Read Dagbani Zaligu 9 Bible Online

Zaligu 9 - Dagbani bible

Zaligu 9

¹“Yinim’ Izraɛlnima, wummiya, zuŋɔ dabisili ŋɔ ka yi yɛn gbaai Jɔɔdɛn Mɔɣili ŋɔ du n-chaŋ ti deei zuliya shɛb’ bɛn galisi ka mali yaa gari ya fɔntin’ shɛŋa bɛ ni me goma gili hal ka di ti tɔri sagbana.

²Bɛ nyɛla ninvuɣ’ shɛb’ bɛn mali yaa ka wɔɣawɔɣa, ka nyɛ Anaki zuliya bɛn nyɛ yi ni pun mi shɛb’ la. Yi pun wum ka niriba yɛri bɛ yɛla, ‘Ŋuni n-leei ni tooi zani Anakinim’ tooni?’

³Dinzuɣu baŋmiya zuŋɔ dabisili ŋɔ ni Yawɛ ŋun nyɛ yi Naawuni ŋɔ n-nyɛ ŋun yɛn daŋ yi tooni du kaman buɣim din dira. O ni nyaŋ ba ka gbarigi ba tin ya din ni chɛ ka yi kari ba yihi, ka ku ba yomyom kaman Yawɛ ni daa lɔn ya alikauli shɛm.

⁴“Yawɛ ŋun nyɛ yi Naawuni ŋɔ yi ti kari ba yihi tin ya, yin’ di yɛliya yi suhuri ni, ‘Ti wuntitali zuɣu ka Yawɛ zaŋ ti na ni ti ti ʒini tiŋgbɔŋ ŋɔ ni.’ Di nyɛla niriba maa ninvuɣ’ biɛtali zuɣu ka Yawɛ kari ba tin ya maa.

⁵Di pala yi wuntitali bee yi ʒiɛyimtali yi suhuri ni zuɣu ka yi yɛn chaŋ ti ʒini bɛ tiŋgbɔŋ maa ni maa, amaa di nyɛla niriba maa ninvuɣ’ biɛtali zuɣu ka Yawɛ ŋun nyɛ yi Naawuni ŋɔ kariti ba ka chɛri ya maa ni di chɛ ka Yawɛ ni daa po pɔri n-lo yi yaannim’ bɛn nyɛ Ibrahimma mini Yisahaku ni Yaakubu alikauli shɛl’ la niŋ pali.

⁶Dinzuɣu pumpɔŋɔ baŋmiya ni Yawɛ ŋun nyɛ yi Naawuni ŋɔ bi zaŋdi tiŋgbɔn viɛlli ŋɔ tiri ya la yi wuntitali zuɣu, dama yi nyɛla tipawumlinima.

⁷“Di tamiya, teemiya yi ni daa chɛ ka Yawɛ ŋun nyɛ yi Naawuni ŋɔ suhu yiɣisi shɛm tiŋgban’ nɛl’ ni la yɛla. Dahin shɛli yi ni daa yi Ijipti tiŋgbɔŋ ni mali hal ti paai kpe na ŋɔ yi kul nyɛla bɛn zaɣisiri Yawɛ.

⁸Hal yi daa chɛ ka Yawɛ suhu yiɣisi pam, Sinai Zoli gbini, ka o daa je suli n- yɛn kun ya.

⁹ Ka n ni daa du zoli zuɣu ni n ti deei kuɣ’ parilana ayi din nyɛ Yawɛ ni daa lɔn ya alikauli shɛli kuɣ’ parilana la, n daa kpalim be zoli maa zuɣu la wuntaŋ’ ni mini yuŋ biɛɣ’ pihinahi. N daa bi di bindirigu bee n-nyu kom.

¹⁰Ka Yawɛ daa zaŋ o ni daa zaŋ o nubil sabi sabbu shɛli pa kuɣ’ parilana ayi shɛŋa zuɣu la ti ma, ka Yawɛ ni daa yɛli ya yɛtɔɣ’ shɛŋa zaa buɣim sunsuuni zoli la gbini laɣiŋgu dal’ la sabi pa di zuɣu.

¹¹Ka wuntaŋ’ ni mini yuŋ biɛɣ’ pihinahi maa naabu dali daa ti paai ka Yawɛ zaŋ kuɣ’ parilana ayi din daa nyɛ alikauli kuɣ’ parilana maa ti ma.

¹²“Di saha ka Yawɛ daa yɛli ma, ‘Yiɣisima, yim’ kpe siɣi tiŋ’ yomyom, dama a ni daa zaŋ a ninvuɣ’ shɛb’ yi Ijipti na la tum tuumbiɛɣu, bɛ ŋmaligiya yomyom ka chɛ n ni daa zali ba ni bɛ doli so’ shɛli maa; ka doola binnani zali bɛmaŋa.’

