Read Dagbani Zaligu 5 Bible Online

Zaligu 5 - Dagbani bible

Zaligu 5

¹Ka Musa daa boli Izraɛlnim’ zaa na ti yɛli ba, “Yinim’ Izraɛlnima, wummiya zalikpan’ shɛŋa mini zaligu shɛŋa n ni wuhiri ya zuŋɔ dabisili ŋɔ. Bɔhimmiya li ka dol’ li viɛnyɛliŋga.

²Yawɛ ŋun nyɛ ti Naawuni ŋɔ daa lo ti alikauli Sinai zoli gbini.

³Pa ti yaannim’ kɔŋko ka Yawɛ daa lo alikauli ŋɔ, amaa tinim’ bɛn zaa na be ti nyɛviya ni zuŋɔ dabisili ŋɔ.

⁴Yi ninni ka Yawɛ daa tɔɣisi ya yɛtɔɣa buɣim puuni zoli gbini la.

⁵Di saha maa n daa ʒiɛla yi mini Yawɛ sunsuuni ni n zaŋ Yawɛ yɛtɔɣa maa tɔɣisi ya, dama yi daa zɔrila dabiɛm buɣim maa zuɣu, ka daa bi du zoli maa zuɣu. Ka o daa yɛli,

⁶‘Man’ Yawɛ ŋun nyɛ yi Naawuni ŋɔ n-daa yihi ya Ijipti tiŋgbɔŋ ni dabitim ni na.’ ”

⁷Miriya ka yi mali wun’ shɛŋa pahi n zuɣu.

⁸Miriya ka yi ti mali wuni ŋ-ŋmahindi binshɛli din be zuɣusaa bee binshɛli din be tiŋgbani puuni bee binshɛli din be kom ni tiŋgbani puuni.

⁹ Miriya ka yi ti damdi li tiŋa bee n-jɛm li; dama man’ Yawɛ ŋun nyɛ yi Naawuni ŋɔ nyɛla Naawuni ŋun zabiri nyuli, n darigiri ninvuɣ’ shɛb’ bɛn zaɣisi ma bihi tiba bɛ banima taali zuɣu hal ti paai ʒiɛmani din pahir’ ata mini din pahir’ anahi ni.

¹⁰ Amaa ninvuɣ’ tusa bɛn yuri ma, ka doli n fukumsi zaligunima, n wuhiri n yurilim maŋli bɛ sani.

¹¹ “Miriya ka yi booni Yawɛ ŋun nyɛ yi Naawuni ŋɔ yuli yiriŋyiriŋ, dama Yawɛ ku chɛ ŋunkam boon’ o yuli yiriŋyiriŋ taali.

¹² “Gbibiya Vuhim Dabisili ka chɛ ka di be kasi kaman Yawɛ ŋun nyɛ yi Naawuni ŋɔ ni zali ya shɛm.

¹³Zaŋmiya daba ayɔbu tum yi tuma zaa,

¹⁴ amaa dabisi’ shɛli din pahir’ ayopɔin maa nyɛla Yawɛ ŋun nyɛ yi Naawuni ŋɔ Vuhim Dabisili; di tumiya tuuni kam yi maŋmaŋa bee yi bidibisi bee yi bipuɣinsi bee yi daba bɛn nyɛ dɔbba bee yi paɣiba bee yi naɣilaa bee yi buŋa bee yi biŋkɔb’ so bee saan’ so ŋun be yi tinsi ni din ni chɛ ka yi daba bɛn nyɛ dɔbba mini paɣiba gba ni vuhi kaman yi ni yɛn vuhi shɛm.

¹⁵Di simdi ni yi baŋ ni yi gba daa nyɛla daba Ijipti tiŋgbɔŋ ni, ka Yawɛ ŋun nyɛ yi Naawuni ŋɔ daa teeg’ o yiko nuu yihi ya nimaani na. Dinzuɣu ka Yawɛ ŋun nyɛ yi Naawuni ŋɔ zali ya ni yi gbibi Vuhim Dabisili maa.

¹⁶ “Tim’ a ba mini a ma jilima kaman Yawɛ ŋun nyɛ a Naawuni ŋɔ ni zal’ a shɛm din ni chɛ ka a mali nyɛvili wɔɣinli ka binshɛɣukam niŋ viɛnyɛla a sani Yawɛ ŋun nyɛ a Naawuni ŋɔ ni zaŋ tiŋgbɔn shɛli tiri ya ŋɔ ni.

