Read Dagbani Jɔn 15 Bible Online

Jɔn 15 - Dagbani bible

Jɔn 15

¹Yisa daa yɛliya, “Mani n-nyɛ wain ti’ maŋli la, ka m Ba mi nyɛ di gula.

²Wulli kam din tuɣ’ ma ka bi wandi wala, o ŋmari li mi bahi, amaa wulli kam din tuɣ’ ma ka wandi wala, o wahirila di wulli maa nyoya ni bahiri ni di maan wali pam pahi.

³Yɛl’ shɛŋa n ni pun wuhi ya la n-chɛ ka yinim’ mali zaa ka ka daɣiri ŋɔ.

⁴Benya n ni, ka n gba be yi ni. Tiwulli ku tooi wali wala dimaŋmaŋ’ yiko ni ka pa ni di tuɣila tia; yi gba ku tooi wali wala, shee yi tuɣila mani.

⁵“Mani n-nyɛ tia maa, ka yi mi nyɛ di wula; ŋun kul tuɣ’ ma ka n gba tuɣ’ o, ŋuna n-wandi wala pam; dama yi yi bi tuɣ’ ma, yi ku tooi niŋ shɛli.

⁶Nir’ yi bi tuɣ’ ma, o ŋmanila wul’ shɛli bɛ ni wooi bahi ka di kuui, ka bɛ laɣisi di dari niŋ buɣim ni ka di di li.

⁷Yi yi tuɣi ma ka n yɛligu be yi suhuri ni, ka yi suhi yi ni bɔri shɛlikam zaa, yi ni nya li.

⁸Yi yi wali wala viɛnyɛliŋga, dina n-ni chɛ ka m Ba nya jilima pam, di mi n-ni lan wuhi ni yi nyɛla n nyaandoliba.

⁹M Ba ni yuri ma shɛm, lala ka n gba yuri ya. Benya n yurilim ni.

¹⁰Yi yi doli n zaligu, yi ni be n yurilim maa ni kaman n gba ni doli m Ba zaligu ka be o yurilim ni shɛm.

¹¹“N yɛli ya la dimbɔŋɔnima ni di chɛ ka n suhupiɛlli be yi ni, ka yi suhupiɛlli maa yaɣi.

¹² N zaligu maa m-bɔŋɔ: ‘Yumiya taba kaman n ni yuri ya shɛm.’

¹³Nir’ yi zaŋ o nyɛvili taɣ’ o zɔnim’ dini, yurilim shɛl’ lan kani gari li.

¹⁴Yi yi doli n zaligu, yi nyɛla n zɔnima.

¹⁵Zuŋɔ zaŋ chana, n ku lan boli ya n daba, dama dabili bi mi o duuma daashili; amaa n ni boli ya la n zɔnima, dama n ni wum shɛlikam zaa m Ba sani, n zaŋ li wuhi ya.

¹⁶Pa yinima m-pii ma, amaa mani m-pii ya, ka zali ya ni yi chaŋ ti pum puma n-wali ka yi wala maa ku kpihim; ka yi yi ti zaŋ n yuli suhi binshɛɣukam m Ba sani, o ni tin ya li.

¹⁷Dimbɔŋɔ n-nyɛ zaligu shɛli n ni zali ya, ‘Yumiya taba!’ ”

¹⁸“Dunianim’ yi jɛn ya, yin’ baŋmiya ni mani ka bɛ pun daŋ zaɣisi ka naanyi ti jɛn ya maa.

¹⁹Yi yi di nyɛla dunia ŋɔ ni su ninvuɣ’ shɛba, dunianim’ naan yuri ya, amaa yi pala dunia ni su shɛba, dama mani m-pii ya, dinzuɣu ka dunia ŋɔ nim’ jɛn ya maa.

²⁰ Teemiya n ni daa yɛli ya shɛm la, ‘Ye dabili bi gar’ o duuma.’ Bɛ yi daa niŋ ma wahala, lala ka bɛ ni niŋ yi gba wahala; bɛ mi yi daa deei n noli, bɛ ni deei yi gba dini.

²¹Amaa bɛ ni niŋ ya dimbɔŋɔnim’ zaa n zuɣu, dama bɛ bi mi ŋun tim ma na.

²²N yi di daa bi kana ti wuhi ba, bɛ naan ku mali taali, amaa pumpɔŋɔ bɛ ku tooi lan chihi yi bɛ taali maa ni.

²³Ŋunkam je ma, o je m Ba gba.

²⁴N yi di daa bi tum daadam ni na ʒi n-tum tuun’ shɛli bɛ sani, bɛ naan ku mali taali; amaa pumpɔŋɔ bɛ nya n ni tum shɛlikam maa, ka yaɣ’ di zuɣu zaɣisi m mini m Ba zaa.

²⁵ Dimbɔŋɔ mi niŋmi ni di chɛ ka di ni sab’ shɛm bɛ zaligu ni ni bɛ kul je ma la yol’ la niŋ pali.

²⁶“Amaa Sɔŋda so n ni yɛn tim ka o yi m Ba sani n-ka yi sanna la nyɛla yɛlimaŋli ni be so ni. O yi ti kana, o ni leei n shɛhiralana.

²⁷Yi gba nyɛla n shɛhiranima, yi ni pun be n sani piligu ni hal ni pɔŋɔ la zuɣu.”