Read Dagbani Jɔn 13 Bible Online

Jɔn 13 - Dagbani bible

Jɔn 13

¹Yaɣigari Chuɣu daa ti miri puhibu, ka Yisa baŋ ni o saha paaya ni o chɛ dunia ŋɔ ka lab’ o Ba sani. Amaa o ni daa pun yur’ omaŋmaŋ’ ninvuɣ’ shɛb’ bɛn be dunia ŋɔ ni la, o daa kul yuri ba la lala hal ti yi dunia ŋɔ ni.

²Sintani daa pun niŋ tɛha niŋ Judas ŋun daa nyɛ Saimɔn Isikariɔt bia la suhu ni ni o yi Yisa nyaaŋa. Yisa min’ o nyaandoliba ni daa ti laɣim diri yuŋ bindirigu saha shɛli

³ka o baŋ ni o Ba pun zaŋ binshɛɣukam zaa niŋ o nuu ni, ka lan mi ni o daa yila Naawuni sanna ka ni lan lab’ o sani.

⁴Di saha ka o daa yiɣisi bindirigu maa dibu shee m-pirig’ o kparibu sɔŋ, ka zaŋ bɔdua mil’ o shee ni,

⁵ka booi kom niŋ tahili ni n-gbaag’ o nyaandoliba maa naba paɣibu, ka mali bɔdu’ shɛli din mil’ o shee ni maa nyɛhiri bɛ naba maa.

⁶Ka o daa ti paai Saimɔn Pita sani, ka Pita bɔh’ o, “N Duuma, a yɛn paɣila n naba?”

⁷Ka Yisa garigi yɛl’ o, “A ku tooi baŋ n ni niŋdi ya shɛli ŋɔ gbinni pumpɔŋɔ, amaa saha shɛli ka a ni ti baŋ di gbinni.”

⁸Ka Pita yɛl’ o, “A kul ku paɣi n naba hal abada.” Ka Yisa yɛl’ o, “N yi bi paɣi a naba maa, shɛl’ lan ka m min’ a sunsuuni.”

⁹Ka Saimɔn Pita yɛl’ o, “N Duuma, dindina pa n naba kɔŋko, amaa paɣimi n naba zaŋ tabili n nuhi ni n zuɣu zaa.”

¹⁰Ka Yisa yɛl’ o, “Ŋun pun su kom bi lan bɔr’ o luɣ’ shɛli polo paɣibu n-naɣ’ pahila o naba, dama o ni zaa pun viɛlimi.” Ka yɛli ba, “Yi zaa ha viɛla, kul gbaai yihila yi ni yino.”

¹¹Yisa daa pun mi ŋun ti yɛn yi o nyaaŋa, dinzuɣu ka o daa yɛli ni bɛ zaa ha viɛla, kul gbaai yihila bɛ ni yino maa.

¹² O ni daa paɣi bɛ naba maa naai, ka o zaŋ o kparibu ye n-lab’ ti ʒini ka bɔhi ba, “Yi baŋ n ni niŋ ya shɛm ŋɔ gbinni?

¹³Yi booni ma la yi karimba ni yi Duuma; yɛlimaŋli mi n-shiri nyɛ li, dama lala n-nyɛ ma.

¹⁴Ka n yi nyɛ yi Duuma ni yi karimba ka paɣi yi naba, dindina di simdi ni yi gba paɣiri tab’ naba lala;

¹⁵dama n niŋ li mi ni yi nya ka mi niŋdi taba kaman n ni niŋ ya shɛm maa.

¹⁶ Achiikatim, yɛlimaŋli ka n yɛri ya, dabili bi gar’ o duuma; tumo mi bi gari ŋun tim o.

¹⁷Yi yi baŋ dimbɔŋɔnima ka dol’ li, yi ni nya alibarika.

¹⁸ “Pa yi zaa yɛla ka n yɛri maa, dama m mi n ni pun pii shɛba; amaa di kpala talahi ni Naawuni Kundi ni yɛli shɛm la niŋ pali. Dina n-nyɛ: ‘N ni dihiri so gbi ma zamba bɔɣili.’

¹⁹N yɛri ya la dimbɔŋɔ pumpɔŋɔ ka di na bi niŋ, amaa ni di ti niŋ ka yi niŋ yɛda ni mani n-shiri nyɛ n ni yɛli ya ni n nyɛ so la.

