Read Dagbani Jɔn 17 Bible Online

Jɔn 17 - Dagbani bible

Jɔn 17

¹Yisa ni daa tɔɣisi yɛtɔɣa ŋɔ naai, o daa kpuɣila o zuɣu lihi zuɣusaa ka gbaai Naawuni suhibu yɛra, “M Ba, saha yipa paaya ni a chɛ ka a Bia nya jilima, ka a Bia maa gba chɛ ka a nya jilima.

²Dama nyini n-ti o yiko ni o su daadam kam fukumsi, ka niŋ o yiko ni o ti ninvuɣ’ shɛb’ zaa a ni zaŋ ti o nyɛvili din ka bahigu.

³Nyɛvili din ka bahigu maa nyɛla ni ninsalinim’ baŋ nyin’ ŋun nyɛ Naawuni maŋli ŋɔ, ka baŋ man’ Yisa Masia so a ni timna la.

⁴N chɛ ka a nya jilima dunia ŋɔ ni, ka tum tuun’ shɛlikam a ni daa ti ma ni n tum la naai.

⁵M Ba, pumpɔŋɔ chɛ ka n nya jilima a sani, jilima shɛli n ni daa pun mal’ a sani ka dunia na bi nam la.

⁶“N kahig’ a yuli wuhi ninvuɣ’ shɛb’ a ni zaŋ ti ma dunia ŋɔ ni la; nyini n-su ba ka daa zaŋ ba ti ma, ka bɛ mi deeg’ a yɛligu.

⁷Pumpɔŋɔ bɛ baŋya ni binshɛɣukam a ni zaŋ ti ma la yila a sanna;

⁸dama n zaŋ yɛtɔɣ’ shɛŋa a ni daa tɔɣisi ma la tɔɣisi ba, ka bɛ dee’ li ka baŋ ni n shiri yila a sanna, ka niŋ yɛda ni nyini n-shiri tim ma na.

⁹“Bɛna ka n suhir’ a tira; m bi suhir’ a tirila dunianima. A ni zaŋ ninvuɣ’ shɛb’ ti ma maa ka n suhir’ a tira, dama bɛ nyɛla a niriba.

¹⁰N ni su ninvuɣ’ shɛb’ zaa nyɛla a niriba, a mi ni su ninvuɣ’ shɛb’ zaa nyɛla n niriba, ka n nyari jilima bɛ sani.

¹¹M bi lan yɛn be dunia ŋɔ ni pumpɔŋɔ, dama n labirila a sanna, amaa bɛn’ kul ni beni. M Ba Suŋ, gbib’ ba a yuli din nyɛ yu’ shɛli a ni daa wuhi ma la zuɣu, ka di chɛ ka bɛ leei zaɣ’ yini kaman m min’ a ni nyɛ zaɣ’ yini shɛm.

¹² N ni yi be bɛ sani maa, n yi gbib’ ba la a yuli din nyɛ yu’ shɛli a ni daa wuhi ma la zuɣu. N kul gbib’ ba viɛnyɛliŋga hal ka bɛ ni yino bi bɔrigi naɣila bahi yoli bia la ni di chɛ ka nyin’ Naawuni yɛligu niŋ pali.

¹³N labirila a sanna pumpɔŋɔ, dinzuɣu ka n tɔɣisiri yɛtɔɣa ŋɔ n ni na be dunia ŋɔ ni ŋɔ, ni n suhupiɛlli pali bɛ suhuri ni yɛlimaŋli.

¹⁴N zaŋ a yɛligu ti ba, ka dunianim’ zaɣisi ba, bɛ ni lan pa dunia ŋɔ nima kaman n ni pa dunia ŋɔ nir’ shɛm la zuɣu.

¹⁵M bi suhir’ a ni a yihi ba dunia ŋɔ ni, amaa n suhir’ a mi ni a gbib’ ba ka Sintani ku paai ba.

¹⁶Bɛ pala dunia ŋɔ nima kaman n ni pa dunia ŋɔ nir’ shɛm.

¹⁷A yɛligu nyɛla yɛlimaŋli, dinzuɣu zaŋm’ a yɛlimaŋli maa m-mali ba ka bɛ be kasi.

¹⁸A ni daa tim ma dunia ŋɔ ni na shɛm, lala ka n gba tim ba.

¹⁹Bɛ zuɣu ka m mali mmaŋa m-be kasi ni di chɛ ka bɛ gba mali bɛmaŋa m-be kasi a yɛlimaŋli maa puuni.

²⁰“M bi suhir’ a tirila bɛmbɔŋɔ kɔŋko, amaa n suhir’ a tiri bɛn gba na yɛn niŋ ma yɛda bɛmbɔŋɔ yɛligu wumbu ni la

²¹ni bɛ zaa leei zaɣ’ yini kaman nyini m Ba ni be n ni ka n gba be a ni shɛm la, ka di chɛ ka bɛ gba be ti ni, ka dunianim’ niŋ yɛda ni nyini n-shiri tim ma na.

²²N zaŋ jilima shɛli a ni daa zaŋ ti ma la ti ba ni di chɛ ka bɛ leei zaɣ’ yini kaman m min’ a ni nyɛ zaɣ’ yini shɛm la.

²³Ka n yi be bɛ ni ka a mi be n ni, dina n-ni chɛ ka bɛ leei zaɣ’ yini ni yɛlimaŋli, ka dunianim’ baŋ ni nyini n-shiri tim ma na, ka lan baŋ ni a yuri bɛn niŋ ma yɛda maa kaman a ni yuri ma shɛm.

²⁴“M Ba, m bɔri ni a chɛ ka a ni daa zaŋ ninvuɣ’ shɛba ti ma la ti be n sani n ni ti yɛn be luɣ’ shɛl’ la n-nya jilima shɛli a ni daa zaŋ ti ma ka di nyɛla a ni daa pun yuri ma ka dunia na bi nam la zuɣu.

²⁵M Ba ŋun nyɛ wuntialan’ ŋɔ, dunianim’ bi mi a, amaa man’ mi a, ka bɛmbɔŋɔ gba mi ni nyini n-shiri tim ma na.

²⁶M pun kahig’ a yuli wuhi ba, ka ni lan kahigi li wuhi ba pahi, ka di chɛ ka yurilim shɛli a ni yuri ma la be bɛ ni, ka n gba be bɛ ni.”