¹⁷ “Miri ka a ku ninsala.

¹⁸ “Bee miri ka a tum zina.

¹⁹ “Bee miri ka a zu.

²⁰ “ Bee miri ka a di ʒiri shɛhira jɛndi a kpee.

²¹ “ Bee miri ka a bo a kpee paɣa, ka miri ka a chɛ ka a suhu ye a kpee yili zuɣu bee o puu zuɣu bee o dabili ŋun nyɛ doo bee paɣa bee o naɣilaa bee o buŋa bee a kpee ni su binshɛlikam zuɣu.

²²“Yɛtɔɣa ŋɔ ka Yawɛ daa duh’ o yee yɛli yi salo maa zaa zoli maa gbini buɣim mini sagbani ni zibisim titali sunsuuni la; ka o daa bi lan pahi yɛtɔɣ’ shɛli. O daa sab’ li pala kuɣ’ parilana ayi zuɣu n-zaŋ li ti ma.”

²³“Ka yi ni daa wum kukoli maa zibisim maa sunsuuni ka buɣim dir’ zoli maa, yi zuliya zuɣulaannim’ mini yi kpamba daa vumi miri ma na

²⁴ti yɛli ‘Nyama, Yawɛ ŋun nyɛ ti Naawuni ŋɔ wuhi ti o jilima min’ o galisim ni nyɛ shɛm, ka ti wum o kukoli buɣim sunsuuni; zuŋɔ dabisili ŋɔ ti nyaya ni Naawuni ni tooi tɔɣisi ninsal’ yɛtɔɣa, ka ninsal’ maa na be o nyɛvili ni.

²⁵Dinzuɣu pumpɔŋɔ bɔzuɣu ka ti lan yɛn bo kum ti timaŋa? Dama buɣim titali ŋɔ ni ti di ti. Ti yi lan wum Yawɛ ŋun nyɛ ti Naawuni ŋɔ kukoli pahi, ti ni kpi.

²⁶Dama bɛn mali niŋgbuŋ zaa ŋuni n-na mi n-wum Naawuni ŋun be ŋɔ kukoli ni tɔɣisiri yɛtɔɣa buɣim sunsuuni kaman ti ni wum shɛm ŋɔ, ka na be o nyɛvili ni?

²⁷ Amaŋmaŋ’ cham’ miri ha ti wum Yawɛ ŋun nyɛ ti Naawuni ŋɔ ni yɛn yɛli shɛm. Di nyaaŋa ka a yɛli ti Yawɛ ŋun nyɛ ti Naawuni ŋɔ ni yɛl’ a shɛm zaa, ka ti wum ka niŋ li.’

²⁸“Ka Yawɛ daa wum yi ni yɛli ma yɛtɔɣ’ shɛŋa maa, ka yɛli ma, ‘N wum niriba maa ni yɛl’ a yɛtɔɣ’ shɛŋa maa, bɛ mali yɛlimaŋli bɛ ni tɔɣisi yɛtɔɣa shɛŋa maa zaa puuni.

²⁹Bɛ yi daa pun mali tɛha ŋɔ tatabo ni bɛ zɔri ma, ka doli n fukumsi zaligunima zaa sahakam, dindina binshɛɣukam naan niŋ viɛnyɛliŋga bɛ mini bɛ bihi sani.

³⁰Cham’ ti yɛli ba ka bɛ labi bɛ suɣa ni.

³¹Amaa nyini zanim’ baɣili ma kpe, ka n yɛl’ a fukumsi zalikpana mini zaligu shɛŋa din pahi, ka a zaŋ wuhi ba ka bɛ ti dol’ li n ni zaŋ tiŋgbɔn shɛli ti ba ni bɛ su maa ni.’

³²“Dinzuɣu gbaamiya yimaŋa, ka tummiya Yawɛ ŋun nyɛ yi Naawuni ŋɔ ni zali ni yi tum shɛm maa, ka miriya ka yi birigi kpa yi nudirigu polo bee yi nuzaa polo.

³³Doliya Yawɛ ŋun nyɛ yi Naawuni ŋɔ ni zali ya so’ shɛŋa la zaa din ni chɛ ka yi be, ka binshɛɣukam niŋ viɛnyɛliŋga yi sani, ka yi ti mali nyɛvili wɔɣila tiŋgbɔn shɛli yi ni ti yɛn su maa ni.”