Read Dagbani Jɔn 11 Bible Online

Jɔn 11 - Dagbani bible

Jɔn 11

¹ Bɛtani do’ so ŋun yuli daa booni Lazarɔs daa ti biɛra. O min’ o tizɔpaɣiba Mariama mini Maata zaa ya n-daa bala.

² Lazarɔs tizɔpaɣ’ Mariama maa n-nyɛ ŋun daa zaŋ tulaale ʒe ti Duuma Yisa ka zaŋ o zabiri nyɛh’ o naba la.

³Ka o tizɔpaɣiba maa daa tim ti yɛli Yisa, “Ti Duuma, a ni yuri so pam la biɛra.”

⁴Ka Yisa daa wum lala ka yɛli, “O dɔro maa pala kum dɔro, amaa di nyɛla din ni chɛ ka Naawuni nya jilima, ka Naawuni Bia gba nya jilima di zuɣu.”

⁵Hal Yisa ni daa yuri Lazarɔs mini Maata ni Mariama pam la zaa yoli,

⁶o ni daa wum Lazarɔs bariŋ maa yɛla o daa kpalim o ni daa be luɣ’ shɛli maa n-niŋla biɛr’ ayi pahi;

⁷ka daa ti yɛl’ o nyaandoliba, “Chɛliya ka ti lab’ Judia.”

⁸Ka o nyaandoliba maa yɛl’ o, “Karimba, mami daba ayi ŋɔ ni ka Yɛhudianim’ daa bɔri ni bɛ lab’ a kuɣa la, ka a ti lan yɛn lab’ nimaani yaha?”

⁹Ka Yisa garigi bɔhi ba, “Wuntaŋ’ puhibu saha zaŋ ti paag’ o lua saha pala awa pinaayi? Dinzuɣu ŋunkam chani wuntaŋ’ ni bi tuura, ka di nyɛla o ni nyari dunia ŋɔ neesim la zuɣu.

¹⁰Amaa ŋunkam chani yuŋ tuurimi, ka di nyɛla neesim ni kani zuɣu.”

¹¹O ni daa yɛl’ lala naai ka o ŋmaligi yɛl’ o nyaandoliba maa, “Ti zo Lazarɔs gbihirimi, amaa n chanimi ni n ti neeg’ o o gom maa ni.”

¹²Ka o nyaandoliba maa yɛl’ o, “Ti Duuma, o yi gbihirimi dindina o ni nya alaafee.”

¹³Amaa Yisa daa tɔɣisirila Lazarɔs kum yɛla, ka o nyaandoliba maa bɛn’ tɛhi ni o tɔɣisirila o daalaafee gom yɛla.

¹⁴Di saha ka o naanyi kahigi yɛli ba, “Lazarɔs kpimi;

¹⁵amaa yi zuɣu di niŋ ma nyaɣisim n ni daa ka nimaani maa zuɣu, dama dina n-ni chɛ ka yi niŋ yɛda.” Ka yɛli ba, “Chɛliya ka ti chaŋ o sani.”

¹⁶Di saha ka Tomas ŋun daa nyɛ jaa la yɛl’ o nyaandolitab’ maa, “Dindina chɛliya ka ti zaa dol’ o chaŋ ka ti min’ o ti laɣim kpi.”

¹⁷Yisa ni daa ti paai Bɛtani dahin’ shɛli ka o wum ni bɛ ni sɔɣi Lazarɔs daba anahi dali m-bala.

¹⁸Bɛtani mini Jɛrusalɛm bi wɔɣa ni taba; di nyɛla kaman mail’ ayi laasabu,

¹⁹ka Yɛhudianim’ pam daa ka Maata mini Mariama sanna ni bɛ ti maai bɛ suhuri bɛ tizɔdoo Lazarɔs kum maa zuɣu.

²⁰Maata ni daa ti wum ni Yisa be soli kanna o daa yiɣisimi ti tuh’ o soli, ka Mariama ŋun’ daa kpalim be yiŋa.

