Read Dagbani Zaligu 8 Bible Online

Zaligu 8 - Dagbani bible

Zaligu 8

¹“N ni zaŋ zalikpan’ shɛŋa zaa tiri ya zuŋɔ dabisili ŋɔ, doliya li viɛnyɛliŋga, dina n-ni chɛ ka yi be ka nabi, ka chaŋ ti ʒini Yawɛ ni daa po pɔri lo alikauli n-zaŋ tiŋgbɔn shɛli ti yi yaannim’ la ni.

²Teemiya Yawɛ ŋun nyɛ yi Naawuni ŋɔ ni daa zaŋ ya doli tiŋgban’ nɛli ni so’ wɔɣinli yuun’ pihinahi ni o chɛ ka yi leei tarimba, ka o zahim ya nya yi ni dol’ o fukumsi zalikpana la bee yi ku dol’ li la yɛla.

³ O daa chɛ ka kum gbahi ya, ka yi siɣisi yimaŋa ka o zaŋ manna dihi ya, din daa nyɛ yi mini yi yaannim’ ni ʒi shɛli ni di chɛ ka yi baŋ ni pa bindirigu kɔŋko n-chɛ ka daadam be, amaa yɛtɔɣili kam din yiri Yawɛ nol’ ni na n-chɛ ka daadam be.

⁴Yuun’ pihinahi ŋɔ zaa puuni, yi niŋgbuna ni situra daa bi chahi, ka yi naba mi daa bi mɔri.

⁵Baŋmiya yi suhuri ni ni nir’ ni saɣisir’ o bidibiga shɛm, lala ka Yawɛ ŋun nyɛ yi Naawuni ŋɔ gba saɣisiri ya.

⁶Dinzuɣu doliya Yawɛ ŋun nyɛ yi Naawuni ŋɔ fukumsi zalikpana maa ka dol’ o soya ka zɔr’ o.

⁷Dama Yawɛ ŋun nyɛ yi Naawuni ŋɔ zaŋ ya mi tahiri tiŋgbɔn viɛlli ni, tiŋgbɔn shɛli din mali kulibɔna din kom zɔri mini kɔbil’ nina ni tiŋgbani puuni kom din puhiri yiri vinvama ni mini daboya ni na;

⁸di nyɛla tiŋgbɔn shɛli din mali alikama mini chi ni wain tihi ni fiig tihi ni pumpɔrinchihi tihi. Di lan nyɛla tiŋgbɔn shɛli din mali olivi tihi mini shikpam.

⁹Di nyɛla tiŋgbɔn shɛli ni yi ni ti yɛn di bindirigu tiɣi, ka binshɛli ku pooi ya. Tiŋgbɔn shɛli din kuɣa nyɛ kuriti, ka yi ni ti gbiri tahiʒiɛɣu di daboya zuɣu.

¹⁰Yi ni ti di n-tiɣi ka paɣi Yawɛ ŋun nyɛ yi Naawuni ŋɔ, o ni zaŋ tiŋgban’ viɛli shɛli tin ya maa zuɣu.”

¹¹“Gbibiya yimaŋa ka di ti tamya Yawɛ ŋun nyɛ yi Naawuni ŋɔ yɛla, ka di zuɣu chɛ ka yi kɔŋ n ni zaŋ o fukumsi zalikpana mini zaligu shɛŋa din pahi tiri ya zuŋɔ dabisili ŋɔ gbibbu.

¹²Yi yi ti di n-tiɣi, ka me yiya viɛla be di ni,

¹³ka yi niɣi mini yi biŋkɔbbaligu nabi, ka yi daazinfa mini yi salima nabi, ka yi binshɛɣukam nabi,

¹⁴di saha yin’ miriya ka yi ti tam Yawɛ ŋun nyɛ yi Naawuni ŋun daa yihi ya Ijipti tiŋgbɔŋ ni dabitim ni na la yɛla.

¹⁵Ŋuna n-daa zaŋ ya tim tiŋgban’ nɛli din galisi ka mali dabiɛm, ka nyɛ tiŋgban’ kuŋ puuni gari wɔɣ’ biɛri mini nɔnsi ni be tiŋgban’ shɛli ni. O daa chɛ ka kom yi chɛribo kuɣa ni na ka yi nyu,

¹⁶ ka zaŋ manna shɛli yi yaannim’ ni daa ʒi n-dihi ya tiŋgban’ nɛli maa ni ni o chɛ ka yi siɣisi yimaŋa ka o zahim ya, ka niŋ ya din viɛla di bahigu ni.

¹⁷Miriya ka yi ti yɛli yi suhuri ni, “Timaŋmaŋ’ yiko mini ti nuhi kpiɔŋ ka ti zaŋ nya azichi ŋɔ.”

¹⁸Amaa teemiya Yawɛ ŋun nyɛ yi Naawuni ŋɔ yɛla, dama ŋuna n-niŋdi ya yiko ka yi nyari buni maa ni di chɛ ka o pal’ o ni daa po pɔri lo yi yaannim’ alikauli shɛl’ la kaman o ni niŋdi shɛm zuŋɔ dabisili ŋɔ.

¹⁹Ka yi yi tam Yawɛ ŋun nyɛ yi Naawuni ŋɔ yɛla, ka doli wun’ shɛŋa n-tumdi bɛ ni bɔri shɛm ka jɛmdi li, nimmoo ka n yɛri ya zuŋɔ dabisili ŋɔ, biɛhiŋ kani, yi ni kpi.

²⁰Kaman Yawɛ ni daa kul chɛ ka zuliya shɛb’ bɛn be yi tooni kpiri shɛm la, lala ka yi gba yɛn kpi, yi ni zaɣisi ni yi ku wum Yawɛ ŋun nyɛ yi Naawuni ŋɔ yɛligu maa zuɣu.