¹³“Yawɛ daa lan yɛli ma yaha, ‘N nyaya ka niriba maa nyɛla tipawumlinim’ ni yɛlimaŋli.

¹⁴Chɛli ma ka n ku ba n-kpihim bɛ yuli dunia ni, ka chɛ ka a nam zuliya shɛb’ bɛn mali yaa, ka galisi gari ba.’

¹⁵Lala zuɣu ka n daa ŋmaligi zoli maa zuɣu siɣina, ka buɣim daa diri zoli maa, ka alikauli kuɣ’ parilana ayi la daa be n nuh’ ayi ni.

¹⁶Ka n daa nya ka yi tum alahichi ni yɛlimaŋli Yawɛ ŋun nyɛ yi Naawuni ŋɔ sani. Yi daa ŋmaligiya yomyom ka chɛ Yawɛ ni zali ya ni yi doli so’ shɛli maa, ka doola naɣibil’ kɔtomsi zali yimaŋa.

¹⁷Dinzuɣu ka n daa zaŋ kuɣ’ parilana ayi maa bahi, ka di yi n nuh’ ayi maa ni lu tiŋ’ ŋ-ŋma yi ninni.

¹⁸Di nyaaŋa ka n daa teei dɔni m puli zuɣu Yawɛ tooni wuntaŋ’ ni mini yuŋ biɛɣ’ pihinahi kaman n ni daa pun niŋ shɛm la, n daa bi di bindirigu bee n-nyu kom yi ni daa tum alahichi shɛŋa zaa n-chɛ ka Yawɛ suhu yiɣisi yi tuumbiɛri maa zuɣu la.

¹⁹ Dama n suhu daa zɔhirimi ni Yawɛ suhu ni yiɣisi pam bahi yi zuɣu shɛm maa, o ni kun ya. Amaa ka Yawɛ daa lan wum n suhigu di saha maa gba.

²⁰Yawɛ suhu daa yiɣisi bahi Aduna zuɣu hal ka o ti bɔr’ ni o ku o, amaa ka n daa lan suhi Naawuni Aduna gba zuɣu di saha maa.

²¹Di nyaaŋa ka n daa zaŋ yi ni mali naɣibil’ so ka di nyɛ alahichi bini maa nyo buɣim wurim li, ka baɣisi li zaa hal ka di ti be kaman zim la, ka n daa zaŋ di zim maa bahi kulibɔn shɛli din kom zɔri yiri zoli zuɣu sirigirina la ni.

²² “Ti ni daa be Tabɛra mini Masa ni Kiburɔtihataava la gba, yi daa lan chɛ ka Yawɛ suhu yiɣisimi.

²³ Ka yi ni daa be Kadɛshibarinia, ka Yawɛ tim ya ka yɛli ya, ‘Chamiya ti deei n ni zaŋ tiŋgbɔn shɛli tin ya maa, ka yi daa zaɣisi Yawɛ ŋun nyɛ yi Naawuni ŋɔ zaligu maa, ka bi niŋ o yɛda bee n-deeg’ o yɛligu.

²⁴N ni baŋ ya saha shɛli zaŋ kana zuŋɔ, yi nyɛla bɛn kul zaɣisiri Yawɛ.

²⁵Yawɛ ni daa lo ni o ni kun ya la, n daa teemi dɔni m puli zuɣu Yawɛ tooni wuntaŋ’ ni mini yuŋ biɛɣ’ pihinahi

²⁶n-suhi Yawɛ yɛli, ‘N Duuma Yawɛ, di ku a niriba bɛn nyɛ a dahalali ninvuɣ’ shɛb’ a ni daa fa m-bahi a yiko ni, ka zaŋ a nuu din mali kpiɔŋ yihi ba Ijipti maa na.

²⁷Teem’ a daba bɛn nyɛ Ibrahimma mini Yisahaku ni Yaakubu yɛla, ka di doli niriba ŋɔ tipawumli bee bɛ ninvuɣ’ biɛtali bee bɛ daalahichi ŋɔ,

²⁸di yi pa lala a ni daa yihi ti tiŋgbɔn shɛli ni na maa nim’ ni yɛli, ‘Yawɛ ni kɔŋ ba zaŋ tahi o ni daa lo ba alikauli ni o ni zaŋ ba tahi tiŋgbɔn shɛli ni la zuɣu min’ o ni je ba zuɣu ka o yihi ba tahi tiŋgban’ nɛl’ ni ni o ti chɛ ka bɛ kpi.

²⁹Dama bɛ nyɛla a dahalali niriba, ka nyɛ a ni daa teeg’ a bɔɣu ni yiko din galisi yihi shɛb’ na.’ ”