɔ ni.”

⁴¹Dimbɔŋɔ nyaaŋa ka Musa daa yihi fɔntinsi ata Jɔɔdɛn mɔɣili duli wulimpuhili polo,

⁴²ka di nyɛ nir’ ni yɛn ku daadam ka zo n-kuli luɣ’ shɛli. Ŋun bi yuri ka ku o kpee ka di pala dimdi m-pun be bɛ sunsuuni, ŋun ku nira maa ni tooi zo n-kuli fɔntinsi maa zaɣ’ yin’ ni tilig’ o nyɛvili.

⁴³ O daa piila Bɛza din be tiŋgban’ nɛl’ ni tintani ni la n-ti Rubin zuliya niriba, ka pii Ramɔt din be Giliad la n-ti Gaad zuliya niriba, ka pii Golan din be Bashan la mi ti Manaasa zuliya niriba.

⁴⁴Musa ni daa zaŋ fukumsi zaligu shɛŋa ti Izraɛlnim’ m-bɔŋɔ;

⁴⁵zalikpana ŋɔ mini zaligu shɛŋa din pahi ŋɔ ka Musa daa zaŋ ti Izraɛlnima bɛ ni daa yi Ijipti na m-be

⁴⁶Jɔɔdɛn mɔɣili duli Bɛtipɛɔr tooni vinvamli din daa be Amɔrinim’ naa Sihɔn ŋun daa be Hɛshibɔn la tiŋgbɔŋ ni la. Ŋuna ka Musa mini Izraɛlnim’ daa tuhi nyaŋ saha shɛli bɛ ni daa yi Ijipti na la.

⁴⁷Ka bɛ daa deeg’ o mini Bashan naa Ogi bɛn daa nyɛ Amɔrinim’ nanim’ ayi bɛn daa be Jɔɔdɛn mɔɣili duli wulimpuhili polo maa tiŋgbɔna ʒini,

⁴⁸zaŋ Aroa din daa be Arinɔn vinvamli naŋgbaŋgbiriŋ la hal ti paai Siriɔn Zoli (din nyɛ Hɛrimɔn la),

⁴⁹zaŋ tabili Araba din daa be Jɔɔdɛn mɔɣili duli wulimpuhili polo la zaa hal ti taɣi Araba Teeku Pisiga zolɔŋ la ni.