²¹Ka Maata daa paai Yisa sani ti yɛl’ o, “N Duuma, a yi di daa be ya ŋɔ, n tizɔdoo ŋɔ daa naan ku kpi;

²²amaa m mi ni hal a yi suhi shɛlikam Naawuni sani pumpɔŋɔ, o ni ti a li.”

²³Ka Yisa yɛl’ o, “A tizɔdoo maa ni neei kum ni yaha.”

²⁴Ka Maata yɛl’ o, “M mi ni o ni ti neei kum ni zaadali.”

²⁵Ka Yisa yɛl’ o, “Mani n-nyɛ nyɛvili, mani n-lan su kum ni neebu yiko; ka ŋunkam niŋ ma yɛda, hal o yi kpi gba, o ni lan neei yaha.

²⁶Ka ŋunkam mi ne ka niŋ ma yɛda ku lan kpi hal abada.” Ka bɔhi Maata, “A niŋ dimbɔŋɔ yɛda?”

²⁷Ka Maata saɣi, “Iin n Duuma, n niŋ yɛda ni nyini n-nyɛ Masia, Naawuni Bi’ so bɛ ni daa yɛli ni o ni ti ka dunia ŋɔ ni na la.”

²⁸Maata ni daa yɛl’ lala maa ka ŋmaligi chaŋ o tizo Mariama sani nti sɔɣi yɛl’ o, “Karimba kana, ka boon’ a.”

²⁹O ni daa wum lala maa ka o dii yiɣisi chaŋ Yisa sani.

³⁰Yisa daa na bi paai Bɛtani tiŋ’ puuni; o daa na kul bela Maata ni tuh’ o soli luɣ’ shɛli maa.

³¹Yɛhudianim’ bɛn daa be Mariama sani m-maar’ o suhu la ni daa nya ka o yiɣisi yomyom yiri maa ka bɛ gba yiɣisi dol’ o, dama bɛ daa tɛhiya ni o chanila gballi maa gbini ni o ti kum.

³²Ka Mariama daa ti paai Yisa sani n-gban’ o tooni yɛl’ o, “N Duuma, a yi di daa be ya ŋɔ, n tizɔdoo ŋɔ daa naan ku kpi.”

³³Yisa ni daa nya ka Mariama kumda, ka Yɛhudianim’ bɛn dol’ o na maa gba kumdi maa, ka o suhu saɣim pam, ka o siɣim

³⁴ka bɔhi ba, “Ya polo ka yi lee sɔɣ’ o?” Ka bɛ yɛl’ o, “Ti Duuma, kamina ti nya ti ni sɔɣ’ o luɣ’ shɛli.”

³⁵Di saha ka Yisa gba dii gbaai kumsi.

³⁶Ka Yɛhudianim’ maa yɛli, “Nyamiya o ni yuri Lazarɔs shɛm!”

³⁷Ka bɛ ni shɛb’ mi bɔhi, “Doo ŋun daa neei zom’ nina ŋɔ daa naan ku faai Lazarɔs gba bahi ka o ku kpi?”

³⁸Ka Yisa daa chaŋ gballi maa gbini, ka o suhu ti lan saɣim pam. Gballi maa daa nyɛla siliga, ka kuɣili yo di noli.

³⁹Ka Yisa yɛli ba, “Biligimiya kuɣili maa bahi!” Ka Maata ŋun tizɔdoo daa kpi maa yɛl’ o, “N Duuma, ŋ-ŋɔ o pooya, dama o ni kpi maa daba anahi m-bɔŋɔ.”

⁴⁰Ka Yisa bɔh’ o, “N di pun bi yɛl’ a ni a yi niŋ yɛda a ni nya Naawuni yiko ni nyɛ shɛm?”

⁴¹Ka bɛ daa biligi kuɣili maa bahi. Ka Yisa duh’ o zuɣu zuɣusaa ka yɛli, “M Ba, m paɣir’ a a ni deeri n suhigu zuɣu,

⁴²ka m mi ni a kul deeri n suhigu sahakam; amaa niriba bɛn ʒe kpe ŋɔ zuɣu ka n suhir’ a maa ni di chɛ ka bɛ niŋ yɛda ni nyini n-shiri tim ma na.”

