Read Dagbani Zaligu 6 Bible Online

Zaligu 6 - Dagbani bible

Zaligu 6

¹“Pumpɔŋɔ fukumsi zalikpana ŋɔ mini zaligu shɛŋa din pahi ŋɔ ka Yawɛ ŋun nyɛ yi Naawuni ŋɔ zali ma ni n zaŋ wuhi ya ka yi ti doli li yi ni chani ni yi ti ʒini tiŋgbɔn shɛli maa ni

²din ni chɛ ka yi mini yi bihi ni yi yaansi ti jɛmdi Yawɛ ŋun nyɛ yi Naawuni ŋɔ yi nyɛvili ni zaa, ka dol’ o fukumsi zaligunim’ min’ o zaligu shɛŋa zaa n ni zaŋ wuhiri ya ŋɔ din ni chɛ ka yi mali nyɛvili wɔɣila.

³Dinzuɣu yinim’ Izraɛlnima, wummiya, ka dol’ li viɛnyɛliŋga din ni chɛ ka binshɛɣukam niŋ viɛnyɛliŋga yi sani, ka yi nab’ pam pahi tiŋgbɔn shɛli din mali bihim mini shiri pam[3] ŋɔ ni kaman Yawɛ ŋun nyɛ yi yaannim’ Naawuni ŋɔ ni daa lɔn ya alikauli shɛm la.

⁴ “Izraɛlnima, wummiya: Yawɛ n-nyɛ ti Naawuni, kulla Yawɛ kɔŋko.

⁵ Di simdi ni yi yu Yawɛ ŋun nyɛ yi Naawuni ŋɔ ni yi suhuri zaa ni yi shia zaa ni yi yaa zaa.

⁶Zaŋmiya n ni zaani ya yɛtɔɣ’ shɛŋa zuŋɔ dabisili ŋɔ niŋ yi suhuri ni.

⁷Zaŋmiya li wuhi yi bihi, ka tɔɣisim’ di yɛla yi yi be yiŋa ni yi yi ti be luɣ’ shɛli polo ni yi yi ti doya ni yi yi ti yiɣisi.

⁸Zaŋmiya li lo yi nuhi ni ka di leei shihirili, ka zaŋ li lo m-pa yi gbɛri zuɣu kaman saba la.

⁹ Ka sabi li pa yi yiŋ’ dunɔpaɣirisi zuɣu mini yi dunɔdaya zuɣu.”

¹⁰ “Yawɛ ŋun nyɛ yi Naawuni ŋɔ yi ti zaŋ ya ti niŋ o ni daa lo yi yaannim’ bɛn nyɛ Ibrahimma mini Yisahaku ni Yaakubu alikauli ni o ni zaŋ tiŋgbɔn shɛli tin ya la ni, tiŋgbɔn shɛli din mali fɔntin’ kara din viɛla, ka pa yi ni me shɛŋa

¹¹mini nɛma balibu kam ni pali yiya shɛŋa, ka di pala yinima n-zaŋ li niŋ di ni ni kɔbil’ shɛŋa din gbi n-doya, ka di pala yinima n-gbi li ni wain tihi mini olivi tihi puri, ka di pala yinima n-sa li, ka yi yi ti di n-tiɣi,

¹²yin’ miriya ka yi tam Yawɛ ŋun daa yihi ya Ijipti tiŋgbɔŋ ni dabitim ni na la yɛla.

¹³ Di simdi ka yi ti zɔri Yawɛ ŋun nyɛ yi Naawuni ŋɔ ka jɛmd’ o, ka zaŋm’ o yuli kɔŋko pom’ pɔri.

¹⁴Miriya ka yi jɛm ninvuɣ’ shɛb’ bɛn gili ya ŋɔ zaa wuna.

¹⁵Dama Yawɛ ŋun nyɛ yi Naawuni be yi sani ŋɔ nyɛla Naawuni ŋun zabiri nyuli. Yawɛ ŋun nyɛ yi Naawuni ŋɔ suhu ni yiɣisi bahi yi zuɣu, ka o kpihim’ yi birili dunia ŋɔ ni.

¹⁶ “Miriya ka yi zahim Yawɛ ŋun nyɛ yi Naawuni ŋɔ kaman yi ni daa zahim o shɛm Masa la.

¹⁷Di simdi ka yi gbibi Yawɛ ŋun nyɛ yi Naawuni ŋɔ ni zali ya fukumsi zalikpan’ shɛŋa min’ o zaligu shɛŋa din pahi la viɛnyɛliŋga.

¹⁸Di simdi ni yi tumdi din tuhi mini din viɛli Yawɛ sani, ka binshɛɣukam niŋ viɛnyɛliŋga yi sani, ka yi ti chaŋ ti ʒini tiŋgbɔn viɛl’ shɛli ŋun’ Yawɛ ni daa po yi yaannim’ sani ni o ni zaŋ tin ya la ni,

¹⁹ka yi ti kari yi dimnim’ bɛn zaa be di ni kaman Yawɛ ni lɔn ya alikauli shɛm.

²⁰“Ka yi bihi yi ti bɔhi ya saha shɛli, ‘Yawɛ ŋun nyɛ ti Naawuni ŋɔ ni daa zali ya fukumsi zalikpan’ shɛŋa mini zaligu shɛŋa din pahi ŋɔ gbinni lee nyɛla wula?’

²¹Di saha yin’ ti yɛlimiya yi bihi maa, ‘Ti daa nyɛla Firawuna daba be Ijipti, amaa ka Yawɛ daa zaŋ o nuu din mali yaa yihi ti Ijipti maa na.

²²Yawɛ daa wuhi ti shihira ka tum alahiziba tuun’ kara din mali dabiɛm pam jɛndi Ijipti mini Firawuna ni o yiŋnim’ zaa ti ninni.

²³Ka o daa yihi ti nimaani na nti zaŋ o ni daa po pɔri ni o ni zaŋ tiŋgbɔn shɛli ti ti yaannim’ la ti ti.

²⁴Di saha ka Yawɛ daa zali ti ni ti doli zaligunim’ ŋɔ zaa; ka zom’ ŋun’ Yawɛ ŋun nyɛ ti Naawuni ŋɔ ti zaɣ’ viɛlli nyabu zuɣu sahakam din ni chɛ ka ti be kaman di ni nyɛ shɛm pumpɔŋɔ ŋɔ.

²⁵Ka ti yi doli fukumsi zaligunim’ ŋɔ zaa viɛnyɛliŋga kaman Yawɛ ŋun nyɛ ti Naawuni ŋɔ ni zali ti shɛm, dindina ti niŋ din tuhi.’ ”