²⁰ Achiikatim, yɛlimaŋli ka n yɛri ya, ŋunkam deei n tumo deela mani, ka ŋunkam mi deei ma deela ŋun tim ma na.”

²¹Yisa ni daa yɛl’ lala maa ka o suhu saɣim pam ka o yɛli, “Achiikatim, yɛlimaŋli ka n yɛri ya, Yi ni yino ni yi n nyaaŋa.”

²²Di saha ka o nyaandoliba maa ŋmaligi yuuni taba, ka bi baŋ o ni yɛri bɛ ni so maa ni nyɛ so.

²³Yisa min’ o ni daa yur’ o nyaandol’ so la n-daa ʒi n-tab’ taba,

²⁴ka Saimɔn Pita daa buɣisi yɛl’ o ni o wuhim’ ba Yisa ni yɛri bɛ ni so maa ni nyɛ so.

²⁵Ka ŋun daa ʒi n-tab’ Yisa maa bɔh’ o, “N Duuma, ŋuni ka a lee yɛri maa?”

²⁶Ka Yisa yɛl’ o, “N yi ti ŋmaai bɔrɔbɔro suɣ’ ʒiɛri n-zaŋ ti so, ŋuna m-bala.” Ka daa ŋmaai bɔrɔbɔro suɣ’ ʒiɛri n-zaŋ ti Judas ŋun daa nyɛ Saimɔn Isikariɔt bia la.

²⁷Judas ni daa deei bɔrɔbɔro maa nyaaŋa, ka Sintani kpe ŋun’ Judas suhu ni. Ka Yisa yɛl’ o, “Niŋmi a ni yɛn niŋ shɛli maa yomyom.”

²⁸Bɛn daa ʒi bindirigu maa dibu shee maa ni so daa bi baŋ din chɛ ka o yɛli Judas lala maa.

²⁹Bɛ ni shɛb’ daa tɛhimi ni Judas ni gbib’ bɛ liɣiri kolibil’ la zuɣu ka Yisa yɛl’ o ni o cham’ ti da bɛ ni bɔri binshɛŋa ni bɛ zaŋ puhi chuɣu maa na bee ni o pii liɣiri maa shɛli ti ti nandaamba.

³⁰Judas ni daa deei bɔrɔbɔro maa naai, o dii yiɣisimi yi; di daa nyɛla yuŋ.

³¹Judas ni daa yiɣisi yi n-naai, ka Yisa yɛli, “Pumpɔŋɔ ka Daadam Bia jilima yipa yi palo, ka Naawuni gba jilima yi palo o zuɣu;

³²ka Naawuni jilima yi yi palo Daadam Bia zuɣu, dindina Naawuni ni chɛ ka Daadam Bia gba jilima yi palo ŋun’ Naawuni maŋmaŋ’ zuɣu; ka di mi ku yuui ka o chɛ ka o nya jilima maa.”

³³ Ka yɛli ba, “M bihi, n ku lan yuui yi sani. Yi ni ti bo ma kɔŋ; n ni daa yɛli Yɛhudianim’ shɛm la, lala ka n yɛri yi gba maa, n ni chani luɣ’ shɛli maa yi ku tooi ka nimaani na.

³⁴ Amaa zaligu palli ka n zaani ya ŋɔ; dina n-nyɛ, ‘Yumiya taba! N ni yuri ya shɛm, yi gba yumiya tab’ lala.

³⁵Yi yi yuri taba, dina n-ni chɛ ka sokam baŋ ni yi nyɛla n nyaandoliba.’ ”

³⁶Ka Saimɔn Pita daa bɔhi Yisa, “N Duuma, ya ka a chana?” Ka o garigi n-yɛl’ o, “N ni chani luɣ’ shɛli maa, a ku tooi doli ma pumpɔŋɔ; amaa a ni ti doli ma saha shɛli.”

³⁷Ka Pita lan bɔh’ o, “N Duuma, bɔ n-niŋ ka n ku tooi dol’ a pumpɔŋɔ? Hal n ni saɣi kpi a zuɣu.”

³⁸Ka Yisa bɔh’ o, “A shiri ni saɣi kpi n zuɣu? Achiikatim, yɛlimaŋli ka n yɛr’ a, a ni ti chihi paai siɣimsiɣim buta ni a bi mi ma ka nolɔɣu na bi kum.”