⁴³O ni daa yɛl’ lala naai ka o kuhi pam yɛli, “Lazarɔs, yimina!”

⁴⁴Ka Lazarɔs ŋun daa kpi maa shiri yina. Ka kahiŋga pɔb’ o n-lo o nuhi min’ o naba, ka bantabiga vil’ o zuɣu tabil’ o ninni. Ka Yisa yɛli ba, “Yihimiya kahiŋga maa, ka viligi bantabiga maa, ka chɛ ka o chaŋ.”

⁴⁵Di saha ka Yɛhudianim’ pam bɛn mini Mariama daa doli kana la daa nya Yisa ni tum shɛm maa, ka niŋ o yɛda.

⁴⁶Amaa ka bɛ ni shɛb’ daa chaŋ Farisiinim’ sani ti yɛli ba Yisa ni tum shɛm maa.

⁴⁷Di zuɣu ka maligumaaniba kpamba mini Farisiinim’ daa laɣim jintɔriba na ti bɔhi ba, “Wula ka ti lee yɛn niŋ? Dama doo ŋɔ wuhiri shihira pam.

⁴⁸Ti yi chɛ ka o niŋdi lala, sokam zaa ni niŋ o yɛda, ka Romnim’ kana ti saɣim ti Naawuni jɛmbu shee, ka bahi ti zuliya ŋɔ zaa yoli.”

⁴⁹Amaa ka jintɔriba maa ni yino ŋun yuli daa booni Kaiafas, ka o nyɛ maligumaaniba zuɣulana di yuuni maa la yɛli ba, “Yi ʒi shɛli!

⁵⁰Yi bi mi ni di nyɛla talahi ni ninvuɣ’ yino kpi sokam zaa zuɣu ka ti zuliya ŋɔ zaa ti ku bahi yoli?”

⁵¹Pa omaŋmaŋ’ yubu ni ka o daa yɛl’ lala maa, amaa o ni daa nyɛ maligumaaniba zuɣulana di yuuni maa zuɣu ka o daa tɔɣisi anabitali yɛtɔɣa n-wuhi ni Yisa ni ti kpi bɛ zuliya maa zuɣu;

⁵²hal ka di pala bɛ zuliya maa kɔŋko zuɣu, amaa ni o laɣim Naawuni bihi bɛn wurim kpe yɔɣu na la gba ka bɛ ti lee zaɣ’ yini.

⁵³Dindali maa zaŋ chana, ka bɛ daa to jina bɔri so’ shɛli bɛ yɛn doli ku o.

⁵⁴Dinzuɣu ka Yisa daa bi lan saɣi yiri palo gɔri Yɛhudianim’ maa ni, amaa ka daa yi nimaani chaŋla luɣ’ shɛli din miri yɔɣu ni tin’ shɛli din yuli booni Ifriim la, ka o min’ o nyaandoliba ti be nimaani.

⁵⁵Ka Yɛhudianim’ Yaɣigari Chuɣu puhibu daa ti miri, ka niriba pam yi tiŋkpansi n-daŋ chaŋ Jɛrusalɛm ni bɛ ti doli bɛ kali soli m-mali bɛmaŋa ka Yaɣigari Chuɣu maa dali na bi paai.

⁵⁶Bɛ ni daa ti ʒe Naawuni jɛmbu duu puuni saha shɛli, ka bɛ daa lihiri bɔri Yisa ka bɔhiri taba, “Yi lee zahimla wula? O ni ka Chuɣu ŋɔ ni na bee o ku kana?”

⁵⁷Maligumaaniba kpamba mini Farisiinim’ daa pun bahi noli ni so yi mi Yisa ni be shɛli, ŋun’ nyihim’ ba ka bɛ chaŋ ti gbaag’ o.